سيارتي التاهو 2010 تتعرض لحادث اثناء وقوفها - دلوني على اسعار قطع الغيار

الحمد لله على السلامة والله يعوضك ان شاء الله وييسر امورك ..

بصراحة اسعار القطع غالية جدا ,,

لا تفكر انك تتساهل مع الولد ..

الله يوفقك ..

بالنسبة للتأمين ,, اعتقد حتى لو كنت مأمن شامل ما راح يشمله التأمين ..

لأن اللي صادمك موجود وهو اللي يصلح السيارة ..

عندي تأمين على سيارتي تاهو 2010 (تأمين شامل)

وتختلف أسعارها حسب قيمة السيارة اللي بتقدره انت ..

يعني تقدر تقول اقدر سيارتي ب 120 او 80 الف

وإذا تلفت سيارتك لا سمح الله يقدرونها من عند شيخ المعارض

وأقل سعر بين تقديرك انت وقت التأمين وتقدير شيخ المعارض ياخذون به ..

وبعد يختلف السعر اذا كنت بتدفع مع كل تصليح 250 ريال او 500 او الف ريال ..

التأمين اللي أخذته ب 3050 ريال .. وقدرت سيارتي ب 120 الف وادفع 1000 ريال مع كل تصليح للسيارة ..

وبالتوفيق ..

اجل يسامحه يا ابو ديالا

ليه انت ما تعرف هياط هــ المبزره خصوصا الي في الرياض و سواقتهم الي كلها بطولات

خله يرصه هو و ابوه ع شان يعرف يعطي السياره لمين

و الحين شوف القيمه


============


اقول لا تصلح سيارتك الا في الوكاله

نصيحه سيارتك جديده

:xyxwave: هلا اخوي ,, سيارتي قصدي مثل سيارتك يعني بالموديل 2010 جديده شاريها قبلك بشهر:a1120(86):
وماشيه الآن 9 الاف ويوم ينفجر كانت ماشيه 5 الاف :bigggrin: مثلك تمامآ

مو قصدي اخوفك لاوالله بس نصيحه افحص قبل ,, أخاف عليك لايصير لك مثل ماصار لي بالطريق انا واهلي :blue:
ثم توكل على الله والله يحفظك ويستر عليك

وبالنسبه لسعر الجنط صراحه بقوه مبالغ فيه ..
يعني بهالسعر اطق لي جنوط 20 بكفراتها بمحلات الزينه واسوي لها ترصيص مضبوط ابرك من هالقيمه على جنط 17 وغير كذا بدون كفر بعد هههههههههه

ماشوف شر

فالحديد ولا فيك

معوض خير

بالنسبة لأسعار القطع أنا أنصحك تروح للوكالة مرة ثانية وتطلب أسعارها


لأن الأسعار الأولى ( سعر التسعيره حقت الحوادث ) وهي بالغالب تكون مرتفهة بزيادة

أما إذا بغيت تشتري فبيكون فيه سعر ثاني وبيكون مرضي لحد ما .

وأنا أنصحك تشتري من أوتو ستار أو آي سي ديلكو بيكون السعر ناقص وإنشاء الله بيكون الفرق حول 50 %

وترى فيه محلات بالمدن الكبرى حقت فيبر ويرجعون الصدام مثل الجديد وأسعارهم جداً ممتازة


وأنا أشوف تنزل سيارتك المعارض يمكن يجيك فيها سعر حلو وتضيف عليه قيمة التعويض وتطق لك واحد جديد ( ما أتوقع بيكون فيه فرق كبير )

بالتوفيق وإن شاء الله شر وراح عن السيارة

حياك اخوي
فعلا فيه مبالغه بالاسعار بنسبة 15% على مااعتقد بس الجنط اخر سعر فيه وجدته 3180 ريال يعني ماينزل عن الثلاثة
لاتبيع سيارتك فقط امن عليها شامل وارتح وهذا اللي راح اسويه ان شاءالله
بالنسبه لضغط الكفرات كم اخليهم ومعقوله انفجر معاك الكفر الخلفي بدون سبب
فكم مشيت عليه الكفر ويمكن محبل او تاريخ الصنع منذ مبطي ... ههههههه
انا سيارتي جديده ماشيه 5000 كم وماافكر اغير كفرات الا بعد 40000 ان شاءالله

اول شي الحمدلله على السلامه اخي العزيز

ثاني شي انت مـــتـــأكــد من هالأسعــــآآآآر ؟؟؟:smilie20: << مو اني مكذبك (حاشاك يالغالي) بس مو مصدق .. وعلى فكره تراني ماستوعبت قيمة الجنط انك تقول قيمته بدون كفر بـ3350 ريال

