يا شباب نصيحة لا أحد يفكر يشتري ألتيما ...

[ALTIMA 08]

السلام عليكم قسم بالله من الحره اللي فيني سجلت بالمنتدى عشان أقولكم وش صار معي ...

عندي سيارة التيما 2008 في رمضان صدمني واحد ( قاطع إشارة ) مع الباب الخلفي انعدم تماما وعفطه بسيطة بطرف الباب الأمامي ودقش بسيط جدا جدا بالرفرف الخلفي مو باين ابد على العموم طبعا اللي ينصدم بالسعودية هو اللي يتمرمط رحت للتقييم الفاشل للأسف حاطلي زول ويمني باحترامي لهم ما يفهمون شي قالوا تحتاج 10 قطع فقط ورحت سعرت القطع من الوكالة طلعت 8293 بعد الخصم طبعا باب خلفي 1342 ريال ديكور داخلي 1546 ريال زجاج خلفي 1087 ريال المهم طلع الحساب 8893 ريال بعد الخصم رجعت لمحل تقديرات المرور قلت لهم تراكم ما حسبتوا الأقفال قالي لا ما عليك سليمة المهم وقدروا شغل اليد ب 2700 ريال استلمت المبلغ من اللي صدمني 11 ألف إلا شوي المهم رحت للوكالة تقريبا على 22 رمضان قالوا تعال بعد العيد حنا الآن ما نستلم سيارات إجازتنا 25 رمضان قلت اوكي جيتهم يوم الاثنين بعد العيد قبل ثلاث أيام ودخلت سيارتي قالوا لي تقييم السيارة يحتاج يومين وفعلا اليوم رحت عندهم وطبعوا لي تقرير خيالي بمبلغ 21343 ريال والله نفسه مدير الصيانة يقول لي ما تسوى صدمتك هذا المبلغ اللي يبي يشوف السيارة يروح لفرع نيسان مخرج 18 الصناعية صدمة اللي يشوفها يقول لو كثرت كثرت تصليح وكالة 10 آلاف ريال لكن للأسف طحت ضحية لنظام المرور عندنا و الوكيل السيئ أيضا فنصيحة للجميع لا تفكر تشتري ألتيما أو نيسان بعد ترا قطعه أغلى من البي ام الظاهر اللحين السيارة قيمتها 75 ألف وصدمة من الباب الخلفي تكلف 21 ألف أجل لو صدمت من الوجه كم 100 ألف على العموم هي سيارة قيادتها رائعة لكن لا أنصح بشرائها

آسف على الاطالة وشكرا

[snaek]

الله يعينك يا رب وييسر امرك ..

اهم شيء جات في الحديد وما صار لك شيئ :)

تعوضها في سيارة ثانية في المستقبل ..

بس صراحة 21 الف كثير بل كثير جدا ..

وطيب وش راح تسوي الحين ..؟

[مهندس جديد]

والله نظام التامين والمرور في السعوديه انا بصراحه مب فاهمه... يعني واحد في حال سبيله ماشي ويندعم ويتم تخريب ماله ويمكن ارواح بعد،، وفي النهاية تقييم عقيم من قبل اشخاص في لمرور لا هم في ورشة صيانة ولا هم الوكالة الي بتصلح...

طيب الواحد لما يذبح انسان خطأ يدفع ديته كاملة،، هل قلنا معليش سامحه ذبح اخوك بالغلط والا ذبح قريبك بالغلط وماتاخذ حقك منه؟؟؟؟

انا اشوف نفس الشي السيارة ونظام لمرور لازم يطبق التأمين بشكل اجباري،، والي يكون غلطان شركة تأمينة هي الي تتكفل بنفقات الاصلاح كاملة وليس فقط مجرد تقييم ويندفع له كاش ما يغطي حتى نصف المبلغ وفي الاخير يتمرمط في مابين الوكالة والكراجات والتشليح....

ولي عتب على صاحب الموضوع... انت قلت لحد يشتري التيما لانك ماجربت السيارات الثانية،، ماجربت المرسيدس ولا جربت البي ام ولا الرنج ولا السيارات الثانية الي قطع غيارها نار وشغل اليد في هالسيارات غالي...... يعني الالتيما مالها دخل والنيسان مالها دخل،، الموضوع موضوع نظام مروري اصبح بحاجة للتغيير.

