أبي سيارة وما ادري وش اشتري ؟؟

أشكركم اخواني على نصايحكم وومشوراتكم الطيبة

بالنسبة للمستعمل ما ودي الا بجديد وتخبرون الواحد وده يرتاح

الظاهر اني بستخير وراح انتظر الاكسنت لين يطرحونها وفيه واحد من الاخوان حاط موضوع يقول فيه ان الاكسنت راح يبدون يبيعونها بعد اسبوعين

صراحه مالقيت شي أفضل من الاكسنت ومريت كذا وكالة ووقفت بنفسي على كذا سيارة

حاولت اقنع نفسي بالمازدا 2 بعد ما شفتها ما اعجبتني وواحد من الشباب يقول قطعها غالية
السويفت نفس الشي قطعها غالية ونادرة على حسب الاخوان الي راحوا معي
النترا راح تتغير بعد شهرين
اليارس ما اعجبتني

عشان كذا راح استخير واطلب الله الخيرة على الاكسنت الجديدة

جزاكم الله خير

ولا تنسون تدعولي عندي اختبار :blue:

الله يحفظكم جميعاً وابشروا بدعوه بظهر الغيب لكل واحد فيكم

هوندا سيفيك ونت مريح .. انا شريت وحدة نظيييفة نص فل بـ 59 موديل 2009
ماشية 4000 كم ..

بتلاقي ارخص منها بممشى اكثر ..

وتراها مريحة وسريعة برغم صغر مكينتها ..

واحد مع الشباب الحين ماشية 227 الف موديل 2008

يكرفها كرف وعالطبلون ومافيها شي ماشاء الله تبارك الله ..

وهو عنده CTS-V و كاديلاك SRX :)

حبيبي محد راح يخدمك هنا زي مأنتا بتخدم نفسك شف يمك اقرب محل ايجار سيارات تكون عنده اغلب السيارات الي بنفس مبلغك وتكون تكد عاد انت جرب وشوف الي ترتحله وممبروك مقدما:smile:

نكدتو على الرجال هلى وهيمي واكسنت وكالة وكامري ...............عزيزي طقلك اكورد او سفك مستعمل وريح مخك

خذ لك النترا فل كامل بـ 49.500 ريال

ولا اكسنت الشكل الجديد فل كامل بـ 50.000ريال

ولا كروز اقل من النص LT بـ 48.920ريال

وبراائي انتضر لين تجي اكسنت الجديده

يارجل هللي (هايلكس) غماره 2009 أو 2008 تاخذها حول الاربعين االف تنقص أو تزيد

ولا هيمي أذا انك تبي سيدان الهيمي سياره اجرااام قسم لغير تناظر للكسنت وشلتها باحتقار بعد ماتجربها ماكينه تطربك


أحسن من السيارات االصغيره حديدها مثل حديد الببسي

الرجال سحب علينا ما اعطانا رايه ولاشي


..............................


لاتعليق

تويوتا كورولا
نيسان تيدا - صني
هيونداي النترا - سوناتا مستعمل نظيف مثلا 2007 أحســـن من اكسنت 2010
وفي النهـــاية الله يعينك اذا ما كان في راسك شيء معين ونصيحــة روح ناظر تيدا نيســـان تراها حلوه

شوف انا من ناحيتي لما كنت مثلك محتار وتقريبا عندي نفس المبلغ و زوود شوي


اخذت اللومينا LS 2005 ماشيه تقريبا 119 الف قبل سنتين نهاية عام 2007


المهم طلعتها من صاله نظييييييفه وعليها ضمان

حررررررررررررررقتها خطوط ودعسس طبعا معروف اللومينا خصوصا الـ LS حق كرررررف لانه اقل مواصفات وكهربا من الفئات اللي افخم منها مثل LTZ او SS او رويال

والله اذكر اني كنت اداوم في المعهد يوميا رايح راجع ما انزل عن 160


ماشاء الله السياره كفت و وفت


لكن ما انصحك فيها بشده ...

لان الديكور الداخلي جودته لك عليها
ومعروفه مشاكل الحراره فيها والبريك


وسلامتك

55 الف فيها سيارات مستعلمة أفضل من إكسنت أو النترا جديد بمليون مره

هذي سيارات تجارية و داخل المدينة ما تتعداها ولو تسافر عليها كرهت عمرك خفيفة

ولا تتحمل سرعات ولا تفهم قصدي تهور ولكن أقصد بالكثير 150 الهوا يلعب فيها لعب نصحية عندك عدة خيارات بهذا المبلغ و

موديلات شبه حديثة .

