عندما يزأر الأسد يسكت جميع من في الغابه

[دردعانه]

سلاااااااااااااااااام عليكم
السلام عليكم

مساء الخير

نعم هالشي معروف الأسد إذا زأر كل اللي بالغابه يسكتون ويخافون

سلمولي على الكابريس ياعرررب

قصتي ابقولها لكم

واللي بيصدق اقولها فدددديتك

واللي مايصدق اقوله على راسي لأن الصدق أنا براسي ماكنت مصدق سالفتي بس تأكدت وبقووه عقب تجربه بتقروها باللقصه :ch19:


السالفه يااخون شريت لي كابريس قبل سنه موديله 2001 ال تي زد 8 سلندر

المهم الموتر اول ماشريته كان فيه بعض الخرابات وكلفتني حول الـ 3700 ريال

يعني نفضته تحتيته

فلما جيت ذاك اليوم للورشه ابغى اطلعه قالي المهندس ترا التأمين مفصووول

قلت وشو التأمين تراي ماعرفه

قال يعني مثلا الفورد إذا وصل الـ 1790 مو يفصل ؟؟

قلت اي

قال موترك الفصله ماهي فيه

يالهوووووووووووووي

قال خلني اركبه لك

قلت لا خله لأن صراحه جازلي هالشي يعني يمشي طبلونه وااااااااااو

فقالي : بس يضر قيرك <<< أحفظوا هالكلمه لأني ابجيب سالفتها بعد شوي :smilie20:


الحين طلعت الموتر ولله الحمد

قلت خلني ابشوف القومه طيبه ولا لا لأني قبل كت اسمع بالكابرس انو قوووي ومادري شلون

فقلت اجرب الحين

فكبست لأم أمه وماشااااء الله والله ماسمع غير زئير أسد وهالصووووووووت يطرررب

وشوفوا هالمقطع على الداينوا من الثانيه 29 اسمعوا الصوووت هذا اللي اقصدلكم اياه

http://www.youtube.com/watch?v=N2UAaQdVF00&feature=related

المهم قمت امسكبه خطوط ذاك اليوم للرياض والشرقيه والمدينه ومكه

بس الصراحه ماوصلت إلى 240 يعني اوصل إلى 220 وخلاص اوقف لأني صراحه اخاف:bigggrin:

وبنفس الوقت ماعمرها تعدتني سياره لأن كلهم ماتعدوا الـ 180

ماعدا كامري 2010 يمشي 210 يعني على الفصله واهبلبه ارووح عنه وارجعله ولاتزعلوون

ياصحااب الكوااامري

فذاك اليوم كنت جاي من الرياض رايح للقصيم ومثبت السرعه عالـ 160

ولما اقبلت على المجمعه والله ومادريت غير الأريون السبورت 2010 يجي بجنبي ويروح ويتعداني ويدق فلشرات وبعدين يرجع لي

وعلى هالموال وانا بصراحه ماعرفت وش يبي لأن أبو الشباب مشغل أبو نايف وداخل جو

ففهمت اخيرا وش يبي هذا المخلوووق الياباني

فقلت خلو يرجع ويصير بجنبي وابجرب حظي معه مع العلم إني أدري أنو بيروح عني بحكم انو سيارته جديده

فلما جاء بجنبي دقيت له اشاره يعني يالله مساااااااقط

انا جاء ببالي أنو ماأكفخ على طول

قلت خلني اجاريه الين يطق امبيري

فمشينا سوى حتى وصل امبيري 250 وشووووي تحت

حتى عيون البس صرت اشوفه خط وااحد

المهم صرت اشوف نفسي اني اتعداه وكل مالي ابعد عنه !!

وش السالفه ياولد ورا مايروح هالشخص لايصير يطقطق علي بس

فصرت ادقق له اشارات يعني يابو تعال لاتصير جبان <<< يهايط

بس والله ماتوقعت إنو هياطي بيصير بمحله ههههههههههههه

الولد مب راضي يلحقني وبنفس الوقت يكبس لي كل مادقيت له اشاره

وش السالفه ياولد !!:

المهم خفيت السرعه لحد ماجاء بجنبي ودقيت له اشاره يعني هيا نكفخ مع العلمم إنو امبيري لسى للحين على الـ 250 فرحت وخليته ورجعت مره ثانيه وثالثه ورابعه

