تجربتي للتشارجر آر تي 2007 بالصور و بصراحه

[BLACK R/T]

السلام عليكم ورحمة الله وبركاته


كيف الحال يا شباب ؟؟


انا طلعت تشارجر آر تي اللون اسود موديل 2007
ماشي الى لحظه كتابة هذا الموضوع 1956 و الي نهاية كتابة هذا الموضوع 3300 كيلو


المواصفات كالتالي


الفئة – آر تي فل اوبشن
السعر 131900 ريال
المواصفات الخارجيه
انوار عاديه ليست زينون ولا هالوجين
موجود كشافات ضباب
فتحة سقف
اجمل شي في خلفية السياره (( الشكمانين ))
جنوط مقاس 18 ماهي مكحله عاديه ..
المواصفات الداخليه
طبعا جلد
الطبلون يجي نوره ابيض (( طبعا مو زينون )) والارقام بالاسود
الدركسون فيه ازرار تحكم بال CD و الراديو ونظام المعلومات وتحديد اتجاه السير
السياره ما فيها نظام ملاحة ابدا
المقعد حق السواق التحكم فيه كهربائي بينما الراكب الأمامي يدوي !!
بالنسبه لتدفئة المقاعد غير متوفرة لموديلات 2007 بس موجوده في ال 2006
بالنسبه لل سي دي ياكل 6 سيديات وفيه ام بي 3
المكيف يدوي طبعاً .. وفي ال 2006 كان الكتروني ..
بالنسبه للداخليه تعتبر واسعه ومريحه جدا


فيه ناس تقارن ال RT بال اس اس وانا من واقع تجربه لل كابريس حق واحد من الشباب وكان موديل 2005 بقول لكم الراي واتمنى للي يقرى الموضوع ياخذ رائيي بصدر رحب


بالنسبه للشكل الخارجي يتفوق التشارجر عن الكابريس في لفت انظار الناس و رغبتهم في التعرف على هذي السياره ..
بالنسبه للداخليه انا اعترف بكل صراحه ان ال اس اس افضل وفيه الجماليه اكثر وتحس ان السياره متعوب عليها بينما التشارجر تعتبر الداخليه نوعا ما تميل الى العاديه
بالنسبه للقوه والعزم انا اشوف ان التشارجر افضل بقليل ما ادري جايز ان التشارجر باقي ما خلص التمرين و ما شفنا خيرة من شرة .. بينما ال اس اس ماشي في حدود ال 53000 يوم جربت عزمه .. و التشارجر اثقل ووزنه 2276 كيلو غرام على حسب ما قريته بالبطاقه الجمركيه يوم رحت اخلص موضوع اللوحات الوروريه والمعروف ان التشارجر 340 حصان وال اس اس اتوقع اقل بشوي وهذا يدل على ان محر الهمي انه جبار جبار ..
بالنسبه للعزل الصوتي انا اشوف انهم متعادلين علماً بأني راح اغير الجلد حقت الابواب في فحص ال 5 الآف وراح اقولكم تحسن الوضع ولا لا .. لاني عبثت في الجلد حقت باب السواق يوم طلعت السياره من الوكاله
بالنسبه للرساوه ما اقدر اتكلم بصراحه لان الفرق شاسع بين السيارتين واقولها بالفم المليان التشارجر يتفوق بهذي الحاجه بنسبه 100 %


مشكلة الدودج تشارجر اقولها بصراحه هو الوكيل حقه نقدر نقول اذا ما تغثه وتجننة ولا ما تحصل صيانه مثل العالم والناس

ملاحظة غريبه !!
موقف حصل لي ولاحضت فيه احترام و تقدير موظفين الصيانه علماً باني جيت لهم وكنت منرفز ومتهاوش مع رئيسي في الدوام وحطيت الحره فيهم وقمت اسب واشتم بشكل غير طبيعي وعلى الصباح الساعه 8 ما ادري وشلون قدر يصبر على الشتايم وبالعكس جاب ورقه معاه وطلع للباركينق وشاف السياره معاي وسجل المشاكل الي عندي وكانت تافهه الى ابعد الحدود و وفر لي سياره بديله وكانت jeep موديل 2005 وقال اذا خلصت الصيانه بتصل عليك تجي تستلم السياره و بنفس اليوم الساعه 11 ونص اتصل علي وقال سيارتك خلصت تعال استلمها والحين هي في مغسلة السيارات طبعاً داخل الصيانه وبالفعل بعد نهايه الدوام الساعه 3 ونص رحت الصيانه واستلمت السياره وكانوا مصلحين كل المشاكل الي فيها وفوق هذا اعتذروا عن هذا المشاكل علماً بأن هذي المشاكل صارت بسبب سوء استعمالي للسياره وليست عيوب مصنعيه



العيوب الي لاحظتها بالتشارجر الي هذا الوقت
1- مافيه زينون ولا هالوجين علماً بأن السيارات الي في نفس فئتها متوفر فيها وكذلك الي اقل من فئتها نحصل الزينون فيه ,,
2- البنزين يدوي يعني ما تقدر تتحكم فيه وتفتحة من داخل السياره وهذا الشي نحصله في اسواء السيارات في العالم ..
3- الكبوت حق السياره لازم تثبته بعصا ..
4- يصعب التمييز بين ال 8 سلندر و ال 6 سلندر والفرق بينهم هو السته بشكمان واحد بينما ال8 بشكمانين .. السته بجنوط 17 بينما ال 8 بجنوط 18 وصعب انك تفرق بينهم بسهوله ..
5- العزل الصوتي ما كانت اطمح بهذا العزل وكنت متوقع افضل منه واعطية 8 من 10 يعني جيد جداً مرتفع وما وصل لدرجة الممتاز
6- صرفية البنزين داخل المدن اذا كانت رجلك غير ثابته على البنزين كانت عاليه شوي والسياره مشتني حدود 300 كيلو فقط


المميزات الي اعجبتني بالسياره ..


1- صوت المحرك الي كأنه صوت محرك طياره نفاذة اذا دعست البنزين بقوه والهدواء الاكثر من رائع اذا كنت رايق ..
2- لفت انظار الناس وشد انباههم بهذي السياره سواء كان الانسان صغير ولا كبير شايب ولا شباب رجال ولا ........... !!
3- رساوة السياره ولا اروع تحس انك ما تخاف من المنعطفات حتى لو كنت على سرعات عاليه ..
4- صرفيه البنزين على الخطوط الطويله اعتبره اكثر من رائع تعبي بنزين ممتاز 91 ( 70 لتر ) ب 30 ريال يمشيك في حدود 700 كيلو اذا كانت السرعه بين 120 – 190 وهذا من تجربتي ..
5- وجود 6 ايرباقات متوزعه على جميع الركاب
6- نظام مراقبة ضغط الاطارات الي متوفر في البي ام شي جيد جداً وتعتبر من المميزات في التشارجر ..
7- الجلد رائع والي يقول انه رديء انا اقول انت غلطان طبعاً انا اتكلم عن الجلد الي متوفر بالهيمي واعتبره انعم وافضل من بعض السيارات الفخمه ..


