بخصوص ورشة للرنج روفر بالرياض

[نـــو نو]

السلام عليكم

اخواني اختصر الموضوع احتراما لوقتكم

شريت رنج روفر سبورت 2007 ما شالء الله نظيف جدا مشكلته وحدة بس وهي أحيان اذا طفيت الموتر جيت اشغلة ما يشتغل لازم انتظر فترة ثم ارجع اشغله ويشتغل. طبعا تطلع بشاشة الطبلون شيك السيستم

اذا فحصته كمبيوتر ب500 مايطلع مشاكل ابد

الورش اخذوا مني الاف ولا استفدت شيْ

ارجوا اللي يقدر يفيدني ويدلني ع ورشة فاهمين واهم شيئ امينين وصادقين يدلني عليهم

أخاف اروح الوكالة ياخذون فحص الف وخمس بدون فايدة

رجاء دلوني ع ورشة بالرياض صادقه مو هدفها تأخذ فلوس وبس لاني دفعت حتى الان 5الاف على لاشيء والكذب عندهم مثل شرب المويه لا حسيب ولا رقيب

انتظركم ع احر من الجمر

[ARMADA xKINGx]

أخوي صدقني هذه السيارات معقدة ومليئة بالتقنيات
الورش أبداً ما يفهمون لها ويمكن يجيبون العيد
روح الوكالة أحسن لك شغل مضمون وفاهمين السيارة أكثر من غيرهم
ولو ما تصلحت عند الوكالة ودفعوك فلوس على غير سنع اتصل على وزارة التجارة واشتكي عشان يعوضوك

[نـــو نو]

والله الصراحة انك صادق بس انا قلت يمكن فيه شيء ما ادري عنه

مثل فحص الكمبيوتر عند الورش ب500 او 300 وفي الوكالة ب1500

ومثل تغيير البواجي سهل جدا ,,, حرام اروح الوكالة شي سهل وشغل الوكالة غالي اشوف ورشة بميه وخلاص بلا غلا بلا مواعيد بلا تكاسي

انا ع النية لو كنت عارف ان أسعار صيانته كذا ماقربته الموتر عادي انا مستخدمه برى المملكة صيانته عادية وأسعار قطعه عادية بس هنا الاحظهم يقولون هذا رنج ويحولون يشوفون خرابات ثانيه يتوقعون اني املك بنك
ف علشان كذا أتمنى بس الاقي ورشة امينه

ف اذا فيه ورشه مشهورة بالأمانة سعرها معقول ياليت تدلوني عليها خصوصا فحوصات الكمبيوتر

[S N E E K]

فيه ورشه بالرياض اسمها الغفيلي
وصفها وانا اخوك لو انك جايي من شارع الظهران وموجه للصناعيه وتعديت النفق بيجيك الكبرى حق الصناعيه لا تطلعه انزل من تحته
بتجيك إشارة خذ يسار وامش قدام ثاني اشاره يمين بتصير داخل الصناعيه امش قدام تعدى ثاني تقاطع بتلقاه الورشه قبل نهاية الشارع على يمينك
أتمنى يكون الشرح واضح اذا مافهمت تواصل معاي خاص اعطيك رقمي عشان اوصف لك
عموما اذا وصلت هناك في واحد اسمه ابوشهاب تفاهم معاه وان شاء الله تنحل امورك

[نـــو نو]

الف شكر اخوي والوصف واضح

رحت له بناء ع وصفك الرجال ما وضح لي أي شي منه

قال لي لازم تخلي السيارة

السوال هل هو مشهور بالأمانة والصدق لاني بخلي السيارة عنده وماني متاكد من شغله

انا ما ابي اصلح سيارة واذا ماصلحت اروح اشتكي واطالب وادخل بدال مشكلة بالسيارة تصير مشكلتين

ابي واحد تعرفون انه امين وصادق ويصلح الخرابات بدون ما يالف او يركب قطع تجارية ويقول اصليه

سوتها ورشة فيني قبل وجلست شهرين اطالبهم بالاخير قالوا هذا من الفلبيني ,,, طبعا اكتشفت اني مو اول زبون ينصب عليه واجد اللي نصب عليهم ويطالبون

[الجوكار]

السلام عليكم ورحمه الله وبركاته

كل عام وانتم بخير ..

انا معي رنج 2013 والى الان ماجربت خارج الوكاله بس مستغرب من مساله 1500 اعرف غالبا الوكاله ب400 الكشف على السياره وكذا

اعرف ورشتين مختصه برنج ولكن صدقا ماجربت شغلهم

فيه وحده وانت بطريق الملك خالد ووجهك شمال تجيك قبل مخرج الدرعيه داخل محطه على يمينك
والثانيه تقاطع الامام مع ابوبكر او عثمان مو متاكد

والله ييسر اموركم لو اقدر اخدمك ياليت والله وبالتوفيق

[اوتشيها مادارا]

مشكلتك بسيطة وهي بلف الراجع


علشان كذا ما يظهر في الكمبيوتر

[نـــو نو]

الله يعطيكم الف عافيه وعشمي فيكم كبير

والله مدري بس رحت ورشة الصراحة وقال لي يبغى لك تبدل دائرة الكمبيوتر كامل وعنده مستعمل ب20الف

ورشة ثانيه قالوا مو صحيح دامه يشتغل ولا اشتغلت اللمبات فيه مشكلة تصليحها فقط ب1000 ريال

تعبت علشان كذا ابي ورشة احط الجيب وانساه

وبشوف عن بلف الراجع ان شاء الله تكون المشكلة بسيطه

الف شكر ع مساعدتكم واعذروني بس للأسف كل ما ادخل ورشه بالرياض الاقيهم اخذين راحتهم بالنصب

[نـــو نو]

مشكلتك بسيطة وهي بلف الراجع


علشان كذا ما يظهر في الكمبيوتر

اسف اخوي بس قصدك بلف الحرارة والا ايش

[اوتشيها مادارا]

اسف اخوي بس قصدك بلف الحرارة والا ايش

لا بلف الراجع هذا بلف يتحكم في البنزين اللي يرجع للتانك من بعد ذهابها للبخاخ والزايد يرجع للتانك عن طريق البلف هذا

اذا صار خلل تشغل السيارة والمكينة تدور بس تحس كان مافيه بنزين ما يشبك ولو اشتغلت ومشيت ما تقطع معك

هذه اعراض مرض بلف الراجع واللي بنسبة 99% من السيارات يكون فيها بلف ميكانيكي الحركة لذلك ما عليه حساس وما يظهر في الكمبيوتر

[نـــو نو]

الله يعطيك الف عافيه

ع الشرح الوافي

تشكرات يافنندم