#تقرير , تجربتي المبسطة لفورد فيوجن 2014 الجديدة كلياً [الأرشيف]

مشاهدة النسخة كاملة : #تقرير , تجربتي المبسطة لفورد فيوجن 2014 الجديدة كلياً

SHERLOCK H

22-03-2015, 06:44 PM

بسم الله الرحمن الرحيم

السلام عليكم ورحمة الله وبركاته

لحد يشغلني يقول انت متعصب حاط صورة فيوجن :)

http://icdn2.digitaltrends.com/image/fusion-rear-650x488.jpg?ver=1

الهدف من التجربة هذه والتجارب السابقة , هو اني اقدم السيارة بشكل بسيط جداً , بحيث اني اريح القارىء وما اخذ من وقته الشيء الكبير

هذا الموضوع يتبع سلسلة تجارب وهي :

تجربتي البسيطة لكيا ريو 2012 الشكل الجديد (http://www.assayyarat.com/forums/t256230.html)

تجربتي البسيطة لنيسان صني الشكل الجديد (http://www.assayyarat.com/forums/t263984.html)

#تجربتي البسيطة لكيا سيراتو الشكل الجديد# (http://www.assayyarat.com/forums/t269945.html)

في موضوعي هذا ماراح اتكلم عن المواصفات بشكل كبير وسبق ووضعت موضوع بسيط لها قبل فترة

وصول فورد فيوجن 2014 الى الرياض + تقرير شامل (http://www.assayyarat.com/forums/t276453.html)

http://store1.up-00.com/2015-01/1422632164061.jpg

الفيوجن من اكثر السيارات الي كنت انتظرها , تحديدا من بداية عام 2012 يوم تم الاعلان عنها , وبعد انتظار دام سنتين وصلت اخيراً

الفئة المجربة :
هي اقل فئة " الستاندر "

انا قبل فترة جربت المازدا 6 الجديدة , وما حصلت فرصة انزل التجربة
لكن بحاول قريب ,

المهم كلامي عن الفيوجن راح يكون مقارنة بينها وبين المازدا 6
والماليبو وربما السوناتا , عشان اوضح مقصدي في كل نقطة

الشكل الخارجي

http://store1.up-00.com/2015-01/1422633021071.jpg

مقدمة السيارة هو اكثر شيء اعجبني فيها من الاعلان عنها في 2012
والشبيهه بالاستون مارتن

طبعاً المعذرة على جودة التصوير , وكان بودي بلون اخر غير الاسود
لاظهار السيارة بشكل اوضح , لكن الجود من الموجود

http://store2.up-00.com/2015-01/142263536421.png

http://store1.up-00.com/2015-01/1422635488361.png

http://store2.up-00.com/2015-01/1422635544671.png

http://store2.up-00.com/2015-01/1422635947121.png

http://store2.up-00.com/2015-01/1422636763691.png

الداخلية

http://store1.up-00.com/2015-01/1422636374781.png

http://store1.up-00.com/2015-01/1422636375062.png

http://store1.up-00.com/2015-01/1422636375263.png

http://store2.up-00.com/2015-01/1422636473521.png

http://store1.up-00.com/2015-01/1422636554231.png

http://store2.up-00.com/2015-01/1422636763922.png

ويظهر في هذه الصورة تصميم المراتب , والي بالمناسبة مريحة جداً
وراح اتكلم عن هالنقطة بعدين

http://store2.up-00.com/2015-01/1422637049011.png

http://store2.up-00.com/2015-01/1422637049292.png

http://store2.up-00.com/2015-01/1422637324211.png

http://store2.up-00.com/2015-01/1422637324382.png

http://store2.up-00.com/2015-01/1422637324833.png

http://store2.up-00.com/2015-01/1422637324974.png

http://store2.up-00.com/2015-01/1422637897582.png

http://store2.up-00.com/2015-01/1422637897341.png

مساحة تخزين جيدة

http://store2.up-00.com/2015-01/1422637897793.png

http://store2.up-00.com/2015-01/1422637898074.png

درج للتخزين خلف القير , ويظهر في الصورة توفر نظام سينك من اقل فئة بالفيوجن

http://store1.up-00.com/2015-03/1427035432361.jpg

مساحة تخزين ممتازة جداً , مع ميزة سفط المراتب الخلفية لمساحة اكبر

http://store1.up-00.com/2015-03/1427035433782.jpg

http://store1.up-00.com/2015-03/1427035435173.jpg

_______________

هنا اكثر حاجة اعجبتني بالسيارة , وسبق وتكملت عنها في موضوع وصولها الى الرياض

http://store1.up-00.com/2015-03/1427035436654.jpg

اللمبة هذي في الباب تولع اذا قفلت الابواب , يعني تعلمك ان الباب مأمن
واعتبرها حركة جديدة وجميلة بدال العصا الي تطلع فوق وتنزل ( مثل الجموس والفكتوريا ) أو مثل السيارات الاسيوية ( الزر الي في مساكة الباب من الداخل )

المكينة 2.5 لتر

http://store1.up-00.com/2015-03/1427035438155.jpg

بعد المقدمة الطويلة هذي
نجي للنقاط الي تهم الجميع :

الراحة والركوب

السيارة مريحة مريحة مريحة جداً
ما قد شفت سيارة حديثة بها الراحة , المراتب من اريح ما يكون

الركوب فيها والاتساع الداخلي بالنسبة لي ممتاز وافضل من التورس
يعني السيارة حجمها الخارجي ممتاز مقارنة بالداخلي , عكس التورس
الي من الخارج كبير اما الداخل ضيق

والحقيقة توقعتها من الداخل مو بذاك الاتساع حكماً على حجمها الخارجي
ولكن اتضح العكس !

على المطبات اشوف المازدا 6 افضل , والماليبو مثل الفيوجن ماحسيت بفرق

مقارنة بالماليبو والسوناتا والمازدا اشوف نفسي ارتحت فيها اكثر
وهذا المقطع يؤكد كلامي :

https://www.youtube.com/watch?v=RNDm6aRH884

الأمان

طبعاً من اقل فئة الفيوجن تتوفر بـABS ومانع انزلاق

بينما الكامري الـ GLX والي تعتبر فل كامل تتوفر فقط بـ ABS
وسعرها يقارب الـ92 الف !!

والسوناتا اقل فئة لا يتوفر فيها الا ABS بدون مانع انزلاق

المازدا 6 والسوبارو الليجاسي والهوندا اكورد 15 هم المنافسين
للفيوجن بهذي النقطة حيث من اقل فئة تجد فيهم ABS ومانع انزلاق
الاكورد سعرها مرتفع فـ احس انه من المفترض والطبيعي انها تتوفر
بها الشيء , والا ما فائدة السعر المرتفع ؟!

لذلك اعتبر المازدا 6 والليجاسي هم المنافسين

جربت الفرامل على عدة سرعات , واتكلم عن ضغط كامل وليس خفيف
يعني على قولتهم عطيته اقوى ماعندي , وكان ممتاز في سرعة التوقف
السيارة كانت توقف بسرعه مرضية

القيادة والرساوة

هذا موضوع مهم واتمنى الكل يركز معي فيه , جربت السيارة على سرعات عالية بخطوط مستقيمة وبمنعطفات وخرجت بالآتي , راح نقسمه قسمين :
خط مستقيم , منعطفات

خط مستقيم :
السيارة بالنسبة لي رساوتها ممتازة جداً , ما توقعتها تكون بها الرساوة خاصة ان الفئة المجربة كانت طاسات !! , مقارنة بالمازدا 6 والماليبو , اشوفها ارسى منهم

الماليبو راسية والي جربها يعرف كلامي , بس الي يخليني اقول ان الفيوجن افضل انك ما تحس بالسرعة الي انت ماشيها ,

يعني فيه سيارات راسية بس برضو وانت تسوق عارف انك مسرع , اما الفيوجن نادر تحس , حتى صديقي راكب معي وماسك الجوال وجالس ومو حاس وحنا نجرب اقوله تراي امشي كذا , يقول والله ؟!

