منتدانا الحبيب.
اليوم سوف أكتب عن الكيا موهافي وما لها وما عليها. السيارة صار لها معي 5 شهور وسبعة ايام وقطعت بها 24000 كلم.
صحيح المثل اللي يقول : القرد في عين أمه غزال. وهذا ما لاحظته على الكثير من الأعضاء من التعصب للسيارة اللي يحبونها او يملكونها. وطبعا يأثر كثيرا على راي أي مقال يكتبه. وحتى لو حاول واجتهد لازم يكون فيه من التغاضي عن المشاكل في سيارته. فترى راعي الفورد يمدح فورده بالإعتمادة وتارخها العظيم. وراعي التويوتا لا أحد يكلمه عن قوة وعملية السيارة وكذلك انها شيك. الهرج يطول هنا.
لكن سوف أبدا بنفسي عشان تعرفون من هو محدثكم. ووشهي الخبرة اللي يملكها والسيارات اللي جربها.
أولا العمر 35 ولي اسوق 22 سنة وأول سيارة حركتها من مكانها كانت داتسون بيك أب 1983 ام خطوط برتقالية.
ثانيا السيارات اللي كانت تحت يدي من شهر وأكثر هي كالتالي:
1- داتسون 180 بي 1977
2- نيسان 200 بي 1982
3- مازدا 929 1985
4- تويوتا كراون 1985
5- كريسيدا قراندي 1989
6- نيسان التيما 1992
7- بيوك رود ماستر 1992
8- مازدا 929 رويال كلاسيك1989 ( 7 سنوات و نص مليون كلم)
9- مازدا ام بي في 1989
10- لينكولن تاون كار 1995
11- أوبل أوميقا 2000
12- شفر استور فان 1995
13- أوبل أوميقا 2002 (7 سنوات ونص و 200000 كلم)
14- كيا موهافي 2009 اي اكس نص فل (سيارتي الحالية)
ثالثا: خبراتي:
1- اعرف اصلح الطيارات لاني أخصائي صيانة طائرات والظريف انها اسهل من تصليح السيارات.
2- السيارات اللي كانت معي ماعمرها شافت ميكانيكي الا اذا كانت العدة اللي عندي او المجال غير كافي.
3- على كل السيارات اللي ملكتها , هذي السيارة الجيب الأولى اللي املكها ومع ذلك التصعيس والبران ماهي غريبة عني ويا كم تمردحت في نفود "السر" لين دخت بسيارات سيدان. وكنت اقول وش ابغى بالجيب.
4- اقل سيارتي خراب الأوبل 2002 واكثرها خراب الكريسيدا قراندي . عجيب!!!
5- السيارة اللي بعتها وانا راضي عن السعر الكريسيدا قراندي.
6- اريح سيارة البيوك الرود ماستر1992.
7- السيارة الوحيدة اللي جيت عليها سرعة 255 كلم\س ال مازدا 929 رويال كلاسيك1989.
8- سيارة ماتهنيت بها الالتيما 1992
[COLOR="Red"]9- سؤال للفطينين . في سياراتي اللي ملكتها صفة مشتركة وش هي؟
[/COLOR]رابعا: ليش شريت الموهافي.
انا عندي طريقة غريبة في الشراء. ادور اقل سعر ثم احاول ادور الاسباب اللي ماتخليني اشتري اللي اخترته . فمثلا ابي اشتري تلفزيون 32 بوصة ال سي دي. امر على كذا محل واشوف ارخص ماركة ثم اللي تليها في السعر ثم اشوف وش الاسباب اللي بتخليني ادفع زيادة؟ ان كانت مقنعة دفعت او أخذت الارخص.
شريت الموهافي ومن قبله الأوبل على هالطريقة ولله الحمد والمنه ماتندمت.
خلونا نشوف مقارنة قبل 7 سنوات بين اوبل 6 سلندر و كامري 6 سلندر كلهم 2002
الأوبل ب 70000 والكامري 82000
الأوبل بعتها بعد 7 سنوات ب 10000 والكامري كم بيبيعا بعد 7 سنوات نقول 22000 مبالغ في السعر؟ الخلاصة انا خسرت على الأوبل زي الكامري يعني السعر متساوي. بس الأوبل فيها مزايا ماتحلم بها سيارة تويوتا ومنها أمشي 180 كني امشي 120 وال أي بي أس والسلامة والراحة وووووو . فليش احط نفس الفلوس في سيارة اشتريها لمن يشتريها بعدي.
بصراحة الموهافي كان عليه عرض "ندفع قد ماتفع" والقسط كان جدا مناسب لميزانيتي. فقمت ادور في السوق على نفس السعر او نفس القسط. لقيت الفوتشنر ثم الأكسبلورر. ولكن الموهافي كان متفوق على الجميع من نواحي عدة. اهمها التصميم والسلامة والخمس سنوات ضمان مفتوح الكيلو.
يكفي ماقلت عن نفسي وكيف اشري.