بضيف لكم بعض الصور بس ياليت تعذروني لان التصوير كان بالجوال والظهر والسياره مو نظيفه
ويا شباب ترى العين حق ويا ليت كل واحد يقول ما شاء الله تبارك الله


1


http://sul121.jeeran.com/photos/129008_l.jpg
2


http://sul121.jeeran.com/photos/129009_l.jpg
3


http://sul121.jeeran.com/photos/129012_l.jpg
4


http://sul121.jeeran.com/photos/129011_l.jpg
5
http://sul121.jeeran.com/photos/129010_l.jpg
انتهى موضوعي واتمنى اني ما قصرت معاكم ..
وآسف على اسلوبي السيء في وصف تجربتي ..
والي عنده أي سؤال انا حاضر للغالين ..

[عســـاف]

الله يعطيك خيرها ان شاء الله ويكفيك شرها

وماشاء الله .

اخوٍك . عســــآف .

[BLACK R/T]

جزاك الله خير اخوي عساف

وما قصرت على الرد السريع ..

وحياك الله معانا في المنتدى وتشرفنا بمشاركتك ..

[hmsnr]

يعطيك العافيه اخي الكريم الموضوع ويعطيك خير السياره ويكفيك شرها شكلا جميل من الخلف والامام لاكن لمن نجي لمواصفته مع تقديري لك ما يسوى سعره 131 الف شي مو بسيط احطه في سياره كذا بدون مواصفات مميزه فقط محرك الهيمي يعني هذا ماا اعتقد يسوى .

خذها برحابة صدر وجرب اللكزس ES وقارن بينها وبين الشارجر . ما اقول مب حلو الشارجر بس سعره غالي على الي فيه .


تحياتي

[إيسوزاوي]

نعـم الإخـتيار ..

مشكـور أخوي على التقرير و التجـربه لهالسـياره التحـفه .. والله يبارك لك فيها و يعطيك خيرها و يكفيك شرها

و أحب أنبهك لا تشـغل اسطوانات منـسوخه فقط أصلي .. لان المسجل حساس شوي و هالكلام من مجربـين .
ولو تكحل الجنوط عند الوكاله(أعتقد يسوونه بـ700 ريال) راح تعـطي السياره منظر أكثر من رائع

ســلام ,,

[C A D I L L A C]

مشكوووور على هذه طرحك لهذه التجربه

و اتمنى انك تتوفق في حياتك و تتهنى بسيارتك

بثبت الموضوع للفائده

مع اني تمنيت ان التجربه تكون اكثر تفصيلا

لكن ان شا الله التفاصيل في اجوبتك للاعضاء

[أنـــــس]

ماشاء الله تبارك الله ...سيارة وحشية روووعه

تبليها بالعافية..

بس لو كنت مكانك أخذت 6سلندر ب80ألف تقريبا يعني فرق 50 ألف لكن ماألومك عشان المحرك

تحياااااتي

[عمر الشهري]

ماشاء الله تبارك الله

الله يعطيك الخير ويكفيك شرها

تحياتي وتقديري

[LT_RAM]

ماشاء الله تبارك الرحمن

ايش الحلاوة دي...ماشاء الله

الله يبارك لك فيها ويعطيك خيرها ويكفيك شرها وشر الحساد...
تتهنى بها ان شاء الله...

مشكور على التقرير...

[salehhd]

السلام عليكم

ما شاء الله تقرير رائع لسيارة رائعة

كم اتمنى ان يحذو الاعضاء حذوك عند امتلاك سيارة جديدة بطرح موضوع يبين انطباعهم وملاحظاتهم لكي تفيد الاخريى في حال الرغبة في الشراء

مشكور على التقرير المتميز
صالح

[Concept]

ماشاء الله تبارك الله

الله يعطيك خيرها ويكفيك شرها

اللي يعجبني في هذي السياره شكلها المرعب والمتوحش والهجومي

لكن ليش ما اخذت 2006 اشوف مواصفاتها احلى على كلامك ان التحكم بالمكيف الكتروني

ولكن يمكن لتخفيف وزن السياره وجعلها رياضيه استغنوا عن الالكتروني !!

[BLACK R/T]

اخوي الغالي hmsnr (http://www.assayyarat.com/forums/member.php?u=36299) في البدايه مشكوووور على الرد ..

واشكرك على صراحتك .. وصدقني الى مثلك دوم في عيني كبير ويعجبني الي يعطي رايه حتى لو كان عكس الناس ولا يفكر في احد ..

وانا بقولك ليه ما فكرت في ال لكزس es

في البدايه انا عمري 21 وتوني ما فكرت بأني اصير رسمي وثقيل بالعكس ابغى الناس اذا شافتني تقول هذا شباب

وبعدين انا واحد من اعمامي معاه es 2005 الي هو (( كامري شيوخ ))

يعني ما اراح اكون اول واحد يطلع لكزس و عمي الكبير معاه ls ابيض 2007

و بعد خالي معاه فياغرا عنابي 2005

وهذا الشي الي خلاني ابعد عن موضوع الفخامه لاني ماراح اوصل مراحل الشيبان الي عندنا في العائله علشان كذا فكرت بالسيدان الرياضيه و اهتميت بالشكل الخارجي و قوة المكينه .. ووجدتها بالتشارجر ولله الحمد ..

---------------------------------------------------------------------------------------------------
اخوي الغالي ايسوزاوي

مشكووووور على ردك

وجزاك الله خير

واشكرك على النصيحه بالنسبه لموضوع السيديات المنسوخه بس انا حبيت اسألك وين احصل ام بي 3 اصلي هههههههههههههه
على العموم انا استخدم جميع السيديات منسوخه لان الأصلي اذا كان من روتانا ب 45 ريال والله حرام في سيدي بسمعه مرتين او 3 وانا اعرف بعض الشباب غيروا السيدي بعد ما اخترب على حساب الوكاله ببلاش (( زبدة الموضوع حلال عمك لا يهمك اذا اخترب اروح لهم يغيرونه لي ببلاش ))

ولو انك قريب مني كان عطيتك بوسه على راسك على موضوع تكحيل الجنوط لاني خاطري اكحلها بس ماني لاقي المكان وما توقعت الوكاله تكحل بس اذا وديتها الصيانه راح اسأل و ارد عليكم ..

__________________________________________________ __

اخوي الغالي C A D I L L A C (http://www.assayyarat.com/forums/member.php?u=3378)

مشكووووووووور على ردك وما قصرت

واشكرك كذلك على التثبيت

وان شاء الله ما نقصر مع الشباب من ناحية الاجابه على الأسئله و الاستفسارات ..

