تجربتي السيئة لسيارة جراند شروكي Jeep Grand Cherokee 2015
السلام عليكم
محدثكم مالك لسيارة قراند شروكي 2015 الدفعة الأخيرة
وحاب أفيد الجميع بما حصلته من هذي السيارة وكذلك ما واجهه غيري في السيارة سواء قريته في قروبات ملاك السيارة أو أشخاص قابلتهم في الوكالة وما كتبته ليس فقط أنا حصل لي بل كثير إما طلعت له بعض المشاكل أو ماهو منتبه أو بعضها .
السيارة حقيقة غير مضمونة وكثيرة المشاكل والوكيل سيء جداً جداً هذا باختصار
أنا شريت الموتر على أساس ان مشاكل السيارة انحلت والدفعة الاخيرة خالية من المشاكل وبعد تجربته تجربة خفيفة عند الوكالة واستلمته
مسكت به خط بدت تظهر معي المشاكل قبل 1000 كيلو
وهي :
عدم توازن / حذفة جهة اليمين / دركسون يرج وفيه ميلان/ صوت يظهر عند سرعة 120 تبين أنه من الكفرات / ضعف الفرامل / وعندي مشكلة كفرين بعد ماغيرت الكفرات جديدة انفقعوا عندي في وقت قصير أظن والله أعلم فيه مشكلة في الجنط لكن ما تأكدت وهم يقولون الجنط سليم كعادتهم كلش سليم !
هذي المشاكل السابقة استغرقت تقريبا تردد على الوكالة خمس مرات وكل مرة تجلس 5 أيام إلى أسبوع وبعضها ضبط بنسبة كبيرة وبعضها لا .
ولا تسأل عن دلاخة الوكالة والفنييين اللي في طريق خريص
وهو الفرع الوحيد وزحمة العالم والخدمة السيئة للأسف وتجلس وقت طويل عشان تسلم وتستلم وبعدين كم مرة يسلمون الموتر ومافهموا أوماحلوا المشكلة لأن المشاكل ماهي مستمرة تروح وتجي أو يقولون طبيعي هذي بتختفي معك حتى يطفشونك .
الكفرات قالوا بنغيرها لك وجدنا المشكلة لما افتقدت مصداقيتهم عندي حطيت علامات على الكفرات قلت أتأكد غيروها أولا لما طلعوا السيارة مع الكراج لقيت مغسلين الكفرات فقط وملمعينها والسيارة مغبره!! وكنت متقين انهم ماغيروها لكن ماتقدر تصيد عليهم شي .
---
مع الأيام بدأت تظهر معي مشاكل لما سافرت بالسيارة وطلعت خارج الرياض وهي تنرفز حقيقة تطلع لك وتختفي وربما تروح الوكالة وتختفي ماتطلع وهي :
مشكلة في النظام الصوتي تشويش في الراديو قوي تحس كأنك راكب كراسيدا موديل 80 وغالبا يكون في أطراف المدن / تصفير جهة باب السائق / نتعة في القير تظهر بعض المرات / رائحة التريلات والمجاري تدخل للسيارة / حساس الباب اللي يفتح باللمس ماهو مضبوط فأحيانا لازم أفتحه بالريموت أو أطلع الريموت من مخباي عشان يلقط / كذلك النور الخارجي للسيارة شغال حتى مع وجود الشمس في عز القايلة في الصيف مايطفي !
وهذي المشاكل نفس سابقاتها مرمطة وألف تصريفة وتدخلها وتطلع بنفس المشكلة
النظام الصوتي ماله حل غيروا أسلاك غيروا الانتل وكذلك الراديو وماله حل اخر قالوا فيه تحديث جديد انتظر ولحد الان مانزل وهذي المشكلة عند غيري من الملاك وأخذت فواتير على أنهم ماصلحوها وبأتقدم بها لوزارة التجارة طلبوها مني بإذن الله عشان يغيرون لي الموتر .
تصفير باب السائق قمت بوزن الباب مرتين عندهم ومافاد وغيروا لي الجلب وخف بنسبة 80% ولازال تصفير موجود لكن خفيف جداً .
بالنسبة لدخول الرائحة للسيارة لما عجزوا عن حلها قالوا فيه تحديث جديد بيوصل لنظام الهواية الخارجي انه يكون مايفتح من نفسه وخذلك تصريفات !!
الخ الخ
ماكتبته جزء مما حصل لي وواجهته وغيره الكثير والله على ما أقول شهيد وما كتبته إلا عشان يشوفون غيري التجربة ويحذرون فنصيحتي الابتعاد عن الوكيل هذا وسياراته .
