اطلق علي بسلاح هوائي ( غازي ) اثناء قيادتي ،،،

[العاشق الحزين]

السلام عليكم ورحمة الله وبركاته

للاسف ما حدث اليوم علي كان امر مفجع لي بالغايه

والله يرد كيده في نحره

الحدث

اثناء قيادتي بطريق الامام سعود وكنت في حي المرسلات في الخدمه وكنت راح اتوجه الى

الطريق السريع كنت ماشي في امان الله والا هذاك الشخص بخلفي وكان الطريق او طريق الخدمه

مسارين انا بالمسار الايسر ومتجه للسريع الي خلفي قام يكبس علي وانا ذاهب للسريع

ويلزق وراي للدرجه انه كان بيدفني فبادرته بتهدئه السرعه ولمسة فرامل ويكبس الزنون العالي علي

السياره الي على يميني بالمسار الثاني فضى الطريق ويلحقني واثناء دخولي للخدمه تجاوزني على اليمين

قلت الحين يصدم في المثلث الي بين الخدمه والسريع اخر مدخل للسريع ومخرج ايضاً

وكان بجوار شركة الاصالات السعوديه الي بالمرسلات ويكمل بالخدمه

وانا دخلت السريع وصار موازي لي ويفتح الشباك انا قلت بيسوي حركة لا اخلاقيه

وكانت السيارة لكزس ES350 بانوراما اللون لؤلؤي موديلها حديث ممكن 2010

وحاط زنون في العالي وكان مضلل السياره تقريباً

اثناء ما كنت موازي له هو بالخدمه وانا بسريع الا بادر واطلق علي من سلاح وضرب القزاز

صوته مخيف جداً لدرجه اني قلت اصابني شي وهو طفا انوار اللوحه وهج وانا نزلت للنفق

حسبي الله عليه في الدنيا والاخره

واتوقع والله اعلم ان ممكن له معرفة هنا واتمنى ان يوصلونها له اني لن اسامحه في الدنيا والاخره

القزاز تبع الراكب الحمد لله لم يتعرض بشي بس كانت الطلقه مائيه او سائل شفاف

كنت ببلغ عليه بس ما عندي رقم اللوحه ولو في مدخل خدمه بلحقه ووبلغ عليه وبضل متابعه

لكن الحمد لله اني كنت قارئ الاذكار الصباحيه والمسائيه وصار الموضوع

في الساعه 11 ونص تقريبا اي قبل ثلاث ساعات وشوي

واتوقع ان هذا السلاح المستخدم لانه هوائي يتعبا بالغاز انا لم اشاهده لن كانو اثنين

السائق فاتح القزاز حقه واتوقع الي اطلق علي الراكب الي معه

وهذي اتوقع والله اعلم نفس السلاح

http://up.graaam.com/forums/552068/11308817445.jpg


http://up.graaam.com/forums/552068/11308817785.jpg

والله يكفينا شر الخلق يارب

والله لا يريكم مكروه

وهذا الموضوع كتبته لكم للاحتياط وانتبهو لانفسكم والله يستر لا يطيحون الشعب فيه ،

تحياتي لكم

[MILAN 2008]

الحمدلله على سلامتك



والله العيب يا خوي في اللوحات الجديدة ما تقدر تلقطها من بعيد


القديمة افضل

[العاشق الحزين]

الحمدلله على سلامتك



والله العيب يا خوي في اللوحات الجديدة ما تقدر تلقطها من بعيد


القديمة افضل



الله يسلمك ويخليك ويجزاك خير

اي والله القديمه اكبر وبسرعه تلقطها

تسلم ع الرد عزيزي

تحياتي لك

[وضح النقاء]

.
.
.
الحمدلله على سلامتك

بس عندي تساؤل


واتوقع والله اعلم ان ممكن له معرفة هنا واتمنى ان يوصلونها له اني لن اسامحه في الدنيا والاخره

كيف عرفت انه موجود هنا واستنتجت هذا!!!

ثم لو ما عرضت المسدسات كان من الافضل لانك مثل : اللي يعمل دعاية عنها ، وعن اثرها ، وانها ماتضر ، بس تخوف!!

واما الطريق فانتبه للمهبل ... والله انهم يخطؤون عليك ... ويتهمونك انك انت الغلطان !!

ملينا منهم

وصار الواحد اذا اخطؤوا عليه ، على طول اعتذر منهم .... من كثر ما يشوف من مشاكلهم .. .. ناس فاضية لاي شيء تافه!!!

تحياتي

[العاشق الحزين]

.
.
.
الحمدلله على سلامتك

بس عندي تساؤل


كيف عرفت انه موجود هنا واستنتجت هذا!!!

