مساعده تكفون بقياده السياره

[الخالد0]

السلام عليكم .. انا عندي ظروف وماتعلمت الا متاخر
الحين تعلمت التعشيقات وماتطفى اول كانت تطفى والحين الحمد لله حليت المشكلة وتدربت انها ماعد تطفى واذا طفت بس مره
الحين عن الحفر والمطبات وارجع نمره ولا اهدي الوالد يقول اذا كانت على نمره 3 راح تطفى عليك يعني هل ارجعها نمره 2 لو عند حفر ومطبات ولا كيف عند الحفر والمطبات
وعندي استفسار ثاني كيف اخذ اللفات صحيحه 100% يعني وش اسوي انا الحين قاعد يدربني في منطقه الدفاع كلها خطوط ..بس مو مزفلته كيف اركز وما اتوتر
وكيف اوزن الطاره
وكيف اكسر حاجز الخوف بالخطوط العامه وبالزحمه بالله ساعدوني من الالف الى الياء لانه بعد كم يوم بيكون اول يوم لي بالجامعه وماعندي احد يوديني غير سياره الوالد القديمه ..

الحين اذا غرزت كيف اطلعها ؟؟
بالله ساعدوني
منتظر اجابتكم

[majro7]

وعليكم السلام ورحمه الله وبركاته


قبل ابدا [ انا ترى اسوق تماتيك فقط هههههه ]
مو بس انا كثير اصحابي وكثير رجال مايسوقون عادي ابداً
انا اذكر زمان وقت اطلع الرخصه كنت اسوق العادي واختبرت على عادي
ولكن حالياً ماسوقها ولا اعرف [ اخواني كلهم يسوقوها اكبر واصغر بس انا لا ]
اعرف سواقتها بالتفصيل ولكن لي كم سنه ماسقتها يعني لو تسلمني وحده الحين انتع فيها ههههه
بس اشرحلك ابشر عارفها بالتفصيل ههههه

المهم /

عادي تخليها على الثالث وتهدي ولكن الافضل
تثقل ترجع نمره افضل

بخصوص كيف تاخذ الفه هذي ياخوي سهله
يعني معرف كيف اشرحلك
يعني تنتبه من السيارات + تنتبه للرصيف وتلف عادي
ترى هذي ماتخاف منها مره سهله

انت الافضل من الان انزل الشارع
يعني سوق في الحي وبعدين شوارع خفيفه وبعدين اطلع لاشارات وشوارع اكبر

خليك هادي لا تتوتر خصوصا وقت تبديل النمر

واذا احد دقدق بواري لا ترتبش وتتلخبط
خلي الوضع عادي

ترى مافيه شي يخوف خليك هادي
واذكر وقت الواحد مبتدي يقلق ويتوتر اذا احد راكب معاه خصوصا زيك ابوك ههههه
بس شيل الخوف هذا منك لن والله كله بسيط وسهل

وبرضو من النصايح اذا بتنقل من مسار ل مسار انتبه يكون احد وراك طالع في المرايه زين
واذا احد دق بوري هدي وخليك هادي لا تتوتر

من الان ابدا انزل شوارع وكذا عشان تتعود قبل يوم السبت

المهم المهم المهم على مهلك وخليك هادي ورايق

وترى كله سهل بس تخرج وتتعود وخلاص

ابدا من الان اخرج حتى لو تجلس تلفلف بالسياره ساعه ساعتين ثلاثه اخرج
وخذ معاك واحد من اصحابك حتى لو سويت شي خطا ينبهك

موفق يارب

[الخالد0]

جزاك الله خير عند المطبات ارجعها نمره ؟؟ وعندي استفسار ثاني عند الاشارات اخليها بواحد ولا لو مثلا كانت ب 3 ارجعها 2 او اذا كانت 2 ارجعها 1 ؟؟ لانه بكره بنزل معي اخوي الكبير وابي اخليه يعلمني بالحي وبنزل انا وياه مره واحده السوق .. وبسوق انا

شباب ادعولي ان تكون سواقتي هادئة واتعلم بسرعه

[majro7]

جزاك الله خير عند المطبات ارجعها نمره ؟؟ وعندي استفسار ثاني عند الاشارات اخليها بواحد ولا لو مثلا كانت ب 3 ارجعها 2 او اذا كانت 2 ارجعها 1 ؟؟ لانه بكره بنزل معي اخوي الكبير وابي اخليه يعلمني بالحي وبنزل انا وياه مره واحده السوق .. وبسوق انا

شباب ادعولي ان تكون سواقتي هادئة واتعلم بسرعه

خلود حبيبي انت بهذي الطريقه تقلق نفسك
ترى والله الموضوع سهل لا تفكر وتكبر الموضوع كذا
انا اذكر بدايتي كنت استمتع وابغى اسوق بأي طريقه
فخذها من باب المتعه مو الخوف والقلق
انا معاك التوتر موجود ولكن مع الروحه والجيه يمسح تماماً

المهم

ترجع نمره يعني ترجعها من 3 الى 2
الاشاره زي ماتحب يعني مثلاً
انت على 3 ترجعها ل 2 وتوقف
وبرضو تقدر تفضيها تخليها على الفاضي يعني N
اكيد فاهم وعارف كيف تفضيها

ايوا مره حلو انت واخوك انزلو
كذا احسن من وجود ابوك لن لو ابوك جمبك ممكن تخاف تغلط وتتوتر

خليك هدي وخذ الموضوع تسليه قبل كل شي
وخليك حذر والمرايا اهم شيء انتبه لسيارات الرايحه والجايه
الشخص المبتدي دايم ينتبه للي قدام عينه وينشغل عن الي وراه وجمبه فخليك حريص
ومثل ماذكرت لك والله سهل

واي استفسار انا حاضر وانا اخوك
ودايم انصح الواحد يتعلم من بدري افضل

شوف اخوي الحين 2 متوسط بدا يدرب
فالافضل مستقبلاً اخوانك او اي احد يدرب بدري
وهذي النصيحه لكل الي يمر هنا [ ولكن بمتابعه عليه وعدم خروجه لحاله ]

بالتوفيق ياعسل :xyxthumbs:

[JoooJooo]

الشباب ما قصرو :xyxthumbs:

[محمد]

تغيير النمرة على حسب السرعة.
يعني لو جت مطبة أو حفرة وخففت إلى 20 فالأفضل ترجعها للثاني.

بالنسبة للأمور الأخرى ستجد نفسك تجيدها مع الخبرة والأهم أن تتدرب مع شخص يجيد القيادة ويعرف كيف يوصل المعلومة لك

والله يوفقك عزيزي

[ابـوخــــالـــد]

سواقة العادي سهلة بس يبيلها تركيز بعدين تتعود عند المطب والحفره حاول تهدي و ترجعها على نمره 2
عند الاشاره تهدي وتخلي القير فاضي وتوقف واذا بغيت تمشي قوم السياره بنمره 1 عشان ماتطفي وماتنتع وبالسوق خل بينك وبين السياره اللي قدامك مسافه عشان لو مسك بريك فجأة ماتصدمة
وانا اول كنت مثلك اتوتر اذا رحت السوق بس بعدها خلاص تعودت
طبعا تعلمت قبل 15 سنه او اكثر وللحين اسوق عادي
ومع الوقت تتعود
:xyxthumbs::xyxthumbs: