242 حصان غيرواظحه وصرفيه بترول عاليه

[حمدان البادي]

السلام عليكم يالربع وبصراحه فرحت لما حصلت منتدى متخصص بالسيارات الكوريه لأني شريت كيا سورينتو 3,3 وبصراحه أفكر حاليا أبيعها لأن الشركه تحط معلومات في النت بعيده عن الواقع موشويه بل بشكل مبالغ فيه وهو عن صرفية البترول وهي كالتالي :موقع كيا الرسمي في الخط860كم والمدينه570 وموقع أمريكا :في الخط700كم والمدينه512كم وسيارتي في الواقع:في الخط520كم بالتعب والمدينه 340كم فرحت الوكاله مرتين وفحصوا بالكمبيوتر وكل مره يقولوا مافي مشكله كل شي طبيعي بس أنا مو مقتنع بكلامهم وأبغي منكم المساعده يالربع وحبيت أزيد معلومه وهي أن المحرك مشترك مع السوناتا والأزيرا وأداء السياره جيد كتسارع وظعيف في الخط يعني كأنها أٌقل ب70 حصان

[afaopi]

السلام عليكم

يا اخوي ما اظن يمكن سيارتك فيها مشكلة نوعا ما

لانه ما اظن يعني الجيب ما شاء الله عليه

ومافيه احد قد شكى عليه

انت راجع الوكالة وشوف ايش راح يقولون لك

والله يعطيك اللي فيه الخير

وكل عام وانتم بألف خير,,,,,,,,

[M.W4EVER]

يمكن سيارتك فيها مشكله انا عندي الأزيرا صرفيتها أكثر من روعه

[أبو عبدالعزيز]

السلام عليكم
كل عام وانتم بخير اخواني
بالنسبة لك اخوي
لاتنسى بالاول والاخير ان موترك جيب......!!!
وجيب ثقيل نوعا ما
سيارتك 3.3 لتر يعني المكينة ماتعتبر جبارة علشان تبغى تسارعها يكون خطير لها الدرجة
بعدين انا اول مرة ادري ان السورينتو يجي 3.3 لتر......!!!
أنا اللي اعرفه انه ما يجي غير 3.8لتر وهذا عزمه خطير بالخط والبر
واما بخصوص الصرفية فأنت شكل رجلك جدا حارة عليه
ولما تكون رجلك حارة كل اللي معك هذا طبيعي في طبيعي
بالعكس هذا الجيب خطير بالخط والبر بالمدينة
والله يوفقك واترك عنك الهواجيس وانا اخوك

[Genius_m]

غريبه..............

اكيد انك تدعس له كثير وما ترحمه وعلشان كذا هو يبي ينتقم منك :D

تحياااااااتي..............

[أبـــوبـــدران]

يمكن شابك الدبل ولا من هذا القبيل

340 .. احس انها شويه الصراحه

وبالتوفيق

[حمدان البادي]

يعني رايكم يا جماعه أن معلوماتهم الرسميه كذب لأن الفرق مو بسيط

[REVOLUTIONARY]

الله يعييييين

[EF Sonata]

كيف قدرت إن السيارة "يعني كأنها أٌقل ب70 حصان" انت داينو :D

بالنسبة للصرفية ... فهناك أشياء كثيرة ممكن تحكمها ... لأن المواصفات إلي في أمريكا وكوريا ممكن تختلف البرمجة وأحيان النظما العادم ... فتلقى القوة والصرفية تختلف عن النت لأنه مافي موقع ذاكر هذي البيانات في بيئتنا ... كذلك أظن الأرقام المذكور أظن إنها أفضل الأرقام وتحت بيئة معينة ... وترا قوة وإتجاه الهواء وعدد دورات المحرك إلي تسوق بها وذلك البنزين المستخدم :)

[M.W4EVER]

لا مو كذب بس سيارتك فيها مشكله
انا برأيي تعرض هذي المشكله في قسم ورشة السيارات وتلقى ردود من أخواني الأعضاء وان شاء الله تنحل مشكلتك

[سراب الود]

السلام عليكم
اخوي حمدان
عندي بعض الاسئله:
موديل السياره؟؟
السياره كم قطعت من كيلو ؟؟
وهل هي معك من وكالتها ؟؟ ولا شاريها مستعمله؟
قير عادي او اوتوماتيك ؟
هل سبق وسويت للسياره اي صيانه؟؟
بانتظار اجابتك وشكرا

[+KoRn]

راحت بكم انسامت انا جازم شراهاا...

