موضوع خاص أهديه لاخواني الشباب
اخواني جائني بعض التعليقات عل توقيعي وشكاوي
ولكن انني ارى انه والله فيه الفائده والموعضه
وارجو منكم افادتي
اغير التوقيع او اتركه
وهذا موضوع اطرحه لكم تعقيب على الموضوع
(( والله لي ثلاث ايام اكتب فيه))
واتمنى الافاده منه
اخواني (اللي معاهم سيارات بس) الكل منا يحب السرعه والتهور والمناورات بين السيارات (وخاصة أصحاب الكورولات!!) والبعض منا المفاخره بمهاراته وتحدياته أمام الناس ولكن هل تتوقع انك حتنجح في كل حركه ، في كل مناوره تسويها؟؟! لا... أحب أقول لك: مو كل مره تسلم الجره! ولازم تآخذ لك علقه ما تنساها طول عمرك وبعدين لا تفكر ان كل شخص بسيارته مع أهله لمن حيشوف عرضك عالخط السريع مثلاً حيصفق لك وينبسط من الحركه ويقول: ياهووووووووووو يا فنان!؟ احتمال حيدعي عليك وعاد شوف رصيدك لمن ترجع بيتك من دعاوي الناس ، منها: الله لا يوفقك ، حسبي الله عليك ، الله يلعنك (تجي من الشيبان وكبار السن غالباً) ، حريقه إنشاء الله (عائله جداويه كامله تدعي عليك بهالكلمه) ، واذا كنت راضي بالسب هذا كله بكيفك ولكن هل ترضى لنفسك الحرق؟؟
أخواني .. اصحوا من الجنان اللي أنتم فيه واتركوا السرعه لأصحابها في مضامير السباق (مايكل شوماخر) وحافظوا على حياتكم وحياة الآخرين من الهلاك ، والكل منا يعرف ان نسبة الحوادث عندنا بالسعوديه من أعلى النسب في العالم وهل يرضيكم ان الأجانب وأخواننا المسلمين في الدول الشقيقه يقولوا علينا (غشيمين في السواقه ، محد يعطيهم سيارات) وإلى آخره من هذا الكلام
فيه مقوله دائماً نقراها في الشوارع أو عند الإشارات وهي: لا تسرع فالموت أسرع ، أغلب الشباب مايصدق المقوله هذي إلا اذا صار له ضرر لا سمح الله وقد تؤدي إلى الموت ، أقترح عليك بأن تصدق كل مقوله مكتوبه عن التحذير من السرعه وتتبع مواضيع الحوادث بسبب السرعه مثلاً روح تشليح النهدي (عندنا بجده) وشوف كم سياره توصل يومياً مشوهه ومعدومه وحالتها حاله وكويس ان لقيت صاحبها واقف جنبها حتروح وتكلمه: السلام عليكم ، كيف الحال؟ سلامات ياأخوي خير إنشاء الله؟؟ إيش تتوقع حيرد عليك؟؟ حيقول لك واحده من ثنتين: 1-أنصحك بأن لا تسرع ولا تتهور. 2-نهاية مطارحات!! ، وصدقني حتكره شي اسمه سرعه بعد كذا
اسأل الله لكل شاب الهدايه والرشاد والسير في طريق الخير والبعد عن أذى الناس وأذى النفس قبل الناس ، وأحب أضيف ان السرعه تعتبر انتحار وتراني من المحبين للسرعه ولكن صار لي حادث بالخط السريع قبل أسبوعين وأخذتها علقه على راسي ما حأنساها طول عمري وأرجو ان تتعضوا ، قبل ما اختم موضوعي أحب أعدد لكم بعض النقاط الرئيسيه المسببه للسرعه والحوادث: منها
1-رفع صوت الأغاني وكأنك بمسرح.
2-(تي تيت .. تي تيت) الرسائل الوارده=1 ، حتموت لو ما قريت الرساله بعد ما توصل المكان اللي تبغاه؟؟
3-السواليف الزايده عن حدها داخل السياره وقد توصل بأن الشخص اللي ورا يدغدغ اللي يسوق!! ياناس وين قاعدين؟؟
4-مرت من جنبك سياره زي اللي معك ونفس اللون بس معدلها صح ، حتغار ولازم تطارحه وآخرتها حتندم اذا صار لك شي
تقبلو تحياتي
