اكستيرا 2008 او فيتارا 2007 مستعمل ( ساعدوني )

أخوي...
أولا / لا تنس الاستخارة إذا عزمت على شراء السيارة و اخترتها بعينها ، يعني قبل ما تدفع الدراهم تروح و تصلي.

ثانياً / بحكم أنك من جده أشوف أن السوزوكي مطلوب بكثرة عندكم و يصير سعره مرتفع ، لكن أعتقد لو تجي للرياض تلقاه أرخص من هالسعر اللي تقول ...

ثالثاً / أترك القيل و القال خاصةً من بعض الشباب اللي يجيك مدرعم و يقولك السيارة الفلانية ممتازة و الفلانية تتفكك <<< يايه تنرفزني هالكلمة بجد.
اتركهم عنك ،الا أصحاب الخبرة و المعروفين صح ، ثم جب لك ورقة و قلم و أكتب لك أي قطعة غيار تخطر في بالك سواء استهلاكي و لا غير استهلاكي و حاول تكتب قطع لها علاقة بالدبل و المكيفات و الاديتر و قطع للمكينة و دينمو دريشة السيارة و اصطبات الأنوار الأمامية كاملة و الخلفية و صدامات أمام و خلف و و غير ذلك.
ثم لرح للمحلات اللي تبيع قطع غيار القريبة منك و المعروفة -غير الوكالة- و شف توفر القطع من عدمها و أسعارها ، و سجلها على ورقة .
ثم رح للوكيل و اسأله عن القطع اللي تبي و كم سعرها و سجلها .
ثم اعمل مقارنة بين هالشركة و هالشركة.

رابعاً / ابحث في النت عن منتدى خاص بالسيارتين أو رابطة مثلاً ، و حاول تقرا المشاكل اللي يواجهوها و كيفية التغلب على المشاكل و حلهم لها و من خلال اللي تقرا و تشوف سوي مقارنة بينهم.

خامساً / عند الشراء ، أفضل شي تاخذ لك واحد معك يعرف في السيارات - أنت لو تدور عرفت السيارة المسمكرة من النظيفة - وتخليها يفحص السيارة صح ، و ابعد عن الشخص اللي يقول ما أدري عن السيارة ، و كذلك أي سيارة جايتها صدمة بالوجه اتركها مهما كان سعرها مغري - شيك على الايرباقات و لاحظ أطرافها ، إن كانها ملزقة و لا فيها شي اتركها على طول- .
بعد ما تختار السيارة ، اشترط عليه عدم وجود صدمات في أي مكان أو مشاكل تقنية ، و لا تعطيه عربون أكثر من ألف ، ثم رح لأحد مراكز الفحص - اترك المراكز اللي يقولك عنها راعي السيارة - و خلها يفحصها لك بالكمبيوتر و يفحصها من تحت و يسوقها و خلك راكب مع الفني و لا يجي معكم راعي السيارة- اهم شي لا يركب معكم راعي السيارة اثناء الفحص - وقل للفني تكفى شيك عليها صح و لا مانع من انك تخرده بـ 100 ريال .

-قبل الشراء اتفق مع راعي السيارة ان لا مبالغ تدفع من قبلك زيادة عن سعر السيارة مثل السعي و تكاليف النقل .

هذا اللي أذكره الآن و الله يوفقك في السيارة اللي تبرد خاطرك و تسرك