برنامج تاجير السيارات بهامش 2.99% يابلاش

[malk]

السلام عليكم ورحمة الله وبركاته

حياكم الله اخواني الاعضاء

بما اني ابحث عن سيارة قررت شراء سيارة جديده ولان الكاش غير موجود الله يرزقنا واياكم

مالنا الا التقسيط والتاجير والقروض وخلافه واليوم

قريت اعلان البنك الاهلي اليوم بخصوص برنامج تأجير السيارات الاشمل

بهامش ربح افضل يبداء من 2.99%

(( الاعلان موجود بجريدة الرياض ليوم الاحد 26\ربيع الاخر لعام 1431هـ ))

مميزاته ::

1- برنامج اسلامي ومجاز من الهيئة الشرعية

2- سرعة اعطاء الموافقة دون الحاجة الى حساب جاري لدى البنك او تحويل للراتب


المطلوب (( لا يقل الراتب عن 3000 ريال - تعريف بالراتب - ان تكون موظف من اكثر من ثلاث

شهور - كروكي لمقر المنزل والعمل - فاتورة كهرباء او جوال )) وفقا لما ذكره الموظف

3- توفير الضمان الممتد والتامين الشامل طوال مدة التاجير

4- امكانية نقل العقد وانهائه طوال مدة التاجير

للمزيد من الاستفسار الرقم المجاني 8002441005

النقاط المهمة اللي تهم من يريد الانضمام للبرنامج ويطلب الراي والمشورة ::

1- ما رايكم بالبرنامج من ناحية هامش الربح السنوي (( في نظري ممتازة ))

2- ما هي خفايا البرنامج (( هل هناك شروط اضافية وخلافه ..... الاجابة ممن سبق وتعامل معهم

3- هل هناك بنوك او شركات تعطي عرضا افضل

هذا ما يحضرني حاليا ولي عودة ولكن

لا تبخلوا باي راي او استفسار او مشورة لاخوانكم

[مخربها]

السلام عليكم

اول شي لاتقع في الفخ وانا اخوك

في البدايه 2.99 هذي لها شروط من اهمها تحويل الراتب
وعدنك 3.5 التأمين الشامل يعني 3.5 + 2.99 = يساوي 6.49%

واذا منت محول راتبك توصل لـ9.5 مع التأمين

هذا أولا

ثانيا السياره مو بأسمك تطلع بأسم البنك الأهلي التجاري
يعني كل ثلاث اشهر تروح فرعهم اللي على خريص عشان تجدد وفرعهم صغير مررره ومليان عالم ويفتحون من 8 الى 6

اذا تبي تسافر برا المملكه لازم تخلص اجراءاتك من الرياض لان احيانا من توصل المنفذ وتبي تفويض من مرور المنفذ يطلع على البنك مخالفات فقدامك يا ترجع أو تسدد مخالفاتهم

مسألة ترجيع الموتر او التنازل للغير
يقولون تصير أوكي هي تصير بس لها تعقيدات لها اول مالها اخر

لو بتتنازل لواحد يعقدون والديه لين يمل لانهم مايبونك تروح على قولة عصفور في اليد احسن من 10 في الشجره ويبون هالشخص ياخذ موتر ثاني يصيرون احجروكم اثنينكم

والتنازل عليه رسوم ممكن تصل 3000 ريال

ترجيع السياره او الغاء العقد
لما تقولهم اقدر ارجع السياره لكم يقولون ايه اكيد

يقوومون حبايبي يحسبونها عليك كأنك مستأجرها من ذيب لتأجير السيارات <-- مجازي
يعني مثلا
لو تروح تاخذ تشارجر من ذيب يطلع بالشهر حدود 5000
بس لو تاخذ تأجير منتهي بالتمليك يطلع عليك بالشهر حدود 2300 ريال
بس لما تجي ترجعه بعد سنه مثلا يقولون شوف يا حبيبي اوكي راح ناخذ السياره لكن انت كنت ماخدها تمليك والحين تأجير يعني لازم تفع لنا عن كل شهر 5000 - 2300 = 2700 ريال * 12 = 32400 ريال
والاجار يحسبون عليك بالكيلو لك في اليوم 200 كيلو
والبنك الاهلي يعطيك 25000 كيلو في السنه لما ترجعها يشوف كم ماشيه ويحسب عليك الكيلوات الزايده

انتبه واذا صملت فأحسن الحراميه هو بنت الرياض على الأقل نسبته 8.5% ولكن بكامل المواصفات السابقه ..


اذا نويت خذ العقد معك قبل توقعه ومر محامي وفصفصه انت وياه لين تعرف كل كبيره وصغيره فيه ولا توقع الا وانت عارف انت وش تسوي


الله يكتب لك اللي فيه الصالح

تحياتي ..

