المشاركة الأصلية كتبت بواسطة احب ترابك يانجد
هلابك اخواني من ناحية المستورد فيه من يجيب النظيف واللي عليه الكلام(اتكلم عن الفورد) لكن يفرق عن غيره بنفس الموديل ب10 الاف وفيها اكيد بتقول انا خبل ادفع 10 الاف زياده مع انه نفس الموديل بهالزياده اخذ موديل اعلى لكن كيف تعرف انها السياره سليمه من الصدوم والحوادث نبداء خطوه خطوه
1- ابعد التنجيد الجانبي الموجود بالشنطه وشوف اثر اللحام الموجود بالبودي اذا كان لونه نفس لون البويه او وجود استكر على البودي من الداخل يعني خالي من الصدوم بأذن الله افتح الكبوت وشيل الغطاء البلاستيك الموجود فوق الرديتور وشوف جوانب الجسر الامامي الموجود ورا الشبك واثر اللحام فيه اذا كان مثل الخلف باللون وثقل اللحام هذا اوكي
2- افتح فرش الشنطه وتأكد مافيه اثار املاح او صداء (تعني غرقانه)
3- السيارات اللي تجي مرشوشه كامل من تحت عن الصداء بسيطه ارفعها وخذلك مفتاح وحك البويه اذا تحس ان البويه سميكه مره خذ اليقين التام بأن الصداء لعب فيها اما اذا كانت الرشه خفيفه اما مرشوشه برا او من وكالتها
4- البويه كيف اعرف ان السياره مرشوشه كامل او بها سمكره روح من ورا السياره من الجنب وشوف اذا كان البودي مسطره مافيه تعرجات اوكي ماجاه صدوم والجنب الثاني مثل افتح غطاء البنزين وشوف بويه الغطاء وافتح باب السيارة وشوف ركن الغماره وافتح الكبوت وشوف من لون البويه من ورا المكينه اذا كان متشابه مافيه لا فاتح ولاغامق السياره اوكي هاذي نقطه النقطه الثانيه حط اصبعك على الزيق الموجود بالكبوت امسح على نفس الكبوت من الداخل من بين القزازه الاماميه وفتحات تهويه المكيف اذا حصلت خشونه جايته رشه او امسح بأصبعك نهاية الرفرف الامامي من الداخل اذا حصلته خشن برضو مرشوش واذا ملمسه عادي ان شاء الله انه تمام
5-روح عند الكفر الامامي من جهة الراكب وشوف ارتفاع السيارة حط اصابعك بين الكفر والرفرف وروح الجهه الثانيه وجرب اذا كلها نفس الارتفاع الموتر اوكي اذا جهه مايله وجهه تمام الموتر يدخل في شكوك بهالحاله
6-عاده السيارات النظيفه تحصل احد اصطبات الركن مكسور عشان رسوم الجمارك تكون اقل اذا كان فيه اصطب مكسور او تحس انه متغير(تجاري) بأذن الله يكون نظيف اذا مايوجد احد الملاحضات السابقه اما اذا كانت كلها تجااااري انحش
7- روح لرقم الشاص يجيك حرف P بعده اما رقم 71 او 72 او 73 او 74 اذا كان 71 هذا سياره شرطه او ليموزين اذاكان 72 يكون بالغالب استاندر وال73 يكون نص فل و74 هذا فل كامل
8- افتح الكبوت بتحصل استكرات صغيره موجود بالرفارف على جنب وتحصل نفسها بالابواب وباب الشنطه وداخل الشنطه من الجوانب اذا كانت هاذي موجود ريح راسك الموتر ماجاه صدوم يعني لاعاد تكشف عليه من ناحيه البودي ابد وحجم الاستكرات صغيره عرضها عرض اصبعين تقريبا وطولها طول الاصبع السبابه
9-اذا تبي تتاكد من الموتر ماهو مقصوص بأغلب السيارات المصدومه والمعاد ترميمها حطها بأي حفره وخذ لك قطعه حديده حاده وامشي على بطن الشاص من اوله الى اخره اذا حصلت لحام جاي بعرض الشاص من الجهتين جهه الشاص من يمين والجهه الثانيه من يسار غير لحام الكمرات خذ اليقين التام بأن الشاص مقصوص او معدل فيه
واللي مايبي يعور راسه يطلب تقرير ويريح راسه بس هذا للي يبي يستكشف بنفسه ويشوف
وهذا اللي يحضرني واسف ع الاطاله وان جاء اكثر ابشرو بعزكم ودعواتكم لي وللجميع وبالتوفيق............
قناة السيارات
رد مع اقتباس