بسم الله الرحمن الرحيم
السلام عليكم جميعا أعضاء منتدى السيارات
يسعدني إني أقدم لكم تجربتي بشراء سيارة
بورشه ماكان
Porsche Macan
2019
وكالعادة سيكون التقرير طويل شوي
لذلك الي ما يحب التقارير الطويلة ما أنصحه يتابع هذا التقرير
مع احترامي للجميع
السيارة مو لي شخصيا إنما لزوجتي أم سعود
وبما أنه قد تم السماح لقيادة المرأه في السعودية ، فأتوقع في ناس بتستفيد من هذا التقرير ولو الشيئ القليل والبسيط لما فيه من معلومات وصور ونصائح وتحذيرات ، سواء للبنت الي بتشتري سيارة البورشه أو لزوجها أو ابوها ، لذلك ....
قولوا ما شاء الله وذكروا الله
وخلونا نبدأ التقرير .
الأهل كان عندهم انفينيتي Q50 موديل 2013 وماكانت تشتكي من شيئ ولله الحمد
كانت فل الفل وعال العال مثل ما يقولون
لكن الي حصل بشهر ديسمبر 2018 من أمطار وفيضانات وسيول بالكويت ( حتى ببعض دول الخليج ) أدى لخسائر وتلف كبير وغرق الكثير من السيارات ، ومن ضمنهم سيارة الأهل
قدر الله وماشاء فعل ، والحمد لله على كل حال
المهم موضوعنا عن البورشه وليس عن الأمطار والفيضانات والخسائر
بعد ما بعنا الانفينيتي الغرقانه ما كنا مستعجلين لشراء سيارة ، عطيت الأهل سيارتي BMW وقلت ندور سيارة جديدة على راحتنا وأشوف أحسن العروض واستغلها
( لكن للأسف ما حصلنا عروض لما شرينا البورشه هههههه )
تجولنا وتفحصنا أكثر من وكالة للسيارات ، بي أم ولكزس وأودي وحتى شركة انفينيتي رحنالها ، لأن سيارتهم ماشتكينا منها وحتى لغاية ما بعناها كان فيها سيرفيس مجاني ما خلص يعني ، خدمتهم كانت ممتازة انفينيتي لذلك مرينا وشفنا سياراتهم
البورشه ما كانت في بالي أبدا ، والسبب ؟
كنت ( اسمع ) انها غالية جدا
وانها سيارة سبورت للشباب ، مو حق بنات خصوصا لأم عيال
لذلك ما رحنا لوكالتهم ، لكن بالصدفة شفت فلم باليوتيوب عن التحديثات الجديدة في سيارة بورشه ماكان
وليلحين أذكره وهو مال قناة عرب جي تي ، المهم من هذا الفلم عجبتني السيارة وغيرت نظرتي لها
شافتها ام سعود وايضا عجبتها جدا جدا وصرفت النظر عن كل السيارات الي شفناهم من قبل بالوكالات السابقة
لكن الي خلانا نعجب فيها أكثر هو ....... سعرها !
نعم سعرها مغري !!؟؟
دخلت النت موقع بورشه الكويت عشان أشوف سعر الجيب ماكان ، انصدمت
سعرها كان ابتداء من 16 الف دينار كويتي !!!
= 196 الف ريال سعودي = 52 الف دولار أمريكي = 192 الف درهم اماراتي
ما صدقت !
سيارة بورشه جديدة مو مستعملةومن الوكالة وبهذا السعر !!
أكيد في غلط بالموضوع
طبعا 16 الف دينار مبلغ مو رخيص !
لكن لما تقول جيب بورش جديد من الوكالة بهذا السعر يكون مبلغ ممتاز
خصوصا لما تشوف أسعار منافساتها من الماركات الأخرى ، كلهم أغلى منها !