__________________________________________________

اخوي الغالي جذاب 18

مشكور على ردك ..

والله يعافيك

وش جاب الهيمي عن ال 6 والله لو ادفع 100 مو 50 بس !!

والله يرزقك ب تشارجر srt-8 و تطلع احسن مني ان شاء الله

______________________________________________

اخوي الغالي عمر الشهري

اشكرك على ردك

والله يعافيك

__________________________________________________ ____

اخوي الغالي LT_RAM

يعطيك ربي العافيه على الرد الجميل

وهذا من ذوقك يا الغالي

والله يعافيك

__________________________________________________ ___

اخوي الغالي salehhd

مشكور على ردك واتمنى الشباب يسمعون نصيحتك ونشوف التقارير الحلوة منهم علشان يستفيدون ونستفيد منها ..

وهذا من ذوقك يا الغالي

__________________________________________________ _________
اخوي الغالي Concept

مشكور على ردك

وال 2006 كانت افضل بكثير من 2007

2006 مانت قيمتها ب 109 الف وال 2007 ب 131 الف

لان 2006 كان عليها عرض بس 2007 ما عليها

و بحثت عن 2006 في الوكاله ما لقيت 2006 الا كحلي وانا كان براسي اسود والله كتب لنا ننتظر 2007 وناخذ الاسود

vbmenu_register("postmenu_1030249", true);

[ALBANDARIAH]

الله يعطيها خيرك ويكفيها شرك
:D

[الإدعشري]

ما شاء الله ..

مبروك ... الله يعطيك من خيرها ويكفيك شرها ..

تقرير مميز عن السيارة ..

كفيت ووفيت ..

[____TOTTI____]

الله يعطيك هيرها ويكفيك شرها
صراحة احسنت الاختيار
بس الله يسامح الوكاله
المفروض يزودو المواصفات ما ينقصوها
انا ماخذ تشارجر ار تي 2006
بالضافه للمميزاتك
جنوط مكحله
مكيف الكتروني
تسخين مقاعد
تحكم الكتورني في مقعدي ومقعد الراكب
تتقديم وتاخير دعسة البنزين
بـ 120 الف اول ما نزلت
افتكر في وكالة جده رابع واحد اشتري السياره
وانا اصلا من المدينه بس اخذتها من جده
واقول الحمد لله اني توفقت واخذت 2006
وباضيف شئ بالنسبه للمسجل
السياره لها معاي سنه
ما عمري حطيت سي دي اصلي
والمسجل شغال ما فيه شئ
لا تخاف انسخ سيدهات وحط
والله يعطيك خيرها ويكفيك شرها

[blue chevy]

الف الف مبروك
وبصراحة سيارة ملفتة للإنتباه ومتوحشة.

وتقدر تضبطها أكثر وتخليها رياضية اكثر بحيث تطلب قطع روعة من الانترنت

واحسن لك انك ما خذيت لكزس لأنها بصراحة نفس الكامري
حتى الجام مكتوب عليها تويوتا

اهم شئ راحتك النفسية
واللون الأسود رووووووووووعة واجرام
وسالفة الزينون هينة وتقدر تركب عادي
يعني لون اسود وزينون وصوت متوحش وثبات وشكل روعة
بصراحة الله يهنيك

بس لو يضبطون الداخلية تطلع السيارة روعة
والمكينة حسب ما سمعت ان هندستها المانية.



انا عندي كابريس اس اس

براسي اني ابيعها بسبب عدم توفر قطع تضبيط لها في الخارج مثل اكزوز وسبرنقات تنزيل و بريكات اقوى وهذي الأهم عندي
اما السيارة ماشاء الله روعة

قاعد افكر اني اشتري كمارو واضبطها
بس الحين موقف لأن الدوام راح يسفرني

ادخل هني وشوف القطع إلي تركب على سيارتك

http://store.summitracing.com/egnsearch.asp?SearchType=Make&N=700+4294908110+4294908099+4294780218+115+4294839 967


صاحبي خذا له موستنق 2004 وماشاء الله السيارة نظيفة وما يشتكي منها والحين يخطط انه يطلب قطع من بره مثل اكزوز وسبرنقات تنزيل ومعاونات على الغاز وبريكات اقوى ....الخ
وكلها قطع ذات جودة عالية بأقل الأسعار

[BLACK R/T]

اخوي ܌ܟ๛ (http://www.assayyarat.com/forums/member.php?u=43290)

اشكرك على ردك والله يعافيك ..

___________________________

اخوي الإدعشري (http://www.assayyarat.com/forums/member.php?u=42705)
مشكور على ردك
والله يبارك فيه
وهذا من ذوقك والتقرير ما صار مميز الا بتواجدكم

_______________________________________

اخوي totti2tti (http://www.assayyarat.com/forums/member.php?u=23915)
مشكور على ردك وكنت انتظر ردك انت بالذات و عضو ثاني الى الحين ما رد علي ولا يهونون الشباب الباقين فيهم الخير والبركه

تمنيت اني احصل نفس مواصفات سيارتك بس ما لنا بالطيب نصيب

واعتبر مواصفاتك احلى مواصفات نزلت على التشارجر والله يهنيك فيها يا الغالي ويرزقك ب srt-8

وانت رابع واحد يشتريها من جده هذا بحد ذاته تميييييييييييييز .. الله يحفظك يا الغالي

_________________________________________

اخوي الغالي blue chevy (http://www.assayyarat.com/forums/member.php?u=10595)

اولا اشكر على ردك

وثانيا مشكووووور على كلامك العسل يا عسل وهذا ان دل انما يدل على اخلاقك العاليه

وبالنسبه للون هذا من ذوقك

وانت معاي في اختياري للتشارجر و ابتعادي عن اللكزس (( انت كووووووووول ))

وبالنسبه للداخليه ان شاء الله بركب سستم نفيقيشن قريب بروح اشوف المحلات المعروفه وان شاء الله يركب يعني يركب قريب

وتبغى نصيحتي ترى الكابريس اس اس وحش وحش ولا عليه كلام و اذا السياره ما فيها شي انصحك لا تبيعها

واشكرك حبيبي على الموقع الرائع بس انا بفكر اعبث في السياره بعد 60 الف لاني شفت ار تي ماشي 7 الاف وقايمه المكينه عليه لانه مركب عليه قطع غلط وتركيب غلط وراح عليه ضمان الوكاله وشكل المكينه غاليه لان لها اكثر من شهر واقف في الصيانه بدون تصلح ..