بس مب راضي يرووح معي

المهم جينا محطة الغاط ووقفت اعبي بنزيم واذا خويي راعي الأريون بجنبي يعبي

فنزل وسلم علي هالمواطن فقال ماشاء الله هالمزيون يمشي هالممشى ؟؟

فأنا بخيت ضحك قلت ياولد لاعاد تطقطق

فقال ياخي والله العظيم إني أمشي 260 امبيري واقف عليه وعجزت الحقك

:confused1::confused1:

كيف كيف يابو الشباب تستهبل أنت ؟؟

قال والله االعظيم إني امشي وراك 260 ؟؟

قلت ياخوي انا من اليوم احسبك تمشي عالـ 220 ماتشوف من اليوم ادقق لك اشارات ابيك تلحقني

يوم قلت هالكلام ولا ابو الشباب ميت ضحك

قلت ياخوي بجد انت تستهبل ولا تتكلم بجد

فحلفلي الرجال وقال والله امشي وراك 260 حتى رجووولي وصلت المكينه هههههههههههههه

المهم اخذنا نسولف شوي

فلما مشيت

جاء في بالي أقرب ورشه بالقصيم لأني والله شكيت قلت يمكن انو معدل هالوتر

لكن الوقت ياحلو الحين الساعه 2 بالليل من وين لك ورسه

المهم الحمدلله وصلت القصيم

بس مانمت إلا أعرف الموتر معدل ولا لا ؟

فواصلت لحد ماجاء الساعه 9 الصباح ورحت للقرعاوي هالورشه ماعليها كلاااام واسألوا حقين القصيم والخبر :)

فطلبت منهم إنهم يشوفوون هالموتر معدل ولا لأني والله ماعرف شي بهالأمور

فأتاني الرد بأنو الممووووووووتر مب معدل والمكينه مكينته البلد

االله وأأأأأأكبر

ماشاء الله تبارك الرحمن

قعدت اقول في نفسي ماشاء الله هذا مكينته بلد قووويه و والموتر LTZ

أجل كيف S S

المهم طلعت من الورشه ومبسوووووووووووط لأني حققت إنتصار لأول مرره أحققه هههههه

أصلا في حياتي مانتصرت هع

فأخذت شهر بالقصيم عند الأهل

فمسكت احد الأيام اني اروح لحايل ابتمشى لأن جو اهل الشماااال يهبللل

فأتت منافسه بيني وبين لكزس 430

وسفطنااااها بالراحه :wink:

لكن يوم جيت من حايل ياحلوووين تحرشت تحرش مب في محله :bigggrin:

لقيت مرسيدس والله مدري كم موديله بس من موديلات الـ 83 و 84

بس شكله من برىىى جديد نظييف

المهم صرت مثل راعي الأريون اللي فوووق

تعدااه وادقق له اشارات

لكن الرجال كااش وفقع وخلاااااااااااااااني

وقسم انا الحين اللي وصلت رجولي لجوى المكينه وللسلندر بعد هههههههههههههه

وصراحه توووووووووبه اتحرش بألماني :bigggrin:

طبعا بعد هالسالفه ماعاد اطيق الكابرس عقب المرسيدس

وقمت العن ابو ثواه بالديره وانواع المقوامات على قلة سنع

فخبط القير :blue:

ووضبته بـ 3200 ريال مع ضمان سنه


ورجعت لرفيقي وقلت ياححبيلك ركبلي الفصله وخله يفصل على 120 بس لايخبط قيري مثل اول

وبعدها بخمس شهوور صارت المكينه تشكي ومالها حيله أنواع التفقيع

بس ماني راعي درفت

ويبيلها توضيب ههههههههههه

بس ماعلي عندي سياره ثانيه إذا خبطت

فطموحي الحين بالجديد

على حكم تجربتي للكابريس لقيت فيها مميزات كثيره ومن اهمها

الرساااااااااااوه

الأمان

الراحه <<< أحس إني بغرفة نووم

ماشاء الله عليهن


وعندي استفسار ياحلووين

هل مكينة الأس س تختلف عن الـ LTZ ؟؟؟

وكم قوة كل وحده فيهن

والكوابرس الجداد وشلون استخداممها هل تنصحوني فيها


وشاكرلكم متابعت القصه :ch19:

[Golden Holden]

السرعه ما منها خير ، ما تسوى عليك يضرب كفر أو أو و أنت في شبابك ...
المهم :
المكينه نفس الشيء لكن الأس أس رياضي و مع العلم أن الجديد صار قيره 6 نمر ، من ناحية الخرابات
إبعد عن الحفر و لا تكثر زرزره ، من 2009 بالذات الكابرس صار أكثر إعتمادية و الكلام هذا مجملا بدأ مع الشكل الجديد ( 2007 ) ، موفق ...