اتمنى محد يجي يقول اي سيارة على خط مستقيم راح تكون راسية , هذا كلام غير صحيح , فيه هواء ورياح تلعب دور , والازفلت بالشارع اذا ماكان ممتاز ومليان تشققات يلعب دور

منعطفات :
الحقيقة اداء السيارة ما اعجبني على المنعطفات ابد سواء على سرعات عالية او اقل مثل سرعة 60 , المازدا 6 والماليبو افضل بكثير
والمازدا افضلهم كلهم

الدركسون تحسه مشدود بزيادة عن اللزوم واي حركة تجيه تبان معك , يعني مايعطيك اللفة بسلاسة مثل الماليبو مثلا , لا تحس انك لاف بزاوية اكبر وهذا شيء ما اعجبني

قلت يمكن بالفئات الاعلى عشان الجنوط راح تكون ارسى المنعطفات , بس الحقيقة توقعت افضل من كذا , لاني جربت سيارات اقل واشوفها افضل

العزم

بالنهاية السيارة 4 سلندر , يعني ما يصلح تطلب منها الكثير
ما اقدر اقارنها بمكينة المازدا لان مكينة المازدا السياحي 2 لتر
ولو قارنت راح تكون مقارنة ظالمة لان مكينة المازدا سيئة في هالحالة

فـ راح اقارن بينها وبين الماليبو ( 4 سلندر طبعاً ) والسوناتا
السوناتا افضل كتسارع لخفة الوزن الخ..
الماليبو والفيوجن متقاربات كمكينة بس صوت مكينة الماليبو
اهدى وعند التسارع الصوت عندي افضل من صوت الفيوجن

بس الفيوجن تحسها مرتاحة على السرعات عالية , يعني ممكن
تروح معك سرعة اعلى بدون اي اشكالية

ملخص الايجابيات :

-مقاعد مريحة جداً
-مواصفات امان عالية من اقل فئة مقارنة بالمنافسين مثل الكامري
-توفر صيانة مجانية لمدة 3 سنوات ( ربما العرض انتهى يرجى التحري من الوكالة)
-رساوة تنفع لاصحاب الخطوط ( مثل القصيم والشرقية )
-توفر مثبت سرعة من اقل فئة
-عزل ممتاز مقارنة بالمازدا والسوناتا , اما مع الماليبو فهما متقاربين
-متوفر ضغط مراقبة الاطارات من اقل فئة وهذا بالنسبة لي شيء مهم مهم مهم

السلبيات :

-كان بودي لو ان اقل فئة ليست طاسات بل جنوط
مع العلم انه جائتني اخبار ان 2015 اصبح من اقل فئة جنوط
وهذا شيء ممتاز

-كنت اتمنى لو ان الاسطبات الخلفية نورها يكون على الاطراف
مثل التايتانيوم الحمراء الي باول صورة بالموضوع ولكن هذا من فورد
نفسهم سواء بالسعودية او حتى الفيوجن الي بامريكا

-نظام سينك معقد ومزعج والمشكلة كل الي الاوامر الي انت تبيها بسيطة
وما تحتاج كل هالتعقيد

-الطبلون باللغة الانجليزية ويمكن تحويله للعربية , لكن باقي الاعدادات
في السيارة الي في المسجل الخ.. , لا يمكنك تحويلها للعربية وهذي اشوفها
سلبية دام الطبلون يمديني اخليه عربي وش الي يمنع اخلي الباقي عربي
مثل الشيفرولية ماليبو , واللغة العربية يحتاجها البعض خاصة كبار السن

-نور السيارة ما اعجبني ابد وطول التجربة كنت اقول انه ضعيف , لين ماوقفت
بطلعة وشفت اتجاه النور , اكتشفت ان مشكلته ماهو انه ضعيف

مشكلته انه نازل , وهذي حلها تجيب مفك وتعدل الارتفاع من الكبوت
وهذي الاخوان الي معهم فورد ايدج سووها , بعضهم كان متضايق من هالنقطة
وعدلها , والطريقة بالضبط ماني عارف كيف , الاخوان الي معهم ايدج عندهم
العلم الكامل

-الرساوة بالمنعطفات ما اعجبتني
-حسيت بنتعة خفيفة تجي احيانا على السرعات المنخفضة تحت 20

الخلاصة

السيارة ممتازة وسعرها جيد وتوفر مواصفات كثيرة بسعر منافس
والرجاء قبل قول اي نقطة , قارن بينها وبين سعر الاكورد المرتفع
أو شح مواصفات الكامري

السيارة تنافس الليجاسي الجديدة والمازدا والماليبو والالتيما

بعد التجربة هذي صار عندي قناعة ان الفيوجن هي وريثة الفكتوريا الحقيقية وليست التورس

_______________________________________

وانا لست مندوب لشركة ما او معرض او اي شيء من هالقبيل , مجرد شخص يحب يفيد ويستفيد

حاولت اكتب كل الي عندي , وكلها عبارة عن رأي شخصي , قد نختلف فيه انا وانت , وقد نتفق , وكل واحد يسوي الي يريحه , واغلب النقاط الي ذكرتها تناقشت فيها مع صديقي واتفق معي فيها , فـ اغلب النقاط الي ذكرت هنا تمت مناقشتها

وكل مافي الموضوع عبارة عن اجتهاد شخصي مني ومن صديقي الي ساعدني في التجربة وحقيقة تعبنا فيه , من الذهاب للوكالة والاتصالات مع الموظفين والمعارض , وبالأخير اخذها من محل الايجار

وكل الي اطلبه هو الدعاء , ونحن هنا اخوان نفيد بعضنا البعض كمستهلكين , وعلى اساس كل شخص يتعرف على المنتج الي يرغب بشرائه

اتمنى ان تكون التجربة اعجبتكم , والحقيقة اعتذر على القصور
ولكن ضعف الانترنت ومعاناتي في الرفع اتعبتني

شكراً , في امان الله

SHERLOCK H

22-03-2015, 06:56 PM

ملاحظة قد ينشر الموضوع في منتدى اخر خاص بفورد
وكلانا نفس الشخص

انت بطنك يعورني

22-03-2015, 08:51 PM

Laramie

22-03-2015, 09:25 PM

شكرا على التجربة المتكاملة

الجيل القادم من فورد توروس بيكون مبني على نفس بلاتفورم الفيوجن
يعني بيكون فيوجن ممغوط
مشكلة فئة التوروس ان اغلب المنافسين دفع خلفي وبلاتفورم متطورة

فاذا كان هذا مستوى البلاتفورم حقهم ديناميكية متواضعه وعزل عادي فاتوقع لها الفشل في فئتها

SHERLOCK H

22-03-2015, 10:09 PM

مشاءالله تقرير سلس وممتع

بس اقولك الأكورد أقل نوع ب 92 وتجي 6 ايرباق وأي بي إس و بريك الكتروني

بس عيبها تجميع صيني

ياريت قلت لنا ايش تجميع الفيوحين الي تجينا سمعت انها مكسيكي

اشوف العيب الثاني ارتفاع سعرها في الفل ابشن وسعرها يجبلك التيما 6 سلندر

المتصدر من ناحيتي في فئة 4 سلندر من ناحية السعر والمواصفات والوكيل المازدا 6 والالتيما لكن اشوف المازدا أفضل لاءن الالتيما حتى الآن فيه ناس تشتكي من عيوبها المصنعيه

الأكورد حبيبتي محد يفهمها إلا الي يحب الهوندا

انا لو باشتري سيارة 4 سلندر بروح على طووووول على سيزوكي كيزاشي لأنها جدن مظلومه

والجلنط الالكتروني موجود بالماليبو والفيوجن والسعر مازاد ومعقول
والايرباقات ناسي كم بالفيوجن

انا احب هوندا , واكثر وكالة قد دخلتها في حياتي هوندا
لكن 92 الف على سيارة 4 سلندر , شيء مايدخل الراس