________
vbmenu_register("postmenu_1030419", true);

[CHARGER_HEMI]

سلام عليكم

والله حبيت اقولك شيئين

الاول : يعطيك الف عافيييه على الموضوع صرحه كفيت و وفيت

ثانيا : الله يطعمك من خيرها ويكفيك شرها ان شاء الله

وعقبال ان ششاء الله البيت والحرمه ههههههههههههه :D

لا من جد الموتر ما عليه كلاااام موتر

اخوك ... |3|

[____TOTTI____]

تسلم حبيبي
وان شاء الله قريبا بنزل صور سيارتي
بوصف شامل لها
ولتجربتي معاها
لمدة سنه

[خبير سيارات]

الف الف مبروك ،، ماشاء الله السيارة روعة ،، احسنت الاختيار
انا طلعت نفس سيارتك بالضبط بس لون ابيض اخذتها بـ127600 درهم وحطيتلها جناح وحساسات خلفية بالوكالة
وعندهم فئة اعلى فيها تدفئة ومكيف الكتروني ودي في دي سعرها 135900
وفئة جنوطها مكحلة ومقاعدها رياضية سعرها 138000

[BLACK R/T]

اخوي CHARGER_HEMI

مشكور على ردك يا الغالي ..

وبصراحة انا الحين افكر جدياً يالحرمة والبيت الحمد لله موجود ..

وهذا من ذوقك يا ذوق

_________________________________

اخوي توتي

مشكور على منابعتك للموضوع والمشاركه معاي

وانتظر موضوعك على احر من الجمر ..

-----------------------------------------------------
اخوي خبير سيارات

الله يبارك فيك

والله يعطيك خير سيارتك ويكفيك شرها ..

وللأسف انا ما لقيت هذي القئات عندنا في الوكالة الي لقيه الدايتونا موديل 2006 وما فيه اسود بعد ..

اخوكم سلطان

[BLACK R/T]

آسف يا شباب على الاخطاء الاملائية الي بالرد السابق

لاني ارد على الموضوع من انترنت ارامكو داخل الشركة و الكيبورد مافيه حروف عربيه وكتبت الرد بطلعه الروح

آآآآآآآآآآآآآسف

[AHMED900]

أشكرك أخي الكريم على موضوعك الرائع وطرحك الشيق

بصراحة دودج تفوقت على نفسها في انتاج هذه السيارة

تشارجر سيارة جبارة بالفعل ويكفي تصميمها الذي يلفت الأنظار كما ذكرت

بارك الله لك فيها

[عبااادي]

ماشالله تبارك الله

الله يعطيك من خيرها ويكفيك من شرها


موتر والله يستاهل ماشالله كافي المحرك الجباااااااار

حتى اللون بصراحه احسنت الاختيار الاسود ملك الالوان ماشالله

تتهنا فيها يارب





تحياتي

[كيف الحال]

ما شاء الله تبارك الله
الله يعطيك خيرها ويكفيك شرها

[A L H A M O O R]

ماشاء الله تبارك الله ...

الله يعطيك خيرها ويكفيك شرها ...

وناقصها دبتين ويطلع صوتها يخوف ..

وبيني وبينك ترى الوجهية تخوف <<<< بسم الله علي :D

[BLACK R/T]

اخوي احمد 900

اشكرك على الرد ما قصرت ..

ومشكور على المدح في السياره وهذا من ذوقك ..

-----------------------------------------------------------
اخوي عبادي

مشكوووووور على ردك والله يعطيك الصحة والعافيه ..

وهذا من ذوقك الراقي ..

---------------------------------------
اخوي كيف الحال

مشكور على الرد

والله يجزيك خير ..

_______________
اخوي A L H A M O O R (http://www.assayyarat.com/forums/member.php?u=17724)

مشكور على الرد ..

وكل شي بوقته حلو يا حلو

لا تحرق جو المفاجأت الي افكر فيها

اخوكم سلطان

[Dr.Car]

أولاً: الف مبروك على السيارة وزين ما اخترت
وترى سيارتك مميزة غير باقي السيارات اللي بسعرها|6|

طبعاً يبغالك إضافات على السيارة أنا برأيي تبدأ بحساسات خلفية
تراها موجودة بالوكالة اصلية بس شغل اليد غالي شوي وهو 900 ريال قبل الخصم + قيمة الحساسات موجودة في قطع الغيار.

وتتهنى ياعم

بس لاتكثر دعس بالموتر لأنك بتحس بكذا:eek:

[a8j2]

الف مبروك

واحسنت الاختيار

والسيارة ماشاء الله تبارك الله كل مالها تثبت نفسها زيادة

انا معي السيارة مشتريها من شهر 3 عام 2006 وهي ار تي... والحمد لله السيارة اكثر من رائعة

من ناحية المسجل لا تحط الا السيديات الاصلية..لأنه خرب على مرتين ..(طبعا غيروه على الضمان)..

والصيانة اكثر من ممتازة ومعاملتهم راقية زي ماذكرت اخوي


ما اقول الا الله يعطيك خيرها ويصرف عنك شرها....وابعد عن السرعة .... وقد بحذر

[BLACK R/T]

Dr.Car (http://www.assayyarat.com/forums/member.php?u=43595) اخوي

مشكوووور على ردك يا الغالي ..

ومشكووووور على النصايح وقريب ان شاء الله بتبداء مسيرة التضبيط + التلغيم على اصول ان شاء الله بس انتظر ضمان الوكاله ينتهي !!

تحياتي لك

_______________________________________

اخوي
a8j2

مشكوووووووووور على ردك و انا ما شريت السياره الا بعد استشارتك ..
والحمد لله اني ان شاء الله توفقت بالاختيار ..
والصيانه الى يومك هذا حنا حبايب وان شاء الله دووووووم
وجزاك الله الف خيييييييييييير
اخوك سلطان

[أنـــــس]

اخوي عندي طلب بسيط ..

ياليت تصور لي داخلية السيارة في الليل أقصد نظام الإضاءة ومسجل الصوت..

أكون شاكر لك...

[azoOoz 100]

مشاء الله تبارك الرحمن

ونعم الاختيار

سياره حلوة وقويه وكمان اللون راكب عليها

والله يعطيك خيرها ويكفيك شرها

وتسلم يمناك ع التقرير

[رفيق الفورد]

الف شكر لك اخي الحبيب على الموضوع الرائع
واسئل الله ان يهنيك في سيارتك وان يعطيك خيرها ويكفيك شرها

[افالوني]

السياره جميله واحسنت الاختيار في اللون لأن هذا اللون هو الاميز...والتقرير اجمل
يعطيك العافيه اخوي

S.A.3 (http://www.assayyarat.com/forums/member.php?u=12164) http://www.assayyarat.com/forums/images/statusicon/user_offline.gif


افالوني vbmenu_register("postmenu_1030177", true);

[BLACK R/T]

اخوي الغالي جذاب بالنسبه للداخليه ابشر بالي يرضيك وقريب ان شاء الله تكون الصور في الموضوع اتمنى تعذرني لاني ما حطيتها لك الحين في هذا الرد لاني تعبان و كسلان .. والسياره بالكراج بعيد عني شوي (( على بلاطة سوداني بقوووه ))

اخوي عزوز

جزاك الله خير ..
ومشكور على ردك ..
ويشرفني مشاركتك معاي في الموضوع ..

