السلام عليكم ورحمة الله وبركاتة
شف يالغالي نظراً لخبرتي بالكابرس القديم
اول شيء تسويه بالسيارة تغير القطع الميكانيكية بالسيارة بمعنى انك تضبط السيارة عملياَ وبعدين تهتم بالمظهر..
اول شيء تسويه طال عمرك تروح ورشة المشعل في الصناعية القديمة(صناعية الخرج)
اسأل عن الورشة وراح يدلونك عليها...
خلهم يشيكون على المكينة هل فيها تهريب ام لا..
ثانيا خلهم يفحصون كلتشات القير هل هي سليمة ام محروقه
ثالث شيء قم بعمل تصفية للبخاخات وتغيير البواجي وأسلاك البواجي (لاتاخذ الا أصلي) والفلتر وصفايات البنزين..
رابع شيء قم بصيانة شاملة لفرامل السيارة وتغيير مايلزم بها..
خامس شيء قم بتغيير الكفرات والجنوط(مهم) الجنط لن يكلفك سعر الواحد 60 ريال جديد
بتقول لي ليش..اقول لك يمكن ان الجنوط القديمة قد تعرض لحوادث بحيث لاتركب على الكفرات الا بعد عمل ترصيص..
سادسا بعد تركيب الكفرات اذهب الى ميزان الدرع في الصناعية القديمه وخلهم يعملون لك وزن أذرعه ومقصات والطارة..
واذا خلصت منهم رح ورشة بن مرضااااخ في الصناعية القديمة نفسها واعمل تربيط كامل من الصدام الى الصدام على شان ماتسمع اصوات حكحكه بالسيارة وانت ماشيء
وخلهم يفحصون الكمر هل هو سليم ام يحتاج كبس(وظيفه الكمر هو جعل الكفرات قائمه بشكل مستقيم لكي لاتحتك جوانبها بالأرض ثم تقل عمرها )
سابعاً خذ السيارة عند كهربائي محترم وخل يفحص لك دينمو الكهرب هل يوصل تيار كهربائي كامل للسيارة وخله يفحص لك الافيوز وغير البطارية اذا تحتاج تغيير ..وبعدها دعه يركب لك مراوح كهربائية قدام الرديتر (مراوح سوبارو) على حساس حرارة حق مرسدس وكتاوت ددسن
وخله يوزن المراوح انها ما تشتغل على طول تشتغل على حد معين تحدده عن طريق حساس الحراره مثل تخليها تشتغل معك اذا وصل امبير الحرارة الى النص مثلا او الربع...
ثامناً اعمل تسييخ للرديتر وعبه علبتين ماء أخضر أصلي والباقي موية صافيه (موية بطارية) وتاكد من ليات الردتير انها ماتهرب وسليمة وان غطاء الرديتر محكم ولا يطلع تنسيم...
تاسع شيء تسوية تروح عند فني مكيف تخلية يشيك لك على المكيف والفريون والثلاجة ويعمل تنظيف للفلاتر وخلافة...
عاشر شيء دخل سيارتك للسمكري واحرق البوية واضربها بوية لماعه من جديد وغير المرايا الخارجية الى مرايا كابرس موديل 84
صدقني شكل احلى وراح ترتاح معها
اخر شيء تسوية انك تنجد الموتر من داخل تنجيد كامل وكمل اي ديكور ناقص عليك من داخل من التشليح
وسلامتك.......