ازيدها كم الف واقدر اشتري :
فورد تورس
شيفرولية امبالا
تشارجر
الماكسيما الجديدة اذا وصلت

وكل هذي 6 سلندر

SHERLOCK H

22-03-2015, 10:19 PM

جتني اخبار من بعض الاخوان ان موديل 2015
صار يجي بكاميرا خلفية باقل فئة + جنوط

انت بطنك يعورني

23-03-2015, 12:28 AM

والجلنط الالكتروني موجود بالماليبو والفيوجن والسعر مازاد ومعقول
والايرباقات ناسي كم بالفيوجن

انا احب هوندا , واكثر وكالة قد دخلتها في حياتي هوندا
لكن 92 الف على سيارة 4 سلندر , شيء مايدخل الراس

ازيدها كم الف واقدر اشتري :
فورد تورس
شيفرولية امبالا
تشارجر
الماكسيما الجديدة اذا وصلت

وكل هذي 6 سلندر

طويب اسمع وجهة نظري يمكن تكون فيها جزء من الصحة :smilie16:

اول شي انت عارف ان الماليبو جودتها ماتتقارن بالاكورد وعارف مشاكلها والدليل اول مانزلت في 2007 2008 انتشرت وفجاءة اختفت وجا الشكل الكوري في 2011 و2012 وانتشر وفجاءة اختفت ومشاكلها كفاية عندك في الرابطه والمنتديات

غير أن أهل جنرال موتروز ومجانين الشفر بنفسهم يعتبرو الامبالا مو من شفرولية ويعتبروها كوري زي موضوع الابيكا والافيو الي جودتهم سيئة

ومع عدم احترامي لجنرال موتروز بيضحكو على الشعب الخليجي يجيبو امبالا من مصنع كوريا ولا يجببوها من مصنع امريكا ويقولك نفس الجوده؟ أي نفس جوده الله يخليكم

نجي لسعر الماكسيما الشكل الحالي سعرها 88 الف بس انت عارف انها من نفس ذا الشكل من 8 سنين تقريباً يعني التكلفة على نيسان قليله لاءن الشكل ماتغير وذا الكلام على فورد توريس سعرها طايح لاءن الشكل والمكينه والشاصيه من 7 سنين ماتغير شي يعني اكيد فورد بتخلي سعرها طايح عشان بينزل جيل جديد

نجيي للامبالا الي سعرها صراحه منافس بس مدري عن جودتها ومارح افتي في شي مافقه به

أما الأكورد اكيد بتنزل غاليه لانها شكل جديد ومكينة وقير جدد فاصبر عليها كم سنه وينزل سعرها زي مالماكسيما اول مانزلت قبل 8 سنين كانت تبداء من 103 الف

انا مادافع عن هوندا ونا زي ماقلت لو ابغى سياره 4 سلندر من فئة الأكورد باتجه لكيزاشي أو كيا سول أو نيسان جوك

آخر نقطه

الأكورد أقل نوع يجي جنوط مقاس 16

بس عيبها حتى الفل ابشن مافيه منبه لميزان هوا الكفرات

شكرن لك

SHERLOCK H

23-03-2015, 01:28 AM

طويب اسمع وجهة نظري يمكن تكون فيها جزء من الصحة :smilie16:

اول شي انت عارف ان الماليبو جودتها ماتتقارن بالاكورد وعارف مشاكلها والدليل اول مانزلت في 2007 2008 انتشرت وفجاءة اختفت وجا الشكل الكوري في 2011 و2012 وانتشر وفجاءة اختفت ومشاكلها كفاية عندك في الرابطه والمنتديات

غير أن أهل جنرال موتروز ومجانين الشفر بنفسهم يعتبرو الامبالا مو من شفرولية ويعتبروها كوري زي موضوع الابيكا والافيو الي جودتهم سيئة

ومع عدم احترامي لجنرال موتروز بيضحكو على الشعب الخليجي يجيبو امبالا من مصنع كوريا ولا يجببوها من مصنع امريكا ويقولك نفس الجوده؟ أي نفس جوده الله يخليكم

نجي لسعر الماكسيما الشكل الحالي سعرها 88 الف بس انت عارف انها من نفس ذا الشكل من 8 سنين تقريباً يعني التكلفة على نيسان قليله لاءن الشكل ماتغير وذا الكلام على فورد توريس سعرها طايح لاءن الشكل والمكينه والشاصيه من 7 سنين ماتغير شي يعني اكيد فورد بتخلي سعرها طايح عشان بينزل جيل جديد

نجيي للامبالا الي سعرها صراحه منافس بس مدري عن جودتها ومارح افتي في شي مافقه به

أما الأكورد اكيد بتنزل غاليه لانها شكل جديد ومكينة وقير جدد فاصبر عليها كم سنه وينزل سعرها زي مالماكسيما اول مانزلت قبل 8 سنين كانت تبداء من 103 الف

انا مادافع عن هوندا ونا زي ماقلت لو ابغى سياره 4 سلندر من فئة الأكورد باتجه لكيزاشي أو كيا سول أو نيسان جوك

آخر نقطه

الأكورد أقل نوع يجي جنوط مقاس 16

بس عيبها حتى الفل ابشن مافيه منبه لميزان هوا الكفرات

شكرن لك

حياك الله , وشكلك مع سرعة الكتابة كتبت امبالا بدال ماليبو في الاماكن الي انا كبرت حجم الخط فيها

بالنسبة للماكسيما كنت اتكلم عن الشكل الجديد وليس القديم والي راح يبدأ سعره من 100 الف , يعني فرق بسيط بالسعر عن الاكورد وكبير في المواصفات

نقطة التورس ممكن اتفق معك فيها

بالنسبة لنقطة الاكورد انه تحتاج صبر لين ماينزل سعرها ما اتفق معك , الاكورد لطالما كانت غالية و2013 نزل بـ 86 واستمر ايضا بـ2014 بـ86 , وجاء 15 الان واصبح بـ90 الى 92

فـ لو كان بينزل سعرها ليه ما نزل على موديلي 13 و14
ايضاً من ايام 2008 اول ماظهر شكل 08 استمر سعره بـ83-85 الى 2012 لاقل فئة
فـ الاكورد اثبتت انها من 7 سنوات سعرها دائما ثابت وما ينزل كثير

أبو مؤيد

23-03-2015, 02:20 AM

يعطيك العافية على التقرير

للأسف ينقصها بعض المميزات لتنافس بشدة
مقارنة بالسعر
الليجاسي والمازدا أفضل وناهيك عن المواصفات وغيرها

بخصوص نظام سينك
جربته على التورس
جدا معقد
اتمنى من فورد تستبدله بنظام آخر

plus

23-03-2015, 10:41 PM

يعطيك العافية على التقرير الخفيف

انا جربت السيارة من اكثر الاشياء اللي عجبتني فيها المقاعد مريحة جدا :xyxthumbs:

اشوف السيارة نقصها بعض المواصفات لو تضيفها فورد ف الفيس لفت القادم تصبح السيارة ممتازة :smile:

ahmedoh

24-03-2015, 07:11 PM

السلام عليكم و رحمة الله و بركاته

للاسف هناك عده نقاط لا اتفق معاك نهائيا فيها و قد تفتقد لنوع من المصداقية و قد يكون السبب تجربتك للسيارة خلال فترة زمنية قد تكون قصيره ، لكن اتفق معاك في نقاط كثيرة

السيارة كنت مغرم بها و يعلم الله ان إمتلاك الفيوجن كان بالنسبة لي حلم دعوت الله ليلاً و نهاراً ان يتحقق

و الحمد لله تحقق الحلم و تم شراء فيوجن se 2014 الفئة التي تحت الفل مباشرة

لكنني ندمت اشددد الندم على شراء السيارة خصوصاً انني لم اصلي صلاه الإستخارة قبل شراء الفيوجن