[إسكاليد]

مخربها
جزاك الله خير يا شيخ
والله إنك نشمي

[قناص الرياض]

مخربها شكرا على إيضاح الحقيقة

فعلا عروض مزيفة و إحتيال على العلن و امام الملأ

[Abu-Omar848]

مخربها انت خربت عليهم صححححححححح :smilie16:

تقبلو مروري ،،

[malk]

اشكر اخوي مخربها على هالنصائح ولا يهون باقي اخواني

اليوم اتجهت للعيسى وقابلت مندوب البنك الاهلي الموجود بالوكالة

اولا :: النسبة 2.99% للي راتبه ينزل بالبنك الاهلي

اما اللي راتبه عل بنك اخر ياخذون3.99%

ثانيا :: كما ذكر اخوي مخربها هناك تامين بنسبة 3.5% على قيمة السيارة كاملة

يعني حسبو بسيطه لو تبي موتر قيمته 130 الف ريال وستدفع نص المبلغ دفعه اولى

وتقسط الباقي على سنتين هامش الربح راح يكون بين 15 الى 20 الف ريال

هذا ما احببت اضافته

بالنسبة للقروض التي يعطيك البنك مقابلها اسهم

ماهو اقل بنك ياخذ هامش ربح .....

[مسيرة حبي]

ما عمرهم عطو شئ لله

كل فوائد ربويه

[عطل طارئ]

مخربهاااا ماقصر

وبيض الله وجهه والجميع

[مخربها]

الله يعطيكم العافيه ياشباب على الردود

وماسويت الا والواجب

اخوي بالنسبه للقروض ...

اذا انت راتبك تقدر تحوله لأي بنك وشوله اجل تفكر في التأجير المنتهي بالتميلك ؟؟ يخوي ترا والله مايلجأ لها الا المضطر لان ابسطها السياره مو بأسمك فطوال فترة استخدامك للسياره تحس فيه شي غلط تحس انك تستخدم موتر مب لك

شوف كل البنوك تقريباً تتراوح فوائدها بين 2.99 الى 3.75
يعني مثلا لو بتاخذ 100 الف ريال بفايده 2.99% راح ترجعها بعد خمس سنوات 114950 ريال بتقسط شهري تقريباً 1915 ريال
ولو أخذتها بنسبة 3.75% راح ترجعها 118750 ريال بقسط شهري تقريباً 1979 ريال

يعني الفرق في الإجمالي حول 3800 ريال
وفي الشهر حول 64 ريال
السؤال الآن ... انت راتبك على اي بنك ؟؟

شوف راح اقولك شي
انا اللي اشوفه اذا انت مستعجل ولا تبي تعقد الامور خذ القرض من البنك اللي انت محول راتبك عليه حاليا

لان لو افترضنا انك محول راتبك على بنك الفايده عنده 3.75%
ولقيت بنك ثاني الفايده عنده 2.99%
انت عارف كم يبيلك لين تحول راتبك ؟؟
اول شي يبيلك تجيب مخالصه او اخلاء طرف من بنكك السابق
وهذي يبيلها تقريبا من 10 الى 15 يوم لين تجيك المخالصه
وبعدها تفتح حساب في البنك اللي تبي تحوله راتبك
وبعدها تروح لدوامك وتحول راتبك
وبعدها البنك اللي توك محول راتبك عنده لازم يستقبل راتب شهر عشان يبدأ في اجراءات القرض اللي تختلف من بنك لبنك ومدتها من ساعه في بعض البنوك إلى ماله نهايه
انا اشوف 64 ريال في الشهر او 3800 ريال بعد خمس سنوات مو مستاهله كل هالتعب

عموما
البنك الفرنسي
وسامبا
والرياض
3.5 واذا تعرف احد ينزلها شوي ممكن تنزل لـ2.99%
مصرف الانماء 3.75
الجزيره 2.99% بس خدمه لك عليها
الراجحي لو قالوا لي فايده 1% مارحت لهم <--- رأي شخصي ولاعندي خبر عن الفايده عندهم


وعلى فكره طبعا الفايده تختلف على حسب اختلاف القطاع اللي انت فيه
احيانا تكون في شركه معاقده مع بنك معين بفايده اقل من باقي العملاء
واحيانا تكون اعلى من باقي العملاء

ولا تنسى الرسوم الاداريه وهي رسوم يطلبها كل بنك على القرض بعضهم يخصمونها من القرض اول ما ينزل بحسابك وبعضهم يقولك اودعها بحسابك واذا خصمناها نزلنا القرض وهي في تكون تقريباً من 800 الى 1300 على حسب البنك ...

الله يسمح امرك ويكتب لك الصالك ....


تحياتي

[malk]

اشكرك اخوي مخربها جززيل الشكر

راتبي على الراجحي الله يخارجنا

[مخربها]

الله يسلمك

طيب شوف العرض اللي عندهم وش راح يقولون لك على الفاديه وغيره
اذا ماجازوا لك حوله على الانماء او الفرنسي

واذا تبي اسلامي 100% شوف عندك الانماء لان قروضهم عباره عن سيارات يكتبونها بأسمك وانت كيفك تبيعها تخليها على راحتك بس شرطهم تكون بطاقه جمركيه يعني جديد

تحياتي

[الخطيييييييير]

السلام عليكم ورحمة الله وبركاته ..


