وكلائنا وعدم اختيار الموظف المناسب وعدم توضيح الحقيقه .... دعوه للنقاش

[C300-SRT8]

بسم الله الرحمن الرحيم
السلام عليكم ورحمة الله وبركاته

احد زملاء العمل شخص هادئ من حاله في شانه ماتسمع له صوت من النوع الي من الدوام للعمل ومن العمل للدوام
طبعا الرجال متزوج الله يخليه لعياله
كان ناوي يشتري سياره شوي عائليه وواسعه على قد امكانياته فكر بالكابرس الجديد وكان الاختيار كابرس ls
من هنا نبدأ بالموضوع الفعلي
هو شراها على انها V8 والرجال ماعنده اي خبره في السيارات ولايدري ان فيه نوع V6 ولاهو مصدق يقول معقوله كيف كابرس و 6 سلندر قلت له انت خبرك قديم الكابرس الجديد فيه 6 سلندر بدا يشك في سيارته الي هو شراها على انها 8 سلندر طلعت انا واياه للمواقف وشيكنا على السيارة ولما فتح الكبوت عرفت على طول من يوم شفت المكينه انها نفس مكينة اللومينا ماصدق للحين وريته الكتابه الي على جنب المحرك ويوضح فيها V6 وقلت له ترى هذي معناها ست اسطوانات بالعاميه 6 سلندر
بدا يحس بالغبنه ولاهو مقتنع بالمره في كلامي الين راح لورشه للتاكد فقط وقاله العامل نفس كلامي
الرجال انقهر وحقد ماينلام .... كيف اشتري سياره بمبلغ وقدره على انها V8 وهي V6 لو اني دراي وفرت وشريت لومينا
الموظفين ماقالو لي ان فيه 6 سلندر ولا ادري ان فيه كابرس مكينتها كذا
راح للوكاله وعرض عليهم المشكله
هههههههههههه قاله احد الموظفين انت شارب شئ والا فيك شئ ناوي ترجع السياره بعد ما كرفتها ولافيها شئ وعذرك هذا عذر تافه ولاهو مبرر واحنا مالنا دخل المفروض انت تعرف ان فيه كذا وفيه كذا
شوفو الرد في منتهى الوقاحه
الرجال للحين طالع نازل رايح جاي ويقول بشتكيهم ......... ياعمي تشتكي مين ولمين

تعليقي الشخصي
عندنا وكالات تضع ناس غير اكفاء في اماكن هناك من هو اجدر بها تحصل الموضف ماعنده خلفيه عن المنتج ولايقدر يعطي العميل شرح مفصل عنه واذا كان فاهم تحصله يصرف العميل ووده يمشيه باي شكل
يفترض ان الموظف لما شرى الرجال السياره وضح له انو فيه كذا وفيه كذا وهذي سعرها كذا وهذي سعرها كذا
والمفروض ان الوكاله توفر الكاتلوجات ويكونون هم احرص على رضاء العميل وتوضيح الحقيقه له
لان مو كل الناس تفهم بالسيارات

نصيحتي له كانت كالتالي : دام تخوبرت في السياره اذا كنت مرتاح معاها وادائها مرضي اصبر عليها واستخدمها ويكفيك انها جديده وعلى يدك على الاقل كم سنه حتى تحلل قيمتها لانه لو باعها الحين بيخسر فيها

الله يعينه وان باعها الله يوفقه بالبيعه الطيبه


ودنا الكل يشارك برايه حول الوكلاء في هذة النقطه

[توب جير]

صح كلامك اخوي وكثير من وكالات السعوديه كذا
تشوف مصري ولا اردني يتفلسف عليك على انه فاهم وهو خراااط مايعرف شيء
المفروض الوكالات تحط ناس متدربين ودارسين مو اي واحد وعنده خلفيه عن السيارات وانواعها

تسلم اخوي على الموضوع

[ابوعبدالآله]

طالما اننا في بلد لايوجد فيه حماية للمستهلك ، فعلى كل شخص ان يحمي نفسه بنفسه

اذا اردت ان تشتري شي ، فخذ اسم المنتج وابحث عنه واعرف عيوبه ومميزاته وسعره ثم استعن بالله

واشتر .