يعني البوشه ارخص منهم ؟؟؟
كانت أرخص منهم كسيارة ستاندرد بدون إضافات وبدون مميزات ، لأن وكالة بورشه بالكويت ( وأتوقع بكل دول الخليج والعالم ) توفر للزبائن طريقة حلوة للشراء واختيار السيارة ، وهذا الي بتكلم عنه بالتفصيل بهذا التقرير
لكن قبل ما أتكلم عن طريقة الشراء من الوكالة خلوني أعطيكم نبذه بسيطة عن تاريخ وكالة بورشه بالكويت.
* نبذة عن شركة بهبهاني للسيارات
( وكالة بورشه في الكويت )
بدأت قصة نجاح شركة بهبهاني للسيارات في عام 1955 مع وصول أول سيارة فولكس واجن بيتل للكويت، تلاها إنطلاقة أول سيارة بورش في البلاد 356 الأسطورية.
وفي عام 1957 تم تأسيس شركة بهبهاني للسيارات على يد السيد مراد يوسف بهبهاني لتكون الممثّل لأشهرالعلامات التجارية الألمانية الرائدة في عالم السيارات في المنطقة
كما تُعد الشركة الممثل الحصري لسيارات بورش وفولكس واجن في الكويت منذ أكثر من نصف قرن ، وأكثر من ست عقود ، وبالتحديد 62 سنة.
في عام 2003، تم افتتاح مركز بورشه الكويت ليشكّل مركزاً عصرياً ومخصصاً لعلامة بورش.
وقد تم توسيع المركز عام 2010، إضافة إلى توسعة ريادته على منافسيه في السوق الكويتي.
هذي بعض الصور الحديثة لوكالة بهبهاني وكيل بورشه بالكويت
هذا قسم السيارات المستعملة والمعتمدة من بورشه
الملاحظ أن الوكالة صغيرة بالحجم
وعدد السيارات المعروضة قليل
والسبب في ذلك يرجع لطريقة الشراء
طريقة الشراء من وكالة بورشة :
الطريقة عبارة عن طلبية خاصة لك و على ذوقك من المصنع مباشرة
أي واحد يبي سيارة بورشه يدخل الوكالة ويختار نوع السيارة المرغوب بشرائها ، وبعدين تروح عند البائع و تختار لونها ومواصفاتها ومميزاتها على كيفك وعلى ذوقك وعلى مزاجك
طبعا تقدر تختار هذي الاختيارات عن طريق الكمبيوتر الموجود عن البائع بوكالة بورشه ، وتشوف السيارة أمامك بالكمبيوتر
بلونها الي اخترته انت وداخليتها ومواصفاتها ، وتقدر حتى بالبيت بالكمبيوتر الشخصي تعدل على هذه المواصفات أو تزيدها أو تقللها ، يعني وانت مرتاح وعلى مزاجك وعلى كيفك تختار مواصفات سيارتك المستقبلية ، تحط المواصفات الي تبيها وتحذف المواصفات الي ما تبيها ، تختار لون السيارة الخارجي ولونها الداخلي وحتى لون الخيوط بالتطريزات الداخلية !
تختار حجم وشكل الرنقات ( الجنوط ) الي يعجبونك ، وطبعا تقدر تخليهم ستاندرد وتوفر على نفسك الفلوس
تختار أنظمة مساعدة السائق حسب رغبتك
تختار الأساسيات والكماليات وحتى الاكسسوارات
تفصل السيارة تفصال على ذوقك الشخصي وميزانيتك الشخصية
هذي الطريقة عجبتني جدا جدا
صحيح ان السيارة تستلمها بعد شهرين لكن الحلو انك بتاخذ سيارة على مزاجك ! على ذوقك !
وراح تكون سيارة فريده من نوعها لأن كل واحد بياخذ نفس نوع سيارتك أكيد بيختار الوان ومواصفات وكماليات مختلفة عنك ، كل واحد له ذوقه الخاص وميزانيته الخاصه ، وفي واحد يشوف ان هذي الميزة ظرورية وفي واحد ثاني يشوف هذي الميزه غير ظرورية ، وهكذا
لذلك تشوف ان سيارات بورشه تختلف كل وحده عن الأخرى حتى لو كانوا من نفس النوع راح يكون فيهم اختلاف
....... يتبع
مواضيع قد تعجبك