اخوي رفيق الفورد
العفو وهذا من ذوقك يا الغالي ..
وجزاك الله خير ..

اخوي افالوني
مشكور على ردك ..
والله يعطيك الصحة والعافيه ..

اخوكم سلطان

[أنـــــس]

تسلم يالغالي...

وفي انتظار الصور نبيها في الليل..


بااااااااااااي

[Y A S S E R]

الله يعطيك خيرها ويكفيك شرها ولا تنسانا بالمعلومات المتجددة عن سياراتك من ايجابيات لم تكتشقها وسلبيات (ان شاء الله ماتشوفها)
ومشكور على الموضوع الرايق

[BLACK R/T]

اخوي جذاب 18 ان شاء الله ما يطول انتضارك والليله باذن الله تكون الصور قي الموضوع

اخوي تركي مشكور على ردك
وما يحتاج توصي ابشر بكل صغيرة وكبيرة

اخوكم سلطان

[وردة التوليب]

يسلمووووووووووووووووووو

[bxb111]

بارك الله فيك

[MATREX_430]

مبروووووووك الله يعطيك خيرها ويكفيك شرهاعندي لك سؤال مهم
يمكن ومحرج شوي :-)
السيارة تجيب طبلونها او يفصل عند ال 200؟
اتمنى تردي لي خبر لان ذا شي مهم عندي ذبحونا الكوامري

[faisal saad]

3- الكبوت حق السياره لازم تثبته بعصا ..... ممكن تشرح زياده

[BLACK R/T]

الاخوان وردة التواليب . BXB1 . ماتركس 430 . فيصل سعد مشكورين على الردود ..

والله يعطيكم العافيه ..

اخوي ماتركس السيارة تفصل بين 235 و 240 وانا اعتبرها احد العيوب بصراحة ..

واذا انت تملك تشارجر هيمي والله عيب تحط راسك براس سياره 4 او 6 سلندر مع احترامي للكامري ..

اخوي فيصل سعد وشلون اشرح لك يعني اذا فتحت الكبوت ما يثبت عند المستوى الي تبيه زي الكابريس او السيارات الي بمستوى التشارجر .. ولكن حاله حال الدتسن فيه عصا حديد موجود لازن ترفع الكبوت وتبته على هذي العصا ..

اخوكم S.A.3

[kaser_kr]

ما شاء الله تبارك الله

رووعه الله يعطيك خيرها ويكفيك شرها

[LT_RAM]

يفصل العداد؟

غريبه أنا شايف فيديو لتشارجر ار تي جايب طبلونه 260

محتمل يكون مبرمج السيارة أجل

[MATREX_430]

متاكد انها تفصل على 240 لاني سمعت انها تفصل على 200
حشا مو شارجر صارت ددسن
340 حصان وبالاخير يفصل عند 230
قوية
معقولة الكبوت يتثبت بحديده ومرتبة الراكب يدوي!!! شي غريب
ولا فيه حساسات صح؟
وبعدين عندي سؤال وش يفرق عن الكرايسلر 300 لاني ركبته من داخل ونفس الشي
الفرق الطبلون والساعه والشكل لكن الباقي زي الشارجر
ان بالوكالة شفت الكبوت ينفتح من غير عصا؟؟ انت شكلهم محولين سياررتك الى فل عندهم
:-) تقبل حياتي ياحلوووو

[أنـــــس]

يالغالي وين الصور..صدقني مشتاق أشوفها

ومشكوور

[T O R N A D O]

ما شاء الله ..

الله يعطيك من خيرها ويكفيك شرها ..

والله اللون الأسود مطلع التشارجر (( وحش ) وهي اصلاً وحش بدون الأسود ما شا ء الله

بس الله يعينك على التغسيل والخدوووووش :(

سلام

[راعي الصابونه]

صراحه ظلمواااااااا التشارجر ليش ماجابو ال SRT8 لان بيني وبينك التشارجر الحالي مايحط راسه براس الكابريس الSS
وبصراحه شكل التشارجر حلو جدا والله يوفقك وشكر على التقرير

[BLACK R/T]

kaser_kr (http://www.assayyarat.com/forums/member.php?u=25334)
اشكرك على الرد يا الغالي و ما قصرت


LT_RAM (http://www.assayyarat.com/forums/member.php?u=19318)
اولا اشكرك على الرد
والمقطع الي شفته اكيد راعي السياره مركب شيب كمبيوتر علشان كذا السياره ما فصلت والشيب سعره ما يتعدى 1600 ريال فقط ولكن للجنون حدود يعني الي يوصل لل 260 اعتبره بايع نفسه ..


MATREX_430 (http://www.assayyarat.com/forums/member.php?u=42080)
اخوي اولا مشكور على ردك ..
ثانياً اذا مكذبني روح صدق الي قالك 200 و لا تجي تتفلسف على راسي ..
340 حصان وبالاخير يفصل عند 230 <<< هذا علشان ال SAFTY مو معناها ان السياره ما تجيب 260 .. ومثل ما قالك اخوي الي رد قبلك مشرفنا يقول شاف تشارجر يمشي طبلونه 260 اذا بتكذبه هذا شي راجع لك

معقولة الكبوت يتثبت بحديده ومرتبة الراكب يدوي!!! شي غريب
ما غريب الا الشيطان بس للمعلوميه ان 2006 كان السواق والراكب كهربائي بالأضافه لنظام تدفئة المراتب بس علشان يفرقون بين الفئات سوو هذا الشي

وبالنسبه للحساسات ما فيه في الفئة الي اخذتها انا لاني كنت طفران يوم اخذت السياره ما كان معي الا 135 الف بس ولو كان عندي زيادة كان خذيت افضل من هذي الفئة

وبعدين عندي سؤال وش يفرق عن الكرايسلر 300 لاني ركبته من داخل ونفس الشي
انا ماني مصدقك وش جاب التشارجر عند السي 300 ..
اذا انت فاضي اروح انا وياك الوكاله ونشوف الفرق بالضبط ..

طيب انت شفت الكبوت ينفتح من غير عصا ليه تسألني .. يعني مسوي تحرجني بس معليش بقولك انت كذااااب هههه لأن الفئات كلها تتثبت بعصا يا حلو .. وتبغاني اوريك العصا ما عندي مشكله نقابل و اوريك العصا واذا شفت العصا بعيونك بتصدقني بعدين ..