النقاط الي اتفق معاك فيها :

1- مساحة السيارة الداخلية
2- راحة المقاعد
3- توفر مميزات مهمة في الاستاندر
4- جمالية التصميم الامامي
5- ضعف الإنارة الامامية
6- الامان العالي في السيارة

النقاط التي لا اتفق معاك فيها :

1- رساوة السيارة في الخطوط المستقيمة عندما قارنتها مع الماليبو و المازدا و رشحت الفيوجن ان تكون الافضل بينهم
2- عزل الهواء عندما قارنته مع الماليبو
3- راحة المحرك على السرعات العالية

تعليقي على النقاط التي لا اتفق معاك فيها :

1- رساوة السيارة على الخطوط المستقيمة جيده لكن ليست ممتازة و المازدا و الماليبو افضل بمراحل
كنت اعاني على كبري الصناعية القديمة من عدم ثبات السيارة عن الفواصل الحديديه الي على الارض

2- عزل الهواء في الماليبو افضل من الفيوجن و فيه فرق واضح بينهم

3- المحرك على سرعه 140-160 تحسس انه بينفجر ، تحسس ان هناك جهد كبير على المحرك

سلبيات اخرى بالسيارة :

1- تصميم الإنارة الخلفية سئ جداا
2- فيه نتعه بالسيارة عند سرعات متفرقه
3- ارتفاع سعر السيارة مقارنة بالمازدا و الماليبو
4- صوت المحرك العالي و ضعف العزم
5- الرساوة على المنعطافت سئية جدا جدا

سعر الشراء فئة ال se ب 97 الف
http://store2.up-00.com/2015-03/1427211666813.jpg

الحمد لله تم بيع السيارة من اول شهر ( 4 الف كيلو فقط ) عانيت اشد المعاناة عند بيعها
لم اتحمل مافيها من عيوب خصوصا ضعف العزم و الرساوة في المنعطفات

و تم شراء ماليبو LTZ 6V بسعر المقلب (الفيوجن) :rolleyes1:
ب 97

صوره اخيره للفيوجن في اخر لحظاتها مع اول يوم للعروسة الجديدة الماليبو
http://store2.up-00.com/2015-03/1427211667184.jpg

الخلاصة :

الفيوجن اعتبرها من اسوء السيارات في هذه الفئة
تتفوق عليها الماليبو و المازدا و الالتيما و الاكورد و السوناتا لو قارنها من جميع النواحي :a1120(121):

و بإذن الله عندي مقارنه و موضوع كامل لـ ( الماليبو + الفيوجن + الاكورد + الزوم 6 )
راح انزله بإذن الله قريب

http://store2.up-00.com/2015-03/1427211664991.jpg

اي استفسار انا حاظر للجميع

MaiThooM

24-03-2015, 08:33 PM

تجربة وتقرير ممتازين ..
ولكن ينقص فورد الاهتمام بالمواصفات اكثر لتنافس بشكل أقوى وتجذب المستهلك ..
اشكرك على جهدك اخي الكريم .. وموضوع ممتاز من عضو مميز

تقبل مروري ..
تحياتي لك ..
أخوك / ميثم

bo 3low

25-03-2015, 01:16 PM

^^^^^^

بالنسبة للمواصفات فهي من افضل السياارت في فئتها من ناحية المواصفات,,,

بالنسبة للمواصفات الكاملة للسيارة لا اعلم اذا كان الوكيل يجيبها بمواصفاتها كاملة او لا.

fhad2007

25-03-2015, 01:33 PM

والله تقرير حلو جدا جدا جدا ورد ahmedoh برضوه رائع تحس انك في تقريرين لموضوع واحد

قناعتي كل يوم تزيد ع المازداء 6 ولكن هل مقارنتها فوق للفل اوبشن ولا السياحي ؟

SHERLOCK H

25-03-2015, 05:25 PM

..][ ح ــياة التــم ــيز ][..

26-03-2015, 12:40 PM

اشكرك على هذه التجربة

الفيوجن سيارة ممتازة , أنا شخصياً أفضلها على كثير من فئتها

يختم بختم التميز

محمد

26-03-2015, 12:57 PM

شكرا لك عزيزي للتجربة وللتقرير.
واتمنى أن نرى منك تجارب ممثالة.

KOERU

27-03-2015, 05:19 AM

تعجبت وماتوقعت السلبيات اللي انقالت عن فيوجن ، والسياره سعرها غالي ودعاياتها في كل مكان

شكرا لك على التقرير

SHERLOCK H

28-03-2015, 02:32 PM

هذا رد لأحد ملاك الفيوجن في منتدى اخر , بعض النقاط الي ذكرها تدعم نقاطي وفيه سلبيات ذكرها هو , اتركم مع الرد ,

ووضعي واقتباسي لهذا الرد يؤكد عدم تحيزي ومصداقيتي في التجربة , الي البعض شكك فيها , حسسوني ان الموضوع فيه خيانة ودول مو مجرد سيارات :bigggrin::smile:

"بسم الله الرحمن الرحيم

اهلا فيكم اخواني الكرام اليوم حبيت اسوي تقرير بسيط عن السياره الله يعطيني خيرها ويكفيني شرها

السياره الان كملة تقريبا 7500 ..,,, واخر 4000 الاف كرفتها خطوط في جميع التضاريس هههههههه

على العموم في اشياء طلععة خربة مزاجي ,,’ وفي اشياء شفتها بالسياره اعجبتني كثير حقيقه ..,,

خليني ابدأ في الايجابيات الي لاحظتها بالسياره :

1 ) مااااااااااااشاء الله تباااارك الله ( رساااااااوه شي خرااااااافي ) .., وهذه الرساوه ماشفتها غير بالالماني

حقيقه بدون مبالغه .., السياره فيها رساوه شي عجيب ماشاء الله تبارك الله ..,, والله يا اخوان اني ماني راعي

سرعه ولا احب السرعه لكن تغيب عيني عن الطبلون ثواني .., وارجع اطالع اشوف اني ماشي 180 !!!!!

قسم بالله ما احس ولا باي اختلاف بين 130 وبين 180 .,, وهذه يدل على رساوه ممتازه .

2 ) العزل اقدر اقول ممتاز ماشاء الله وحتى الارضي ممتاز ماشفت شي ضايقني من ناحية الحزل .,,, بالعكس

اوقات افك الدريشه وانا ماشي 130 ابي ادخن ( اذني تعورني ) !! فعلا فيها عزل ممتاز داخل السياره ..,,

3) صرف البنزين ...,, عبيت فل من المدينه وطلعة على القصيم مثبت السرعه 130 .., القرائه 800 كيلو .,,

وصلت القصيم القرائه 400 ..,, ولكم الحكم ( سيارتي الكورلا على كذا في الخطوط تصرف اكثر هههههه )

باختصار السياره اذا مثبت السرعه على 120 او 130 اقدر اقول انها اقتصاديه اكثر من الكورولا والاكسنت في

الخطوط الطويله ..,, لكن داخل المدينه صراحه اشوف صرفها متوسط ..,,

4 ) الاناره الخاصه بالسياره ..,, اعتقد انها تتأثر بالضوء !! كيف ما اعرف لكن الحين افهمكم وش الي لاحظته

يوم امشي بطريق ملظم وفي سيارات واجد ,, اشوف الاناره تقريبا عاديه ..,, لكن الي جاي قبالي يعلق على

النور العالي ..., حتى لو اعطيه تنبيه اني ماشي بالنور الواطي .., اعتقد النور مرفوع والله اعلم !!

