التشليح حرق الفيوزات و من بعدها الحرارة ما نزلت - تاهو 2010
السلام عليكم ...
اخوكم معه تاهو 2010 مطلعه من الوكاله .. خرب القير معي وشلته من الشمال القريات الي الرياض وامدحو لي تشليح خاص باليوكن والتاهو فقط بالحاير وصاحبها يماني .. وجلست عنده سيارتي ثلاث ايام الكلام هذا قبل ثلاث سنوات وركب القير ورحت وقال راح تدعي لي اول ماقربت للقصيم ارتفعت الحراره وخشيت القصيم وقصينا الكلبس وشبكنا داير اكت سلك المروحه وحصلناه محترق وكملت وحايل نفس اشي اتعطلت وحراره ومدري وش صاب السياره وكل شي غيرته واتضح لي بعد ان علبة الفيوزات كمان احترقت قاعدة فيوز تماتيك المروحه .. المهم صارت معاناتي مع الحراره وكل صيف مره ترتفع ومره تنزل بعد سنتين اتضح لي ان محل التشليح هذا سارق المراوح حقات التاهو وحاط مراوح حقات 2005 بعد مااتاكدت من الجميح وكاسر علي الاديتر من عند مواسير قير التبريد وشريت اديتر ومراوح تشليح من القريات ...ومدري وش رايكم ...!!! ... الحين الحراره ترتفع وغيرت قاعدة الفيزوات اللي تجي يسار جنب المكينه ...والحراره توصل 125 فوق النص واحيان 130 والمراوح ماتشتغل الا خفيف ومع المكيف اكثر صوت هو صوت مروحة المكيف ومع الخط ترتفع واذا اسرعت 140 تنزل ع النص ... عطوني حل وش تتوقعون وهل لي الحق اشتكي علي التشليح بعد كل هالفتره هذي ... وانتبهو منه صاحب التشليح هذا ..وشكرا
رد: تعالو ياملاك اليوكن والتاهو
و عليكم السلام و رحمة الله
الأخ سلطان , إذا أنت تأكدت من عبث هذا الرجل فالله حسيبك و الله يعوض عليك. أنا ما أوقف في صفه لكن أقصد أنك ما تحطه بذمتك إذا ما تأكدت. المشكلة وين تشكيه بعد كل هذي المدة. الله يعينك. الحين ركز كيف تحل مشكلتك الموجودة.
أنت تقول أنك غيرت علبة الفيوزات الخارجية. طبعًا هذا يشمل الفيوزات والكتاوتات الموجودة معها.
إذا المراوح ما تشتغل مع تشغيل المكيف أو تتأخر , فالمشكلة من كتاوت المروحة. لكن إذا كان عمل المروحة طبيعي و بسرعتها العالية أثناء استخدام المكيف , فالمشكلة أشياء أخرى تسبب لك الحرارة :
- بلف الحرارة مفكوك ؟ إذا مفكوك ترتفع الحرارة كثير بالمشي.
- هل تستخدم ماء حنفية عادي ؟
- افتح غطاء الرديتر وألق نظرة بداخله, هل فيه صدأ أو انسداد. خصوصًا أنك مركبه مستعمل.
- شيك إذا فيه هواء داخل دورة التبريد. افتح غطاء الرديتر ثم شغل السيارة و انتظر شوي. إذا وجدت فقاعات هواء فهذا وجه الرأس متآكل مما يجعل ضغط بساتن المكينة يدخل إلى ماء الرديتر.
- لو تروح ورشات الرديترات و تشكف على قوة ضح طرمبة الماء. إذا ضعيفة ترتفع الحرارة في الوقفات و تنخفض مع المشي.
لعلي إن شاء الله غطيت كل ما يتعلق بالحرارة.
و لكن أخوي أنا ألومك أنك أخذت رديتر تشليح. ما تدري كيف هو من داخل و هل فيه انسداد أو تسريب.
لا تتعجل في تغيير أي قطعة إلا بعد الفحص الشامل ثم تستطيع الحكم.
رد: التشليح حرق الفيوزات و من بعدها الحرارة ما نزلت - تاهو 2010
وعليكم السلام ورحمة الله وبركاته
بالاضافة الى ما تفضل به اخي العزيز مستشار الورشة , ارجوا فحص الامور التالية :
1- فحص صلاحية حساس CTS
2- التاكد من عدم وجود انسداد وضعف في مسالك الماء وتشمل ( الرديتر - ليات الماء - انابيب الماء - طرمبة الماء - بلف الحرارة )
3- تاكد من عدم وجود انسداد في الاقزوز
بالتوفيق
رد: التشليح حرق الفيوزات و من بعدها الحرارة ما نزلت - تاهو 2010
مشكورين ...ويعطيكم الف عافيه ع الردود وماقصرتوو وجزاكم الله الف خير ... !!
تم علاج المشكله ولله الحمد وماراح اخبي عليكم طريقة اصلتح سيارتي ...رحت واشتريت بلف حراره فورد 54c ومعجون والصباح لما صحصحت قمت انا بنفسي بفك البلف وتركيب بلف الفورد وحطيت المعجون وشديت عليه ...والحمدلله الحراره نص واطقه بالساعات شغال والمكيف شغال وعال العال ..ونصيحه للناس اللي يعانون من مشكلة المكيف انا لما الغيت المكيف الحار صار المكيف يبرررررد تقل ثلاجه لدرجة ان احيان اطفيه من كثر البروده واللي يركب معاي يقول طف المكيف برررررد ...وبالتوفيق جميعا ...
رد: التشليح حرق الفيوزات و من بعدها الحرارة ما نزلت - تاهو 2010
السلام عليكم . بارك الله في الجميع . وشكرا اخ عزام لانك كتبت الحل للمشكله .
رد: التشليح حرق الفيوزات و من بعدها الحرارة ما نزلت - تاهو 2010
مشكور أخ سلطان على الإفادة.
إذًا كان البلف القديم يغلق في الأوقات التي يُطلب فيها أن يكون مفتوح. و بالتالي يرفع الحرارة.
بلف الحرارة له عمر و يفقد مرونته. و مما يقصر عمره عدم استخدام ماء الرديتر الأصلي (يحتوي على جلايكول إيثيلين) و التوجه إلى الماء الرخيص أبو 5 ريال الذي لا يتعدى أن يكون صبغة خضراء فقط.