للي يعرف لـ c5 يالربع

[nssar]

السلام عليكم


هذي اول مشاركة لي معكم اخواني في هذا المنتدى الرائع واللي سمعته ماشاء الله واصلة لآخر الدنيا :eek:



انا نويت اخربها واشتري c5 وعرفت انه من موديل 97 الى 2004 والـ c5 التغييرات فيها خفيفة





فياريت تعلمونا بأسعارهم ومميزاتهم ,, انا لقيت وحدة 1999 يبيها راعيها بـ 95 الف ريال سعودي



وقالي اذا تـبي تشوف c5 اكثر





تعال لي يوم السبت الجاي وانا ان شاء الله رايح له بس حـبـيت اخذ معلومات عنها قبل الروحة وياريت





تعلمونا عن القوة ( ستوك ) ومستواها كيف يكون مع السيارات الاخرى وعلى الخرابات هل هي كثير ام لاتوجد





عارف اني ثقلت عليكم بس انا لما سألت دلوني على المنتدى الطيب وقالوا لي بتلقى عندهم كل ماتامر عليه |1|







اخوكم نصار

[الوليد الطائر]

اهلا وسهلا بك كعضو في منتدى السيارات ..

نعم الـ C5 جى من موديل 97 الى 2004 والتغييرات اللي صارت عليه جدا بسيطة اهمها الجنوط واضافة الوان جديدة وتغييرات بسيطة في الداخل مثل زر تشغيل واطفاء الايرباج للراكب .. بالنسبة لسعر السيارة 95 الف على موديل 99 فهو غالي شوي ولو كان موديل 2000 لكان أفضل لان موديل 2000 توجد منه الوان اجمل اضافة الى ان الجنوط تختلف واذا كان خليجي جى مواصفاته افضل..

بالنسبة لمواصفات الكورفيت فهي كثيرة ولكن اذا بتدفع فيه فوق الـ 90 الف اهم شي يكون ماشي مسافة قليلة وتكون مواصفاته الداخلية فل اوبشن ومنها : مكيف الكتروني وتحكم مستقل لدرجة الحرارة للراكب والسائق. يوجد به مشغل اشرطة كاسيت مع وجود سيدي في الخلف . مقعد السائق يتحرك كهربائيا مع وجود ذاكرة .. يحتوي على شاشة عرض اللي تظهر لك السرعة وكمية البنزين على الزجاج الامامي " لا داعي للانشغال على الطريق بالنظر الى العدادت " .. احرص كل الحرص على ان تكون اطاراته من نوع Run flat لان الكورفيت لا يحتوي على اطار احتياطي.. بالنسبة للمشاكل والخرابات فالكورفيت يعتبر اقل مشاكل لو قارنه بالكمارو مثلا اضافة الى ذلك ان جودته التصنيعية عالية جدا والمواد الخام المستخدمة في المقصورة الداخلية ممتازة... طبعا نسيت شي وهو ان مقاعد الكورفيت في منها نوعين النوع الاول وهو الاقل لا يحتوي على فتحة عند مسند الرأس اما النوع فتوجد به هذه الفتحة فأحرص على ذلك .. لكن اذا كانت السيارة خليجية فهي فل اوبشن

[nssar]

مشكور اخوي الوليد الطائر على هذه المعلومات التي فادتني كـــثـير

الحمدلله السيولة متوفرة لكن مثل ماتقول ابي ادفع في شي يستاهل

شفت الصور على الـنت ولقيت الفروق لا تُذكر تقريبا ً ولكن من الداخل الله العالم

بس سؤال لو تكرمت هل الهاتشباك تجي فيه فتحة مثل السيارات العادية مثل الكابريس واللومينا ...

وبالنسبة للفل اوبشن هل يفرق سعره كثير عن الـعايدي




وهذا موديل 1999

http://images.securedwebform.com/stock/300/chevrolet/corvette/1999/2co.jpg

وهذا موديل 2000

http://www.fantasycars.com/derek/cars/images/chevrolet/c5_6.jpg

[aldoob88]

طبعا الكورفيت سيارة ماتحتاج كلام قديمه كانت او جديدة انا اشوف ان 95 الف على 99 كثيرررررررررر مرة انا لقيت في معرض اسفار بجدة وحدة الى يومك هذا موجودة استعمال امريكي فل اوبشن موديل 2003 ب 115 الف فابلة للتنزيل ومبروك مقدما

[الوليد الطائر]

العفو وهذا واجبنا ...