لكن يوم امشي بطرررريق مظلم وتقريبا لحالي .,,’ اقدر اقول ماشاء الله تبارك الله الاناره ممتاااازه لأبعد درجه

لكن الاناره وسط المدينه سيئه ولا تخارج ..,, عشان كذا قلت الظاهر ان الانوار المحيطه تأثر على النور ..,,

5 ) راحة المقاعد ..,, وهذه عاد مايحتاج افصل فيها ..,, يكفي اني اقول اتحدى اي سياره مقاعدها مريححه

بكثر الفيوجن ههههههههه ماعدا سيارات الي فوق 500 الف ..,

6 ) السياره والعلم عند الله تتحمل الكرف ماشاء الله .,, مشيت فيها من جدة الى المدينة الى القصيم الى

الحدود الشماليه ..,, وامسك الكبوت اشوف انه عادي جدا ماهو مووووولع حراره بالعكس كاني رحت

مشوار بسيط ..,, قدمة استقالتي ورجعت من عرعر الى حائل الى المدينه الى جدة ...,, ونفس الوضع

ماشاء الله تبارك الله .

6 ) المكيف ..,, وما ادراك مالكيف هههههههه ماني قادر احطه على البارد حقيقه اتجمد من البرد ماشاء الله

مكيف اقدر اقول ينافس الياباني بل ويتفوق عليه ..,, بحكم تجربتي على سيارات الياباني ماعدا المازدا ..

7 ) مشيت على السياره على سرعه 160 في الامطار وطريق منكوب مطر ماقول غير ماشاء الله تبارك الله سياره ممتازه

تقريبا هذه الاشياء الي انتبهت لها من الايجابيات ..,

الحين بجي اتكلم على الاشياء الي شفتها واقدر اقول انها عيوب او اشياء ترفع الضغط :

1 ) السياره مع اللفات تقريبا خطيره ..,, الواحد يوم يقص اللفه لازم ينتبه ولايكون مسرع

2 ) السياره ثقيله ثقيله ثقيله ثقيله ..,, وعزم يدف السياره انسى ..,, الحين افهمكم :

الحين يوم تبي تدعس بنزين المكينه احس ماهي شايله السياره من ثقلها بطيئه كمشي بدايه ..,

لكن بعد ال 120 تنفلت ماشاء الله مادري وش يصير فيها احس المكينه ملائمه لسياره حاجه غريبه !!

فلسعتبي هذه السياره هذه ...,, في مشكله في المكينه كبدايه انها تقوم السياره احس انها ماتعطي كل

العزم ..,, لكن هذا مو معناة السياره سيئه بالعكس السياره مكينتها بعد ال90 تقريبا تفرش فررررش ماشاء الله

يعني الي يدور اداء من السياره نصيحه لا يشتري هذه السياره يروح ياخذ تورس او اي سياره اخرى ..,,

انا جربة سيارات منها الفولكس واجن تيقوان ..,, بس احط رجلي الله يعزكم على الدواسه السياره تطير هههه

هذا الشي غير موجود بالفورد فيوجن وبقوه ( اكثر من مره بغيت اتنكب في التجاوزات بسبب الموضوع هذا )

ويعلم الله اني ماقولت غير الصدق ..,, السياره تصلح بطرق مستقيمه لكن في الطرق المزدوجه والي فيها لفات

اشوف ان السايق راح يتعب مع السياره ..,,

3) السياره في الطلعات مش ولا بد ممممم لا ( الا سيئه وبقوه ) الثقل وسالفة المكينه الي قلت لكم عليها

يعني في طريق من ( دومة الجندل الى حائل ) هذا الطريق كله طلعات ونزلات ..,, صراحه خفت ان السياره

تخبط علي ,,, كل ماجيت اطلع الطلعه السياره ترد نمره !! وعلى هذا الحال لين وصلة حائل وانا يدي على قلبي

لا تخبط مكينتي ( وهذا شي غير مقبول وشي انا اعتبره سيئ )

4 ) سالفة البنزين هذه السالفه الي ماني عارف وشلون اشرحها صراحه لكن بحاول اوضح باذن الله

الوكاله قالولي عبي السياره احمر !! وانا عبيت اخضر وحسيت ان السياره صوتها عااااالي المكينه

بعدين عبيت السياره احمر ..,, الصوت تقريبا موجود لكن السياره صارت اثقل !!!!

وامس رحت للوكاله مع زميلي لقيت حاطين على الزجاج حق السياره بالوكاله نوع البنزين اخضر !!!

لاحول ولاقوة الا بالله !!

رحت لمندوب المبيعات قلت له طيب والي يعبيها احمر ! قال تقبل لكن الافضل اخضر !! طيب انتم قلتولي احمر

قالولي غير اذا بقي شوي !!! لاحول ولا قوة الا بالله

عموما في الكتالوج مكتوب 87 ..,, وانا اشوف ان 91 اقرب واداء السياره فيه افضل من 95

5 ) مممممم في تفتفه طلعة في السياره بعد تشغيل المكيف ههههه يالله خير توها السياره جديده

لكن حجزت موعد على اساس بكره واشوف ايش يصير وابلغكم ههههههه يارب انها بسيطه

6 ) الاستاندر ماتجي بانوار ضباب ..., نصيحه لوجه الله قبل تطلع السياره من الوكاله قولهم ركب انوار الضباب ..,, في طريق مابين ( الاسياح القصيم

وبين ساموده في الحدود الشماليه الساعه 3 فجرا جاني ضباب ورب البيت ما اشوف شي ) افك العالي يزيد الغباش لين جاء واحد معاه سياره

فيها كشافات واللحم وراه لين الله خارجنا .,,, نصيحه ركبوا هذه الكشافات انا شريتها لكن ماكان عندي وقت اركبها للحين

على العموم اختصر مجمل الكلام الي فوق واقول :

الي يدور اداء ومناوره واستجابه ( لا يشتري السياره ابدا ولا حتى يفكر )

والي سواقته راكده ويبي الراحه والعمليه وسفراته كثيره بخطوط طويله ( توكل على الله هذه سيارتك )

واعيد مره اخرى الى هذه اللحظه لو يرجع الزمن راح اشتريها ..,, وماشاء الله تبارك الله سياره ممتازه

واذا في سؤال او معلومه او اي شي تبونه انا حاضر

اخوكم زياد "

KOERU

28-03-2015, 04:25 PM

^^

يعطيك العافيه

انا مع ثقافة التجربه لأنها تبين الشي الكثير ، افضل من مجرد كلام وسمع وقال !
واتمنى جميع السيارات ينزل عنها تقارير بالمنتدى ، وخصوصا هذه الفئه مبيعاتها كبيره

ربما بعض التجارب لا يتفق معاها البعض ، ولكن التجربه تبين الشي الكثير من ايجابيات السياره وسلبياتها حتى لو يتفق معها البعض تصبح ظاهره لكثيرين

الفيوجن حلوه واعجبتني لكن انا شفتها بالمعرض ماجربتها ، بس استغربت سعرها غالي شوي واشوف ان سلبياتها ماتشفع لسعرها

شكرا مره اخرى

ahmedoh

28-03-2015, 04:52 PM

ahmedoh

اولاً

مقارنتي كانت مع الماليبو 4 سلندر وليست الـ6 سلندر

ثانياً

من الطبيعي ان تكون الماليبو 6 سلندر ارسى من الفيوجن لانها جنط 18
انا كنت اتكلم عن الماليبو 4 سلندر والي جنطها 17 وكفراتها اقل عرض من الـ18

بالمناسبة انا اتفق معك ان الماليبو افضل كرساوة ومكينة من الفيوجن ولكن كـ 6 سلندر
فقط , وهذا بالمنطق والعقل والعرف طبيعي

انا مجرب الماليبو 4 سلندر و 6 سلندر
وبالنسبة للعزل تفرق من شخص لشخص , وانا قلت الي عندي

بالنسبة للمازدا يبقى الموضوع رأي شخصي , انا بالنسبة لي الفيوجن ارسى
خفة دركسون المازدا على السرعات العالية ما اعجبني
وقلت ان المازدا افضل على المنعطفات

اتمنى اخوي ان دفعك لمبلغ كبير مثل 97 الف بسيارة ما اعجبتك مايعميك ويخليك مقهور
لدرجة انك تقول انها اسوأ سيارة بفئتها