عندي سؤال بس ياليت تجاوب عليه
كم عمرك ؟؟

واتمنى تكون لبق بأسلوبك حبيبي علشان يسود الاحترام بيننا

اخوي جذاب الصور في الرد الي بعد هذا وآسف على التأخير
************************************************** ***************************************
اخوي تورنيدو

مشكوووووور على ردك حبيبي

والله يعطيك العافيه
************************************************** **********************
اخوي راعي الصابونه
مشكور على ردك والتشارجر 340 حصان و ال اس اس 325 حصان بس وزن التشارجر ثقيل شوي و السيارتين متقاربتين والي يحكم هو السواق ..

وال SRT-8 في بطنه 425 حصان ولا يقارن بال اس اس ابداً

تقبلوا تحيات اخوك S.A.3

vbmenu_register("postmenu_1040124", true);

[عنبري]

عندي بس سؤال واحد ،، لفت نظري ستكر السياره

إنت موظف أرامكو؟ :)

[فيصل بن محمد]

بالنسبة للسرعة القصوى للتشارجر شي مؤكد بانه تصل الى 260 او اكثر وعامل الهواء له دور في السرعة


القصوى


الفكتوريا وهو 265 حصان يصل الى 235 في حالة لايوجد فاصل


على طاري العصا تدرون بان العصا افضل من الناحية الاقتصاديه يعني مايخرب ابد بعكس المساعدات

اللي كل فترة تخرب



واخيرا تراى مايضر التشارجر اذا كان الكبوت يرفع بعصا واكيد العصا هذا حاطينه علشان اللي يعصي التشارجر


تقوم تمحطه فيه ههههههه




المهم والاهم ان يكون الحوار والنقاش باحترام وتقدير ودون مناوشات ومهاترات لافائدة منها


وبعد ذلك يصبح الموضوع غير لائقا اخلاقيا


والله يحفظكم

[BLACK R/T]

اخوي عنبر ما شاء الله عليك ..

عيني عليك بارده قدرت تقز الاستيكر ..

على العموم انا موظف ارامكو والوالد موظف ارامكو وعمي موظف ارامكو .. ههههههه العائلة الكريمة كلها !!

................

اخوي فيصل سبورت

مشكور على الرد

وبالنسبه للفورد اذا كان سبورت يمشي 190 ويفصل بس الضغط يكون على 2 او اقل شوي يعني اذا ما فيه فصله انا اجزم انه بيوصل 260 بالراحة ..

على العموم السلامة اولاً ..

اخوك s.a.3

[الكاسر2004]

السياره حلوة ما عليها كلام بس عندي كم استفسار
صحيح ما اقدر افتح البانزين من داخل السياره ؟ يعني كل مره بعبي بانزين لازم انزل من السياره وافتح البنزين او كيف ؟
حاب اسأل عن قطع الغيار ؟ هل هي متوفره عند الوكاله فقط ؟ او احصلها في اماكن ثانيه ؟ كيف اسعارها غاليه او معقوله

مشكورين

[a8j2]

التشارجر ار تي تجيب ال 260 زي سلا عليكم...

بس العداد مفصول الكترونيا عند 232

يعني ممكن تفك العداد وتجيب ارقام كبيرة...


اما من ناحية العصا.. فما اشوفها شي مره مهم يعني انت بتسوق فوق المحرك ولا داخل السيارة؟؟

من ناحية المواصفات ... فمواصفات 2006 افضل من 2007

والسيارة جدا ادائها رائع ولا يعاب عليه

[BLACK R/T]

اخوي الكاسر 2004 ..

مشكور على الرد يا الغالي ..

وبالنسبه للبنزين ما يحتاج تنزل من السياره ولا حاجة الهندي الي بيعبي البنزين هو الي بيفتحة ويعبي ..

يعني بدون مفتاح يدوي (( يعني على بلاطة كل من هب ودب يقدر يفتح غطاء البنزين ))..

بالنسبه لقطع الغيار على كلام الصيانه قبل شهر انها متوفرة واذا فيه قطعه مو موجوده يطلبها لك من الأداره الأقليميه في الشرق الاوسط (( دبي )) وعلى كلامه 4 او 5 ايام وتكون موجودة ..

وبالنسبه هل هي متوفره عند الوكاله بس انا كنت امس على شارع الملك سعود بن عبدالعزيز بالدمام واشوف لوحات محلات مكتوب عليها دودج كرايسلر و جيب .. لبيع قطع الغيار الأصليه ..

وبالنسبه للأسعار ما ادري بالضبط لاني ولله الحمد ما احتجت اغير شي الى هذا اليوم والسياره ماشيه 8360 كيلو ..

الي سألت عنه شي واحد وهو الأقمشه (( الفحمات )) وقالي الأماميه 480 .. يعني اشوف السعر نوعاً ما ممتاز جداً .. ما احتجت اغيرها بس احتمال اغيرها مع فحص 50 الف لأن رجلي قاسيه على البريك بشكل غير طبيعي ..

اخوي a8j2 يعطيك العافية على الرد
وما يحتاح اعقب على كلامك لانك تملك تشارجر هيمي
وبالنسبه للعصا ماهي عيب بس ملاحظة ..

اخوكم سلطان

[أنـــــس]

أخوي سمعت أن التشارجر مايقبل سي دي نسخة لابد من أصلي

هل هذا صحيح وياليت تخبرنا عن مدى رضاك عن الصوت أقصد السماعات وقوتها وصفائها

وكيف العزل من الداخل خصوصا بعد 120كم

مشكوووووور

[head shot]

اخوي بسالك هل الsrt8 تجيبها الوكاله ولو طلبية ؟ وكم سعرها ؟

[BLACK R/T]

اخوي جذاب ادري انك زعلان لاني ما نزلت الصور بس الظروف ما ساعدتني بس اوعدك قريب !!

بالنسبه للعزل اشوفة جيد جداً مرتفع

بالنسبه للسيدي انا كل الي مركبها مو اصليه عاديه والحمد لله شغاله معاي ..

اخوي هيد شوت

الفايبر لو تطلبها يجيبونها لك وشلون التشارجر

والسعر في حدود 180 الف والله العالم ..