ثم لو ما عرضت المسدسات كان من الافضل لانك مثل : اللي يعمل دعاية عنها ، وعن اثرها ، وانها ماتضر ، بس تخوف!!

واما الطريق فانتبه للمهبل ... والله انهم يخطؤون عليك ... ويتهمونك انك انت الغلطان !!

ملينا منهم

وصار الواحد اذا اخطؤوا عليه ، على طول اعتذر منهم .... من كثر ما يشوف من مشاكلهم .. .. ناس فاضية لاي شيء تافه!!!

تحياتي



الله يسلمك ويطول بعمرك ،

انا خمنت ان ممكن يكون هنا او احد يعرفه لان هذا المنتدى كبير ومعروف لدى اغلبية الناس

ولما قلت ممكن هنا لان ممكن احد عارفه ان عنده هذا النوعيه من السلاح ويعرف ان السياره

الفلانيه له اكيد بيعرف وانا ميزت السياره وميزت الفعل المشين الي سواه ،،

وانا ما وضحت هذا النوعيه حتى مدري هي هذه النوعيه ولا لا لاني ما شفت السلاح فعلا

بس فتحته للقزاز واطلاقه وضرب القزاز حق السيارتي بقوه هائله هي الي خلتني اني استنتج ان

هذه النوعيه من السلاح وانا قد شفت في احد الفديوهات الامريكيه الحقيقيه ان معهم زيه ويطلقون

ع الشعب الي يمشي بالشارع وتجيهم اصابات وكدمات قويه عشان كذا قلت انه هو ،،

وانا حبيت احرص اخي العزيز من هذه الفئه التي لها حسابها الخاص عند رب العالمين

والله يكفينا شرهم وشر ما بحوزتهم ،

تحياتي لك عزيزي

[`SIERRA`]

وعليكم السلام ورحمة الله وبركاته.أول شي ألف ألف الحمدلله على سلامتك..عسى بس ما أرتعت؟؟...صراحه الموضوع هذا طووويل جدا أنا ما أدري إلى متى بنظل على الانحطاط
ما ادري متى بنرتقي..داائماً تحصل لي هذي يخطي عليك الشخص وإذا ناظرته فقط
يتعارك معك ويفعل حركات وصخه..وبعضهم يحدك ويوفقك..صراحه مافيه آداب والله
لو بتكلم بظل أتكلم حالنا والله صعبه جدا جدا وصلت للدرجه أنه يوس فيك كذا!!
لاحول ولا قوة إلا بالله..إحنا دفعنا ضريبة الشباب..المهم لو بتكلم بخصوص الموضوع
ماراح يكفني صفحة كامله..الحمدلله على سلامتك.والله يكفينا وياك شر الشباب
ويالله أن تهديهم دمت بود أخي

[:: ابو العز ::]

الحمد لله على السلامة
والله يصبرنا على السواقة في الرياض وغيرها من مدن المملكة
اقسم بالله صار الواحد يطلع من بيته مايدري هو يرجع والا لا .!!

[الموت ..]

:a120(97):


آسف ترا بس حبينا نمزح معاك ..


وأنا عارف إن الطلقات ماهي مؤذية وما توقعت إنك بتحقد ..


كل الحكاية إن الشباب أتحدوني وعاد عارف حركات الشباب ..


على العموم أتمنى إنك تسامحني وتراني حاس بالذنب من يوم قريت موضوعك ..


أخوك / الموت ..


:a120(6):


<< نصاب ..

[km260]

الحمدلله على السلامة __ هالمسدس وين نحصلة بس

[العاشق الحزين]

وعليكم السلام ورحمة الله وبركاته.أول شي ألف ألف الحمدلله على سلامتك..عسى بس ما أرتعت؟؟...صراحه الموضوع هذا طووويل جدا أنا ما أدري إلى متى بنظل على الانحطاط
ما ادري متى بنرتقي..داائماً تحصل لي هذي يخطي عليك الشخص وإذا ناظرته فقط
يتعارك معك ويفعل حركات وصخه..وبعضهم يحدك ويوفقك..صراحه مافيه آداب والله
لو بتكلم بظل أتكلم حالنا والله صعبه جدا جدا وصلت للدرجه أنه يوس فيك كذا!!
لاحول ولا قوة إلا بالله..إحنا دفعنا ضريبة الشباب..المهم لو بتكلم بخصوص الموضوع
ماراح يكفني صفحة كامله..الحمدلله على سلامتك.والله يكفينا وياك شر الشباب
ويالله أن تهديهم دمت بود أخي



الله يسلمك اخوي من كل شر ،

اي والله من اسفل الى اسفل ، هذا واحنا مسلمين

كلنا والله لو بنتكلم ما نخلص هي مسئلة مبداء يتربى وينشئ عليه من طفولته ،،

،الله يسلمك يارب

والله يهديهم امين يارب

شكراً والف شكر لك ع الرد

تحياتي لك عزيزي

[العاشق الحزين]

الحمد لله على السلامة
والله يصبرنا على السواقة في الرياض وغيرها من مدن المملكة
اقسم بالله صار الواحد يطلع من بيته مايدري هو يرجع والا لا .!!


