المشاركة الأصلية كتبت بواسطة porsche fan
فكرة الموضوع جداً جميلة , واتمنى الموضوع يكون نقاش جاد وهادف لأن هالموضوع راح يفيد كثير وكثير وكثير من الاعضاء بالمنتدى لأن مثل ما انتم شايفين اسعار السيارات طايرة بالسما وصار عند بعض الناس امتلاك سيارة من الوكالة شئ اشبه من المستحيل مع هالأسعار فصار كثير من الناس يتجهون لسوق المستخدم , وسوق المستخدم ايضاً غالي ومعظم السيارات ما تستحق سعرها والاستعمال عندنا سيئ
شوف انا بتكلم عن تجربة , عايلتنا من فترة طويلة تستورد سيارات من امريكا , طبعاً ما نستورد سياراتنا اول بأول من امريكا عدة مرات شرينا سيارات من هنا لكن جبنا سيارات من امريكا اكثر من ثلاث او اربع مرات , شخصياً انصحك وبقوة بسيارة من امريكا ويكون استعمالها نظيف طبعاً , اخر مرة جبنا سيارة من امريكا كان بعام 2009 , والسيارة للآن موجودة معنا والله انها ولا عطل واحد من يوم جبناها , والسيارة تقريباً ماشيه 100 الف للآن ولا انجبرنا اننا ندفع ريال واحد لأي مشكلة , كلها اشياء اجبارية مثل بنزين وتغيير كفرات وزيت وهكذا , اما غير كذا ولا اي شئ ما شاء الله , وبكل مرة نجيب من امريكا نفس الطريقة , الاشياء اللي تميز الامريكي المستعمل عن السعودي المستعمل كثير , ولكن ابرزها واهمها ان السيارة بنسبة كبيرة جداً راح تكون خالية من الاعطال , ليه ؟ عندنا اذا بتاخذ سيارة مستعملة وعمرها خمس سنوات مثلاً , كم تتوقع قد طاحت بحفرة ؟ او اكلت مطب قوي ؟ او حتى من سوء السير والتحويلات كم حادث دخلت فيه ؟ اما السيارة الامريكية عمرها خمس سنوات لكن تخيل ولا حفرة وحدة او مطب واحد طاحت فيه ( على الاغلب طبعاً لان دولتهم مافيها لا حفر ولا مطبات ) , وحتى ان راعي السيارة حب يستهبل ويخربها ويدعس بالسيارة بتلقاه دعس وضغط على السيارة لكن النتيجة سليمة جداً لانه ما طاح لا بمطب ولا بحفرة , والنظام الامريكي للمرور شديد تعرف محد يقدر يستهبل ويسرع ويفحط
!
يميز الامريكي المستعمل بعد سعرة بالمقارنة عندنا , يعني مثلاً لو تجيب نفس السيارتين ، نقول شفروليه ماليبو على سبيل المثال وليس الحصر ، وتكون الثنتين نفس الموديل ومثلاً 2010 , وكلهم نفس النوع وكلهم نفس الممشى راح نلقى ان اللي بأمريكا سعرها ارخص مع النقطة اللي ذكرتها مسبقاً ان الاستعمال انظف وهالشئ مافيه شك
بالاضافة عندنا بالسعودية يعتبر اصعب مكان ان السيارة تعيش فيه لأنها تواجه كل المشاكل اللي ممكن تواجهه اي سيارة بحياتها
, فتلقاها تواجه درجة حرارة عالية ، تواجه مطبات قوية ، حفر عميقة ، قطع غيار تقليد وليست الاصليه عند بعض الورش واللي ممكن تضر بالسيارة وكثير اشياء تقضي على السيارة عندنا , فعشان كذا اشوف اخذ السيارة من امريكا تعتبر صفقه ناجحة جداً من جميع النواحي ..
بالنسبة لموضوع السخونة فأبداً ابداً ما قد واجهنا هالمشكلة , انت اذا بتاخذ سيارة من امريكا احرص انك تاخذها من منطقة او مقاطعة جوها شبيه بجونا , حار صيفاً بارد شتاءاً
, مثل ولايه تاكسس وفيه ولايات ثانية تمتاز بالحرارة فاحرص انك تاخذها من مثل هالمناطق وما راح تواجه السخونه بإذن الله
بالتوفيق