اخوكم سلطان

[أنـــــس]

مشكووووور عزيزي على الإفادة


وخذ راحتك بالنسبة للصور بس لاتنسانا

ألف ألف شكر

[MATREX_430]

مرحبا اخوي SA3
انت وش فيك معصب انا ماتكلم عليك ولا كذبتك ولا شي
واسلوبي لبق ياحلو ولا اخطيت عليك
انا قاعد اسألك عن السيارة من خلال تجربتك
واسالتي ماكان فيها شي بس مادري وش الاسلوب اللي تبي الواحد يكلمك فيه
وكلامي صحيح مافيه شي لما استغرب ليه ذي بعصا وذيك بلا عصا
ولمعلوميتك انا من اشد المعجبين بتشارجر ولا اذم فيها ... وبعدين انا لا ابي احرجك ولا شي
مادري شفيك حاط دوبك ودوبي .. انا لما قلت شفتها تنفتح م غير عصى يعني هل فئات تنفتح بدون عصا
وفئات بعصا بس لا اكذبك ولا شي

وكلامي لك ... لما قلت.. ماهنا فرق بين الكرايسلر 300 والشارجر وانا صادق
وش الفروقات اللي تشوفها
مافي فرق الا .. البودي الخارجي وانور الزينون
المكينة نفسها القير نفسه.. الجلد نفسه المسجل نفسه المكيف نفسه
حتى الجنوط نفسها

وعمري حتى بس اجاوبك على حيرتك 27

[seraj_9196]

أهلين حبيبي ...........

S.A.3 (http://www.assayyarat.com/forums/member.php?u=12164)

أحب أهنيك على السياره
يعطيك خيرها ويكفيك شرها



بصراح انت عندك ذوق في الاختيار السياره واللون كمان
ما شاء الله
-----------------

حبيبي انا بصرحه ناوي على هسياره 80 في الميه ونشاء الله خلال بداية الاجازه

أكيد RT
بس حبيبي ممكن من سؤال

كيف راحة الكرسي فيها ---------------- لاني كل سبوع جاي من الرياض لدمام يعني هل 4 ساعات على الخط مريحه ..

هل تتطول وقت تسخينها------ سمح لي على هذا السؤال الغبي لاكني والله متعقد من الاتيما لمعاي

كيف قوة مسجلها... أقصد الصوت ..

وعزمها كيف ...

ورايك هل تنفع لسنوات طويله لاني أبيها حق 8 سنوات قدام...

واهم شي كيف الامان فيها ...

وممكن حبيبي تقرنها لي بأي سياره ....

في النهايه هل سعرها فيها لان بصراحه في سيارات كثيره بنفس السعر وموصفات اعلى مثل is
لاكن اكيد مو بشكل الخارجي طبعا ..

ياريت حبيبي تجاوب عليي لاني والله متحمس قوه على هادي السياره ..

مو شكلي مصختها ......

IM WETING U

[LT_RAM]

وكلامي لك ... لما قلت.. ماهنا فرق بين الكرايسلر 300 والشارجر وانا صادق
وش الفروقات اللي تشوفها
مافي فرق الا .. البودي الخارجي وانور الزينون
المكينة نفسها القير نفسه.. الجلد نفسه المسجل نفسه المكيف نفسه
حتى الجنوط نفسها



كثيرة جدا الفروقات..بين التشارجر والــ 300 سي
الشاشة الدي في دي
والزينون
ونوعية المقاعد وتدفئتها
وكرسي الراكب الكهربائي
والمساحات الحساسة للمطر
والدركسون الكهربائي والدعاسات الكهربائية
والتخشيبة الفاخرة
والحساسات الخلفية
والمرايات القابلة للتظليل تلقائيا
وشكل العدادات
واختلاف بسيط اعتقد في شكل المكيف
ونظام التعليق حسب علمي يختلف

:)

[BLACK R/T]

كيف راحة الكرسي فيها ---------------- لاني كل سبوع جاي من الرياض لدمام يعني هل 4 ساعات على الخط مريحه ..

بصراحة انا اعتبرها مريحة جداً وتنفع للخطوط اكثر من البلد

هل تتطول وقت تسخينها------ سمح لي على هذا السؤال الغبي لاكني والله متعقد من الاتيما لمعاي

لا التسخين ما يطول واذا انت من النوع الي مثلي تنتظر السياره تسخن بالكامل وتوصل درجة الحراره لأعلى مستوى
بالنسبه للشتاء 11 دقيقه هذا اقصى وقت
بالنسبه للصيف 5 الى 7 دقايق ..

كيف قوة مسجلها... أقصد الصوت ..

جيد ولكن ما يوصل للممتاز

وعزمها كيف ...

العزم ممتاز ولا ودي امدحها واجد علشان ما يقولون جلس يمدح بسيارته واذا حاب تجرب عزمها فيه محلات التأجير موجوده وسعر اليوم 400 ريال خذها والعن مندوبها وشوف يطيح الحطب الي براسك ولا لا هههههههههه

ورايك هل تنفع لسنوات طويله لاني أبيها حق 8 سنوات قدام...

تنفع اذا كنت محافظ عليها اما بتلعب فيها راح تخدم معاك 3 سنوات وبعدين بيبداء موال قطع الغيار والصيانه هذا اعتقادي ..
واهم شي كيف الامان فيها ...

بالنسبه لنظام الرساوه اكثر من ممتاز واذا كنت تعرف خط الجعيمه الى فيه منعطفات واجد هذا امشي عليه 150 و 160 بدون ما اهدي والحمد لله ثابته تماماً طبعاً بشرط يكون التركشن كار شغال اذا فصلته قول على الدنيا السلام ..


وممكن حبيبي تقرنها لي بأي سياره ....

والله ما ودي اظلم التشارجر ولا اي سياره ثانيه ما اقدر اقارنها

في النهايه هل سعرها فيها لان بصراحه في سيارات كثيره بنفس السعر وموصفات اعلى مثل is
لاكن اكيد مو بشكل الخارجي طبعا ..

انا اجزم لك انك ما راح تندم على ريال واحد دفعته فيها وخذ هذا الكلام من اخ لك
ياريت حبيبي تجاوب عليي لاني والله متحمس قوه على هادي السياره ..

مو شكلي مصختها ......

لا لامصختها ولا حاجة واي اسئله أخرى انا حاظر


اخوي LT_RAM مشكور على التوضيح لاخونا ماتركس

[دكتور / مجنون]

كأني شايف سيارتك بالجبيل او على خط الجبيل الدمام

[seraj_9196]

S.A.3 (http://www.assayyarat.com/forums/member.php?u=12164)


مشكور والله ....


بصرحه ماقصرت الاجوبه واضحهو كافيه مشكور ..


خلاص نشاء الله تشارجر تشارجر غيرها والله مافيه ..............


وانت حبيبي عقبال SRT8


-----------------------------------

جاي جاي ياتشارجر.. :)

[BLACK R/T]

اخوي دكتور / مجنون

انا ساكن بالجبيل واشتغل ب شركة ارامكو ب رأس تنورة و الخميس بالعادة اكون بالخبر

اخوي سراج بالتوفيق يا الغالي وانصحك يا الابيض او الاسود ..

