رايكم في باجيرو ميتيوبيشي

مشكله المتسوبيشي ليس بالقطع الاستهلاكيه لان سعرها مقبول
لكن المشكله بقطع البدي
احد الشباب يقول صدمت على باجيرو موديل 2009 فل كامل وانكسر الصدام والشمعه اليسار بوم سعرت الشمعه وكانت زينون بالوكاله حصلتها 6300 ريال ان ماكنت واهم والمشكله التشاليح ماعندها
سعرت انا الجناح حق الناتيفا طلع سعره فوق 2000 ريال بعد الخصم

وقس على ذلك دينمو الكهرب والسلف والرديتر وهلم مجره

توني اخلص من تقرير حسن الكتبي

ممتاز صراحه لكنه مرارا وتكرارا يقول انا ماني ضد تويوتا لكن للاسف ياليته ماعملها وهو وضعه لدعاية z7 وانها منافسه للانوفا من تويوتا !!!!!!!! ما كااااااااااااااان لها داعي ابدا وهذي اسميها غلطة الشاطر بعشره
وللاسف اثبت الوكيل فشله مرة اخرى بهذه الحركه ....ما يوفرون شئ ابد !! وهذي عقلية هذه الفئه من الناس في الغالب ...
الشئ الاخر اغفل حكاية العزل الصوتي للباجيرو سواء للهواء او المحرك ... فالعزل متوسط ولا يقارن ابدا بالبرادو

زين ما سويت انك صرفت نظر عن الباجيرو ....

سياره قويه وجباره صحيح بس وكيلها الحصري العيسائي الزفت خرب الدعوه ... وكذلك شكل الباجيرو من 2007 وهو ما تغير وموهب شرط 2017 ولا 2016 بتغير .. ماتدري الا والسنه الجايه نازل الشكل الجديد ... لان السوق انسحب من الباجيرو والناس تبي جديد

بس انتقالك للسنتافي يعتبر نقله نوعيه كبيره حيث ان الفارق كبير في المواصفات والحجم عن الباجيرو

الله يوفقك

حاول إنك تأخذ لفة على السكويا وترا عليه عروض ألحين يبدا من 125000 ريال ستاندر
135000 ريال دبل
145000 ريال فتحة ودبل والفل 180000 على ما أعتقد
وطبعا سيارة كبيرة وفخمة ومكينتها جبارة جدا 5.7 ليتر

هلا بيك لا كان جديد في سنته :xyxthumbs: اذا ما خاب ظني كان 2012 راح ينزل قريب و الي اشتراه كانت اخر دفعه من 2011 و لان ماكان فيه اي تغيير فاخذ 2011 مع العروض

اخوي توه اخذ 2013 بدون دبل ب 135 الف :confused1: بنفس قيمه الدبل مع العروض و اعتقد قريب يسوون عروض ممتازه عند نهايه السنه و عيد الحج لتصفيه 2013 و نزول 2014 و واضح ماراح يكون فيه تغيير

و حتى اذا تغير الشكل و انت نفسك فيه و عندك القدره تقدر ترجعه الوكاله و تستبدله بالجديد مع دفع الفرق طبعا في شروط معينه
منها نظافه السياره و الممشى المعقول ( و اعرف 2 في بالهم هذي الحركه من ضمنهم الي عنده التاهو 2013 )

التاهو 2011 مجربينه على طريق المدينه -مكه-جده من الشرقيه الانطلاقه والله صاحبه مرتاح منه كثير و البنزين ما يصرف ابد اقتصادي في المدينه و الخط
و الحين هو كل يوم مسك فيه خط 170 رايح و 170 راجع و مرتاح ماشاء الله عليه

اذا تبي ترتاح في الطريق و واسع للاهل انصحك فيه و بشده سواء جديد او مستخدم بسيط من المعارض يكون تحت الضمان طبعا مو اقل من مديل 2010 -2011 و اذا حصلت LTZ ممتاز جدا هيبه و قوه

شكرا للإخوان اللي ابدوا رايهم بالموضوع

وان شاء الله قررت صرف النظر عن الباجيرو ليس عيب فيها لكن سمعت انه شكلها راح يتغير ب 2016 وانها راح تنافس الرانج روفر لذلك افضل انتظر حتى يطلع الشكل الجديد وراح افكر بسيارة سانتافي من شركة هيونداي

