قناة السيارات
يمديكم على العنوان تحسه عنوان كتاب فيزياء >>> أقول لايكثر
اخباركم شباب كيفكم والاختبارات واللي ماعنده اختبارت كيفه مع البرد اكيد مابقى الا يفصل البطانيه ثوب ويحط كراعينه في المكرويف وعساه يدفا >>> يسمع بالمقدمات
ياقوم كثر الحديث عن السوناتا بالتعديلات الجديدة واصبح هناك حرب تصريحات ( تعبير قوي ههه ).
وكل واحد يدلي بسطله حول الموضوع فقلت انا وش زودي ما اطلع تصريح >> وش عنده عمرو موسى فرع السعودية
ايها الاخوة العرب الاشقاء سلام من الله عليكم >>> كيف الميكرفون ياشباب صوتي واضح
لقد قمت في ذات صبيحة في يوم ملغم بالصقيع الشديد بزيارة أحد فروع الوعلان المسدوحه في الرياض ( راسب في التعبير لا تدققون بلييييز ) وقد استقبلت بالحفاوة والتكريم كعادة سعادتنا ( مسوي زحمة ) وتجولت في اروقة المعرض وكان بصحبتي فيلق من مشرفي المبيعات الذين امتحنوني الا تشرب العصير ياطويل العمر والبخور يدار به من حولي حتى كاد ان يفطس سعادتنا اختناقاً >>> طبعاً اللي هو انا خخخخ
عاد تصوروا لو اموت اختناقاً من يجيب لكم تصريحات شفت انكم ترحمون يعني ادعوا بسلامتي
المهم ماعلينا مالكم بالطويلة ( كل ذا ولاطولت هههه ) وبعد ان تجولت بين مواتر الكواريا وكوريا تقع جنب بركينا فاسو وانت وجهك قبله ( لاعاد توصف تكفى جبت العيد ) وهي مدينة محترمة واهلها محترمين وشوارعها محترمة وتصنع لنا الهونداي المحترمة اللي يحبونها ربعنا وحطوها ليموزين >> ياجماعة الخير اللي وراه شغل يتوكل ابو الشباب مطول يحسبه في عزبه
وبعد جولتي الميمونه والذي زاد زيارتي الكريمة شرفاً قوق شرف تواجدي تواجد أحد ابناء الوعلان الكرام >>> يعني صرنا أخوان في الكرم وأنا توني أدري ههههه
فقام ابوعبد العزيز بالتشرف بالسلام علي وحلفت عليه مايحب كتفي ( أدري قوية وماتنبلع هههه بس واحد مصدق نفسه ) وكان ترحيبا حاراً أحرق اصابعي حتى تنفخت كأصابع موز حطها السيل من علي >>> استرح يا التشبيه خخخخ
وتبادلنا الصور التذكارية والطوابع البريدية لتكون ذكرى على مر العصور وجلسنا نحتسي القهوه ( ملاحظين كلمة نحتسي أجل تمام عليكم ترى ممكن تستفيدون منها في المقابلات الوظيفية علشان يعرفون انك فلته ومثقف) مع حلاو التوفي وقليل من فطيرة الفالوذج >>> لاتسالوني وش مكوناتها تراني مدري ههههه
ثم قمت بعدها بطرح سؤال يؤثر في حياة الامة اهتزت له ارجاء المكان وسالت له الدموع فكم من شاب متيم أضناه الشوق لرؤية محبوبته السوناتا باللوك الجديد يعني نفخ براطم وترهيم خدود وصنفرة خصر وكراتين مكياج والقذلة تهفهف >>> حشى ماصرت سيارة صارت سوناتا وهبي
فبادرني بالرد نظرا لوقتي الثمين ( إيه هين ) وقال أنها سوف تنزل بمشيئة الله شهر 3 أو 4 ميلادي
فاصل ونواصل أوعى تغير المحطة بروح اشرب شاهي صكني راسي من كثر الهذرة هههه
الا على فكره مبروك الخمسه بالميه انا اول ما اعلنوا الخبر احسبه 50% والصفر ضايع ماكذبت خبر رحت ادوره بالحوش >>> انوع الدلاخة هههه
حتى افريقيا محتفلين فينا وطربانين معنا >>> ياهوووووووووووووووووووه يا التضامن
شوفوا الصورة
عدنا >>> متأثر بقناة المجد ههههه
ايه وش كنت اقول ( مازال في راسه كلام ابو الشباب ) والا تدرون خلوني اعطيكم خلاصة الموضوع وافتك ما ودي استاثم فيكم وادوخكم لان فيه ناس مهوب وسيعين صدر ويبون كلمة ورد غطاها وفي رواية طباقتها ويفرحون يشوتوني على كثر هالهذر ههههههههههه
زبدة الكلام اني سألت واحد من عيال الوعلان وأكد لي نزول السوناتا بالشكل الجديد شهر 3 أو 4 ميلادي يعني بالدفعة الثانية 2008 لان مصانع كوريا وقفت الشكل القديم وبدأت بالشكل الجديد فصعبة يحطون خطين انتاج شي لكوريا وشي للخليج والموجود الان بقايا الشكل القديم ويبون يصرفونها علشان كذا بعض مسؤولين المبيعات ينفون نزولها هالسنة وسلامتكم ارتحتوا هالحين طيب خلاص لاتدفون خخخخخخخخخ
تحياتي المعطرة لجميع أعضاء منتدى السيارات الكرام
رد مع اقتباس
الله يكون بعونه والله قهر