ثالث شي وهو الاهم .. تصدق اني افكر حاليآ في بيع سيارتي التاهو هههههههههههههههههههههه
الله يستر بس :blue:
والله يعوضك خير ,, وتقبل الله عمرتك وصالح اعمالك والله يهون عليك بسفرتك
والله يستر عليك انتبه من ضغط الكفرات قبل السفر لان مابي اخوفك
معي مثل سيارتك بالضبط وانفجر علي الكفر الخلفي وانا راجع من مكه بدون سبب

فيه مشكله مقلقتني بالسياره
بعد الصدمه من الخلف للسياره الكفر الامامي تقدم مقدار اصبع واحد
وطبعا الكفر الخلفي ولكن وجدت ان الذراع الخلفي متضرر ومنحني بسبب الصدمه فسوف اقوم بتغييره بجديد والسؤال
الكفر الخلفي طبيعاي سيعود الى وضعه العادي ولكن الكفر الامامي ماهي علاقته بالكفر الخلفي وهل ممكن يعود الى وضعه العادي ويتلاشى المسافه الناقصه وهي مقدار اصبع علما بان الاذرعه الاماميه ليس فيها شيء حسب كلام الوكاله
وهل هناك خطوره من استخدام السياره اثناء السفر
ماهو رايكم

تحياتي للجميع

اليوم تم تقدير المعارض وكانت 3 تقديرات
المعرض الاول 18000 ريال
المعرض الثاني 26000 ريال
المعرض الثالث 27000 ريال
طبعا حسب النظام عندهم يتم الاخذ بالسعر الاوسط
الفرق بين تقرير الوكالة والمعرض 12000 ريال بس الصراحه ان الجميح مهوي بالحيل
قمت بمراجعه للموضوع حصلت مايلي :
دعامة الصدام الخلفيه فيها طعجه بسيطه يعني بمطرقه لمدة نصف تصلحها وتعيدها زي ماهي وقيمتها ماهي بهينه تصدقون بـ 2400 ريال ولذلك شلتها من قائمة الشراء
الرفرف الايسر الجانبي به طعجه بسيطه ولايوجد خدوش يعني مايحتاج سمكره مجرد شفط فقط يرجع زي ماكان وقيمة الرفرف عندهم 5800 ريال ولذلك شلتها من قائمة الشراء
الحساسات قيمة الواحد 1000 ريال والخربان هو واحد فقط بس مسجلين 4 قيمتها 4000 ريال ولذلك لن اشتري الا واحد وشلت من القائمه 3000 ريال
وبذلك تجاوزنا عن مبلغ 11200 ريال من قيمة القطع حسب تقريرهم 26000 ريال معنا الباقي 15000 ريال والاجور كاتبين 11200 ريال فخلها النصف 6000 فتصبح الحسبه 15000+6000 = 21000 + 3000 ريال احتياط يعني الشغله كلها 24000 ريال
صراحه انا مرتاح الضمير حاليا لان الجميح بالغ كثير وانا مااحب اخذ شي زياده على حقي وان شاءالله 26000 ريال بتغطي السياره بالكامل ...
هذا ماحصل هذا اليوم ولكن ابي مشورتكم
وين اصلح سيارتي وهي ترى وكالة العيسى
هل اشتري قطع غيار من وكالات اخرى وهل تكون اصليه مضمونه
لان الصدام بيكون جديد مجرد تركيب
والشنطه الخلفيه جديد مجرد تركيب
والحساس تركيب
وكله على كله تركيب مافيه لاسمكره الا الزاوية اللي تحت الاسطب شيء بسيط ودعامية الصدام الخلفي تفك وتعدل وترجع مره ثانيه
طبعا انا في حائل واحب اسويها في جده لاني رايح عمره نهاية الشهر

وسؤال اخر .... عندي لمبة داخل قوسين علامة تعجب لونها برتقالي هل تؤثر على السياره اذا سافرت عليها حاليا
والان في الطبلون تطلع لي كلمات مثل : control break assist
فهل هذه لها تاثير على السياره اثناء السفر
افيدونا لاعدمناكم وبارك الله فيكم

وشغله اخيره
وش رايكم بالتامين الشامل تنصحونا فيها واي تامين مناسب وكم بالسنه 1
تحياتي للجميع

