مشكور يا اخوان على الردود الجميلة
اخوي أبــوكلبشــه اذا تسمع نصيحتي خل الوالد ياخذ له فورد اكسبدشن طبعا الاسباب كثيرة اولها السعر والراحة في القيادة والمواصفات مقابل السعر وسعة التحميل حقيقة انا جربت السيارتين زرت وكيل فورد واخذت السيارة لتجربة القيادة وزرت وكيل جمس وجربت اليوكن حقيقة مافي مقارنة الاكسبدشن افضل ( بالنسبة لي ) كان قيادته ممتعة للأخر لدرجة انك ماتصدق انك تسوق سيارة بهالجحم يعني حقيقة فورد ابدعت في تصميم الاكسبدشن الجديد من ناحية التعليق والتحكم كذلك الانعطاف U وكأنك تسوق سيارة صغيرة ايضا من المميزات الي عجبتني فيه اني ما احتاج اني اشيل المقعد الثالث اذا بحمل اغراض معي مجرد ضغطة زر وينزل الصف الثالث والثاني ويستوي مع الارضية كذلك الصف الثاني مكون من ثلاث مقاعد وكل مقعد ممكن التحكم فيه وفي مستوى الظهر وهذي الميزة مفيدة بالنسبة لكثيري الاسفار ( نفس حلاتي :D )
كذلك ميزة التحكم بدعسة البنزين والبريك كهربائيا عجبتني على الاخار يعني مايهم اذا كان طولك مترين او طولك نص متر :D بتوصل لك الدعسات لعندك بعدين في شي ثاني حلو عجبني فيه الا وهو فصلة العداد ... معروف ان لسيارات الامريكية تفصل عند سركة 160 كم في الاكسبدشن نفس الحالة ولكن اللي يميزة انه مايفصل الكمبيوتر والبانزين ويطفي السيارة ويعمل لك فلم هندي كل اللي يسويه انه يثبت السرعة على 160 كم بدون مايفصل اي شيء اما اليوكن اذا وصلت لسرعة 160 كم كل شيء يفصل معك والسيارة تطفي وترجع تشتغل مرة ثانية ( طبعا شيء يفشل )
الجمس يوكن ماوجدت فيه اي ميزة من المميزات الموجودة بالاكسبدشن ومميزاته عاديه حاله حال الموديل اللي قبله واللي قبل اللي قبله ( من ناحية المميزات في التعليق والمميزات الداخلية ) وكانت قيادته عادية ونفس النطنطه في الطريق ما اختلفت
نجي من ناحية الاعتمادية ( المحرك وناقل الحركة )
انا عملت بحث طويل في الانترنت عن مشاكل الاكسبدشن واليوكن من مواقع الاجانب واصحاب السيارات ورايهم في سياراتهم وهذا الي توصلت له
الاكسبدشن يجي بمحركين 4.6 و 5.4 محرك ال 4.6 هو نفسه محرك الفورد فكتوريا 98 - 2003 طبعا في الخليج الاكسبدشن مايجي الا بمحرك 5.4 اللي راح اتكلم عنه
محرك الاكسبدشن 5.4 من افضل المحركات اللي صنعتها شركة فورد الى الان ( بالنسبة لسيارات الجيوب ) ميزته ان لديه قوة جر قوية بشكل غير طبيعي Tow capacity يعني تخيل تسحب لك 8900 رطل يعني اكثر من 4000 كيلو وفي آر بي أم منخفض ( يعني تسحب سيارتين ولا تدري وش وراك :D ) كذلك كثير من المواقع اللي شفتها اصحاب محرك ال 5.4 يقولون ان سياراتهم ماشيه اكثر من 320 الف كيلو ( 200 الف ميل ) من غير مشاكل او خرابات مع الصيانه الدورية طبعا
اليوكن يجي بمحركين ( ماعدا الدينالي ) 4.8 و 5.3 في الخليج مايجي الا محرك ال 5.3
محرك ال 5.3 جيد وسريع ولكن عيبه الشرعي هو طقطقة البساتن في الجو البارد ( هذا العيب في جميع المحركات 4.8 و 5.3 و 6 لتر و 8.1 ) يعني تشتري سيارة جديدة وتسمع هالطقطة في الباستن وتروح للوكالة ويقول لك عادي مافي شي :D كذلك في بعض الاشخاص صادفوا مشكلة نقص الزيت يعني كل 5 الاف كيلو بينقص الزيت شوية وبتولع معك لمبة الزيت في الطبلون ( ياعيني ) طبعا الوكالة بتقول لك بدل الزيت كل 3 الاف ولاتخليه لل 5 الاف ( عادي طوف ) رؤوس المحرك بسرعة تمتلي بالكربون كل 30 الف الى 40 الف كيلو وطبا وحل الشركة انك تنظفهم بتايد :D
من ناحية الامان ( الامان بيد الله سبحانه وتعالى ولكن الانسان يأخذ بالاسباب )
فورد اكسبدشن احتل المركز الاول من ناحية الامان في الاصطدام الامامي والجانبي والانقلاب ... وهذي ميزة اضافية
http://www.nhtsa.gov/NCAP/Cars/2323.html
حقيقة انا من اشد عشاق الجمس خاصة ولجميع سيارات جنرال موتورز عامة ولكن في السنوات الاخيرة اصبحت الجودة آخر ما تنظر فيه الشركة واصبحت اسعار قطع الغيار غير طبيعية حتى تعدت اسعار السيارات البريطانية ابمعروفة بالغلاء كمثال :
طرمبة بنزين تركبها عند الوكالة ب 200 دينار !! 2400 ريال من برة بتشتريها ب 70 دينار و تركبها ب 20 دينار المجموع 90 يعني 1100 ريال !! ياساتر
سعر المحول الحفاز ( دبة التلوث ) 350 دينار !!! 5000 ريال
كمبريسر التكييف سعره 165 دينار 2000 ريال .....
كل هذا دفع شركة فورد الى الاهتمام بالجودة حتى اصبحت مبيعات سياراتها اكثر من سيارات جنرال موتورز في امريكا اكبر واعقد اسواق العالم وصبحت تماثل السيارات الالمانية في الجودة والمتانه
كذلك في الفترة الاخيرة لاحظت ان فورد اكسبدشن بالذات بدأ في الانتشار بالكويت بشكل كبير وهذا دليل على ان السيارة بدأت تكسب شعبية عند الناس
من ناحية عدد الاحصنة انا مثل ماقلت اني جربت السيارة والله يا اخوان انها طيارة وعزمها جبار وطبعا ال 260 حصان هي للعجلات الخفلية RWHP ماهي نفس اليوكن يحسبون عدد الاحصنة للمحرك لوحده FWHP يعني لو حسبناها بالعقل هل معقول ان محرك ال 5.3 قوتة 295 حصان في اليوكن وكذلك قوته 295 حصان في السوبربان ؟؟ طيب وزن السوبر الزايد وين راح ؟!!!! ان اتحدى اي شخص يثبت لي ان محرك اليوكن ممكن يوصل 250 حصان للعجل الخلفي وله اللي يبي بالعكس في بعض المواقع لمبحي سيارات الجمس والشفر اثبتوا ان قوته الفعليه هي 220 حصان الى 230 حصان ... 295 حصان تخلي اليوكن ينتفض مكانه ( اقـــلاع )
بحفظ الله :)