الله يسلمك ويخليك ،

اي والله ، الله يصبرنا ويكفينا شر من به شر ،

صادق عزيزي والله يستر علينا وعليكم يارب وعلى جميع المسلمين

تسلم ع الرد عزيزي

تحياتي لك

[العاشق الحزين]

:a120(97):


آسف ترا بس حبينا نمزح معاك ..


وأنا عارف إن الطلقات ماهي مؤذية وما توقعت إنك بتحقد ..


كل الحكاية إن الشباب أتحدوني وعاد عارف حركات الشباب ..


على العموم أتمنى إنك تسامحني وتراني حاس بالذنب من يوم قريت موضوعك ..


أخوك / الموت ..


:a120(6):


<< نصاب ..





نصاااب اجل :confused1::confused1: الله يخلف عليك عزيزي

زين ما جتك دعوه بعد انت :a1120(121):

[العاشق الحزين]

الحمدلله على السلامة __ هالمسدس وين نحصلة بس


الله يسلمك ،،

وهذا الخوف من الموضوع

الله يستر عليكم ولا تنسى اخوي

دعوة المضلوم مستجابه سواء جتك في الحال او بعد مده

انتبه من دعاوي الخلق اذا كانو مضلومين منت مستفيد الا المصائب الي بتجيك

والله يكفينا شر من به شر

[DRcorolla587]

الحمدلله على سلامتك
وأنا أقترح تسوي هذا الموضوع في منتدى تويوتا العربية قسم لكزس ES350 وان شاء تحصله او تحصل ناس يعرفوه.
العضو (الموت) ماني فاهم عليه!

[Coral2012]

الحمدلله على سلامتك

[Night]

السلام عليكم ورحمة الله وبركاته

ماتشوف شر اخي الفاضل

وحمدالله على سلامتك

وبخصوص هذه المسدسات للتسليه لكن كقانون يعافب عليه في حين انك اخذت الرقم واتهمته بالتهديد وفيها سجن وسحب مركبه

والله يستر عليك

مع التحية

Night

[محمد]

الحمد لله على سلامتك.
كل يوم نرى تقليعة جديدة وبعضها قد يكون خطيرا مثل هذه.

الله يكفينا وإياكم الأسواء.

[m-sam]

أسمح لي أقول أنك أنت من فتح الباب وذلك بالضغط على الفرامل أثناء تكبيس الرجال عليك وهذا الفعل أثار غضبه :smile:

أنا لا أبرر الخطأ لكن لو فتحت الطريق ومشيت في أمان الله ما صار اللي صار ,,,

[Omar F1]

اقلقونا والله ومافي قانون ممكن يردع, عسى ساهر ياكل من جلدهم
المشكلة تحصله من وراك يكشح من بعيد وبنفس الثانية يبغاك تطير من امامه, طيب انا ما اقدر اصفط مرة وحدة من سرعة 120 الى 80 في الخط الثاني

[porsche fan]

الحمد لله على السلامة

[mr.3do0ol]

ما دام ان القلوب نظيفه والمسدس ما يضر , آتمنى انك تسامحه لوجه الله وتحتسب الاجر

وكلنا نخطي , بارك الله فيك

[Meshal.M.Y]

اعرف هذا السلاح :smile:

هذا ياطويل العمر سلاح للعبة اسمها باينت بول لعبته من قبل

هذي في نادي في الثمامة اسمة نسيت وش اسمه والله

واسلحته كلها مثل هذا بس مااظنهم يبيعونها

والسلاح قوي مره ولسعته تعور زين ماكنت فاتح القزازة ولا والله لو جت في راسك ممكن من قوتها يغمى عليك

الحمدلله على سلامتك ياخوي العزيز

+استفسار

وش يبي ذا اللي اسمة الموت :confused1:

[قير علاقي]

واحد يكبس بالنور ..
يمكن مستعجل يمكن معه مريض يمكن واحد مو صاحي او فيه اي بلا ..
تهدي في وجهه وتتحداه ليه
( نفس الموقف صار لأخوي و انتهى بحادث بسيط ومشكلة في القسم)

عموماً حمد الله على سلامتك..وابعد عن الشر وغني له مستقبلاً

[سوناتا V6]

السلام عليكم ورحمة الله وبركاته

حزنت كثيرا ً لقصتك هذه

لأنني سبق وأن تعرضت لنفس المضايقة من قبل شباب مراهق ولكن بطريقة أخرى !

