ارغب في شراء رينو ميجان ومحتاج المساعده..

[almalki]

السلام عليكم ورحمة الله.

اليوم قمت بزيارة لوكالة الزاهد وشفت رينو ميجان. والصراحه السياره اعجبتني ومقرر اشتريها . بس أحتاج بعض المساعده من الأخوان ممن لديهم الخبره في سيارات الرينو. وارجو أن يكون الرد موضوعي ويفضل أن يكون عن سابق تجربه وليس عاطفيا. النقاط التي اود الاستفسار عنها واحتاج للمساعده فيها هي.

1- كيف وضع الوكيل الزاهد من حيث التعامل وخدمة ما بعد البيع . سرعة التسليم. قطع الغيار. اجرة الاصلاحات؟؟؟

2- تحمل سيارات الرينو يشكل عام والميجان بشكل خاص لا جواء المملكه وخاصة في الصيف. وه حرارة السياره ثابته أو فيها مشاكل.

3- جودة التكييف ؟؟

4- ثبات وراحة السياره في الطريق مقارنة بالسيارات الأخرى اليابانيه والامريكيه. وهل يسمع صوت الطريق والهواء مثل اغلب السيارات اليابانيه.

5- ما هو الأفضل من حيث الشكل الهاتشباك أو السيدان

6- أي الالوان أفضل (بلاتينيوم) أو (اخضر ) وبصفه عامه ما هو افضل لون للميجان.

تحياتي للجميع وشكرا مقدما لتجاوبكم.

[cadyman]

1 صيانه ممتازه ولو تاخذ عقد صيانه ب 2000 ريال لمدة 50000 كم يكون افضل اما اسعار القطع اغلى من الياباني بشكل بسيط ولكن عمرة طويل وجودته عاليه وانصحك تأمن على السياره وتريح بالك
2 السياره تتحمل الحراره والموشر على النصف صيف او شتاء والمكيف ممتاز والثبات افضل من اي ياباني وبالنسبة للتحمل انا مسافر فيها الاسبوع الماضي والحراره 44 وكنت مشغل المكيف وامشي 170-180 واحلى من العسل ما شاء الله
3 مكيف الرينو من تصنيع شركة نيسان
4 الثبات افضل من الياباني في فئتها اما صوت الطريق فينسمع بشكل معقول وصوت الهواء عادي
5 هذا انت اللي تقرره وكلها حلوه بس يمكن الهاتشباك احلى وشبابيه
6 البلاتينيوم والاسود والرمادي
وعلى فكره ترى عند الشركه سيارة تجربه

ا
نا معي لاجونا 4سلندر 2003 ماشيه 52000 كم ولا راح اركب مستقبلا الا رينو
واي استفسار انا جاهز

[almalki]

الف شكر أخي cadyman على تجاوبك وياليت تجاوبني على التالي.

عقد الصيانه ماذا يشمل. ؟؟؟ اجور الاصلاح أو ايش بالضبط.؟

ما فيه مشاكل واجهتك مع السياره خلال الفتره الماضيه.

لما تدخل السياره صيانه كم تأخذ وقت. والقطع هل هي متوفره أم تستنا طلبيه؟

تحياتي

[cadyman]

عقد الصيانه يشمل كل شي تحتاجه السياره حتى 50000 كم مثل زيوت فلاتر بواجي فحمات قماشات مساحات يعني على البنزين وبس
اما بالنسبه للمشاكل خربت على الشمعه الاماميه وعلى الضمان وبس
بالنسبه للصيانه مواسم وبعدين دوام الورشه يبدا 7:00 ص يعني لما تجيب السياره الساعه 9:00 يكون قبلك طابور سيارات فلازم تجيبها بدري او باخر الدوام علشان تكون اول سياره صباح اليوم الثاني . انا ادخل سيارتي نهاية دوام السبت واستلمها يوم الثالاثاء الظهر او الاثنين العصر وبالنسبه لقطع الغيار احس انها متوفره اكثر من السابق بسبب زيادة المبيعات وبعدين مدير الصيانه قال لي اذا احتجت قطعه ضروريه للسياره نفك لك من سياره جديدة اما اذا كانت قطعه كماليه فيطلبونها خلال اسبوع بالكثير وترى عندهم 3 مراكز لبيع القطع في خريص وفي المرسلات وفي الصناعيه القديمه وفيه واحد فلسطيني في ام الحمام عنده محل قطع فولفو قال اي قطعه رينو تبغاها انا اجيبها لك من الوكاله بخصم 20%
عزيزي بالنسبه لعقد الصيانه كلم الوكاله احسن علشان تتأكد من قيمته وترى فيه موظف في الزاهد فرع خريص احلى من العسل اسمه عبدالله الغزواني وترى الزاهد احسن من نص الوكالات عندنا

[صحراء الجليد]

هلا اخوي


الف مبروك مقدما


بصراحة ما جربت الرينو

بس حبيت افيدك في الشكل واللون


خذللك هاتشباك لون اسود من جد روووعة

[super honda]

عفو اخوي بس وش لون يفك لك قطعة من سياره جديده !!ويركبها بسياره ثانيه !!

طيب يمكن اجي انا كزبون جديد واشتري سياره من عندهم وتكون بعض القطع سبق وان فكت واتركبت من جديد اي نعم شغل وكاله بس برضو مو لوانها جايه من المصنع !!


تحياتي

[cadyman]

لا السيارات هذي على طول تصير سيارة تجربه او تاجير للعملاء اللي سياراتهم في الصيانه او يبيعونها على موظفينهم باسعار مخفضه

[almalki]

cadyman الف شكر على المعلومات القيمه التي قدمتها. وللعلم أنا من سكان جده ولكن اتوقع تعامل الوكيل ما راح يختلف بين جده والرياض.

يا ليت اذا أحد تعامل مع الوكيل في جده يفيدنا عن تعامل الوكيل. وخدماته

صحراء الجليد: رأيك محل الاهتمام شكرا لك.