[NOT HEMI]

اولا مـافي اسد يعيش في الغابة ههههههه

ومــاشاء الله علــى مــوترك .. لكــن ودي اعــرف وش نــوع المــرســيدس لأن خبــري انهم يفــصلون على الـ 245 .

[ملوكي 1]

لقيت مرسيدس والله مدري كم موديله بس من موديلات الـ 83 و 84

بس شكله من برىىى جديد نظييف

المهم صرت مثل راعي الأريون اللي فوووق

تعدااه وادقق له اشارات

لكن الرجال كااش وفقع وخلاااااااااااااااني

:a1120(121):

[المكي السلفي]

تذكرت قصة الحمار والاسد>>>>> يا أسد خليك أسد>>>> فر من الكابريس الجديد فرارك من الأسد (آخر كابريس صنعته امريكا هو موديل90)

[عاشقها بجنون]

الكاااااااااااااااابرس مووووووووووووووووووووتر

والى مايطول الكابرس خرباته يقول عنه كثيره

[TAURUS KING]

ههههههههههههه
ماشاءالله على سيارتك وعلى أسلوبك الخطيرررر هههههههه والله دخلت جو وانا اقرأ قصتك مع الأسد حقك الي اسمه كابرس
تصدق حمستني على سالفة فك التأمين حق السرعة :bigggrin:

[Meshal.M.Y]

ههههههههههه ماشاء الله

الحمدلله عندي هالاسد اللي تتكلم عنه

ومن حبنا له شرينا الشكل الجديد موديل 2010

السيارة روعة ومكينه وشكل جميل ومريحة

انصحك تشتري الجديدة

والمكينة ماتفرق كلهم نفس الاحصنة والقوة لكن اللي يفرق الاشكال بس :smile:

اس اس رياضي رويال فخم من الدرجة الاولى ال تي زد فخم ال اس عملي :wink:

والله يوفقك ويرزقك ال 2012 :xyxwave:

[أبو عابــد]

مشاء الله على سيارتك معروف الكابريس من موديل 2000 الي 2003 زي الطيارهـ

[renegade]

تهور وجنون!:c0038:
توب قير على غفلة.

يا اخي اذا بتورينا بطولاتك رح دورلك طريق مهجور واذا انقلبت ومت ماحد درا عنك. موب تقلب في الخط وتظفلك كم عائلة بريئة!

العجوز ذاك اليوم معي في السيارة على طريق القصيم ولا قدرت ترتاح من
الي يخطفون يمين ويسار.

يا ويلكم ما غير تدعي عليكم

بعدين يا حبيبي ترى الاسد معروف )الاكسبديشن( موب سيارتك الدردعة :smilie16:

[black coffee]

الي عندك قوتو 292 حصان والاس اس 2001 325 حصان

[alraddadi]

ما شاء الله عليكـ وعلى سيارتكـ من جد دخلت جو مع القصه كان باقي لها تصوير :bigggrin:

الكابريس وحش واسد واللي يعجبكـ

من جد سيارة زي ما تعطيها تعطيكـ وعلى فكرة الحين الكابريس بكل فئاته 8 سلندر

وعلى كلام موظف التوكيلات العالمية انه فئة LS بقوه 400 حصان

بس مافي بعد الـ SS والله ملكـ في الخط . . طبعا بتكلم عن تجربه لكابريس 2009 و لومينا SS 2010

وان شاء الله قريبا كابريس SS

احترامي وتقديري

[مغبر الكابرس]

يالبى الكابريس
كل يوم قول قصـه .

[شي ثاني]

أماااااااا اسلوووبك رهيب ..

دخلتني جو اكشن...

