قناة السيارات
السلام عليكم
عدنا ..
اخوي اتعبتني ضنوني
بالنسبة للرساوة يالغالي فهي جيدة
انا لي شهرين من يوم اخذت السيارة
وبيني وبينك ما مشيت فيها خط على سرعة للحين ههههههه
زحمة الرياض ما تخارج .. بس مع ذلك اشوف ان رساوتها حلوة جدا بالمقارنة
مع سيارات من نفس السعر .
قطع الغيار اشوف انها عادية مب ذيك اللي تمصع القلب
بس بالمقارنة مع هونداي وتيوتا .. هم ارخص
عاد تيوتا لا تقارنها ابد !
وبالنسبة للوكيل انا اشوف العيسى اصرف .. الجميح ما اواطنه بعيشة الله لو ايش .
وهذا اللي صار معاي بالنسبة للقير لعيون ميمو وليستفيد الكل ..
كانت مشكلتي مثل ما قلت لكم .. بعد ممشى بسيط ( بعد ما يسخن زيت القير ) ابدأ الاحظ بشكل واضح تغييرات القير
عند ابطاء السرعة .. احس بهزة من 3 إلى 2 إلى 1 .. في كل تغييرة هزة ..
وكأني دعست فرامل بشكل سريع ورفعت رجلي .
وصوت طقة في حين التعشيق من N إلى R
طقة تعور القلب
وتأخر في التعشيق لمدة لا تزيد عن الـ 3 ثوان عند التعشيق من N إلى D
ف يوم رحت وكالة العيسى اللي بمخرج 25
فحصوها على اساس انها بتخلص في نفس اليوم ولا خلصت ..
اليوم الثاني قال لي المندوب اللي سلمته السيارة اكيد بتخلص و و
ف يوم رحت له الظهر صعقني بخبر ان القير فيه خراب في الكلتشات الداخلية
يعني لازم ينفك القير ويتم تحديد وين المشكلة بالضبط . . ما يوضح الأمر الا بفك القير
نصين
قلت له يعني باختصار توضيب .. قال ايه توضيب
شغل اليد قال راح يكلفني 3000 ريال
بينما القطع راح تحدد بعد فك القير ، ما يقدر يحدد لي المبلغ الحين .. قد يكون الف او الفين او ثلاث .. يحدد بعد الفك .
قلت له انا الميزانية عندي تعبانة ، ربط لي القطع المفكوكة وبرجع اخذ السيارة مابي اسوي شي
قال 20 دقيقة وتكون خالصة .. قلت له لا بجيكم الساعة 5 اخذها
وصلت يا جماعة ع الموعد عشان اخذ السيارة
ما لقيت المندوب .. وقالوا لي السيارة ماهي جاهزة !
شبيت عليهم وتهاوشت وياهم وان وعدهم لي اساسا كان يوم واحد ، والحين يومين وما خلصت !
انا وياهم انا وياهم لييين قالوا لي . .
السيارة جاهزة بس ناقصنا التقرير لازم نعطيك ياه ، والتقرير في درج المهندس اللي فحصها وخلص دوامه وقفل درجه ومشى ، وانه لازم يطلع بالسيارة اصلا عشان يجربها
ما نكتفي بالفحص الداخلي ، عشان كذا ما سلم التقرير لأنه ما جربها .
قلت لهم : دام السيارة جاهزة ، طلعوها لابو تجريبكم ولابو فحصكم ، طلعوا سيارتي خلاص
و وين مشرف المهندسين ابي اشوفه ، ليه لازم تجريب وانتوا مطلعين المشكلة اللي فيها !
راح واحد ونقز جاب لي الموتر وقال لي ان مشرف المهندسين يقول السيارة مافيها
مشكلة ! عشان كذا لازم يجربها المهندس ...
انا يا جماعة جيّم مخي ، بيني وبينكم عجبني الوضع وفرحت بعد التحطيم اللي سمعته
من المندوب اللي سلمته سيارتي .
قالوا اسمع باقي التجريب والمهندس ما جرب ، انت خذ موترك الحين ورح جربه واذا لقيت
فيها مشكلة ارجع لنا يجربها المهندس ، ولأن ما لقينا فيها مشكلة ترى حتى قيمة الفحص
ما بناخذه منك .
طلعت بالموتر يا جماعة وجربتها و والله ما صار فيها الا العافية ، راح كل شي !!
اظن امي داعية لي ذاك اليوم
قاعد اجرب الموتر وازرزر ع القير واشد ،، وحلااااااوة
توقعت ان الموضوع كان برمجة لا اقل ولا اكثر .. لأنهم خلال فحصهم الداخلي لازم يبرمجون .. المهم اني فرحت وشكرت الله ونمت .
اليوم الثاني .. رجعت المشكلة ههههههههههههه
قمت افكر بيني وبين نفسي ..
قلت تدري يا صالح .. اول شي انت غير زيت القير لأني فحصته وشفته معدوم لليل .
وثاني شي هم فحصوها وقالوا مافي مشكلة !
ف الطقة اللي تسمعها يمكن لأن كراسي المكينة عندك تجارية مو اصلية ..
والقير اذا سخّن يصير تعشيقه اقوى سواء تصاعدي او تنازلي . فعشان كذا احس بالهزة
والطقة اللي تصير أيضا داخلة ضمن موضوع الكراسي التجارية وسخونة القير
والتأخير اللي يحصل في التعشيق للـ D بسبب الزيت التعبان .
هذا كان تحليلي الشخصي ..
فأنا على موعد مع الوكالة اني اغير الزيت والفلتر بكرا بإذن الله
وقالوا الموضوع ياخذ ساعة مو اكثر ، والله يستر .
بجربها بعد تغيير الزيت ، واذا ما تغير شي ،، بغير كراسي المكينة إلى كراسي اصلية
طبعا موضوع الكراسي بيطول .. بس بفيدكم وقت ما يصير معاي شي جديد
لا نسبق الاحداث .
هذا اللي صار معاي باختصار < امحق اختصار ههههه
تحياتي لكم
رد مع اقتباس
المشاركة الأصلية كتبت بواسطة kemo-alblues