الكورفيت بالنسبة لانواع السقف فأنه يتوفر منه ثلاثة انواع :
1- الهاتشباك : وهو الاكثر انتشارا وهذا تجي فتحة تارجا اي ان السقف تشيله وتحطه في الشنطة ويصير سقفها مفتوح وهذا يعتبر افضل نوع لانه يعطيك حسنات الهاردتوب والسوفت توب " مكشوف"
2- الكشف : طبعا جماليا يعتبر افضل من الهاتشباك ويجي سقف قماشي يفتح بشكل يدوي
3- الهاردتوب: هذا نادر الوجود عندنا في الخليج وطبعا هذا مصمم في الاساس لسيارات التزويد والشرطة وموديل Z06 . وطبعا يختلف عن الهاتشباك في عدة امور وهي : لا يمكن فتح السقف يعني سقفها مثل اي سقف سيارة سيدان . الامر الثاني توجد بيها شنطة حقيقة يعني باب الشنطة يفتح مثل السيارات السيدان على عكس الهاتشباك اللي تفتح فيه الشنطة وترتفع معاها الزجاجة الخلفية للسيارة .

بالنسبة للاسعار فهي تتفاوت وتختلف على حسب نظافة السيارة والمنطقة الموجودة فيها يعني لو كانت في المنطقة الشرقية فالسيارة بتكون غالية ولكن في نفس الوقت سيارة نظيفة ومحترمة خصوصا اذا كانت من القطيف وفي المناطق الثانية مثل الرياض او جدة تكون ارخص

[الوليد الطائر]

ما اعتقد ان السعر يفرق كثير لان غالبية الناس ما تدقق في هذه السيارة على المواصفات لان مثل ما تعرف زباينها قليل والامر الثاني اذا كانت السيارة مستعملة يكون تركيز الزبون على نظافة السيارة وخلوها من الحوادث وان محركاتها سليمة ومو ملعوب فيها ... عموما اذا لقيت كورفيت خليجي فمواصفاته فل اوبشن

[nssar]

مشكور عزيزي aldoob88 وانا ان شاء الله ادور ويمكن القى ارخص من اللي لقيتها أول مرة :-)

_____________________

عزيزي الوليد الطائر , انا حالياً في الشرقية فقط لزيارة الاقارب وراجع الرياض وان شاء الله ادور هنا وفي الرياض كمان وراح
اركز على نقطة الفل اوبشن .. مشكور عزيزي مرة ثانية على المساعدة

[بو العابد]

الكوبيه اللي يجي قزازه كبيره وراه هذا ينفتح السقف حقه كامل أما الهاردتوب يجي نوعين 99 -2000 هذا أقل درجه قير عادي السقف ما ينفتح أما موديل 2001-2004 هذا Z06 ماكينته LS6 اما الباقي LS1
السعر غالي 95 ألف على 99 واجد

[blue chevy]

اخذلك من موديل 2000 فما فوق

يفضل

[nssar]

طيب مشرفنا ؛ ابو العابد ؛

اسعار 2000 وطالع في حدود كم ,

يعني الاسعار المتعارف عليها في السوق ؟؟

======================================

وهل هناك فرق في القوة من موديلات 2000 الى 2004 ؟

وهل كلها تجي zo6 ??!!

ومشكورين يا اخواني وتحملوني على كثرة الاسئلة

[THE CORVETTE]

اخوي z06 من 2001 الى 2004 بالنسبه لـ c5
وسعر الـz06 يبدأ تقريبا من 140 الف وفوق
اما سعر 2000 فراح تلقاه في حدود 100 الف واذا كان كشف راح تحصله يمكن 110 او 115

هذا اللي اعرفه واتمنى اني ساعدتك ولو القليل وانشالله الاخوان راح يساعدونك اكثر

[husain_2000]

كلامك صحيح يا اخوي THE CORVETTE و بالنسبه لك يا اخوي نصار اذا كانت السيارة 99 كشف فسعرها مناسب اما اذا فتحه فهو غالي لاني محصل 2000 فتحه سعره حوالي 98 الف و اذا كان وارد امريكا فلا تاخذه لان القطع حقه تختلف و الوكاله ما تستقبله انا لما وديت سيارتي الوكاله اول مرة على طول قال لي اذا وارد امريكا ما نستقبل بس انا سيارتي خليجيه فاستقبلوها عادي و ثاني شي خل في بالك ان بعض القطع ما راح تحصلها يعني يمكن يقول لك طلبيه من امريكا و تتأخر عليك القطع و على العموم مبروك مقدما.

[nssar]

مشكورين حبايبي وان شاء الله خلال اسبوع ناوي على zo6 واول ماشتريه طبعا ً راح اكتب عنه موضوع في هذا المنتدى المميز

ومشكورين اخواني على هذه المساعدة

[BFHvette]

اخوي في واحد 2002 وكاله موصفات كامله نظيف ما شي 40000كم باقي في ضمان الوكاله سنه حق واحد رايق
ما يدعس كثير نظيف نظيف نظيف
بس ما يبي يبيع لاكن اعتقد لوجاله عرض جيد يوافق

[BFHvette]

علي فكره معاه قطع اقزوس كامل وبكر وبلف حراره واطي

[BERSERK]

هلا أخوي nssar سعرها صراحة غالي لأن
أعرف واحد بايع كورفيت كشف 98 اندينابلوس سبيشل ايديشن النادرة بسعر 60000ريال وماشية 25000كم ونظيفة