صراحه مالي خبره بالكابرس...لكن ترا الاوريون يفصل على 235

أمااا المرسيدس فهي قويه ..خصوصا الـ 560 القديم ...اجراااام

تحيـــــــــ ااااته.....*

[boss~1]

أسلوبك في السرد رووعه خاصة لما قالت صاحب الأوريون مشغل ابو نايف وداخل جو ههههههه

المهم ان الكابريس ltz موديل 2001 يجي 290 حصان والاس اس يجي 325 حصان
لكن ما شاء الله الال تي زد يمشي مشي مجنون خاصة انه قديم 2000 !!
انا سبب خقتي مع الكابريس موديل 2001 لما كان عندي كان حاجة ثانية غير عن كل السيارات .. وذحين عندي 2011
وقالوه الأولين كيف نعيش بلا كابريس

على طاري المرسيدس
الكابريس ls1 مستواه رهيب مع المرسديس 560sel !

وفيه واحد يقول الاسد ما يعيش في الغابة اجل وين يعيش مثلاا ؟

[Energy]

يا خوي بطل سرعه صراحه الواحد صحيح يسرع بس يخليها لوقتها يعني لظرف طاريء حياه او موت لا قدر الله ...


وفيه واحد يقول الاسد ما يعيش في الغابة اجل وين يعيش مثلاا ؟


خخخخخخخخخخخخخخخخخخخخخخ لا ابشرك لقيت اسد قاعد يدور في اكياس الزباله اكرم الله الجميع جنب بيتنا خلاص بدأو يهاجروا من الغابات :blue:

[NOT HEMI]

^^^
هاه !!
انــا اقصــد الاســود الــبواسل يعــيشون فــي مــراكــز الهــيئة < عــاش مصــرف هههه
_____________

دام انــي رجعــت ارد بقــول الــي فـي عــندي ..

تمــشي 250 معــقول .. لكــن 270 معــليــش هــذي مــاتجــيبها الا وانت شــاد العــزم مــن القــصيم الــى الريــاض هههههه

علــى كــل حــال ..
الاوريــون يــفصــل علــى 235 .. و اذا كــان فــاك الفــصلة , مــاراح يــعرف كـم يمــشي لأن الطبــلون يكــون طــافي .. والــي مــعاه اوريــون يعــرف وش اقــصد .

علــشان تســذا الكــلام غــير مــنطقــي .

علــى فــكرة .. كــان معــي لكــزس 98 . المكــينة 4 لــتر فـقط و 290 حصــان و اجــيب الفــصلة 250 .. و المــوتــر فــيه عــزم لكــن يبــيلي خـط و فـك فــصلة .

[super_safari]

ما شاء الله هذي لازم تصير رواية تنباع في مكتبة جرير.

قوة الكابرس من 2000 إلى 2003 هو
290 حصان
و الستة سلندر و اللومينا كانت 210 حصان بذاك الموديل.
و الإس إس 324 حصان و صارت 328 حصان في عام 2004.
أما في 2007 أظن 360 حصان على ما أظن.
و الحيد 2011 ما أدري بصراحة.


^^^
هاه !!
انــا اقصــد الاســود الــبواسل يعــيشون فــي مــراكــز الهــيئة < عــاش مصــرف هههه

أضحك الله سنك يا فتى.

[وحش الخط]

الكابرس معرووف انه اسد بس حساافه لو اني داري انك من اهل القصيم كان تقابلنا قبل مايخرب المووووتررر :xyxwave:

[ابو زايد العنزي]

بعدين يا حبيبي ترى الاسد معروف )الاكسبديشن( موب سيارتك الدردعة :smilie16:[/QUOTE]
حسستني ان الاكسبدشن مثل الكايان :tongue:

[أبو ماجد البشري]

صدقني لو اساقطقك على كابرسي 89ماتطلع على امشي 200 بنصف الدعسه ولا عمري ساقط احد إلا جي اكس ار 2006 وعجز يلحقني الأمبير عد من جديد اما الأخيرات مشكله لا اسرعت عدم القير لأنه حساسات وله تحمل معين اما القديمات لا بس تبيلها واحدٍ قلبه صميدعي بايعها باللي هي به ..

مشكور على القصه الدراميتيكيه..

[محمد الحربيِ]

يا اخوي درينا الكابرس اسد وقوي لكن وش هالجنان اللي تسويه ..!!

صدق من قال اهل العقول في راحه ..

اخوي تكفى لا تتهور اهلك ينتظروك واحبابك واصحابك فلا تجرح قلوبهم بسبب الاسد المزعوم ..

واللي يقول الاكسبديشن اسد اقوله نعم اسد بس شكله بايخ ويحب الورش بشكل جنوني

[سوناتا V6]

السلام عليكم ..