ومبروك مقدماُ

اخوكم سلطان

[MATREX_430]

هلا اخوي LT RAM
الفروقات اللي قلتها بس لمسات تحسين وتجي بالشارجر لو طلبتها نفس المواصفات
انا شايف بالوكالة شارجر بدفي دي ونفس المقاعد وتسخينها.
بنشبة للتعليق فالتعليق واحد
شف كتاولج كل سيارة وبتلقاه نفس نظام التعليق
الطبلون معك يختلف
بس السماعات والمكيف والسيتم كام مثله
بالنسبة لمرتبة الراكب بس الموديل ذا صار عادي بس يجي الكتروني لو طلبته
دودج وكرايسلر مثل الشفر والجمس
المكاين والقيورنفسها تختلف اللمسة الداخلية والشكل الخارجي
لذلك ماشوف في فرق كبير بين الثنتين بحيث يكون الفارق بين السيارتين 30 او 40 الف
اتمنى فهمت مقصدي يعني تقريبا مثل ال300 بس فيها بعض اللمسات مثل ماتفضلت بالخشب والحساسات
حتى الشارجر يجي فيه حساسات
اللي قلتها حبيبي تعتبر لمسات تحسينية تجي بالشارجر بالطلب
وثلاث ارباع اللي قلتها في الشارجر التسخين . الحساسات.الكرسي الكهربائي للراكب.. الدركسون الكهربائي

[LT_RAM]

هلا اخوي LT RAM
الفروقات اللي قلتها بس لمسات تحسين وتجي بالشارجر لو طلبتها نفس المواصفات
انا شايف بالوكالة شارجر بدفي دي ونفس المقاعد وتسخينها.
بنشبة للتعليق فالتعليق واحد
شف كتاولج كل سيارة وبتلقاه نفس نظام التعليق
الطبلون معك يختلف
بس السماعات والمكيف والسيتم كام مثله
بالنسبة لمرتبة الراكب بس الموديل ذا صار عادي بس يجي الكتروني لو طلبته
دودج وكرايسلر مثل الشفر والجمس
المكاين والقيورنفسها تختلف اللمسة الداخلية والشكل الخارجي
لذلك ماشوف في فرق كبير بين الثنتين بحيث يكون الفارق بين السيارتين 30 او 40 الف
اتمنى فهمت مقصدي يعني تقريبا مثل ال300 بس فيها بعض اللمسات مثل ماتفضلت بالخشب والحساسات
حتى الشارجر يجي فيه حساسات
اللي قلتها حبيبي تعتبر لمسات تحسينية تجي بالشارجر بالطلب
وثلاث ارباع اللي قلتها في الشارجر التسخين . الحساسات.الكرسي الكهربائي للراكب.. الدركسون الكهربائي


طيب وهذا في كل الشركات نفس السيارة وحده فخمة والثانية عادية...
مثل لكزس وتويوتا ونيسان وانفينيتي وفورد وميركوري

وأنا اتكلم عن المواصفات اللي تجي شد بلد...
وهذه اضافات ومواصفات ماهي قليلة...
والتشارجر ستوك ماتجي فيه نص المواصفات هذه...
والتشارجر 2006 كان فيه مواصفات أكثر تسخين وخلافه...

[أنـــــس]

وش رايكم في اللون الأحمر للتشارجر خصوصا الهيمي....!!

[HEMI - LOVER]

اذا بتاخذ شارجر نصيحة خذ شارجر هيمي غيره لا

[BLACK R/T]

اخوي جذاب انا اقدر اللون الاحمر بس يعتبر غير رسمي يعني شبابي اكثر وتبغى نصيحتي غير الاسود والابيض لا تاخذ

اخوك سلطان

[راعي الشارجر]

هلا والله اخوي sa3 صراحه كفيت ووفيت وشرحك روعه وكافي ووافي بس لى بعض التعليقات على بعض النقاط اذا ما عندك مانع

الشارجر طال عمرك الى موجوده في السعوديه مواصفاتها اجباريه من هيئة المقاييس وعلى فكره تري كل ما زادت الاكسسوارات فيها زاد سعرها فهم يريدون التسويق للسياره ونشرها ومن ثم تكمله مواصفاتها مثل ما شفنا السي 300 وكيف كانت بدايتها بالسعوديه وقطعها المبالغ فيها هذا من جهه والا شوف المواصفات الى تجي بالشارجر الستك 6 سلندر هي نفس مواصفات ال rt عندنا وغير كذا ما جابو ال SRT لسعوديه من الوكاله لان فيها تجهيزات رياضيه وبيكون سعرها غالي وبكذا ما راح تجد كل هالانتشار الحاصل هالايام وشوف انت داخليه الشارجر ال SRT الموجوده في نادي السيارات الرياضيه بالرياض تشوف العجب
مواصفات مو في السي 300 SRT الى عندنا لا اطيل عليك ويعطيك الف عافيه على شرحك اخوك راعي الشارجر

ملاحظه

الون الاحمر احسن الالوان على الشارجر وشوف حتي الاعلان حقها جاي على الاحمر مو ابيض والا اسود
خخخخخخخخخخخخخخخ

[اكورداوي]

التشارجر سياره رياضيه جباره فعلا ..... عندنا في الامارات كان في واحد من الشباب عنده تشارجر ار تي 2006 وكاله يسابق لومينا اس اس 2006 عليها اجزوزت سيستم . القومه كانت من اشاره لاشاره (تقريبا 400 متر) .التشارجر قدم على اللومينا بمسافه مترين تقريبا !!!!!

اللي ابي اقوله هو ان التشارجر مع وزنه الثقيل قدم على لومينا عليها اجزوزت سيستم !!!!!!

الصراحه قوي لا بعد الحدوود


بالنسبه لالوان اللي تعجبني هي (من الاحلى الى الاقل حلاوه)

الاحمر
السيلفر
الاسود

وبس

[زياد بن محمد]

نحن بانتظار الصور

[World of silence]

انا صراحه ماعندي خبره بالتشارجر بس اموت واعرف مرات الشوف تشارجر لون الشبك نفس لون السياره ومرات اشوف لونها نيكل مثل اللي عندك وش الفرق بينهم

وبغيت اعرف الفل اوبشين باتشارجر بالسعوديه كم سعره لاني سمعت الي فيه انواع ماتنزل السعوديه

ومشكور على اموضوع

[تركي بن احمد]

ماشاء الله تبارك الله

الله يعطيك الخير ويكفيك شرها

[GTA_IV]

ماشاء الله تبارك الله يعطيك خيرها ويكفيك شرها
لكن انا ماشوف هذي عيوب ان مافيها زنون او مكيف الكتروني وغيره
لاني اشوف انها سياره رياضيه والسياره الرياضيه تكون خاليه من الفخامه وهذا شي طبيعي


لكن عندك الـ SRT هذي تلقى فيها فخامه وشايف فيها شاشه لكن مدري فيها نفقيشن ولالا
لاني شفتها واقفه

يعطيك العافيه