الله يعوضك خير ان شاء الله

بس الاسعار تقهر والله .. ليه كذا .. ومن يهتم بالمستهلك

4000 صدام !!! الماس هو ولا ايش

والمشكله اغلب السيارات بنفس سعر القطع تقريبا

حسبنا الله ونعم الوكيل

4 حسااسات بـ 4200 ؟؟

الحساس الواحد بألف ريال؟ سلامات ؟

والله الاسعار اللي تحرق القلب

الحمد لله على السلامة والله يعوضك بخير

الاخوان اصحاب التاهو يدلونك ان شاء الله

اذا ابو اللي صدمته يشتغل في السيارات بعه السيارة واشتر ثانية

وش اسعار القطع الخنفشاريه هذي ؟؟؟

الله يعوض عليك خير

والحمد لله على كل حال

ولعل في الامرخير لك

لعل الله صرف بهذا الحادث شي اعظم واكبر

اخوى انا الى اعرفه السياره الجديده موديل السنه تصلح فى الوكاله ولا تروح المعارض
المعارض للموديل الفائت بسنتين يعني من 2008 وتحت
بس شكلهم شافوك منت عارف فى النضام وعلى قولتك والد الولد شريطي يعنى يمديه يضبط وضعه من عند اخوياه بسوق وانواع التحطيم
ما دام نيتهم كذا انشبلهم ولا تروح لشيخ المعارض وصلحها فى الوكاله واذا تفلسف العسكري حق المرور روح لضابط الحركه ولا حتى مدير المرور لان هذا اكل حق
انشبلهم خله اول شئ يتعلم ابو هذا الولد مايفلت ولده فى الشوارع
لا وبعد عمره 16 سنه هذا يا شيخ اخليه ينطق بتوقيف لين يخيس
خله يتادب

هذا راي انشبلهم ولا ترضى بشيخ المعارض سيارتك 2010
الوكاله الوكاله خلها تكلف 50 الف منت دافع
خل هذا الشريطي يتعلم

أتوقع المعارض بتعطيك فرق ما بين 7 إلى 10 الآف ريال

هذا توقعي , والله يكتب لك اللي فيه الخير

هلا اخوي كيفك ماودي اصول معك الكلام والفلسفه

تبي محل قطع غيار وكاله ورخيص واي قطعه تحصلها عندع

( السبيعي )

في الصناعيه القديمه (صناعيه الخرج)

لوحته فيها صوره جمس وكابرس ولونها اصفر

انا معي جمس 2002 ولا اشتر الا منه

وذا معزم على الوكاله دخله الجميح لان العيسى
صار لي معه موقف في السمكره
وهذا كل اللي عندي
تقبل مروري
تحياتي

رحت اليوم الى الجميح واخذت تسعيرة قطع غيار واليكم الاسعار :
صدام خلفي كامل مع الدعاسة العلويه 4900 ريال
الشنطه الخلفيه الباب الصاج فقط من دون قزاز او ديكون داخلي 4060 ريال
رفرف جانبي ايسر 5800 ريال
عمود توازن ايسر 700 ريال
مقص خلفي 350 ريال
جنط 3350 ريال بدون كفر
4 حساسات خلفيه 4200 ريال
المهم وصلت قطع السيارة الى 26000 ريال
بالنسبه للاصلاحات 11000 ريال اذا رغبت تركيب رفرف ايسر لانه يقولون شغله طويله فيها قص وغيره
طلع المبلغ 38400 ريال ( والله ظلم ) وحرام عليهم اسعار خياليه رغم اني لن ادفع قيمة الاصلاح او القطع حيث نسبة الخطا على الاخر 100% ولكن رافه فيه والمشكله انه ماعنده تامين ولكن اللي مهون علي ان الوغد الله يهديه ابوه ميسور ويشتغل بالسيارات
بعد مارحنا للمرور طلب مني انزل ونزلتله 4500 ريال وماقبل وكنت ناوي انزل الى ان يصبح المبلغ 32000 ريال بس هو طلب تقرير المعارض والان ابي امر 3 معارض يقدرون سيارتي بعد الحادث ويدفع الفرق
وسؤالي :: بكم تعتقدون يقيمون سيارتي وكيف يتم التقدير
سيارتي وكاله كما تعلمون الان قيمتها 135000 ريال عند الجميح
وماشيه سيارتي الان 5000 كم يعني بكم بيحسبونها بعد الحادث

وهنا مشكله هم بيقدرون الحادث من شكل السياره وماراح يهتمون بالمحركات اللي تضررت مثل الحساسات وقطع توازن السيارة
تحيرت ............ وش الدبره !!!