بالنهاية منت مضطر تقنعني بشيء ولا انا مضطر اقنعك

اشكرك على ردك

الفيوجن التي كانت معي 18 انش :bigggrin:
و الماليبو 18 انش

اتوقع سالفه ال 4 سلندر و ال 6 سلندر هنا ما تفرق :bigggrin:

و الماليبو الرساوة افضل

بالنسبة للمحرك ما قارنت بينهم لان من الظلم ان تقارن بين محرك 6 سلندر و 4 سلندر
و لو ترجع لكلامي لن تجد ما يثبت انني قارنت بينهم من هذه الناحية :c0214:
لان من المنطق و العقل و العرف الطبيعي ان محرك 6 اقوى

رأيي انها اسواء سيارة بفئتها أتى بعد شهر من التجربة
مش رأيي تجربة 5 دقائق او ساعة او ساعتين

و اتوقع المازدا زوم 6 و الماليبو الافضل في هذه الفئة لو قارنها من جميع النواحي << الف خط تحت من جميع النواحي

و رأيك في السيارة لا استطيع ان اغير فيه شي و انت لا و لن تستطيع ان تغير في رأيي في السيارة :xyxthumbs:

الفيوجن اسواء سيارة في فئتها

ahmedoh

28-03-2015, 04:58 PM

^^^^^^

بالنسبة للمواصفات فهي من افضل السياارت في فئتها من ناحية المواصفات,,,

بالنسبة للمواصفات الكاملة للسيارة لا اعلم اذا كان الوكيل يجيبها بمواصفاتها كاملة او لا.

نعم الافضل في فئتها من ناحية الموصفات

لكن الوكيل للاسف يجيبها بموصفات غير كاملة و اقدر اقول عليها متواضعه بالنسبة لسعر السيارة

SHERLOCK H

28-03-2015, 05:19 PM

اشكرك على ردك

الفيوجن التي كانت معي 18 انش :bigggrin:
و الماليبو 18 انش

اتوقع سالفه ال 4 سلندر و ال 6 سلندر هنا ما تفرق :bigggrin:

و الماليبو الرساوة افضل

بالنسبة للمحرك ما قارنت بينهم لان من الظلم ان تقارن بين محرك 6 سلندر و 4 سلندر
و لو ترجع لكلامي لن تجد ما يثبت انني قارنت بينهم من هذه الناحية :c0214:
لان من المنطق و العقل و العرف الطبيعي ان محرك 6 اقوى

رأيي انها اسواء سيارة بفئتها أتى بعد شهر من التجربة
مش رأيي تجربة 5 دقائق او ساعة او ساعتين

و اتوقع المازدا زوم 6 و الماليبو الافضل في هذه الفئة لو قارنها من جميع النواحي << الف خط تحت من جميع النواحي

و رأيك في السيارة لا استطيع ان اغير فيه شي و انت لا و لن تستطيع ان تغير في رأيي في السيارة :xyxthumbs:

الفيوجن اسواء سيارة في فئتها

ليتك لما قلت انك شريت SE ذكرت انها الي يسمونها السبورت
وهي الي تجي بجنط 18 وجناح, انا قريت SE حسبتك تقصد الي تحتها لانها هي الي تجي 17
عموما انت حطيت صورة وماكان باين فيها مع الرؤية
( اوضح لك بس )

صعب كلما تكلمت اقعد افسر واحط 10 خطوط على كل شيء اقوله
لكن الشكوى لله

انا جبت طاري الماليبو الــ4 سلندر , لاني اقول ان عزم وصوت مكينة الفيوجن
مقارب لها وماحسيت بفرق لاني مجرب الثنتين , ارجع واقول مقارنة بالماليبو
الـ4 سلندر متقاربات بالمكينة جداً

وكلامي عن محرك الفيوجن لم يكن بشكل عام حددت بكلامي اني اقارن بينه
وبين الماليبو والسوناتا

المرة الجاية خل خط كتابة الفيوجن اسوأ سيارة بفئتها بلون اخر غير الابيض
وجهة نظرك ومايحتاج تخفيها :)
_____________

انا خايف بعض الاعضاء ويمكن انت شخصياً , انكم تحسبوني جالس اتهجم
بالعكس انا سعيد جداً ان فيه احد مجرب وجالس يناقشني هذا الي حنا نبيه
مو فلان قال وفلان ما قال ,

بانتظار تجربتك وموضوعك باقرب وقت

SHERLOCK H

28-03-2015, 05:26 PM

ahmedoh

28-03-2015, 06:56 PM

ليتك لما قلت انك شريت SE ذكرت انها الي يسمونها السبورت
وهي الي تجي بجنط 18 وجناح, انا قريت SE حسبتك تقصد الي تحتها لانها هي الي تجي 17
عموما انت حطيت صورة وماكان باين فيها مع الرؤية
( اوضح لك بس )

صعب كلما تكلمت اقعد افسر واحط 10 خطوط على كل شيء اقوله
لكن الشكوى لله

انا جبت طاري الماليبو الــ4 سلندر , لاني اقول ان عزم وصوت مكينة الفيوجن
مقارب لها وماحسيت بفرق لاني مجرب الثنتين , ارجع واقول مقارنة بالماليبو
الـ4 سلندر متقاربات بالمكينة جداً

وكلامي عن محرك الفيوجن لم يكن بشكل عام حددت بكلامي اني اقارن بينه
وبين الماليبو والسوناتا

المرة الجاية خل خط كتابة الفيوجن اسوأ سيارة بفئتها بلون اخر غير الابيض
وجهة نظرك ومايحتاج تخفيها :)
_____________

انا خايف بعض الاعضاء ويمكن انت شخصياً , انكم تحسبوني جالس اتهجم
بالعكس انا سعيد جداً ان فيه احد مجرب وجالس يناقشني هذا الي حنا نبيه
مو فلان قال وفلان ما قال ,

بانتظار تجربتك وموضوعك باقرب وقت

وضحت في ردي انها الي تحت الفل على طول
و الي تحت الفل على طول هي السبورت

و بالنسبة لمحرك ال 4 سلندر للماليبو
الاداء متقارب جداا مع الفيوجن زي ما ذكرت

وجهه نظري كتبتها بلون ابيض علشان لا تتضيق منها :bigggrin:
لان وجهه النظر لن تتغير

و انا سعييد جدا و بالعكس احب النقاش من واقع تجربة
و ليس فلان قال و فلان قال

حياك الله يالغالي و بالعكس يالغالي انا متفاهم انها مجرد نقاش فقط

ahmedoh

28-03-2015, 06:59 PM

’

للمعلومية يا اخوان
انا جربت 3 سيارات ماليبو , ثنتين 6 سلندر ووحدة 4 سلندر
وانا مقر ان الماليبو الـ4سلندر افضل من الفيوجن لو احد قالي
وش اشتري ووش تنصحني

لاني مجربهم وعارف ومقر , وما اختلف مع احد يقول الماليبو افضل
لكن مسالة ان الفيوجن تكون اسوأ سيارة بفئتها هذا الي انا اختلف
فيه ولا ارضاه بناءا على تجربتي :xyxwave:

الفيوجن ناقصه كم حاجة فقطط و تصبح الافضل في فئتها بلا منازع :xyxthumbs:
لكن الان هي لاسواء بين الاكورد و المازدا و الماليبو
اما بين المنافسين الاخرين فا هناك من هو اسواء منها

ابوفارس1212

29-03-2015, 03:44 PM

فد جربت حقت صديقي ولقد فاقت التوقعات
مشاء الله تبارك الله
السياره عزلها ممتاز جدا
وصوت المكينه ونعومه القير رائعه جدا
وراحه المقاعد جيده جدا وليست بممتازه
واهم نقطه نعومه السياره
تفوقت على التورس بفرق كبيرا جدا السياره جدا جدا ناعمه من زمان ماسقت سياره بالنعومه هاذي
وسواقتها لايوجد اي مقارنه مع التورس افضل بكثير منه
والرساوه ما اقدر احكم عليها لاني لم اتجاوز سرعة 80 كيلو
الرئيه رائعه
عيبها الوحيد صغيره من الداخل شويتين ممكن عشان متعود على الكامري

ولي بيشتري السياره يقول بسم الله ويتوكل على الله السياره جدا ممتازه

السلطآآآن حسن

30-03-2015, 04:39 PM

تقرير رائع يشكر صاحبه عليه
اشكرك على الحياديه و ذكر التفاصيل مقارنه بالسيارات المنافسه
شكرا لك عزيزي.