شباب انا سمعت ان بنك الاهلي نسبته مو ثابته تتغير كل سنه حتى لو انك موقعد العقد على خمس سنوات

والله اعلم

( ما ازيد على كلام الشباب كفوو ووفوو)

[C300-SRT8]

اذا ما عندك امكانية كاش
نصيحة اخو لاخوه
حاول باي شكل تطلع قرض من البنك واشتر السيارة الي تناسبك
في حال اخذت من البنك نقاط كثيرة لصالحك
السيارة بسمك متى ما بغيت تبيعها وتستفيد من قيمتها
فؤاد البنك اقل بفارق كبير عن شركات التقسيط او شراء سيارة عن طريق البنوك

[مخربها]

السلام عليكم ورحمة الله وبركاته ..


شباب انا سمعت ان بنك الاهلي نسبته مو ثابته تتغير كل سنه حتى لو انك موقعد العقد على خمس سنوات

والله اعلم

( ما ازيد على كلام الشباب كفوو ووفوو)


السلام عليكم

بالنسبه لكلامك عن زيادة النسبه كل سنه
اخوي كلامك صحيح ولكن هذا في القروض السكنيه او التمويل السكني
يتم تقييم البيت كل سنه ولكن تغير النسبه تكون يالزياده او بالنقص وطبعا عمرها ماراح تنقص ولكن الزياده مو على كيفهم لانها موضحه بمالا يزيد عن 1% فقط
ماعدا سامبا نسبته ثابته ولكن البنوك كلها نسبتهم في البدايه على ما اتذكر 4 ومتغيره في السنه بس سامبا ثابته بـ4.75

وهذا بعيد عن السيارات او القروض الشخصيه


تحياتي

[D E N A L I]

مخـــربها الله يوفقك .. ويرحم والديك .. بيض الله وجهك وجمَل الله حالك كفيت ووفيت .

[أنا ألووو]

اشكر اخوي مخربها على هالنصائح ولا يهون باقي اخواني

اليوم اتجهت للعيسى وقابلت مندوب البنك الاهلي الموجود بالوكالة

اولا :: النسبة 2.99% للي راتبه ينزل بالبنك الاهلي

اما اللي راتبه عل بنك اخر ياخذون3.99%

ثانيا :: كما ذكر اخوي مخربها هناك تامين بنسبة 3.5% على قيمة السيارة كاملة

يعني حسبة بسيطه لو تبي موتر قيمته 130 الف ريال وستدفع نص المبلغ دفعه اولى

وتقسط الباقي على سنتين هامش الربح راح يكون بين 15 الى 20 الف ريال

هذا ما احببت اضافته

بالنسبة للقروض التي يعطيك البنك مقابلها اسهم

ماهو اقل بنك ياخذ هامش ربح .....


الحسبة مش بهذا الشكل ابداً

مبلغ التمويل هو كامل قيمة السيارة تضاف عليه قيمة الفائدة

و تدفع المقدم اللي يقولون لك عليه و الباقي اقساط

[هادي ابو ريماس]

السلام عليكم ياخوان

بخصوص بنك الرياض هو افضل بنك عميل بنك الرياض 2.99

غير عميل بنك الرياض 3.99

تأجير السيارات المنتهي بالتملك

فترة عرض

اخوكم هادي العنزي جوال 0552455126 موجود في شركة عبداللطيف العيسي السيارات بنك الرياض :ch19:

[ابوعوادد]

لاتاخذ القرض الى على شيين اذا تبي تبني او تشتري ارض او مهر زواجك اما الباقي خرااابيط اروح اتدين من البنك عشاان شيء استهلاااكي مثل السيارااات بعد سنتين تتهربط ماتبقى بريال الحمد الله

[سنوات الضياع]

اخوي ابو عواد احيانا تكون مضر على البنك وبعدين من ذي الايام يبي يسلفك 60000

عشان تشتري سياره لا والله اقسط البنك ولا احرج نفسي مع الناس

وبعدين اخوي مخربها انا راتبي على الراجحي ممكن تقولي ليش ما اطلع قرض من عندهم ابي استفيد منك الله يجزاك الجنه

[مافي داعي !!]

يارجال اشتر مستعمله وريح نفسك الايجار مؤذي جداً واذا تبي قرض على قولهم اعمر بيت ولا شي انتبه منها نصيحه لوجه الله

[هادي ابو ريماس]

السلام عليكم

يا خوان بنك الرياض هو افضل بنك في تأجير السيارات

تحياتي لكم

[علووولي]

خربت السوق يا مخربها
والله انهم نصابين واحدروهم