الحين الموهافي:
العيوب:
1- السيارة قاسية مطباتها "عردة"دوروا مترجم (مدري يمكن عشان ماملك جيب من قبل؟ او عشان الجنط 18)
2- خزان الوقود صغير بالنسبة لسيارة يمكن تأخذها للربع الخالي " فل ب 32 ريال 91 اوكتين" وتمشي بي 600 كلم كاملة قبل تولع اللمبة. كان بودي انها تأخذ 100 لتر او اكثر لكن تأخذ 80 لتر.
3- الوكيل لايوجد عنده الخدمة السريعة فكل خدمة لازم تسلم السيارة الصبح وترجع الظهر.
4- الصيانة كل 5000 كلم . المفروض أقل شي 8000 كلم. بس الوكالة قامو يتعذرون بسوء جو الرياض.
5- قطع الغيار الحساسة يجيبونها من دبي. ( المكيف الخلفي علق وقطعتة جابوها من دبي. ويحمدون ربهم انا في الشتاء ولا كانت علوم)
6- الوكيل قليل الخبرة بالنسبة للسيارة. طلعت انا افهمها اكثر منهم.
7- السيارة مع الخط المستقيم وفيه هواء لازم تتكي للطارة جهه عكس الهواء (مدري يمكن عشان ماملك جيب من قبل او اني اتخيل هذا الشي) الغريب اني اذا فكيت الطارة السيارة ماتروح يمين او شمال)
8- القير يريح بدري. مما يؤثر سلبا على عزم السيارة
9- حزامات الامان الخلفية حدايدها تقرقع في الديكور فلازم تثبها في مشقبيات حاطينها لها.
10- الوكيل ومسألة الخروج بالسيارة خارج المملكة (غثه), لكن توقع من الوكلاء الآخرين نفس الشيء.
11- عدم وجود دف-لوك ( للمواقع العردة جدا)
12- الصيانة واسعارها
a. 5000 مجانا
b. 10000 كانت 242 ريال
c. 15000 كانت 150 ريال
d. 20000 كانت 501 ريال
e. 25000 يقولون 150 ريال للحين ماوديتها
المميزات:
1- السعر المناسب جدا بالنسبة لسيارة بهذه الامكانيات.
2- التصميم العصري والرائع (والناس أذواق)
3- جودة الصنع على حسب خبرتي في السيارات المواد المصنعة منها وخاصة الديكوات الداخلية عالية الجودة.
4- عزم اكثر من رائع مع انها 6 سلندر.
[YOUTUBE][/YOUTUBE]
5- راحة المقاعد وراحة في السفر ( رحت دبي 10 ساعات متواصلة مع توقيفة بنزين وحدة بس)
6- هدوئها.
7- الطعوس والبر جربتها للتجربة فقط وكانت رائعة. يعني طلعت عن الازفلت ابو نص كيلو في الثمامة.
8- الثبات والتحكم تحس انك في سيارة صغيرة ( ربما كان للتعليق القاسي خاصية في الثبات)
9- اتوقع السيارة بتعيش معي 7 سنوات قبل ما أفكر ابيعها عشاني راضي عنها.
10- الضمان 5 سنوات المفتوح الكيلو معطيني راحت بال.
11- الوسع وصف المقاعد الثالث اللي يمكن صفطة بطريقة حلوة.
12- (التورك اون دماند) او العزم على حسب الطلب فالسيارة دفع رباعي مستمر ويمكن قفلة خفيف و ثقيل.
13- فرامل اكثر من رائعة ونظام اي بي اس فعال
14- الباب الخلفي شفط :smilie16:
15- السيارة مغطيه "عورتها" ماتشوف لا دفرنس ولا كنداسة :smilie16:
16- ارتفاع السياره عن الارض 217 ملم.
17- المكيف دولي ( الراكب يتحكم بحراته على كيفه)
18- اطمر بها الرصيفات :tongue: (امنية كل سائق في الرياض)
19- طبعا السيارة فيها 1000000 ميزة أخرى لكن جميع المميزات الاخرى موجودة في أغلب السيارات. يعني ماراح اقول الدرايش كهرب او معها رموت يفتح البيبان لأن هالمميزات صارت اساسية في سيارات القرن الواحد والعشرين.
20- في اصورة اللي تحت اعلى زرار يسفط المرايا( استخدمتة مرة كتجربة) واعتبره زود زعطة
21- أفضل موقع جرب السيارة تجريب طويل الأجل هو موتر ترند هذي لنكاته
http://www.motortrend.com/roadtests/oneyear/112_0911_2009_kia_borrego_long_term_test_arrival/index.html
http://www.motortrend.com/roadtests/oneyear/112_1001_2009_kia_borrego_update_one/index.html
http://www.motortrend.com/roadtests/oneyear/112_1003_2009_kia_borrego_update_2/index.html
http://www.motortrend.com/roadtests/oneyear/112_1005_2009_kia_borrego_update_3/index.html
وأخيرا تقبلوا تحياتي