واذا اشتريت عليك بتوثيق كل شي من الالف الى الياء تحسباً لأي عطل او تلف في المنتج .

الله يعينا بس .

[amsb1973]

مع احترامي لشاري السيارة، المفترض أن أي واحد بيشتري أي شيء خصوصا لو شيء غالي مثل السيارات أن يسأل عن كل صغيرة وكبيرة تهمه ولا يفترض شيء من عنده. ومن المفترض أن الشاري يطلب بروشور عن السيارة، ولو يمكن يدخل على موقع الشركة ليعرف المواصفات بشكل مفصل أكثر بيكون أحسن.
وأنا شخصيا لا أرى أنها غلطة الموظف أن الشاري لم يسأل عن المحرك أو أي شيء آخر خصوصا أن الكابرس من كم سنة نازل 6 سلندر.
صحيح أن هناك تقصير من جهة موظفي المبيعات من ناحية نقص معلوماتهم ولكن الشاري يجب أن يكون أحرص لأنه هو المتضرر في النهاية.

وهذه وجهة نظر فقط.

[techmate]

هل عرف صاحبك أن الكابريس ليس كابريس إنما هولدن أسترالي؟
لم أرى مندوب مبيعات يفهم سياراته كما يفهمها مندوبوا وكالة لكزس, يشرحها بالتفصيل الممل ويعقد مقارنات مع BMW ومرسيدس (طبعا في الأشياء إللي تتفوق فيها لكزس).
سألت مرة أحد المندوبين كيف تعرف كل هالمعلومات؟ قال: الشركة ترسلنا في دورة تعريفية لكل موديل تغير جذريا عن إللي قبله (مثل LS430 موديل 2001 بعدين LS460 موديل 2007).

[عاشق الـDODGE]

الله يعينة بس ويعوضة خير
وكلامك صحيح من ناحية انهم يحطون موضفين الله بالخير
لازم يحطون شباب فاهم السيارات ويعلم العميل
بكل شئ من طق طق الى سلام عليكم
وياليت انهم يحاولون ان يحطون موضفين مبتسمين
مو لما تجي تسالة يرد عليك وكنة بيضاربك تقول كانك قاتل امة ولا ابوة :emot178:
يعني المفروض انة يكون بشوش الوجة ويشجعك على شراء السيارة
ولكن مانقول الا الله يخارجنا
تقبل مروري اخوك ابونورة الشهري

[H.Alhindi]

رب ضارة نافعة ، بالعكس صرفية البنزين بتكون قليلة
الله يبارك له فيها ويعطيه خيرها ويكفيه شرها

لكن لي تعليق حول المندوبين : ترى بعضهم ..... الله يهدي الجميع !

واحد السيارة 2008 ويقول 2009 ، والثاني حكرته أسئلة يبي يصرف يقول أنا والله توي جديد ( ومكتبه أكبر مكتب في الصالة وفي قلبها كمان ! )
والثالث يقعد هو وخويه واحد يصلح والثاني يشوت ( يغمزون لبعض ويتكلمون عن الشركة والسيارة وعنك :واحنا نهتم فيك وأنت الاهتمام الأول والسيارة أحسن سيارة وووووو )

والحقيقة هكس ذلك تمامًا

[Genius_m]

والله جزء من الخطأ يقع على زميلك لعدم حرصه على السؤال ,,

والجزء الأكبر يقع على عاتق الوكيل وموظفيه لعدم توضيح مواصفات السياره للعميل بشكل وافي

الأخطاء تقع , ولكن قليلون من يتعلمون منها

شكراً على الموضوع اخوي 300C-SRT8

يُنقل الى القسم العام

[فراس جي تي]

أعتقد الحل هو نشر الوعي بين المستهلكين .. لأن المبيعات في أي مكان في العالم هي تسويق لسلعة ولهم طرق كثيرة فيها.

لذلك الجهل هو العدو الأكبر..