رد: تجربتي السيئة لسيارة جراند شروكي Jeep Grand Cherokee 2015
فيه بعضها ماهي مشاكل
وهي الانوار شغاله حتى في النهار اتوقع هذه اضاءة DRL شغاله دايم وهذه مواصفه مطلوبه علشان السيارة تنشاف
وهي واقفه في الضباب واذا كان النور العادي شغال اتوقع من التضليلة قللت الضوء من الحساس المفروض ماتضلل
الجزء الي فيه الحساس
الهواية ماتسكر زين )) كل الامريكي كذا مايقفل الهواية تماما حتى يوفر نسبه اكسجين متجدد داخل المقصورة
ضعف الفرامل )) الجيوب غالبا فراملها ماهي مثل السيدان لانها ثقيلة وزن مع الوقت تتعود عليها
عدم توازن ؟؟ في اللفات طبيعي كل الجيوب سيئة في المناورات .
وفيه مشاكل من التخزين الرجه والحذفه من الكفرات المفروض يعوضونك بكفرات جديدة السيارة لها قريب السنتين
من يوم ماصنعت واكيد الكفرات اقدم من ذلك
الحساس حق الباب )) من بطارية المفتاح تحتاج تغيير
الجيب دقة تصنيعه لاتجاري الياباني + وكيل سيء المفروض مادام يبيع مخزن يغير الكفرات والبطاريات
رد: تجربتي السيئة لسيارة جراند شروكي Jeep Grand Cherokee 2015
الله يعوضك خير
ياساتر كل هالمشاكل في سياره جديده
وكالة المتحده محد ينافسها على اضعف وكاله بالسعوديه
رد: تجربتي السيئة لسيارة جراند شروكي Jeep Grand Cherokee 2015
الله يكون بالعون
انا عندي تعقيب على مشكلتك مع الريموت البصمه
الريموت اذا كان في جيبك و الجوال معه في نفس الجيب تراه يؤثر عليه ولا يشتغل
تحصل معي في سيارتي التاهو حتى لو كان الريموت و الجوال ماسكهم في يد وحده و حاولت افتح اوقات يشتغل و اوقات لا
اما بالنسبه للتهوئه كل الامريكي كذا حتى لو سكرت التهوئه بشكل كامل من الزر و درجه بروده التكييف اقل حاجه راح تلاحظ يفتح التهوئه كل ربع ساعه مثلا و هذا من امور السلامه تعتبر
حتى في السيارات الكوريه الفخمه مثل الجينيسس و السيارات الاروبيه تفتح ولكن على حسب نسبه الاكسجين في المقصوره لانها مزوده بحساس اكسجين و يقراء النسبه اذا قلت و زاد ثاني اكسيد الكربون الناتج عن التنفس و بدوره يؤثر على السائق و يشعره بالنعاس و كذا يفتح التهوئه و يجدد الاكسجين
لكن الشكوى لله مناطقنا اغلب الاجواء حراره و سمووم و غبار و روائح عشان كذا ماتعجبنا و كثير الي يتشكى منها
رد: تجربتي السيئة لسيارة جراند شروكي Jeep Grand Cherokee 2015
وعليكم السلام
فعلاً مشكلة ... إذا اجتمعت سيارات اعتمادية ضعيفة أحياناً + وكيل خدماته لا ترتقي لمستوى السيارات التي يبيعها وحجم المبيعات !
نيسان وعلى الرغم من السنوات اللي كان فيها الوكيل الحمراني يعاني من مشاكل .. إلا أن كثير من مُلّاك سيارات نيسان لم يعانوا كثيرا من ضعف الوكيل لأنها سيارات اعتمادية ...
كان الله في عونك .. وشخصياً أستبعد تغيير سيارتك ,.,
إذا قدرت تبيعها فهو أفضل لك ..
رد: تجربتي السيئة لسيارة جراند شروكي Jeep Grand Cherokee 2015
الحذفة بكل السيارات الجديدة
لأن زفلتة الشوارع عندنا مايلة
اشوف الموتر مافيه شي
بس وسوسة
انصحك تبيعه وتاخذ ياريس ولا كوريلا
رد: تجربتي السيئة لسيارة جراند شروكي Jeep Grand Cherokee 2015
ما اعتقد ان السياره اللي استلمتها سليمه !!
لان المشاكل اللي جاتك توحي بهالكلام
رد: تجربتي السيئة لسيارة جراند شروكي Jeep Grand Cherokee 2015
صراحة هي ما تعتبر اعطال هي السيارة هيك كان لازم تعمل مراجعة للسيارة قبل الشارء على كل حال شيلك من الوسوسة الزايدة وجيب شيروكي سيارة ممتازة وقوية يعني مثلا شو رح تجيب مكانها !! باثفايندر ولا برادو .. عفكرة عبداللطيف جميل مو احسن من المتحدة