إذا سيارتك طافت الأريون وسرعتها بلغت 260 ك.س

فهذا لأن سيارتك أوشكت تخبط وتحرق زيت وهذا شيء طبيعي ومعروف

وأسأل فيه أهل المكنيكا وأهل الورش يفيدونك

المكسيما والألتيما والتورس وأخواتها من ذوات الأحصنة العالية ....................

بل حتى الجمس 79 اللي مكينته موضبه خمس مرات وقيره منزل سبع مرات يروح على سيارتك

أخوي الغالي

دائماً حط بالك شغله وحده بس قبل ما تجاكر أي سيارة هي في الأساس أقل من سيارتك قوة

أنه مثلما يوجد أقل منك قوة على الطريق فأنه بالمقبال يوجد من هو أقوى منك فلماذا هذا التعب كله ؟!

ونصيحة مجانية لك مني

السرعة ما تجيب خير أبد ....... وترى لو فيها خير ما تركناها

ولولا ستر الله على كثير من خلقه وأنا منهم في أيام خلت لما كتب هذا الرد الآن في موضوعك

ووالله الذي لا إله إلا هو أنني كلما تذكرت تلك الأيام أسجد حمدا ً لله على ستره وعافيته

وأقول كيف كنت أفكر في ذلك الوقت ؟ بل أين كان عقلي ؟!

الله يحميك ويستر علينا وعليك

موفق للخير ،،،

[وحش الخط]

السلام عليكم ..

إذا سيارتك طافت الأريون وسرعتها بلغت 260 ك.س

فهذا لأن سيارتك أوشكت تخبط وتحرق زيت وهذا شيء طبيعي ومعروف

وأسأل فيه أهل المكنيكا وأهل الورش يفيدونك

المكسيما والألتيما والتورس وأخواتها من ذوات الأحصنة العالية ....................

بل حتى الجمس 79 اللي مكينته موضبه خمس مرات وقيره منزل سبع مرات يروح على سيارتك

أخوي الغالي

دائماً حط بالك شغله وحده بس قبل ما تجاكر أي سيارة هي في الأساس أقل من سيارتك قوة

أنه مثلما يوجد أقل منك قوة على الطريق فأنه بالمقبال يوجد من هو أقوى منك فلماذا هذا التعب كله ؟!

ونصيحة مجانية لك مني

السرعة ما تجيب خير أبد ....... وترى لو فيها خير ما تركناها

ولولا ستر الله على كثير من خلقه وأنا منهم في أيام خلت لما كتب هذا الرد الآن في موضوعك

ووالله الذي لا إله إلا هو أنني كلما تذكرت تلك الأيام أسجد حمدا ً لله على ستره وعافيته

وأقول كيف كنت أفكر في ذلك الوقت ؟ بل أين كان عقلي ؟!

الله يحميك ويستر علينا وعليك

موفق للخير ،،،


المشكله ان عنده سياره تخدمه وبدال ما يحافظ قام يلعب فيها ويجاكر

[`SIERRA`]

اللي مايصدق هذا أكبر متعصب..مايبي له كلام الكابرس قوووه والشارع يشهد له
مشكوووور على طرح هالقصه بس شوي شوي على القير..
1+1=2 وأكيد اللي يقول لا.. هذا أكبر مجنون
رساوة+أمان+قوة+راحة=كابريس..

[فهد صالح]

اذا وانت في الكابرس تقول مريح كانك في غرفة نوم وش لون لو جربت كراون فكتوريا من نا حية الراحه قسم بالله ان تنجن

[sam4u]

أولا

انا مشيت بالكابرس اس اس 2008 حقي فوق 300 ماصارات خطوط " عيون البس على قولتك " خط واحد
http://www.youtube.com/watch?v=CRx6Fb93sHs

ثانيا :

لو تفحط وتقطع سيارتك الكابرس 2001 من دون تعديل ماياصل صوتها ربع الصوت الي بالمقطع ولا حتى 5% بعد

ثالثا :

مافيه اي اوريون تتعدى 237 والي وابي احد يطلع لي ويثبت لي العكس لو هو حتى فاصل تندة السيارة

رابعا :

ياشيخ نم انت والمرسيدس 84 البلا في سيارتك

خامسا :

اسلوبك فيه الكثير من " التهويل " وكأنك سويت شي عظيم جدا والامور عادية جدا

سادسا :

للاخ الي رد قبلي ياخي بلا فورد بلا بطيخ ياخي العالم قفعوا مرارتنا بهالسيارة السيئة والمنحطة والقذرة .