عزيزي انا مستخدم باجيرو ولفيت وتعبت زيك ولو تلف وتدور مثل سعر باجيرو جديد ماراح تلاقي ونصيحه خذه من الكويت ارخص ( خويي شاري من الكويت جديد اصفار ماخذه اقل من هنا بـ 20الف ريال

شوف اخوي الباجيرو ممتاز جدا و سيارات مستبيشي قويه
لكن الوكيل سيء جدا جدا
و احتكار قطع الغيار صارت غاليه مره

انا سيارتي المجنا و الله قطعها نار نار و اشحت الوكيل على القطع و يعطيني خصم 30 % لكن تبقى سعرها مبالغ فيه جدا
خذ مثال فلتر الزيت 68 و بعد الخصم 50 ريال غير متوفر في محلات تغيير الزيت
المساعد الواحد اكثر من 1600 بعد الخصم في بحر 1400 ريال
التشليح اتعب على ما احصل سياره مثل سيارتي و اذا حصلت متغالي بسعر القطعه لانهم عارفي سيارتي مافي بره و الوكاله غاليه و ممكن طلبيه

و الورش ماحد يشتغل عليها الا من رحم ربي

الصراحه قويه و انا متمسك فيها لسببين
1- اول سياره لي اشتراها لي الوالد الله يحفظه
2- كنت منتظر اعلان الشكل التاهو و اليوكن الجديد و راح انتظر نزولهم ان شاء الله


صاحبي جربها فل لكن بدون الشاشه الصراحه يمدحه في الخط لكنه يشتكي من حاجه
مراتبه قاسيه شوي و يشرب بنزين
يعني من الدمام يفول يادوب يوصله بدايه الرياض ويعبيه ثاني ه قبل الرياض بشوي
و الجلد بدا يتشقق او ينفتح التخييط بعد استخدامه سنه للسياره و باعها للسفر

على كلام شخص في الوكاله انو في السنين الاخيره الوكيل قام يستورد الباجيرو من الكويت لانها ارخص

وانصحك اذا راح تشتري الباجيرو اخذ لك فكره عنها في الكويت و فرق المواصفات و السعر حتى قطع الغيار ارخص عندهم

مدامك وصلت 130 زودها شوي و خذ التاهو اكيد راح يسوون عليها عروض في 2011 واحد اخذ ه مع الدبل ب 138 او اقل بشوي من الجميح ولا الاكسبدشن بقد ميزانيتك اكبر و اريح بحك انه سياره عائليه بالدرجه الاولى مو جيب

الضمان شيء مهم في السيارات .. لأنه يفديك في حال كان خلل مصنعي في السيارة في اجزائها الاساسية.
وغالباً لا يستفيد الناس من الضمان .. حالات الضمان ووجود خلل مصنعي ممكن يصير في سيارة واحدة من ألاف يتم تصنيعها في كل خط أنتاج وقد تمر سنوات على وجود خلل مصنعي واحد .

لكن أنا عندي فكرة :
ولا أعتقد أن أي وكيل في الخليج يرفضها ..

ليش ما تشري الباجيرو من الإمارات بالضمان الإماراتي , أو أي وكيل خليجي .. و توقع معهم عقد صيانة كل 30 ألف أو 50 ألف .. بحجة أنك تعيش خارج الدولة .. أنت ستستفيد أن عندك ضمان للسيارة , وهم يستفيدون زبون ..
50 ألف كيلو .. هذه تحتاج سنتين حتى تقطعها أو 3 سنوات ..

على كل حال

فيه كثير ناس يشترون سيارات بدون ضمان , ويوفرون مبلغ وقدره .. ولا يعانون من مشاكل .. من تكون في سيارته عيب مصنعي هذا سوء حظ له.


بخصوص المواصفات ., فأتوقع أنها واحدة ولا يوجد اختلاف.

الأسعار , باجيرو 2013

باجيرو 3.5 يبدأ بـ 99 ألف , وينتهي بـ 130 ألف
باجيرو 3.8 يبدأ بـ 140 ألف, وينتهي بـ 150 ألف

لكن غالباً يقدم الحبتور عروض حلوة وتخفيضات مميزة وتكون الاسعار أقل من المعلن.

أخي الباجيرو رائع جداً وقوي وقليلة خراباته . وصدقني ما راح تندم عليه

وفي الفيديو الذي وضعه الأخ قاطع إشارة .. الخبير حسن كتبي مع موظفي الوكالة قالوا أن شكل الباجيرو سيتغير في موديلات 2017 .. يعني لسا مطول تغيير شكل الباجيرو.