[ابو نادر]

قد صدمت بلاند كروزر 2006 مع الجنب
المهم رحت للمرور طلع معي نقيب في مرور الطائف
المهم قال تكلف الصدمه 500
قلت ياولد
طبعا الوقت كان جمعه الورش مقفله
والصدمه مع اليمين البابين و الدعاسه والرفرف
المهم اخذت من اللي صدمني 1000 ريال
وعلى مسؤوليه النقيب اللي قال لي ماتسوى الصدمه اكثر من 2000
طبعا اللي صدمني من الاخوان السودانيين يعني قلت 2000 كثيره عليه
المهم رحت الوكاله
وكلفني 8000 شغل يد و قطع غيار

[بندر بستن]

الله يعينك وفي الحديد ولا في العبيد وانا اخوك وخذلك فرت(فورد)ولاتشيل هم شي ;)

[المارودر 2004]

العام الماضي واحد من اقاربي انصدم بألتيما مع الرفرف الامامي وباب الراكب وتنازل عن اللي صدمه على باله التصليه ماراح يتعدأ 5 الاف ريال وبالاخير كلفته بالوكاله 19 الف ريال وشوي
طبعا الوكاله شغلهم غالي وفيه ورش تصلح بنصف سعر الوكاله وشغلهم افضل

والله يكون بعونك

[ziad x]

شوف الف حمد لله على سلامتك
انا مجرب كثير نظام المرور عندنا
كان معاي مرسيدس وصدمني واحد قاطع الاشاره ولد معاه جمس قديم في المرحله المتوسطه
ونزل يسبني المهم توقيت الصدمه كانت ليلة العيد
والمرور قال بعد العيد نتفاهم
المهم قدروا السياره ب14 الف
وابو الولد قال ماعنده يدفع
وانازلت وكلفتني السياره 22 الف تقريبا
شوف مصايب غيرك تهون مصايبك
وتقبل مروري واسف على الاطاله
وصدقني القطع حق الالتيما مهي غاليه كثير انا جربت اكثر من كذا لا تشيل هم كل شي باجره ان شاء الله احتسب الاجر واصبر على ابتلاء الله

[أبو خميس]

والله ماادري لــيش تروح الوكاله

ودها لصناعيه القديمـه عندهم ورش سمـكره ياشيـخ يرجعون لـك الموتر وكــاله

[GOODWAY]

أخوي الحمد لله على السلامة


نصيحة إذا تبي شغل صح ويستاهل رح لورشة الجرفين في صناعية الشفا

وراح تدعي لي بإذن الله:)

[zoom_833]

^^^^^^^^^^^^^^^^
اخوي مقدرين خوفك وحرصك على السياره انها وكاله و2008 ..

لكن لو تصلحها بالوكاله !!!

مع احترامي فانت فقدت عقلك ..

وشو 21 الف وكسور ؟؟؟؟

على باب وقزازه ؟؟

خيييييييييييييييييييييييير ..

انا من رايي اسأل عن ورش مضبوط وس عندها شغلك .

اخبر ورشه شغلهم 200% .. لكن اسعارهم غاليه جدا ..

اسمها الوفاء بالصناعية القديمه او صناعية الدائري ما اذكر ..


المهم رح وش كم يحسبونها لك ..


والله يعينك ..

[أبـــوبـــدران]

الله يعينك وييسر أمرك ,

ومثل ماقالوا الشباب , ورشآت بالصناعيه افضل من الوكآله ونصف سعرهم .

با اخي الى متى واحنا حايا هالنصابين !! الى متى واحنا نمشي وراهم مع انهم لاعبين علينا .

اتركوو الوكاله يانآس !! اتركوا النصب !! حتى قطع الغيآر لاتاخذونه منهم .. ترا ملينا من الجشع

اللي صاير , ملينا من التفاهات والأسعار اللي حسب المزاج !!

ولو تبي الحقيقه اخوي !! قطع غيآر موترك نآر نآآر , اجل قزازه بـ الف وشوي !!!

الله يعين بس , والله المستعان

.
.

في أمآن الله

[خبير سيارات _ 92]

انصدمت الألتيما بالجنب من الدعامية الأمامية و حتى الباب الخلفي ....

جاءت الفاتورة بمبلغ 22500 درهم اماراتي .. طبعا على التأمين

و طلعت بعد الخصم 10 آلاف ..

الوكالة عندكم فيها خلل ..!!


و الحمدلله عالسلامة اخوي .. لكن يكفي انه الألتيما سيارة مشهود لها ...

[GM_TAHOE]

والله ماادري لــيش تروح الوكاله

ودها لصناعيه القديمـه عندهم ورش سمـكره ياشيـخ يرجعون لـك الموتر وكــاله

فعلا وش اللي حادك على الوكاله ونصبهم
والوكاله ما اجبروك بتصليح لديهم
ياخي رح لورش معروفه بالسمكره ارخص بكثيييير وافضل تصليح من الوكاله
وبتوفيق

[d-joor]

انحش ياولد عن الوكاله

انا صارلي حادث وقالو تكلف 4880 وحولها المهم رحت غيرت الرفرف وصبغة البويه من الصناعيه وماكلفت حول 700 ويمكن اكثر شوي