[LS 2008]

عزيزي كان ينبغي طرح رأيك بحدود الأدب والذوق لكن لما أنت متحامل على صاحب الموضوع أنت في ردك هذا استخدمت أسلوب همجي وكشفت عما تريد إيصاله بطريقة لا أستطيع تفسيرها هنا احتراماً لك .





ثانيا :

لو تفحط وتقطع سيارتك الكابرس 2001 من دون تعديل ماياصل صوتها ربع الصوت الي بالمقطع ولا حتى 5% بعد


إن كنت فعْلاً اعتمدت هذه النسبة وفقاً لدراستك فأنت لا تفهم شيء .





ثالثا :

مافيه اي اوريون تتعدى 237 والي وابي احد يطلع لي ويثبت لي العكس لو هو حتى فاصل تندة السيارة



لقد أثبت لنا بنفسك في النقطة الثانية أنّك لا تفهم شيء.
كما يقوم به العرف أن المثبت تام مالم يُعارضه بإثبات . الأوريون بعد فصل القاطع تمشي 260كم, وليست مشكلتي أن لا تعرف بأن الغيار 5 في عدد دورات 5400د/دقيقة تشير إلى السرعة 260كم/ساعة

لعلك تقصد أنها سيارة غير آمنة بعد 237كم أتفق معك .

[بسدك]

كأنكم مسووين زحمه على الفاضي؟ اسد غابة وكابرس 260 ومدري ايش يسكت الجميع واسمع الطرب وهوشه على قطعة حديد :a1120(121):

والله السرعة آخرتها الموت ..
تخيل انفجر الكفر وانت ماشي 260؟؟؟؟ لا تقول الكفرات جديدة او شي ما تضمن وش يصير لك بالطريق!!
اقل شي ممكن يصير تنقلب السيارة وشوف عاد كم مره بتنقلب!!!

والله اني ما اكذب عليك .. كنت متأخر عن الدوام وامشي طول الطريق 190 من الجبيل الى الدمام
المهم باقي تقريبا مسافة 3 كم واوصل الدوام .. طلعت لي سيارة اكسنت وامسك فرامل واختل وزنية السيارة .. باقي شي بسيط واضرب بالشاحنة والحمدلله عدت على خير.
تدري الفرق كم دقيقة لو كانت سرعتي 120 ؟؟ 14 دقيقة فقط ..

وترا ماهي مفاخرة وصلت للسرعة الفلانيه وتجاوزت السرعة .. السرعة مامنها خير وانا اخوك الركاده زينه.

[بسدك]

اللي مايصدق هذا أكبر متعصب..مايبي له كلام الكابرس قوووه والشارع يشهد له
مشكوووور على طرح هالقصه بس شوي شوي على القير..
1+1=2 وأكيد اللي يقول لا.. هذا أكبر مجنون
رساوة+أمان+قوة+راحة=كابريس..

رساوة+أمان+قوة+راحة+موت= كابريس

[دردعانه]

ياساااتر

ورى العالم اكلتني

وش هلمتعصبين لهالدرجه الكابرس غااثهم ههههههههههههههههههههههه

ياناااس الدعوه مب تعصب

انا علمتكم سالفه حصلت لي وبس

واللي يقول الأريون ماتوصل 260

اقوله

قهقه في قلبن لايفقه

ههههههههههههههههه

عالعموم اشكر شكر خاص للي نصحوني عن السرررعه

وبعض الناس والله مادريت عنكم :)

واشكر لكل إنسان رد علي بأخلاق :)

مع العلم اني ماستفدت من السررعه شي

غير قير اندمر ووضبته

ومكينتن راحت فيها يعني يبيلها توضيب الحين

وهذا دليل على ان موضوعي صح

مشكوورين

[NOT HEMI]

^^
الله يعــينك علــى الاســد هههه

مــين الـي قــال ان الاوريــون مــا يجــيب الـ 260 !!؟

[..][ ح ــياة التــم ــيز ][..]

