استفسارات عن اسعار ال Q5 و مقارنته مع X3 و ال SRX

[Arsene Lupin]

السلام عليكم شباب.. عندي استفسارات واجد يا ليت تتحملوني شوي. بصف الأسئلة بأرقام عشان يسهل الرد عليها:

1- بكم سعر ال Q5 في الرياض؟ و ايش الفئات الي موجودة عند الوكيل؟ أنا مبتعث فما أقدر أمر المعرض، بس رجعتي قريبه انشالله.

2- لفيت على المعارض عندنا في أمريكا و أكثر شي جاز لي هالثلاث الي في العنوان.. الاودي كيو 6 و البي ام دبليو اكس 3 و الكاديلاك اس ار اكس. أي نصائح وش الأفضل بينهم؟ (أو غيرهم في حدود نفس الأسعار)

3- كيف تكاليف الصيانة و قطع غيار فئات ال luxury بشكل عام.. سواء الألماني او الأمريكي أو الياباني؟ هل فيه ورش جيدة غير الوكالة بأسعار معقولة؟

4- الراتب بعد أقساط قروض السيارة و البيت بيوصل 7000. هل أقدر على هالفئات ولا الأفضل انزل لفئات ال Affordable؟

و مشكورين و يعطيكم ألف عافية.

[B&&W]

وعليكم السلام
Q5 عند ساماكو تبدا من ١٨٠ والظاهر النوع الثاني ب ٢٣٠ تقريبا وتقدر تطلبها بالمواصفات الي تبيها بس كل ما تزيد المواصفات بيزيد السعر بالتاكيد والطلبيه تاخذ 6 شهور تقريبا
ساماكو عنده عرض صيانه وضمان ٥ سنوات يعني طوال هالفتره ماتدفع شي بالسياره غير البنزين والكفرات ع قولتهم
ولا تنسى مصاريف التامين السنويه للسياره
الوكيل ماجربته غير المعرض للاسف صرفت النظر عنهم من سوء الاستقبال بالمعرض فما بالك بما سيحدث لو شريت السياره ورحت للصيانه لاي سبب !!
انا كنت معجب بالسياره A6 ولكن كل مره اروح انصدم من معامله موظفين المعرض الي بالرياض معامله سيئه لابعد درجه بالاضافه انه مو عارفين مواصفات السيارات حقتهم وكل ما تساله عن شيء مافي وتحس انهم مغصوبين للعمل او انك جاي تاخذ منهم سياره ببلاش وطلبت تست درايف وليومك ساحبين ولا كان في شخص جاء عندهم وطلب التست درايف
فانا صرفت النظر عنهم ورحت شريت سياره من مرسيديس مع انها اغلى ومافي عقد الصيانه ولكن على الاقل معامله محترمه
عموما هذه نظرتي الشخصيه ولكن يفيدونك اكثر الي تعاملو معهم اكثر مني
بالنسبه للبي ام ايضا عندهم نفس العرض للضمان والصيانه ٥ سنوات ومعاملتهم ممتازه حسب تجربتي معهم وتجربه احد الزملاء الي شراء من عندهم خلال الثلاث سنوات الي مضت لدرجه تطلع من الصيانه يتصلون عليك خدمه العملاء ويسالونك عن الصيانه وتجربتك وكيف السياره معك وتعامل الموظفين ومن هذه الامور وحتى بالمعرض محترمين جدا ومتعاونين وجربت ثلاث سيارات رغم اني قلت للبائع بعدم رغبتي بالشراء فقط للتجربه وقالي ماعندك مشكله جرب يمكن بعدين تجي تشتري من عندنا


الكاديلاك سعرها مناسب ان كان تحب فخامه السيارات الامريكيه ولا اعلم ان كان عندهم عرض للصيانه بس اتوقع هناك 3 سنوات


ونصيحتي لك اذا انت راجع من الابتعاث وعندك التزامات ماليه لا ترهق نفسك باقساط السياره على حساب حياتك ممكن تاخذ سياره ممتازه بسعر معقول بدون ما تضغط ع نفسك وبعدين تكون خلصت التزاماتك وبامكانك تاخذ سياره افخم
والقرار اولا واخيرا بيدك وبالتوفيق

[speeed1]

ارشح الكاديلاك الفل تقريبا 190 الف اذا ما غلو سعره و مواصفاته حلوة و مكينة الان قوية و تحسنت الداخلية و الصيانة مجانية ل 100 الف كم و حتى الجميح كاديلاك ممتاز كخدمة وشفت اعلانات لهم تاجير مع بنك الرياض بفايدة اقل من 3% مدري اذا العرض موجود ولا انتهى

X3 سيارة تسمع فيها وتشوف صور لها لكن ما لها اي اثر في الواقع الوكيل مهملها تماما

الاودي اشوف عيبها مواصفاتها دايما قليلة

جربهم واحكم

مبروك مقدما

[techmate]

أولا: أرجعك الله بالسلامة
ثانيا : لاترهق نفسك بالاقساط مع بداية حياتك العملية
ثالثا : شيل الكاديلاك من خياراتك لانها كروس أوفر مثل لكزس RX
رابعا : أضف الطوارق واجران شيروكي
والمرسيدس GL ضمن خياراتك

[B&&W]

الطوارق سعره بحدود ٢٠٠ -٢٤٠ ( مع عرض الصيانه والضمان ٥ سنوات ) وعملت لها تست درايف بالفعل السياراه جميله من الداخل والخارج وقيادتها مريحه وفيها فخامه وتقنيات متقدمه ولكن الغريب ان الوكيل مايستورد مكينه ٨ سلندر فقط ٦ سلندرات << مادري اذا كانت من المصنع ولا الوكيل الله العالم

الشيروكي من ١٣٠-١٩٠
ايضا جربت overland ٢٠١٢ منها كانت رائعه بالفعل ولكن اقل فخامه داخليا من قريناتها الالمانيات

المرسيديس كنت برشح لك ml350 بس بتقول متحيز لها ولكن بالسعر ارخص واصغر بالحجم من gl وسعرها بحدود ٢٤٠ وممكن تحصل ع خصم اذا كنت موظف باحد القطاعات الي يعطون الجفالي عليه تخفيض

وعلى فكره المرسيديس ml و gl مصنعهم بامريكا وشركه شيروكي تاخذ منهم كذا قطعه بالسياره مثل القير يعني تقدر تقول انهم ميكانيكيا فيهم تقارب لحد كبير

[Arsene Lupin]

يعطيكم العافية شباب على الردود

B&&W: الاودي اكثر سيارة عجبتني بس على قولتك.. خوفي من الوكيل. يمدحون وكيل البي ام دبليو.. و اسمع عنده عرض تدفع نص المبلغ الآن و نص بعد سنتين. الكاديلاك عندهم عرض صيانه.. بس يبدو لي حق البي ام دبليو يغطي امور اتهلاكيه أكثر.

الطوارق حلو.. بس ما ودي اتعدى الميتين.. و اذا وصلت الميتين اشوف اني آخذ اودي افخم.

speeed1: اتوقع فل الكاديلاك اغلى من 190.. بس فعلا هو الأرخص من الثلاثة.. و هذا الي جاذبني له.

الله يبارك فيك.

techmate: الله يسلمك اخوي. ما عندي مشكله مع الكروس اوفر.. انا حريص على الفخامه، و شوية وسع. راح اشوف المرسيدس اذا سعره مناسب.. لأن اظن عندهم تخفيض للموظف الحكومي.