SHERLOCK H

31-03-2015, 09:46 PM

حياكم الله جميعاً
المازدا الان 2016 الستاندر نزلت بمكينة 2.5 لتر
باقي نقطة العزل , لو حسنوها
راح اقول ان المازدا هي الافضل حالياً

SHERLOCK H

02-04-2015, 09:38 PM

!

سبحان الله

khofisiz

03-04-2015, 06:25 PM

الفيوجن سيارة جيدة جدا ولكن كيف ينزلون شكل جديد وجيل حديث مع محرك قديم جدا وفاشل
وين الايكوبوست

SHERLOCK H

07-04-2015, 03:33 PM

الفيوجن سيارة جيدة جدا ولكن كيف ينزلون شكل جديد وجيل حديث مع محرك قديم جدا وفاشل
وين الايكوبوست

الايكوبوست صيانته صعبة والوكيل لسا ماهو فاهم لهم
ربما مع الاكسبيدشن الجديد بحكم انه ايكوبوست
راح يبدا الوكيل يفهم في صيانته

وينزل سيارات اخرى ايكوبوست

keep on

08-04-2015, 10:50 PM

lool777

09-04-2015, 12:01 AM

السلام عليكم \\

انا ابي اشتري سيارة ((اقساط))

تكون متوسطة الحجم
وفخمه نوعا ما

استخدامي هادئ داخل المدينة سفرياتي قليلة
سيارتي الحالية لومينا 2003 سياحي شريتها من سنتين لسوء ضروفي الاقتصادية ومرتاح معها حتى الان

استقريت على عدت شركات وانتظر القرار الفصل بينهم
1- مازدا لكن الوكيل لم يوفر 2016 حتى الان ونظامه حجز وما ادري عن البنوك تقبل هالنظام او لا سعرها حدود 68 الف سياحي .
2- فوكس واجن باسات 2015 جميلة وفخمة لكن الاستنادر منها يجي طيس ب88 الف والي جنوط ب98 والنص فل 107 تجي فيها كل شي ماعدا نجفيشن ب130 تقريباً , كنت شبه مستقر عليها لولا السعر لان حرام 88 وطيس والسعر 98 احس مبالغ فيه . وخوفوني منها ناس ان الوكيل صيانته سيئة ....
3- فورد فيوجن او تورس وكنت اميل للفيوجن ,,,

بعد قراءتي لتقريرك احترت اكثر

انا بصراحة ماعمري شريت سيارة جديدة وخايف اخذ شي سيء واتورط فيه 4 سنوات او 5

ابي سيارة شبابية تناسب عائلة صغيرة وبنفس الوقت ما تكون شكلها شبابية مرة مثل الدودج تشارجر

بعد فهمكم لموضوعي هذا وش رايكم وش يناسبني

الف شكر مقدما

انا وسيارتي

09-04-2015, 01:23 AM

وعليكم السلام ورحمة الله وبركاته

ماشاء الله تجربة متكاملة ورائعة وواضح فيها الإنصاف والحياد ...

انا جربت الجيل السابق ورأيت فيها عزل جبار وراحة ومتعة في القيادة..

الجيل الجديد تصميم مميز وسعة داخلية عجيبة ومراتبة مريحة ...

وجدت الستاندر 2015 مع كاميرا وجنوط كروم لدى الوكيل بسعر : 81 ألف ريال

بورك قلمك ...ولا عدمنا جديدك :)

SHERLOCK H

10-04-2015, 01:07 AM

جزاك الله خير

بعد التجربه هل واجهت في القير بوكس مشاكل ..المكينه والعزم في المرتفعات كيف وضعهم

وكيف عزم المكينه في فئات الفيوجن الاستاندر والنص فل والفل كامل

هل لو انت مكاني تختار الفورد فيوجن 2015 او مازدا 6 2016 استخدام شخصي ولسنين طويله وللسفر وغيره
يعني بالمختصر هل السياره تحس انها بتخدم المالك على المدى البعيد

حسيت بزي النتعة تجي بالقير احيانا على سرعات منخفضة على 10-15
قليل تظهر وبدون صوت , هي كانك تمشي ورديت القير نمرة

اذا كانت المازدا 2.5 مكينتها والعزل تحسن راح اختارها على الفيوجن
اما اذا لم يتحسن عزل المازدا فـ يبيلها تفكير
لانهم يقولون موديل 2016 حسنوا فيه العزل
وانا جربت 14 وكان العزل سيء

السلام عليكم \\

انا ابي اشتري سيارة ((اقساط))

تكون متوسطة الحجم
وفخمه نوعا ما

استخدامي هادئ داخل المدينة سفرياتي قليلة
سيارتي الحالية لومينا 2003 سياحي شريتها من سنتين لسوء ضروفي الاقتصادية ومرتاح معها حتى الان

استقريت على عدت شركات وانتظر القرار الفصل بينهم
1- مازدا لكن الوكيل لم يوفر 2016 حتى الان ونظامه حجز وما ادري عن البنوك تقبل هالنظام او لا سعرها حدود 68 الف سياحي .
2- فوكس واجن باسات 2015 جميلة وفخمة لكن الاستنادر منها يجي طيس ب88 الف والي جنوط ب98 والنص فل 107 تجي فيها كل شي ماعدا نجفيشن ب130 تقريباً , كنت شبه مستقر عليها لولا السعر لان حرام 88 وطيس والسعر 98 احس مبالغ فيه . وخوفوني منها ناس ان الوكيل صيانته سيئة ....
3- فورد فيوجن او تورس وكنت اميل للفيوجن ,,,

بعد قراءتي لتقريرك احترت اكثر

انا بصراحة ماعمري شريت سيارة جديدة وخايف اخذ شي سيء واتورط فيه 4 سنوات او 5

ابي سيارة شبابية تناسب عائلة صغيرة وبنفس الوقت ما تكون شكلها شبابية مرة مثل الدودج تشارجر

بعد فهمكم لموضوعي هذا وش رايكم وش يناسبني

الف شكر مقدما

هناك كم معرض في النسيم يبيعون باسات اصفار بالسبعينات
احد الزملاء اشتري ابوه من احد المعارض وحدة موديل 14
بجنوط وكام بـ72

تجد المعرض على شارع السيارات الفخمة , عنده حبة وحدة اعتقد حاليا

SHERLOCK H

13-04-2015, 03:03 PM

لا اله الا الله

nex

14-04-2015, 10:56 AM

السلام عليكم
.
.
حبيت أشاركم بتجربتي بعد تجربة
الكامري . والهوندا . والفيووجن
.
.
صراحة لم تجذبني سيارة منهم مثل ما جذبتني الفيووجن والله أقدر أقول أن فورد أبدعو فيها بجد مع تحفضي على العزم أسؤهم ولاكن ليس سيئ بالشيء الممل ﻻانها سيارة من فئة المتوسط .. أما الراحة والعزل والهدوء والراساوة من صالحها والافضليه لها وم ناحية الرساوة الكامري خارجه عن المقارنه بجد سيئة ولاكن أفضلهم عزم وفي الراحه أفضل من الأكورد .. أما مسئلة الشكليه فهيا أذواق ... وصراحة انصح أي شخص مقبل على شراء سيارة من هاذي الفئة يشقر على الفيوجن .. او فلكسواجن باسات .. او سوبارو ليجاسي .. افضل الموجودي ولا يهونو البقيه

SHERLOCK H

21-04-2015, 02:54 PM

شكرا يا اخ nex على الاضافة

SHERLOCK H

30-04-2015, 01:38 PM

لا اله الا الله

SHERLOCK H

02-05-2015, 11:46 PM

فيه اخبار عن سعر الاكورد نزل حتى للسبشل وصار بـ92
ربما الوكيل حس على نفسه وشاف ان المنافسين منتشرين
وباسعار معقولة وقرر يخفض السعر

SHERLOCK H

16-05-2015, 02:14 PM

اليوم هناك حفل لوكيل شركة سوبارو لتجربة الليجاسي الجديدة
انصح بالزيارة للمقارنة بينها وبين الفيوجن والمازدا الخ..

SHERLOCK H

30-05-2015, 10:37 PM

لا اله الا الله

alomari949

13-06-2015, 08:24 AM

تجربة افضل من رائعة واشكر لك تغطيتك على جميع النواحي وخاصة اللي ينساها البعض او ماتخطر على بالة

شاكر لك اخوي

SHERLOCK H

19-06-2015, 04:02 AM

تجربة افضل من رائعة واشكر لك تغطيتك على جميع النواحي وخاصة اللي ينساها البعض او ماتخطر على بالة

شاكر لك اخوي

حيـــــــــــــــــاك الله

SHERLOCK H

23-06-2015, 06:07 PM

سبحان الله

خيو الجهني

27-06-2015, 08:18 AM

SHERLOCK H

29-06-2015, 08:01 AM

سعر الاكورد أقل فئة 85 ألف واشوف انه منافس لانك بتلاقي سيارة جودتها عالية ومن النادر او من المستحيل احد شتكي منها ومن النادر تلاقي استدعاء واثبتت جدارتها على مر السنين ولا ينكر أحد هذا الشيء

كيف منافس ؟
اذا الالتيما تبدأ من 66 بالمعارض وفيها بالدفعة الجديدة من اقل فئة
جنوط ومثبت سرعة ومانع انزلاق وABS

كيف منافس ؟
اذا المازدا 6 سعرها بـ66 وفيها مثبت سرعة وABS ومانع انزلاق
ومكينة 2.5 وسبورت مود وتيبترونيك ( الي مب متوفر بالاكورد السياحي)
ونظام مراقبة ضغط الاطارات ولا انسى ياباني 100% :ch19:

كيف منافس!!

SHERLOCK H

10-07-2015, 07:46 PM

عروض فورد مازالت موجودة في رمضان

SHERLOCK H

29-07-2015, 11:57 AM

مازالت العروض مستمرة حتى بعد العيد

SHERLOCK H

12-08-2015, 06:41 PM

ياشباب انصحكم بالاطلاع على اللون السماوي
ما ادري الوكيل وفره ولا لا

لكنه شيء رائع

SHERLOCK H

21-08-2015, 02:58 PM

لا اله الا الله

ساري الليل

23-08-2015, 07:14 PM

سيارات رائعة صراحة ... و إقتصادية إلى حد رائع

الله يعطيك العافيه

SHERLOCK H

26-08-2015, 07:37 PM

حياك الله وهلا فيك

SHERLOCK H

06-10-2015, 06:50 PM

لا اله الا الله

SHERLOCK H

23-10-2015, 01:22 PM

لا اله الا الله

SHERLOCK H

25-12-2015, 09:50 PM

لا اله الا الله

SHERLOCK H

16-03-2016, 09:27 PM

لا اله الا الله

AlnufManal

15-08-2016, 09:12 PM

مرحبا اخوي الكريم
عرضت علي سياره فورد فيوجن مستخدمه البيع 2014

وانا ليس لدي اي خبره بالسيارات

سمعت عنها انها تععطل كثير والماكينه حرارتها عاليه مع ضغط العمل وانها دائما بحاجه للصيانه

رغم ذلك انا متمسكه فيها وفي حيره من ذلك
ما رأيك اشتريها واتوكل على الله سبحانه او ابحث عن شركات اخرى وشكرا

SHERLOCK H

17-08-2016, 12:26 AM

AlnufManal

19-08-2016, 06:11 PM

الســــــــعر؟؟؟؟

26
انا متردده فيها يقولون مكينتها حراره ترتفع وتحتاج صيانة كل شوي شرايك اخوي انا بستخدمها بمشاوير خفيفه

SHERLOCK H

21-08-2016, 05:02 AM

26
انا متردده فيها يقولون مكينتها حراره ترتفع وتحتاج صيانة كل شوي شرايك اخوي انا بستخدمها بمشاوير خفيفه

السعر جدا قليل بشكل مهول
يبدولي انها مبهذلة ولكن كان راعيها ماقبل بهذا السعر
واذا تبي تتاكد من كلامي ادخل على الحراج
وشف اسعار 2014 على كم تباع

أ بـو بـد ر

03-02-2018, 03:43 PM

lool777

03-02-2018, 10:16 PM

جزاك الله خير أخوي شيرلوك على الموضوع المتميز والشكر موصول للمتناقشين معك والمشاركين

أدري الموضوع قديم
لكن حبيت أسأل واستشير
فيه عرض حالي على فيوجن 2014 من الوكيل ستاندارد أقل نوع جديدة بـ 42000 ريال
ايش رايكم؟

الموضوع مشوق ولكن عندي كذا تخوف
1. مشاكل السيارة .. وأنا شخص غير متفرغ للمطامر على الوكيل، أبي سيارة عملية وتكد وأنسى ، وأنا شخصيا هادي في سواقتي.
2. صرف البنزين، حسيت أن السيارة تصرف، يعني بطاقة كفاءة للفيوجن تقول فيما أذكر 13 كلم/لتر، بينما الألتيما 17 كلم/لتر، والكامري 2018 18كلم/لتر .
3. هل فيه مشاكل من السيارة المخزنة أكثر من 3 سنوات

وشكرا

انا اعرف واحد معه 2011 او 2012
وما يشتكي من شي
حتى غرفت ايام المطر والوكالة قالو له تصليحها ب90 الف
وصلحها بالصناعية ب3000 ريال
نظف بس الفيوز والضفيرة

ومن يوم غرقت صار لها معه سنتين ماشاء الله كويسه

موضوع البنزين قارنها بفئتها من ناحية السعر والصرفيه
احيان سيارة ما تصرف بس فرق القيمة بالي بتوفره خلال 3 او 4 سنوات

او تظطر تاخذ فئة اقل عشان الصرفيه

SHERLOCK H

05-02-2018, 12:42 AM

جزاك الله خير أخوي شيرلوك على الموضوع المتميز والشكر موصول للمتناقشين معك والمشاركين

أدري الموضوع قديم
لكن حبيت أسأل واستشير
فيه عرض حالي على فيوجن 2014 من الوكيل ستاندارد أقل نوع جديدة بـ 42000 ريال
ايش رايكم؟

الموضوع مشوق ولكن عندي كذا تخوف
1. مشاكل السيارة .. وأنا شخص غير متفرغ للمطامر على الوكيل، أبي سيارة عملية وتكد وأنسى ، وأنا شخصيا هادي في سواقتي.
2. صرف البنزين، حسيت أن السيارة تصرف، يعني بطاقة كفاءة للفيوجن تقول فيما أذكر 13 كلم/لتر، بينما الألتيما 17 كلم/لتر، والكامري 2018 18كلم/لتر .
3. هل فيه مشاكل من السيارة المخزنة أكثر من 3 سنوات

وشكرا

حياك الله , السيارة حاليا لا تعتبر خيار مثالي الحقيقة , صرفية الالتيما والكامري والمازدا افضل منها بمراحل
وموديل 2014 قديم بالحيل.هذا غير ان الفيوجن صار عليها فيس ليفت برا وللحين ماجابوه وشكلها راح يتغير
قريب.

اذا ميزانيتك محدودة لو شريت سيارة صغيرة جديدة من المعارض احسن لك.