أيضاً الأستاذ حسن كتبي عمل مقارنة لأسعار قطع الغيار الاستهلاكية بين ميستوبيشي وتويوتا جاءت المفاجئة أن ميستوبيشي أرخص !!! مع تأكيدي الشخصي على أن عمر قطع غيار الميستوبيشي طويل بسبب جودتها.

تحيتي لك

بارك الله فيك اخي العزيز الباجيرو احس انه موتر خراباته قليلة حسب شهادة اللي يملكون الباجيرو الله يكتب اللي فيه خير

بالنسبه لي انا شريت برادو فل 2013 ممتاز
سواء بالمدينه او في الخطوط او في البر والوكيل ممتاز والصيانه عندهم مريحه
لكن عيبه السعر غالي غالي غالي


تجربة ميتسوبيشى باخيرو او باهيرو قيادة حسن كتبي جدة
شوف التجربه بتفيدك
http://www.youtube.com/watch?v=QAxoMxLOn-U

مرحبا أخي الكريم

أنا أمتلك الباجيرو
اشتريته في 2012 موديل 2012 باجيرو 3.8 فل اوبشن
وأول مرة أشترى باجيرو أو من ميستوبيشي
اشتريته لان سعره ممتاز مع مواصفاته وقدراته ولأنه جاء على قد فلوسي تقريباً حينها ..
ورغم ان العائلة والاصدقاء والمعارف كلهم لاموني لاني اشتريته , ورغم أن أحوالي الأن ممتازة واقدر اشتري أي سيارة اغلى وافخم , لكن ما با أبدله لانه بصدق ممتاز ويفاجئني كل يوم .

الباجيرو باختصار ( جبّار ) ..

مريح في السفر , سافرت عليه من العين إلى المدينة المنورة ومن المدينة إلى مكة المكرمة ومن مكة المكرمة إلى العين .. في كل سفره ( دون توقف ) الأ للتزود بالبترول والصلاة فقط ..
والله الذي لا إله الا هو أني ما تعبت مثل ما كنت اتوقع قبل السفر , تعب فقط بسيط بسبب طول المسافة ( مريح جداً )

بصراحة فاجئني ثباته في الخطوط السريعة كنت أسحب عليه بين 160 و 180 كيلو ( كل رادار في السعودية صورني ) .. خصوصاً على وضع الدفع الرباعي ثابت جداً

أفضل شيء في الباجيرو أنه اقتصادي في البترول , وقطع غياره متينة وتعيش مدد طويلة جداً..

وبعطيك مثال
اسلمته في 12 / 12 / 2011 .. وقبل كم يوم قررت ابدل السفايف لأني من شريته ما بدلتها ..
وتفاجئت أنها بعد سنة و8 شهور تقريباً من الاستخدام وتعدد السواقين اللي مروا على الباجيرو انا واخواني والدريول وبعض الاصدقاء كان باقي فيها أكثر عن النص ! والله العظيم أني انصدمت , حتى ان صديقي اللي كان رايح معي ما صدق وجلس يحلفني بالله ما بدلتها من يوم اشتريت الباجيرو .. وما لومه لأني أنا بعد تفاجئت من قوتها.

والحمد لله لم اواجه أي عطل ابد منذ يوم مشراه حتى الان

وجربته في البر والرمال وكان جيد فيها جداً ( بعيد أن الاستعراض )

عيوبه من رأيي .. 1
- تصميم الهيكل الخارجي قديم ومب حلو .. ( ذوق شخصي )
- مراتب الصف الثالث صغيرة ( تناسب الأطفال )
- جرس انذار السرعة فوق 120 مزعج ولا يسكت أبد

الموتر يوم بعد يوم يكبر في عيني بسبب قدراته .. وأنصح بشرائه بقوة

نصيحة
أقراء هنا ان وكيل ميستوبيشي عندكم في السعودية سيء ,,
لذلك أنصحك تأخذه من الإمارات
وإذا وجدت جديد غير مستعمل من موديلات 2011 أو 2012 أشتره لأنه ما فيه فرق ابد بينها وبين 2013 .. ويمكن 2014 يشبههم. لأنه بيكون أرخص لك وأوفر
والأفضل تأخذ مكينة 3.8 سي سي ممتازة جداً ..

وبالتوفيق