شراء سيارة عن طريق بنك الراجحي

جزاكم الله خير ما قصرتوا

اخوي ابوالبراء نصيحه مادام ماعندك فلوسه وتبي تتدين لاتشتريه نصيحه من اخ يبي لك الخير اركب على قد فلوسك المبلغ هذا ممكن تحصل فيه شقه تمليك مستعمله ولا تستثمره افضل لك
وان كانك ملزم ووصلت هالمبلغ خذ لاند افضل ويمسك سعره

اناامس عند الراجحي لتقسيط السيارات فعلا حصلت فرق تقريبا 15 الف
بينه وبين الجميح في المبلغ الكلي والسياره يوكون دبل ونفس الدفعات
وعند الراجحي اقل في القسط فمالك الا الراجحي اذا عليك اقساط من البنك
او تاخذ اعاده تمويل وتشريه نقد افصل واقل فايده لان التاجير مثل ماقال اخد الاخوان يرفع قيمته التامين

اذا لم يكن عليك التزامات (اقساد) فان اخذ تميل شخصي افضل لك من الاجار المنتهي بالتملك
على الفكرة العربي يعطي نسبة 2.2 %
اما اذا كان عليك فان الراجحي من افضل البنوك بهذا الخصوص هو الرياض نسبة السنوية تقريبا بين 7- 8 %
تحياتي اليك

لا تنسون التأمين أحد أهم الاشياء التي تزيد من قمية السيارة .. ولكن السؤال هل التأمين فعلا يفيد أم لا .. اتمنى اللي يعرفون يفيدونا ..

جزاك الله خير كارف الـXA ما قصرت

اضف إلى اخوي (مرور الكرام)

التاجير المنتهي بالتمليك فؤايده مبالغ فيها
اكثر من 4% سنويا .. و 4% أخرى للتامين
يعني اكثر من 8 % سنويا !!!
اي 40 % فوائد وتامين على 5 سنوات !!!!!!!!!!!!!!!!!!

بينما لو اخذتها تمويل
الفائده تقريبا 3%
والتامين شامل من التعاونية 2 % فقط

اي 25 % فوائد وتامين على 5 سنوات

ووفرت على نفسك 15%

والله يخوك يابو البراء هم جالسين لك سواء الراجحي او الشركه
لان المحتاج ماله الا يدفع وهو ساكت وماعنده اصلا اي خيار اخر والا يدور سياره على قد فلوسه الكاش ؟؟
التاجير المنتهي بالتمليك عند الشركه اليوكون يزيد سعره النقدي عن المعارض تقريبا 11 الف ريال الدبل والحسابه تحسب
تدفع 50 الف مقدم وقسط 2100 لمده 48 شهر ودفعه مؤخره حول الاربعين يطلع حول الميتين وهو سعره بالمعارض 141 وعند الشركه 152 كاش
هذا موديل 2011
والتاجير فيه شبهه شرعيه لان فيه غرر تدفع لشي ماتملكه ولو ماتسدد لو قسط واحد يسحبون السياره ويصير كل االلي دفعت تاجير وهذا ظلم واكل لمال المحتاج وهو المشتري
على بال مايمتلك السياره
لكن المحتاج ماله الا الصبر
التاهو ال تي زد سعره اذكره 183 ودفعه مقدمه 70 الف وقسط شهري 2100 ودفعه اخيرع حول الخمسين يطلع
المجموع حول 227 الف
بس لازم الراتب ضخم وقسط الياره والبنك مايتجاوزون نص لراتب اعتقد

88888888888888
عين الصواب ما قاله أخي مرور الكرام

ومن عيوب التأجير المنتهي بالتمليك والذي لا ينتبه له كثير من الناس هو أنك ستضطر لشراء السيارة من الشركة مباشرة ‘ ومن المعلوم أن سعر السيارة من الشركة أغلى من المعارض والذي قد يصل إلى 8000 ريال في بعض الأحيان و أكثر عند بعض الوكالات ............ بالتوفيق ..

مافكرت ب gxr جديد تراه قريب منن سعر اليوكون .. مع فرق سعر إعادة البيع ..

الله يوفقك يا أبو ضرس

انت و مرور الكرام

وفيتوا و كفيتوا جزاكم الله خير

و رزقكم الفردوس الأعلى من الجنة

ممكن أفيدك بمعلوماتي ممكن تكون تغيرت لدى البنك ..

الأفضل طبعاً تروح للبنك وتتأكد بنفسك ..

أفضل طريقة للشراء ومجربه أكثر من مره ..

أنك تروح أي فرع للراجحي وتقوله أبي تمويل ( أسهم ) وتحدد له المبلغ المطلوب .. طبعاً لازم يتوافق مع راتبك ..

آخر خبري بالتاهو LTZ بدون دبل لون لؤلؤي بــ 170000

وأنت عندك 50000

المتبقي عليك 120000

تقول للراجحي أبي تمويل بقيمة 120000

على حسب النسبة لديهم حالياً لأن كل فترة تتغير ( تزود - تنقص )

لو فرضنا أنها 3.5

على 5 سنوات

راح تكون الحسبة كالتالي :

الفائدة السنوية 120000 × 3.5 % = 4200 ريال

4200 × 5 (عدد السنوات) = 21000 ريال

المبلغ الأصلي + الفائدة
120000 + 21000 = 141000

هذا المبلغ الي راح تقصده عليهم لمدة 60 شهر ( 5 سنوات )

يعني 141000 ÷ 60 = 2350 القسط الشهري

طبعاً يبقى عليك تدفع رسوم إدارية أعتقد 1500 أو 2000 لأول مره ( ما أدري وش حقته ) !!

وفرق بيع الأسهم أحياناً يوصل 400 - 800 ريال

وتطلع من عنده بعد نصف ساعة تلقى المبلغ نزل بحسابك كااااااش

وتقدر تأجل القسط الأول شهر وياخذون أول قسط بزيادة بسيطة جداً ..

طبعاً المبلغ بيدك كاش + المبلغ السابق مثلاً 50000

تقدر بنفسك تروح المعارض أو أي وكيل وتشتري السيارة كاش ..

ميزة الطريقة هذي أول شي وأهم شي أنها شريعة ( حسب إفادة الراجحي )

ثانياً : السيارة تطلع بأسمك ولا منة أحد ..

تقدر تبيعها بأي وقت وتقدر تتصرف بالمبلغ حتى لو ما شريت سيارة ..

تقدر بأي وقت إن الله رزقك بمبلغ تسدد المبلغ المتبقي عن طريق الهاتف وتحصل على خصم بعد ..

بصراحة مزايا الطريقة هذي كثيرة جداً ..

وأنا جربتها أكثر من مره من 10 سنوات تقريباً ..

****

أما التأجير والتقسيط أبعد عنه ..

التأجير : فيه شبهه شرعية والسيارة بأسمهم ويلزمونك بالتأمين سنوياً ..

التقسيط : شروط معقدة وتلزم بسيارة محددة وتقعد 3 أيام إجراءات الاستلام ..

أتمنى أكون أفدتك ولو بشي بسيط ..

بالتوفيق للجميع ،،،