الحمد لله على سلامتك أخوي

لكن تأكد أن الله سبحانه وتعالى سيأخذ لك حقك عاجلا ً كان أم آجل

الله سبحانه وتعالى لا يرضى بالظلم على عبادة

ودعوة الظالم كما تعلم ونعلم جميعاً ليس بينها وبين الله حجاب

.

والله أنك أحيانا ً تشاهد حوادث سير لشباب مستهتر تقول هذا الحادث مو طبيعي أبدا ً !!

مستحيل ! كيف ذلك !

أكيد وراء هذا الحادث دعوة مظلوم

أو دعوة أب غاضب أو دعوة أم غاضبة أو غير راضية عن أبنها .

حمدا ً لله ع سلامتك مرة أخرى أخوي

وما ترى بأس بإذن الله

أخوك

[العاشق الحزين]

شكراً لكم اخواني وكل من رد في موضوعي واسف ع التأخير

والله يسلمكم ويكفيكم الشر ومن به شر بعد ،

احد الردود يقول يمكن مريض او حاله طارئه

طيب شغل الفلشر + زمر اضرب بواري + اتجه لاحد المسارات المفتوحه او الشبه فاضيه

---------

الي يقول انا اول من بديت ما قصر لكن ذقها يا عزيزي وشف وش يصير يالغالي ،،

تحياتي لكم

[Wicked Heart]

الحمدلله على سلامتك



والله العيب يا خوي في اللوحات الجديدة ما تقدر تلقطها من بعيد


القديمة افضل
اي والله صدقت اللوحة الارقام والحروف صغيره وماتقدر تلقطها بسهولة

[سوناتا V6]

اللوحات صممت بدراسة عمليه بحته كما عودنا مرورنا العزيز

أهم شيء ساهر يلقطها

[مجنون سلندر]

يااخي لو اني منك الحقه واصدمه اخليه يخش باصبات اعلمه ان الله حق
:@ والله ارتفع ضغطي

[salehhd]

السلام عليكم

الحمد لله على السلامة والله يعينا وايكاك على مثل هذي التصرفات الغير مسؤوله من بعض قائدي السيارات

[AL-JAR7-69]

اول شيء الحمد لله على سلامتك


ومن ناحية الحركات الغير اخلاقيه هذي صارت عند بعض العالم شيء عادي مثل واحد لما كنت بالرياض بعد العيد رايح اتمشى انا وخوياي الا واحد مدري وش يحس فيه انا مادل بالحيل وابي محل موصفه لي واحد واقرأ باللوحات الا اللي وراي يكبس ويزمر واشوف انهم شباب وصوت المسجل يرقع شوي فضى الشارع وطافني وفتح القزاز وعمل عملتها وانا وراه الا اربيه لحد ماوقف ونزل يهايط يابن الـ***** كلمات بالحيل قذرره وجاه المقسوم هو وخويه الثالث ساكت صغير بالعمر وخليناه من بعدها لقينا محلنا ورجعنا لديرتنا اللي لا صار لنا شيء فيها عرفناه انه ولد فلان ولا ولد علان

[العاشق الحزين]

شكراً لكم اخواني والله يسلمكم ويطول بأعماركم

والله يعينا عليهم ويكفينا شرهم

واقولكم كل شخص ياخذ حيطته وحذره لكي لا يتعرض للاذى

بعضهم يحمل اسلحه ناريه وبعضهم اسلحه بيضاء وبعضهم يحمل اي شيء

خطير الله يكفينا الشر

تحياتي لكم اخواني

[abo suliman]

عدت على خير وانا اخوك .. وهذولا بزران مسكوا مواتر ..


بس لو بمكانك ما اتركه .. لاسباب ومنها تعطيه درس ماينساه .. بكذا راح يكرر كرته

وممكن يطلق على شخص كبير بالسن ومن الخوف يحذف الموتر ويصدم وحلها عاد


قد صارت لي سالفه على طريق الطايف .. تريله كانت بالمسار الاوسط .. كبست له ما رضا يمسك مساره المحدد له .. اضطريت أجي جمبه و ألف عليه شوي عشان يفهم ان المسار موب له .. فجأه طلع يده مع الدريشه وماسك مسدس


وماتشوف الا غباري عقبها خخخ