[حمدان البادي]

تاريخ إنتاجها4/2007وأنا شريتها شهر 7 من نفس السنه والحين ماشيه 15000تقريبا وصيانتها في الوكاله لأن عندي ظمان 6سنوات بدون تحديد الكيلومتر وجيرها أوتماتك من 5نسب يعني المكينه دايما مريحه وفوق كل هذا دواسة البنزين إلكتلرونيه بدون أسلاك يعني تقنيا السياره متطوره مش كلاسك
والفنشيج مالها يعني طريقة التصنيع جودتها عاليه كل شي موزون وفمكانه وبعدين لو كانو يكذبو في النت مابيخافو على سمعتهم

[أبو خميس]

الأجــواء عـــندنا حـــاره فلازم تزيد الصرفية
وبعدين الجيوب معروف عنها أنها تصرف
مـــع أخوي باثفندر مايوصل من الرياض إلى الأحساء ألا والبنزين فاضي

[MARLBORO]

340 كيلو؟؟

:confused:

اللاندكروزر الضخمة توفر أكثر من كذا مع إنها أكثر ومكينة أكبر وقير 4 نسب

سيارتك فيها مشكلة والله أعلم

[سراب الود]

اخوي حمدان
ما شاء الله السياره جديده
الله يعطيك خيرها ويكفيك شرها
سيارتك ما فيها الا العافيه
صحيح مكينتك مثل الازيرا لكن انت تفرق كثير!!
سيارتك جيب ورفيع عن الارض بعكس الازيرا
غير ان سيارتك دفع رباعي ((4*4)) وهذا يعطي ثقل لسيارتك بشكل كبير!!
طبعا في غالب الجيوب يركبون فصالات ((فرارات))للدفرنش الامامي .
بحيث تخفف على السياره تسارعا وصرفيه انصحك بها.
عموما السياره بعد تقريبا 120-140 راح يزيد صرفها بشكل كبير !!

املأ التانكي وخفف رجلك على دعست البنزين وشف اذا تفرق معك ؟؟
اتمنى لك التوفيق وشكرا

[حمدان البادي]

مشكور أخوي سراب الود وكلامك مقنع بس ليش الوكاله تعلن أن السياره ممكن تمشي عالخط السريع في أقل رقم معلن عالنت 22ميل /جالون يعني 80لتر بيمشوك حوالي440ميل =704كم وعندي بصعوبه وصلت 520 بمعدل90-120 كم في جو بارد بدون مكيف وعلى فكره في مواقع ثانيه عطت افظل من هالرقم ب150كم ؟ ولكن أنا سمعت أن بعظ السيارات ممكن بعد الإستخدام لفتره 25000كم -40000كم يظهر أداءها الحقيقي وصرفيتها الفعليه مع العلم بأن سيارتي تحسن تسارعها بشكل ملحوظ بعد 12000كم فشو رايك ؟

[أبو عبدالعزيز]

ياشباب لا أحد يخلي الرجال يوسوس كثيييييييير ويقول له سيارتك فيها مشكلة ومشاكل بعد
ياأخوي ياحبيب قلبي
سيارتك بسم الله ماشاء الله مافيها إلا العافية إنشاء الله
وأنت لما تشوف مواقع السيارة وصرفيتها تأكد من المحرك ياأخوي أولا
وتأكد من ظروف قيادتك ثانيا
وصدقني راح تلاقي كل شيء تمام

بس بيني وبينك أنا أول مرة اشوف مستخدم عربي يهتم بهذي الشغلات
أنا أحي فيك هذا الحرص
ولو كلنا زيك كان الوكالات صدقت بكل شيء
بارك الله فيك
أخوكم أبو عبدالعزيز

[الهيو]

السلام عليكم :cool:
اخوي حمدان البادي اولا اهنيك على اختيارك . والله يعطيك خيره ويكفيك شره وثانيه انت ذكرت انك مشيت 520 كلم والمعدل المذكور في الموقع الامريكي وهو الاقرب للمواصفات السعوديه من ناحية الوقود والزيوت المستعمله. ومواصفات السياره بشكل عام والموقع ذكر مسافة 507كلم تقريبا .
بالنسبه للكيا سورنتو هذا استهلاكه وطبيعي جدا .
ولا يقارن بسيارات بنفس المحرك مثل الازيرا والسوناتا 6 سلندر للاسباب التاليه
1- السورنتو اقل انسيابيه
2- السورنتو اعلى وزن ويصل وزنه الي اكثر من 2000 كلج
3- السرنتو اكثر ارتفاع
واخيرا لا تنسى ان المقاييس المذكوره تقصد في افضل الحالات يعني
1- بدون تسارع عالي
2- بدون ركاب ( فقط السائق )
3- بدون تاثير عوامل خارجيه مثل الرياح المواجهه للسياره او على جانب السياره
4- تكون الكفرات على الضغط المطلوب وهذا يساعد على توفير القود بنسبه 3%
5- اسخدام افضل انواع الزيوت والتي لها خاصيه توفير الوقود Energy Conserving وهذه الزيوت تساعد على توفير 2% من الوقود
تاكد من استيفاء الاسباب المذكوره سابقا وراح ان شاء الله تزيد عندك المسافه المقطوعه . وصدقني لو تقود سياره اخرى دفع رباعي مثل نيسان باترول او جمس انفوي بنفس طريقة قيادتك للسورنتو راح تعرف معنى الاستهلاك العالي للوقود . اتمنى لك التوفيق .|3|

[Microsoft]

ألـــــف مبروك على السيارة

ومثل ما تفضلوا الأخوان

EF Sonata - الهيو

ولا يهون البقية

:cool: