تجـربتي بشـراء شيفـرولية تـــاهو Chevrolet Tahoe LTZ 2017
السلام عليكم جميعا
الحمد لله ، والصلاة والسلام على رسول الله
سيدنا محمد وعلى آله وصحبه أجمعين
بفضل ونعمة من الله تعالى قدرت أشتري شيفرولية تاهو 2017
وحبيت انقل لكم تجربتي مع هذي السيارة بتقرير مفصل عنها
التقرير راح يكون طويل شوي لذلك وجب التنويه
عشان الي ما يحب التقارير الطويلة ما يتابع هذا التقرير.
:47:
والحين ذكروا الله يا شباب وتعالوا نبدأ التقرير
ما شاء الله لا قوة إلا بالله
أولا : سبب الشراء :
انا ولله الحمد والمنه عيالي كبروا بالعمر ، وعندي سيارة BMW الفئة الخامسة لكنها متوسطة الحجم ولا تكفينا إلا بالغصب
لذلك احتجت لسيارة عائلية تكفي لعددنا وبنفس الوقت تكون فخمه أو كاملة المواصفات
ومن زمان مفكر إني أشتري سيارة عائلية كبيرة الحجم ( 7 ركاب ) لكن الظروف المادية ما كانت تسمح
الحين ولله الحمد بعد ما خلصت من أقساط سيارتي صرت أقدر أخذ قرض جديد وأشتري السيارة كبيرة الحجم تكون سيارة عائلية
وكل اليهال وأمهم كانوا متشجعين لهذا الأمر لأنهم ملوا من الضيق والحشر بسيارة وحده.
ثانيا : اختياري الأول وكيف تغير ؟
انا ما كنت مصمم على شراء تاهو أو يوكن أو غيره ، كنت أبحث عن أي سيارة تكون كبيرة الحجم وتكفي لعدد 7 ركاب
وكان فورد اكسبدشن هو أول اختيار لي من هذي الفئة
وذلك لعدة أسباب منها :
- السعر الرخيص مقارنة بالمنافسين
- راحة بالقيادة بسبب التعليق الخلفي المستقل ( بعكس جميع المنافسين )
-كبر مساحة الصف الثالث مقارنة بالمنافسين
- كفالته 5 سنوات ، وصيانة مجانية 3 سنوات وخدمة الطريق 3 سنوات.
كنت انتظر نزول الشكل الجديد بفارغ الصبر ، وأتابع أخباره أول بأول
كان عاجبني من ناحية الشكل الخارجي والداخلي والمواصفات والمميزات الكثيرة الي فيه والألوان الجديدة ووكالته الجديدة بالكويت
وناوي أشتريه أول ما ينزل بالكويت ومخطط على هذا من زمان أكثر من سنة ونص وانا انتظر نزوله
لكن بعد الكشف عن سعره الرسمي بأمريكا والخليج تغير الحال وتغيرت نظرتي له.
:9::
سعره الابتدائي ( لفئة البلاتينيوم ) على الانترنت = $72,710 دولار أمريكي
يعني أكثر من 21900 دبنار كويتي ، يعني أكثر من 272 الف ريال سعودي !!!
هذا السعر الابتدائي بدووون الضرايب ( الضرايب من 7 إلى 15 بالمئة ) بدون رسوم التوصيل ( 500 أو 600 دولار ) بدون الشحن بدون الجمرك بدون كل شي
إضغط هنا
بعض قنوات السيارات كانت تعرض فورد اكسبدشن الجديد ( الفل كامل المواصفات ) على اليوتيوب بسعر 84 الف دولار أمريكي !!
يعني أكثر من 25 الف دينار كويتي ( تقريبا 315 الف ريال سعودي ) !
:a1120(121):
وكانت التعليقات في معظمها تسخر وتنتقد هذا السعر المبالغ فيه من شركة فورد
https://youtu.be/sqWMPvWrWlU
تخيلوا فورد اكسبدشن بسعر أكثر من 25 الف دينار كويتي ؟؟؟
قلت يمكن هذا السعر الخرافي بأمريكا أما بالخليج فسيكون أرخص من ذلك ؟؟
:c0214:
فأرسلت ايميل إلى شركة فورد الشرق الاوسط وسألتهم عن سعر الاكسبدشن الجديد فئة البلاتينيوم ، وجاوبوني فرعهم الموجود بالامارات.
سعره بالامارات بعد الخصم 280 الف درهم إماراتي( تقريبا 23 الف دينار كويتي ، 285 ريال سعودي )
بس هذا مو كاتبين انه فل مواصفات ! كاتبين انه بلاتينيوم وبس يعني أعلى فئة
وكلكم تعرفون بأن كل فئة لها إضافات ( اختيارية ) ممكن تظيفها ، يعني مع الاضافات الكاملة اتوقع تطلع نفس سعر أمريكا
السعر نااااااااااااااااااااار !! شنو هذا ؟؟
:mad1:
من صجهم شركة فورد شلون بينجح الاكسبدشن الجديد مع السعر هذا ؟؟
:c0038:
أتوقع المبيعات ستنحصر فقط للفئات الدنيا ( الخالية من المواصفات ) من الاكسبدش
أما الفئات العليا مثل الكنق رانش والبلاتينيوم فمن الصعب نجاحها مع هذا السعر الخرافي
خصوصا بنهاية السنه لأنه كانت في عروض وتخفيضات بكافة الوكالات
عروض وخصومات شغاله على أغلب السيارات موديل 2017 لأن نزل عندهم موديل 2018 ويبون يتخلصون من 2017 فيسوون خصومات كبيرة جدا تغري العميل
على سبيل المثال :
كاديلاك اسكاليد موديل 2017 بسعر 24 الف دينار !!
الاسكاليد 24 الف والاكسبدشن 25 الف ؟؟؟ شلوووووووون ؟؟
مثال أخر :
يوكن دينالي موديل 2017 بسعر يبدأء من 22 الف دينار ونصف ( 22630 دينار )
الدينالي وما أدراك ما الدينالي بسعر 22 الف والاكسبدشن مابين 23 و 25 الف ؟؟؟
شي غريب وعجيب الصراحة
مثال آخر :
التاهو موديل 2017 عليه خصم 5000 دولار أمريكي لجميع الفئات
( تقريبا 1500 دينار كويتي ، 19 الف ريال سعودي )
حتى الموظفين بوكالة فورد يأيدون كلامي هذا ، ومديرهم قالي احتمال ما نطلب فورد اكسبدشن فئة البلاتينيوم لأن سعرها غالي جدا ومحد راح يشتريها أبدا
لذلك شلت الفورد من بالي ورحت للمنافسين ، تاهو LTZ و يوكن دينالي والكاديلاك الاسكاليد
( طبعا الاسكاليد فئة أعلى من التاهو واليوكن )
رد: تجـربتي بشـراء شيفـرولية تـــاهو Chevrolet Tahoe LTZ 2017
فعلا اسعار نار فرق 360درجه عن موديل 2017 ماراح تمشي الا اذا رجعت للاسعار المنطقيه شكرا لك على الموضوع