وسع صدرك وترا التيما سياره حلوه بس الوكاله سفطها على جنب ولاتجيها ابد واذا كلنا مثلك مع احترامي مااحد راح يشتري سيارة

[zeyad]

اذكر واحد صدم على اكورد

يعني راحت الشنطه

وراح بعدها يسومها بالحراج الشريطيه قالو اتحداك ان كانت مصدومه

وهاذا بسبب الورشه الى رايح لها بس نسيت اسمها

[قايد الفـتـك]

السلام عليكم
الحمدلله جت الصدمه بالسياره ماهي فيك
بس تبي الصراحه كثيره 21 الف
تقبل مروري

[عشقي ماركيز]

والله يالغالي انا ارشــح انك تصلحها في الامارات في الوكالة

او في ورش في الصناعية القديمة عندهــم شغل عليه كـــلام والقطع جبها من محلات قطع الغيار برا الوكالة طبعا

[ALTIMA 08]

أشكر الجميع على ردوردهم الرائعة والله لا يوريكم مكروه إن شاء الله ...

المشكلة الآن أن القطع لحالها وصلت 15 ألف ريال وكسور وشغل اليد 6 آلاف أنا صراحة الآن قاعد أحاول أجيب خصم حول 20 % على الأقل وبحاول بزيادة المشكلة حتى لو إني بصلحها برا إذا بتفرق فرق بسيط عن الوكالة ما تسوى علي لأني اللحين مشكلتي مع القطع يعني تخيلوا كل قطعة لحالها مساكة الباب قفل الباب مفصلات الباب زيق الباب طلعوا لي ألف قطعة وأنا صراحة ما ودي أسمكر شي بالسيارة وبعد إطار الباب لحاله ب 2300 ريال جته ضربه من داخل ولازم يتغير وإذا ما تغير بيصير تنسيم بالهوا وصراحة يا أني أرجع السيارة جديدة ولا أبيعها وأريح بالي ومدري أدري أن الوكالة بيزرفوني زرف لكن اللي أعرفه إن شاء الله أن السيارة بترجع جديده ومشكلتي الآن هو قطع الغيار الباب فيه ألف قطعه يعني لو نحسب اللي أذكره بس في الباب الخلفي لحاله ممكن نوصل 10 آلاف ريال :
1- الباب الخلفي 1300 وشوي مدري كم عااد
2- ديكور داخلي 1556 أو اكثر بس حولها
3- قفل باب 556
4- زجاج خلفي 1087
5- إطار الباب 2300 وشوي
6 - مسكه باب مدري كم سعرها
7 - دينمو الزجاج
8 - مفصلات الباب تقريبا أربع مفصلات
9- زيق مدري كم زيق واجد
10 - مسطره مدري وش المسطرة
يعني بدون مبالغة الباب الخلفي لحاله ممكن يطق حول ال 10 الاف

على العموم يعطيكم العافية وياشباب قبل لا تشترون السيارة اسألوا عن وكيلها وقطعها قبل لا تتوهقون فيها

[عالم مشاعر]

موظفي الحمراني لهم خصم 25% على القطع

ممكن أساعدك في هالشي بحيث ان واحد منهم يشتري القطع ببطاقة العمل حقته بس خلني أضمن لك واحد منهم و ان شاء الله ما يصير الا الخير

[نـاصر]

الوكاله نصاااابين

انا موتري صدمت عليه صدمه خفيفه مرره بس صدام اسطبات ماجاها شي

قالو لي بـ12الف ريال على صدام !!!!

وصلتها برا بـ300ريال فقط !!

[فهد منصور]

ياشباب ليش تروحون الوكالة تراهم غاليييييييييين مرة:emot76:

الوكالة انتم خلوها للضمان بس

ياخي الصناعية عندهم ورش أفضل من شغل الوكالة بــ 1000 مرة


وتحصل قطع البدي عند محلات قطع الغيار وقطع اصلية
واذا تبي عندك التشليح ياخي مليان ابواب وقطع غيار وبدي للسيارة

ويطلع عليك نص القيمة أو اقل بعد

ولا جشع الوكالات واحتكارهم والتحكم بالأسعار

وما تشوف شر

[big time]

التشليح ثم التشليح

وابعد عن الوكالة استغلال وجشع

والسمكرة في الصناعية كثر التراب وشغل نظيف ومضمون

[مكاوي ماركه]

معروف اذا المسمار عند محلات قطع الغيار بريال
تلاقيه في الشركه ب10 بريال
نصيحه دور في التشليح

[ZAID ZAID]

الله يعينك

[RiYaNcO]

إذا تبغى تصلحها بسعر أرخص خذ لك باب كامل من التشليح وودي سيارتك عند واحد تركي في الصناعية وركز على كلمة تركي يسمكرها مثل شغل الوكالة