عضووو جديد ويطلب مساعدتكم ..........

[S 600 L]

السلام عليكم

كيفكم

يسعدني الانضمام لهذا المنتدى الرائع ....

انا في الحقيقه اريد شراء سياره عائليه كبيره للاهل ومحتار في السيارات ....

وحاط عيني على الجمس الدينالي فاابغى معلومات وصور عنه واسعاره ؟

ووش الفرق بينه وبين السوبربان العادي ؟

وكيف تحمله للسفارات والخطوط من ناحية العزم والثبات وعزل الصوت ؟
وكيف صيانته وقطع غياره واسعارها ؟

يعني كل شي عن السياره

وبكون شاكر لكم مقدما


واسف على اطالة الاسئله

تحياتي.........

[V-I-P]

نصيحه ابعد عن الامريكي

بتقول عشانه وسيع من داخل عندك الارمادا نيسان اتوقع انه اوسع منه
ومن ناحيت الصبر مايحتاج يكفي انه ياباني
ومن ناحيت صرف البنزين من صالح الارمادا ايضا
ومن .............. كل شي الارمادا افضل

اما السعر المشكله اني ماأعرف سعر الارمادا

نصيحه قبل ماتستعجل رح شفه بالوكاله

[S 600 L]

يعطيك العافيه

وشكرا على النصيحه لكن الياباني مافيه راحه مثل الامريكي كان عندنا لاندكروزر موديل 2000 وماكان مريح

عموما اشكرك على طرح رايك وسرعة الرد

وين اصحاب الجموس والاعضاء الي عندهم خبره ترا مانستغني عن ارائكم

[كابـــSSـــرس]

V-I-P

انا في الحقيقه استغرب ردك

الاخ العزيز يقول ابغى مواصفات والفروق وانت تقول ابعد عنه

الرجال من كلامه انه انشاءا لله ناوي على واحد

ولكن انا اسئلك وبكل امانة ؟

هل الراحه الموجوده في الجمس تقارن بلاندكروزر الي هو المنافس الياباني الوحيد للجمس

وكذلك هل صرفية الجمس مثل لاندكروزر الجمس تراه مايصرف مثل صرفية لاندكروزر

ويالغالي انشاءا لله اجيب لك معلومات وكذلك الاخوان مهوب مقصرين

لكن بأجاوبك على بعض الاسئلة بما ان عندي جمس 2001

وكيف تحمله للسفارات والخطوط من ناحية العزم والثبات وعزل الصوت ؟

من ناحية تحملة في السفر ماشاء الله موتر ينحط على يمينك
وحنا سافرنا به الغربية - الطائف ومكه وجده - واخر مره رحنا به لدبي

في الحقيقه الصرفيه جدا رائع بس للمعلومية انا اتكلم عن 1500 يعني موصلنا دبي وباقي فيه الربع؟
واخر مره عبيناه كانت على الحدود الي تبعد تقريبا 500 كيلو او 460 عن دبي

ومن ناحية العزم ماشاء الله فزه واذا دعست له يجي معك ومايقول لا عكس الاول اما الثبات معروف الجمس راسي جدا

اما العزل الصوتي شوي تعبان ولكن ماتحس به احيانا هذا في اغلب السيارات

بس في النهائية الموتر شوية عليه كلمة رائع

وكيف صيانته وقطع غياره واسعارها ؟

من ناحية الصيانة والله ما اشوف فيها شي وبيني وبينك من طلعناه ماقد دخل الوكالة الى مره ( بسبب حادث )

اما الزيوت وغيرها الله يخلي اقرب محطة

اما قطع الغيار انا صار علي حادث به ودخلت البيبان والرفرف وغطاء التانكي والوطاية يعني تقريبا الجهه الي لم السواق راحت

عطاني التأمين شيك بقيمة 5100 او 6100 والله ما اذكر ( شاملة التقدير والقطع < طبعا كله جديد وكالة )

المهم مازدت فيه الى 950 ريال وانا دخلته على الجميح وجلس 4 ايام وطلع << هذي مستغربها من الجميح بس شكله كان فاضي

ومعروف يالغالي قطع غيار الامريكي ماهو غالي متوسط ومتوفر

تحياتي لك

[S 600 L]

يعطيك العافيه يامشرفنا العزيز

وانت عارف الاجازه ماباقي لها شي ولازم سياره عائليه للسفر وانا والله كنت ناوي اسكاليد لكن شفت ال دينالي واعجبني .....

وننتظر اراء الباقيين

سي يو