السلام عليكم
بدون مقدمات اسدح لكم تجربتي البسيطه لجمسي المتواضع
والعين حق يا اخوان , اذكرو الله
اول شي بتكلم
- عن استخدامي بشكل عام للسياره
- وكذلك كيف ربي كتب لي شراءه
الموتر شريته مستعمل
ونظيف جدا كل شي شد بلد ماشاء الله بعد عناء بحث دام اكثر من 5 شهور وشوي
ويوجد ضربه بالصدام الخلفي فقط .. والباقي ماشاء الله تبارك الله وكاله
اخذته وكان ماشي تقريبا 50 الف كلم تقريبا ( على وقت موديلات 2009 على ماظن )
وتجربتي كانت مسافه 150 الف الى ( 200 ) الف عقبال المليون وياكم ان شاء الله
على ذمه صاحبه مافيه الا العافيه .. وفحصته احتياطا ولم يتبين اي شي كل شي سليم
الا الضربه بالصدام الخلفي وماعقتني الحمد لله
اول ماخذته سافرت فيه لابها وجده وينبع والمدينه
وان قلت هو موتر سفر فهي قليله عليه ماشاء الله
[ للمعلوميه سابقا لا اعرف سوى الياباني وبعدها غيرت نظرتي 180 درجه ] !!
وبعدها قلت اني غيرت الامريكي , اخذت الماني ان شاء الله
المهم السياره جدا راسيه بالخط ولا اروع منه وحتى التحكم فيه بالسرعات العاليه سهل بدون مبالغه رغم تجاربي الكثيره بالياباني
فيه عج ولا مطر ماتفرق معاك بالقياده وكانت سفرتي الاولى فيه
واجهت فيها هواء قوي مع غبار وامطار واعطيه 9 من 10 النقطه الباقيه للالماني
واعجبني تنسيم الهواء ماتسمع هواء يدخل السياره لو تطق 190 كم
بس اللهم الهواء اللي يضرب السياره مزعج قليلا .. لكنه هادئ ورائع وتكاد لاتسمعه
على سرعات 100 - 120 - واحيانا 150 !!
بس للاسف صار عليه حادث من عند باب السائق وبعدها بدا التنسيم يزعجني قليلا
رغم اني وزنت الباب اكثر من مره
التنسيم يقل فقط لكن لايذهب ابدا , ويالله لك الحمد
وكذلك المكيف جدا بارد , رغم ان الوقت كان بالصيف وبعز الحر
المكيف لمس وقوه دفع الهواء حبه ( مدري كيف اشرحها ) ودرجه البروده 15
واحيانا الراكب ينزعج من بردوته ويرفع الحراره الى 23
واعجبني فيه رغم تحميله للعفش العزم ماتغير وكذلك الصرفيه وماتحس فيها
رغم ان الحموله كثيره جدا ولايخفى عليكم شنطه السوبربان
ولا اخفيكم ان جاه كرف واهمال وسوء استعمال
مثل الدعس والمقاوم وكذلك التطعيس ( مع انه بدون دبل )
الا اني احيانا اتحدى جيوب بدون دبل بالمراقي ويبيض الوجه صراحه عزمه قوي
ولم اواجهه مشاكل عويصه حتى الان ولله الحمد الا القطع الاستهلاكيه
وسوف اذكرها مع الاسعار اللي اتذكرها من اول ماشريته حتى الان
- فحمات غيرتها يوم مشى 100 الف تقريبا
وكانت شد بلدها مع اني شديد على الفرامل شوي بس الاصلي اصلي !
وتم تغييرها كلها بـ 550 ريال اصلي مع شغل اليد 180 = 750 بعد الخصم
ويوم وصل الظاهر 170 الف غيرتها بنفس السعر والى الان سليمه وبدون اي اصوات تذكر
- فحمات الجلنط ( برضه شد بلدها ) كانت ماتمسك
وغيرتها كلها بـ 140 ريال اصلي شغل اليد ما اذكر حقيقه
- بكرات سيور المكينه 2 مع سير المكينه
واحد سليم بس قلت دامي شاريه خلني اغيره بجديد احسن وما اذكر شغل اليد
واظن كلفني سير المكينه 80 ريال والبكرات بـ 130 ( ماذكر سعرها كويس ) !
- وغيرت طرمبه البنزين , والمشكله كانت من العوامه ولا الطرمبه كويسه
اعبي فل ولاطلعت من المحطه قال ( البنزين منخفض ) ولا وصلت البيت يصير فل !
وكلفتني 970 ريال
وطرمبه البنزين الحين ماصدق اللي يقول انها من عيوب الجمس
وبس يطفى فيك وان الجمس ماعاش الا على طرمبه الفي اكس آر
قله تقهو بس !
