عطنا تجربتك في الفورد قراند ماركيز

[عاشق الحرية]

يااخوان انا ناوي اشتري فورد قراند ماركيز .

الفلوس الي معي 20 الف فقط يعني لو نفضتني منا منا تاصل 23 الف .

المهم : اخوكم في زنقه مو زنقة القذافي .

اقصد الزنقه السعودية .

اخوكم غشيم بالسيارات وناوي اشتري فورد قراند ماركيز يعني تجيب لي سيارة حلوه على كلام الاعضاء موديل 98 .

هل اقدر اشتري السيارة وانا ماعندي ادنى خبرة في السيارة غير قيادته فقط .

يعني انا ناوي ماهو غدا بعد غدا ان شاء الله اروح للمعرض وش الاشياء الي لزم اشيك عليها وهل الفحص بالكمبيوتر يفيدني كثير واقدر اعتمد عليه بعد الله .
بان السيارة حلوه او لا .

ودمتم بود .

[ابوهيثم الغامدي]

حبيبي انا اول فكرتك تبي جيد وجاي متحمس وماشي 200 ابي انصحك

ومادام فلوسك محدودة وتبي نظيف

23 تجيب لك حول موديل 2000

بس انتبه لاتاخذ وانت مستعجل واتبع الخطوات التالية وان شاء الله مارااااح تندم

1- خذلك يومين اوثلاثة اذا انت منت مستعجل وفر المعاااارض وشوف الاسعار ولا تفكر تشتري عشان ما تستعجل يمكن تلاقي احلا منها وارخص
2- حاول انك تتصيد سيارات من برى المعارض يعني بيني وبينك ابعد عن الشريطية لانهم الاكثرية حرامية
3- حاول تا خذ لك واحد او اثنين او ثلاثة معاك خبرة في السيارات الامريكية وما خاب من استشار ومنت خسرااان ليعطيك وجهة نظره
4- عند تحديد السيارة اللي تبيها لا تقول سعر او توافق على السعر الا بعد الفحص عليها بالكمبيوتر وعندما تروح للكمبيوتر حاول انه ما يكون يعرف صاحب المعرض وخل صاحب السيارة يبعد عن كمبيوتر الفحص لان بعظهم يغمز للمهندس عشان يقول نظيفه وبعدين يعطيه فلووووس حركااااات ننغش منها كثير
5- اذا طلع الفحص تمام وقوة المكينة اكثر من 85 بالمية فالسيارة تمام
6- تأكد ان السيارة غير مرشوشة بتاتا البته واذا كانت مرشوشه فيمكن تكون نظيفة بس تنغش في سعرها فعندما تعلم انها مرشوشه نزل من سعر السيارة 50 بالمية لكي ينزل معاك صاحبها بالسعر حتى ولو 500 فانت اولى بها
7- خلك منتبه وتاكد بان بائع السيارة اللي يكثر من مدحها فهو ترى يحاول يغطي عن عيوب فيها تأكد من الدفرنسات والجربوكس والمينة ولززم على المهندس عند الفحص والله يوفقك ولا تنس الاستخارة اذا استقريت على اخذ سيارة

واتمنى اني قد افدتك في اهم النقاط لشراء سياره نظيفه والله يوفقنا واياك

عطني خبر عند الشراء

[النعيري]

عاشق الحرية;يااخوان انا ناوي اشتري فورد قراند ماركيز .

الفلوس الي معي 20 الف فقط يعني لو نفضتني منا منا تاصل 23 الف .

المهم : اخوكم في زنقه مو زنقة القذافي .

اقصد الزنقه السعودية .

اخوكم غشيم بالسيارات وناوي اشتري فورد قراند ماركيز يعني تجيب لي سيارة حلوه على كلام الاعضاء موديل 98 .

هل اقدر اشتري السيارة وانا ماعندي ادنى خبرة في السيارة غير قيادته فقط .

يعني انا ناوي ماهو غدا بعد غدا ان شاء الله اروح للمعرض وش الاشياء الي لزم اشيك عليها وهل الفحص بالكمبيوتر يفيدني كثير واقدر اعتمد عليه بعد الله .
بان السيارة حلوه او لا .

ودمتم بود .

