مشكلة في الفورد .. نرجو المساعده

اخواني الاعزاء اعضاء ومراقبين وزوار هذا المنتدى المتميز

السلام عليكم ورحمة الله وبركاته

الحمد لله على كل حال

اخواني كما ذكر لكم المشكله السابقه في الموضوع اعلاه

الحمد لله تم حل المشكله عن الورشه الثانيه
طبعا قبل يفك الماكينه قالي وش فيها بالضبط وطلع كلامه صحيح

1- تم تغيير الجنازير وكاله 417 ريال
2- تم تغيير شداد الجنزير امريكي 210 ريال
3- تم تغيير الثلاجة اصليه المنويم 950 ريال
4- تم صنفرة الرؤس
5- تم تغيير شحطات الجنزير لانهم رايحات فيها 110 ريال
6- لقينا الضراع مطعوج والبستم مكسور وذلك بسبب الثلاجة تهرب مويه علشان كذا البستم لما جاء يطلع فوق انسكر لان المويه عليه .. على حسب كلام الميكانيكي

شغل اليد كلفني 1400 ريال

كلفتني السيارة 3100 ريال

انا انقل لكم حل المشكله لان ممكن احد يصادف هذه المشكله ... لذلك الورشه هي في الصناعية النسيم طريق الميه ورشة الفرات .. اسم المكيانيكي ابو سعد

اخوي امير بلكمتي مشكور على المتابعه


قبل امس شريت الثلاجة جديدة الالمنيوم قيمتها 950 ريال

لان الميكانيكي قالي ... مراح تطول معاك وراح تهرب مويه غيرها الحين افضل لك مابعدين ما تخسر اكثر

واليوم ان شاء الله تطلع السياره ....

وسوف اوافيكم بجميع الاصلاحات ...........

وتقبل تحياتي

اخووووووك

اعانك الله عليها والله يوفقك في امورك ,, اما بالنسبة اذا الثلاجة فيها كسر فـ التلحيم غير مفيد

وخاصة ان الثلاجة الجديده تغيرت قواعدها الى المينيوم والقديمه فيها عيب مصنعي وهي انها

بعد فترة مع الحراره تتكسر وتبدأ تهرب وحتى لو لحمتها من جهه راح يطلع بعد فتره من جهه اخرى

فالافضل جديده وان كان سعرها غالي ولكن افضل من ان تتعطل السيارة وانت في امس الحاجه لها

وخاصة ان الصيف بدأ

أخوكـ

اخوي امير بلكمتي الله يعطيك العافيه على المتابعه

اليوم نزلت السياره عند الرجال صاحب الورشة الثانيه وكلامه مطمن بس لقى المكاكينه تهتز وبعدين قال البلوف موقفه الرؤس ويبي لها صنفره واساسيا انا ملاحظ على السياره انها تنقص مويه ولقى ان الثلاجه يمكن مكسوره قال لازم افكها وذا تنصلح اصلحها يعني على كلام الرجال انه مراح يركب شي الا وهو واثق انه مايخرب بسرعه

القطع اللي شرتها اليوم من الصناعية القديمه لأنها ارخص من صناعية النسيم

1- جنزيرين من توكلات الجزيرة وكاله اصلي >>> 417 ريال
2- شداد امريكي من المغلوث >> 210 ريال
الاصلي لقيته 500 ريال بالوكاله

شغل يده جنزير مع صنفرة البلوف مع الثلاجة اذا تنلحم
1300 ريال بعد التنزيلات

الله يكون في العون

وان شاء الله خير
يوم الاثنين تطلع سوف اخبركم بالتفاصيل حتى يستفيدون الاخوان

طبعا ماراح يخبط بالماكينة ولكن هو راح يطلع صوت لين ينفك او ينحل من مكانه

وفكته راح يخرب معاه اشياء في الاصل راح تتغير مع وقت تغيير الجنزير

طبعا اذا نفك ماراح تشتغل الماكينة او تدور

الافضل من باب المحافظة انك تغيره قبل ماتمشي عليه كثير

أخوكـ

الله يعطيك الف عافيه اخواني الاعزاء

وبصراحه حق الورشة الثانيه واثق من نفسه

ويقول اذا مشيت كثير عليها راح يفرط الجنزير وتخبط الماكينة

اخوي الفورد الشعبي عنديلك حل قبل لاتسوي اي شي غير الزيت وحط زيت كاسترل الخفيف مع السيفون وكده اسبوعين وبعدين غير الزيت ثاني مرره زيت كاسترل وانشاء الله بتروح

وعليكم السلام ورحمة الله وبركاته

بالفعل ممكن يكون مثل ماذكره صاحب الورشه الثانيه ومادامه متيقن فأكيد عاين المشكلة

وعارف من وين مصدر الصوت لأن الطرمبة راح يكون صوتها في اسفل الماكينه او صدرها

التكايات في الأعلى عند اماكن البواجي او الكويلات

اما الجنزير فصوته واضح يكون في صدر الماكينه من الناحية العليه وطبعا فيه بعض الورش

عندهم مثل السماعات تبع الدكتور ولكن في اخرها مثل الماصورة يحط على مكان الصوت ويعرف مصدر الصوت

أخوكـ