- مع الفلتر تبع البنزين
ضروري جدا تنظيفه على الا قل للحفاظ على الطرمبه سليمه او تغييره بـ واحد اصلي افضل
طبعا الكلام لموديلات 2003 وتحت اما مافوق ماهو ضروري لانه داخل التانكي
- صوفه المكينه الخلفيه وصوفه القير ( تم التغيير بسبب التهريب )
وهذا خطآ لاني استخدم زيت ثقيل وهو اساسا يتعب طرمبه الزيت ويفقع الصوف مع الحراره
وخبركم اجوائنا عاد
وشغل يد مع قطع كامل واصلي بـ 800 ريال تقريبا
- ربله ماصوره طرمبه الزيت ( برضه بسبب الزيت الثقيل )
تم التغيير الربله اصلي بـ 35 ريال مع شغل اليد وتغيير الزيت بـ 120 ريال
- تغيير بواجي من اس ديلكو وبطاريه جديده ( غيرتها مره وحده ) !!
- تغيير لمبه الواطي يسار , والسبب ضرب الكفر اللي يسار
ضربت رصيف على سرعه 60 تقريبا بـ 10 ريال صناعه امريكيه
وماقصر كاس الكابتشينو دخل بخشمي والله يعوضنا خير
- حساسين نوك سنسر ( يجي تحت الثلاجه ) والسبب اتوقع من الغبار لانه بعد الغبار ولعت اللمبه
وغيرتهم الواحد بـ 130 ريال مع شغل اليد 500 ريال
- تنظيف الثروثل مع البخاخات ( نظيفه بس للحفاظ على نظافتها )
- طرمبه ماء خربت بعد مامشى 190 الف .. كثر خيرها
- تغيير زيت قير مع الفلتر كل 40 الف تقريبا بـ 250 ريال مع شغل اليد
- غيرت الكفرات وركبت طقم ميشلان الكفر الواحد بـ 850 ريال تقريبا
- تعطل عندي مفتاح نافذه السواق .. والسبب الاسلاك مملحه وصلحتها وماكلفت 150 ريال
فقط الحمد لله , كلها قطع استهلاكيه واشياء ضروريه
استخدمته تقريبا 3 سنوات ونصف ويبي يكمل 4 سنوات ماشاء الله
والباقي .. بنزين 91 - زيت كاسترول 10w30
بنزين فل بـ 50 ريال 91 اذا كان فاضي
امشي فيه بالديره مع الدعس تقريبا 550 كيلو
امشي بهداوه 600 الى 650 كيلو
بالخطوط مشيت فيه من بريده تحديدا الى مكه بـ تانكي واحد ماشاء الله على سرعه 120
الزيت كل 3000 بالكثير 3500 اغيره
انطباعي عنه وذكر الايجابيات مع السلبيات :
ان قلت موتر ماشاء الله قليله عليه
وبختصار متعدد الاستعمالات ماشاء الله ولا يقولك لا ابد ( سفر - دوران - سرعه - تفحيط - تعديل - تطعيس - زره - قوه - هيبه ) وكل ماتريد
وسوف اتكلم عن المشكله اللي يتكلم عنها بعض الناس
ان ديكور الجمس يتفكك ويتهربد , موتري ماشي 200 الف وكسور حاليا
ومافيه اي اصوات ديكور .. فقط باب الراكب + باب الشنطه وهذي مافكرت فيها لانه نادر تسمعها حتى !
مع ان استخدامي مثل ماذكرت لكم !! استخدام واحد غشيم
فقط يحتاج تربيط اسفل الموتر , لاني ماقصرت معه بالبر جلد
والايجابيات تقريبا ذكرتها بتجربتي
اما السلبيات وبكل صراحه واللي مرت علي بما اني عزوبي
هي البنزين خمسين ريال فل ويجلس اسبوع كحد ادنى
والحجم احيانا يكون ثقيل على الشخص .. مثلا ملابق الجامعه تتضايق شوي
وهذي التجربه بـ اختصار
ورآيي فيه
موتر جدا جبار .. وفيه طاقه تحمل عجيبه !!
موتر صار له حوالي 5 حوادث يطلع منها يمشي رغم ان اللي صدمني شال سيارته بسطحه !!
ماشاء الله تبارك الله , ولاتنسون ذكر الله يا اخوان
وانتظروا تجربتي الثانيه
ليوكن اكس ال فل كامل موديل 2009
مقدمه لـ التجربه بدون مبالغه الـ 2009 حاليا ماشي 180 الف وماشفنا منه اي مشكله ولله الحمد
رغم اننا ساحبين على الوكاله , وما اذكر دخل ورشه الا لتغير فحمات وزيت قير
وبالاخير لاتنسون ذكر الله
وهذي صوره بعد ماوصل 200 الف ماشاء الله
اما الباقي معروف ومنتشر مافيه اي فرق عن غيره < مكسل
واي سؤال عن السياره حاضرين
تحيتي ,