أولا لا تتحمس كثير يا أخوي ترى ما تكلمت عن شخصك أنا قاعد اقارن بين سيارات ، هدي أعصابك لا يطق فيك عرق .
الشيء الثاني إذا كانت مازدا عندكم نفس اللي عندنا ليش رافعين سعرها 108 ألف ريال على ايش ههههه أقول لك أغلى حتى من التيما فل أوبشن 6 سلندر خلك من الستاندرد .
بعدين إذا التيما ما فيها مواصفات مثل الأمريكية ترى حتى المازدا الخليجية مو مثل الأوربية وشاشتها غبية وتقعد تضغط أكثر من مررة حتى تفتح الشاشة ثم تضغط لك ساعة حتى ترجع تقفل وإذا تبي ترفع الصوت أو تخفضه احسن لك تستخدم أزرار التحكم بالدركسون لأن أزرار التحكم مرة صغيرة .
نجي لموضوع المواصفات : شوف حبيبي قير CVT واضح من خلال كلامك أنك ما سبق وجربته خاصة مع ماكينة 6 سلندر وأما من ناحية أنه ما يستخدمونه للمحركات الكبيرة فلأنه اقتصادي والمحرك الكبير ما ينفع معه قير اقتصادي واي شخص يبحث عن محركات كبيرة لا يهمه الاقتصاد (يعني تصنيف للعملاء إذا تهفم) والسيارات الرياضية تحتاج إلى قومات قوية وسريعة وقير CVT مريح جداً ما تحس أبداُ بتغييرات التروس - يعني الهدف منه اقتصاد وراحة (افهم تكفى) . وجرب بنفسك على ماكينة 6 سلندر وتعرف وش أقصد .
على فكرة ميزة التشغيل عن بعد عندي أهم بكثير من تسفيط المرايا خاصة في الصيف تجي تلقى السيارة باردة وجاهزة ، عندك الريموت حق نيسان وانفنتي بشكل عام فيه مواصفات حلوة مثل فتح النوافذ عن بعد مثل تغيير إعدادات المنبه مع الاقفال أو الفتح ، ولو فتحت السيارة عن طريق الريموت ولم يتم فتح الباب لمدة دقيقة يتم اقفال السيارة اوتوماتيكياً بعد دقيقة بالضبط ، تقدر تقفل السيارة وهي شغالة عن طريق البصمة (لا تقول لي مازدا تسوي كذا بعد - لازم تقفلها بمفتاح أو تسوي مثل واحد من الشباب يفتح الدريشة ثم يسكر بالباب ويقفله من داخل السيارة ثم يسكر الدريشة من برا ههههه) ، بعدين الحساسات الأمامية والخلفية مهمة ليش ما يحطونها بالمازدا الخليجية ؟!! في الالتيما فيها حساسات أمامية وخلفية والشاشة اللي بالطبلون توضح لك شكل السيارة وكل حساس له منبه خاص وبالألوان (أخضر - أصفر - أحمر) ، بعدين الحساس فيه ميزة حلوة يشتغل معك عند الرجوع للخلف أو لما تمشي بسرعة 20 كلم واقل ، أسرع من كذا يطفى لوحده حتى ما يزعجك .
بعدين شفت حجم الشنطة حقت مازدا 6 ؟!!! صغيرة مرررة (لا تقول لي هذي مو مهمة بعد!!) لو تحط فيها كرتون مويه وشنطة سفر وحدة تسكرت ههههه .
فيه ميزة حلوة في نظام النقطة العمياء للألتيما وهو تحديد المسافة للتنبيه على ثلاث مستويات (قريب - متوسط - بعيد) تقدر تتحكم فيها عن طريق الشاشة ، نفس الحكاية بالنسبة لتنبيه الأجسام المتحركة عند الرجوع للخلف .
نظام النفقيشن حق الالتيما أفضل بكثير وأوضح وفيه ميزة حلوة لما تمشي بسرعة بطيئة يكون على زوم قريب لما تسرع يقوم يصغر الخريطة ويبعد الزوم بشكل اوتوماتيكي وفيه نظام التوجيه أفضل بكثير من حق المازدا (سويت مقارنة بينهم) .
مراتب الالتيما أريح من مراتب مازدا 6 (جربهم وبتشوف الفرق) مرتبة السائق فيها 10 وضعيات مع إمكانية تعديل مسند الظهر السلفي (عن طريق زر خاص فيه) .
نظام التعليق أريح من مازدا 6 (جرب تسوق السيارتين وبتعرف أن العزل الأرضي أفضل لصالح التيما) أنا مجرب السيارتين .
فيه شغلة ماني متأكد منها بالنسبة للمازدا 6 وهي الايرباق ، كم ايرباق فيها بالنسبة للفل أوبشن؟ التيما فيها 6 أيرباق حتى للركاب بالخلف .
بصراحة شكل مازدا 6 أحلى من شكل التيما لكن الداخلية بالنسبة للألتيما أجمل .
لا تعصب تكفى بعدين جرب التيما 6 سلندر مع قير CVT والله بتتغير افكارك القديمة عنه .
اتفق مع كلامك بشكل كبير ..
المازدا سيارة جيدة جدا خصوصا الموديل الجديد لكن فيها من السلبيات لاتعد ولاتحصى من استخدامي لها لفترة 5 اشهر ..
اولها نظام التعليق القاسي جدا بفضل الاطارات الضخمة .. حيث لاتلائم الطرق السعودية بأي شكل من الاشكال .. لكن يميزها فقط الشكل الرائع مقارنة بالسيارات التي بفئتها ..
ثانيا اداء المحرك .. من الاشياء اللي قهرتني جدا صوت المحرك المزعج جدا لدرجة كآني آسوق ددسن 95 من الحنة القوية بين تبديل التعشيقات .. وهذا الصوت تحديدا ظهر بعد عمل تسارع للسيارة عندما تخطيت حاجز الـ 2000 كيلو متر اي بعد التمرين ..
ثالثا المقاعد غير مريحة بأمانه والشيء الملفت انها صغيره مقارنة بغيرها من السيارات اللي بفئتها ..
هذه الاشياء المهمة التي لاحظتها خلال هذه الفترة البسيطة ..
وتقييمي للسيارة بشكل عام 7/10