انا ماعندي خيارات الك ﻻني ما احبذ السيارات الصغير

لكن لو ان التويوتا تيرسل الى اﻻن ينتجونها .. ﻻخترتها لك

وبالنسبه الى انك تشتري مستعمل او وكالة

فهذا يرجع الك ... اذا الك نفس انك تتعرف وتتعلم على بعض مشاكل السيارات مشان تكون لك خبرة في المستقبل .... فخذ لك وحدة مستخدمة

واذا تبي تريح بالك من المشاكل والتعطيل ... خذ لك من الوكالة .. وانشاء الله تخدمك على 5 سنين بدون مشاكل

شوف اخوي

مع اني اكره التويوتا خللللقه وما اطيقها كذا بسسس


لكن فيه الكامري 2005 او 2006 امريكي

يجيك مواصفات لكزس وفخامه وجلد وتخدم وقويه

ويجيك 6 سلندر مو مثل اللي عندنا ابو مشي حالك


ممتاااااااازه مع واحد من الشباب

بس اذكر انه مالقى لها قماشات الا حقت لكزس :bigggrin:

لانها تعتبر مثل اللكزس الـES اللي نزل عندنا 2005 وحولها


تحياتي

يالغالي نصيحتي لك تدخل المعارض وتدور لك سيارة مستعملة ازين لك من هالمواتر اللي طرحوها الشباب
يعني مثلا لو لقيت كامري 2006 فل كامل ولا نص فل ازين لك من اكسنت 2010

تقبل مروري

استبعد الكروز اعرف واحد في الصيانة يقول الابيكة احسن منها من ناحية الاعطال وقطعها غير متوفرة بالشكل المطلوب.
بالمبلغ الي معك خذلك النترا والسويفت صغيرة مرة والاكسنت مع احترامي حرام تشتريها وكالة ومثلها مثل اليرس..... الكيا منتشرة لاكن قطع الغيار نار وما ادري اذا جودتها تغيرت او لا
والله يعينك....

والله ياخوي ودي افيدك لكن اصبر نصيحه لاتستعجل

واتوقع سعرها حول الـ44 الف حسب مايقال في اغلب المنتديات

لكن

عندك خيارات كثيره اذا مستعجل ومضطر انك تشتري بأسرع وقت


مثلا .. الكروز .. النترا 2010 ممتازه جدا ..كيا سيراتو ممتازه ونفس الالنترا وفيه منها الباب واحد الرياضيه اذكر كانت ب65 الف يعني السيدان ماتبعد عنها بكثير

فيه عندك خيارات كثيييره اذا تبي سياره صغيره


لكن نصيحه اذا انت تداوم الصباح وزحمه خذ اوتوماتيك لانك بتكره نفسك لو اخذت عادي متعب وممل بالزحمه

تحياتي

شكرا يا اخواني على ردودكم ونصايحكم

رحت للوعلان اليوم الصباح (فرع ظهرة البديعة) عشان اسال عن الاكسنت الجديدة لكن بدون فايدة

مافيه الا موظف واحد ويحاكيك من طرف خشمة تحوم كبدك وانت تحاكيه من زود شوفة النفس الي مادري على ايش

الزبدة قالي انها ماراح نطرحها للبيع الا بعد ما تجينا عن طريق الادارة رسمياً فجأه قام وسفهني وطلع :confused1:
ذبحني كلامه بالتقسيط
يوم رجع قال لا تتعب حالك لأن إلى الآن ما حطينا الاسعار ولا عندي معلومات عنها الا ان سعرها ممكن يكون بحدود 45 ألف للسياحية وقام يكرر مو متأكد مو متأكد :confused1: << حسيت انه صرفها لي يبي يزحلقني

اتمنى من الي عنده معلومات عن سعرها وموعد طرحها للبيع يفيدني لأني ما وثقت في كلام الأخ المندوب هذا

ان شاء الله اني بروح لسوزوكي عشان اشوف السويفت لكن سؤال محيرني
من هو وكيل سوزوكي ؟؟ وهل فيه فرع قريب للبديعة ؟

لا هنتم يا اخواني الله يعافيكم