اخواني :)

الرجاء التقيد بطور الموضوع و عدم الخروج منه :)

[avalanche 4x4 ever]

ورجعت لرفيقي وقلت ياححبيلك ركبلي الفصله وخله يفصل على 120 بس لايخبط قيري مثل اول






ههههههههه حلللوة

دخلت جو مع القصة


الله يعافيك

[دردعانه]

^^
الله يعــينك علــى الاســد هههه

مــين الـي قــال ان الاوريــون مــا يجــيب الـ 260 !!؟


منوور

والله وانا اخوك واحد رد هنا بس مدري وش نكه يقول كذا :)

طيب كيف مايجيب 260 وهو معي بالخط لين تعديته

يعني تخيل امبيري على 250 وهو جنبي

واخذت شووي لين تعديته هذا يدل على انو يمشي 260

والكابرس معروف لاوقف الأمبير يكمل من نفسه

[دردعانه]

ههههههههه حلللوة

دخلت جو مع القصة


الله يعافيك


منوووور

وماعيش ترا الفصله على 230 مب 120

ويعافيك ربي

[Meshal.M.Y]

حقتنا انباعت قبل يومين :(

الله يوفق اللي شاريها ويعطيه من خيرها

[waleed jely]

حبيبي صاحب الموضوع

الكابريس من بلده يجي بفصلة

ولما تفك الفصلة يوصل 260 ويوقف


لكن انه يعدي 260 ترى هذا الموتر مبرمج والبرمجة مايعرفها الا واحد متخصص في التعديل
لكن ابغى اسالك فيه فرق العزم لما تشغل البور

وبعدين الاوريون مستواها مع كابريس 2006 وهذا قوته فوق 330 حصان

كيف انتا بتطرحه وقوة سيارتك 290 حصان

لكن اقولك عالم القومات ما فيه شي غريب ابدا


ولو لك رغبة في الامريكي نصيحة لا تاخذ كابريس ترى مشاكله كثيرة مرة

شوف الدودج تشارجر سمعت انها افضل منه في الجودة


تقبل مروري

[sam4u]

منوور

والله وانا اخوك واحد رد هنا بس مدري وش نكه يقول كذا :)

طيب كيف مايجيب 260 وهو معي بالخط لين تعديته

يعني تخيل امبيري على 250 وهو جنبي

واخذت شووي لين تعديته هذا يدل على انو يمشي 260

والكابرس معروف لاوقف الأمبير يكمل من نفسه


مساء الخير اخوي

والله عجزت الصراحة اتخيل

يعني انت تقول انك تمشي 250 وبالقوة تعديت صاحب الآوريون

وقلت هذا دليل انه يمشي 260 !!!!


والله ياخي عجزت افهم عليك الصراحة شلون انت تمشي 250 وتجاوزته وبعدين تقول راعي الأوريون يمشي 260

بعدين يالغالي الفرق بين 250 و237 بسيط جدا يعني تخيل سيارة تمشي بسرعة 13

شي طبيعي جدا انك تتجاوزه بشكل بطيء



على العموم انا سالت مجموعة شباب اعرفهم عن موضوع هل توصل الاوريون 260 فا الجميع قال انه سمعوا فقط من ناس يقولون هالكلام ولا احد شاف الاوريون واصل هالسرعات ابد إلا فقط مقطع الفياقرا الي ماندري وش السالفة ولا شفنا أو سمعنا غير ذاك المقطع

[the-ghost]

يا ولد إرحم ( ما شاء الله تباركـ الله ) هذه هي روووووح الكابرس بس والله واحد شكله مزبطلكـ عيييين حااااااااارة هههههههه ............... :tongue:

إقرا عليها بس ما شاء الله تزل الاوريون .................
(الله أكبر )

تقبل مروري

[silver ghost]

اخوي الكوابرس الجديدة كلها 8 سلندر وكلها نفس الجيربوكس ونفس القوة والأداء

الا بالعكس ممكن اقل النوع الي هو Ls يقوم شي بسيط على الرويال وال SS اذا كانو كلهم ستوك

السبب انه اخف منهم لأنه مافيه دلع من الدخل زي الرويال والSS

وانا انصحك بـ LTZ واطلبه بجنوط رويال وعيش الجوو

بس ترى قطع الغيار نااار غير باقي سيارات شيفروليه لأنه اصلا الكابريس من هولدين مو من شيفروليه

وبـ امريكها ماعندهم شي اسمه كابريس جديد اخر موديل كان 98 بعدها كلها هولدين وهي تابعة لي جنرال موتر

واذا حاب تتأكد من كلامي ادخل موقع شيفروليه الأمريكي وماتلاقي شي اسمه كابريس او لومينا ادخل موقع هولدين بتلقاهم :)

بالتوفيق