هلا اخوي عاشق الحرية :xyxwave:

الاخ الغامدي كفى ووفى

لكني حبيت اشارك بخبرتي المتواضعة واذا انك تقول ان ماعندك خبره في السيارة
الا القيادة . فأنا شريت ماركيز 2004 وانا مااعرف اسوق الا العايدي(متهور صح؟؟)
وماعمري ركبت ماركيز علما انه استخدام امريكي . وفحصته بالوكاله
والحمدلله كديته اربع سنوات بدون اعطال الا القطع الاستهلاكية
كالفحمات والكفرات والبواجي لازم تتغير طبعا واعتمدت على الوكاله في الفحص
لانه فحصه بالكمبيوتر وطلع نسبة الماكينه ( مو كذا بس) لازم يتأكد
ان مافيه تهريبات للزيوت خاصة زيت المكينه ( انتبه لايكون ينقص زيت):c004:

الشئ الثاني المهم انهم يفحصون القير(عندهم جهاز يشبكونه بالقير
ويشوفون اذا القير يتأخر في التعشيق اولا ) # كل السيارات القديمة لازم
يتأخر شوي بس عادي# . ومن الاشياء اللي فحصوها عضلات السيارة
ويفحصون البودي . آخر شئ لازم المهندس يمشي بالسيارة
مسافة ويشغل المكيف اعلى درجه ويخلي السيارة شغالة فترة طويله
وهي واقفه مع المكيف علشان يتأكد ان السيارة ماترتفع حرارتها
نص ساعة اقل شئ خصوصا ان الاجواء باردة هذي الايام وعلشان
ماتختلف عليك السيارة في الاجواء الحارة:a1120(82):

وبالنهاية لازم تعرف ان السيارة القديمة لابد يطلع لك
فيها بعض الاعطال ,,,,

تمنياتي لك بالتوفيق,,,

[m-sam]

إذا أخذت موديل 98 أو حتى 2002 بتتعب مع الخرابات وأنت على قولتك مزنوق:bigggrin:
والورش ما يقصرون

أقترح عليك تصبر نفسك باكسنت 2008 أو 09 نظيفة فلها بـ12 ريال :bigggrin: ما تحتاج صيانة مثل الفورد بحكم إن الموديل يفرق كثييير

إلى أن يفرجها الله علينا وعليك

[محمد]

نقل الموضوع من قسم أرشيف المقابلات والتجارب.

[CLASSIC ¬»]

تجربتي مع ماركيز 98 جداً رائعة

أشتريتها قبل 4 سنوات .. سيارة عملية وتتحمل الكرف.. علماً أن قيادتي لها قاسية شوي وحالة المحرك ولواحقة ممتازة الحمدلله

والمبلغ إلي معاك يجيب لك من 98 إلى 2002 .. بس يبغالك تاخذ شي نظيف

[موووت احبك]

الصراحة اسعار الفوردات لها تقريبا سنه طايرة ونار غالية حاول انك ماتستعجل في الشراء موديل 2000 وتحت تاخذة من 18 الف الى 20 الف النظيف بس لاتستعجل وخصوصا في حراج السيارات وروح يوم الخميس والجمعه افضل لك

[Abo Khallody]

والله نصيحتي لك مثل ماقال الاخ sam فورد موديل قديم بتتعبك خصوصا تحت 2003

عبر لك بسيارة يابانيه اكسنت او كورولا واذا توفر معك فلوس اشتر لك ماركيز موديل 2003 وفوق

يعني فلوسك ممكن تجيبلك كورولا 2004 نظيف

انا جربت الكورولا , على قد ماتكرفها على قد ماتعطيك اكثر

[عزيز قوم]

جرب السيارات الصينيه فلوسك تجيب وحده جديده
وشف اول وحده سعرها 23 الف اقل فئه ووكيلها هو نفسه وكيل القراند ماركيز
لا تستعجل فكر واحسبها صح

http://www.hha.com.sa/campaign/geely-2011/oct/GeelyAd.jpg

[ابـو الـخـل]

معي ماركيز 99 لها معي سنتين والحمد لله ما شفت منها الا كل خير

بس اهم شي الفحص ثم الفحص ثم الفحص

انا يوم اشتريها جلست شهر ادور بالمعارض لين حصلت النظيف