السلام عليكم
لأني أثق أني راح احصل الإجابة اللي تكفيني ان شاء الله عندكم راح ادخل بالموضوع على طول
بدأت المشكلة معي تقريباً قبل سنة لاحظت ان سيارتي تهرب زيت
التهريب ما كان مزعج لكن لأني بدخل الموتر للفحص وديتها لورشة وقالوا لي صوفة خلفية وغيرت ودخلتها الفحص ونجحت والحمد لله
بعدها بفترة لاحظت اني اذا مشيت 3000 كيلو تولع لمبة الزيت
ثم تناقصت المسافة تدريجياً لـ 2500
ووصلنا لـ 2000
وانتهينا بألف وخمسمية
وقتها بديت أسب الورشة اللي صلحت عندهم وانهم نصابين وما صلحوا لي صوفة وو
المهم
استمريت اغير الزيت كل ما ولعت اللمبة مع العلم ان المكينة تكون فاضية تماماً إلى أن طفح الكيل برمضان الماضي فقررت أدخلها ورشة ثانية اخليهم يشوفون وش المشكلة
دخلتها الورشة وقرروا ان الصوفة هي المشكلة وغيرت الصوفة
مشيت على السيارة 1500 كيلو وولعت اللمبة من جديد
عبيتها زيت ووقفتها ولاحظت فيه تهريب فرجعت للورشة وبعد الجدال والهواش والخصام طلع التهريب من صوفة القير بينما مشكلة المكينة كانت انها تحرق الزيت واثبتوها بالدخان الأبيض من الشكمان
بعد ما لهفوا علي 500 ريال فطنوا ان المشكلة من المكينة مو الصوفة
ماعلينا
الآن أنا أمام الأمر الواقع
الخيارات كما قالوا لي تغيير شمبر أو توضيب مكينة ويتراوح سعرها بين 1500 - 3000 ريال سعودي
أو أني أغير المكينة بمكينة مستعملة بسعر يتراوح لـ 2000 - 3000 ريال
الخيار الأول يقال انه ما يضبطها لك أي ورشة وممكن هالشي يجر خرابات وان المكينة لا خربت لازم تخرب معها غيرها
الخيار الثاني المكينة المستعملة ما تضمنها وما يندرى وش مشاكلها ويقال انها قد تخرب القير والعكوس في حالة كانت اقوى من المكينة السابقة
نظراً لقلة خبرتي جيت أشاور أهل الخبرة
السيارة كورلا موديل 2000 ماشية حوالي 275 ألف
شاكر لكم ومقدر تعاونكم