أنا عندي سوبربان 2007 بس مامشيت عليه الثلاثين ألف للحين ، وفجأة
صار فيه صوت ( طقه ) أول ما أخط دي وأتحرك ، وبالذات إذا موقف سيارتك
على مرتفع ويختفي الصوت مع المشي...
وقت صار موعد صيانة الثلاثين ألف رحت للشركة وأنا ما وصلت أصلا
للثلاثين ألف ، واخبرتهم بالمشكلة ، في الأول قالوا مافي شي في السيارة
مجرد تشحيم كراسي مش عارف ويش... المهم خرجت السيارة من الصيانة
والصوت يمكن أزود بعد ، أخذت السيارة في طريقي لمحل تربيط أتعامل معاه
وقال الصوت في نفس عمود الكردان ، رجعت للشركة و أصريت عليهم يشوفون
السيارة ويكشفون من جديد وأخذوا السيارة وهم مكشرين وجيههم ، لكني يوم رجعت
لهم عقب يومين لقيتهم رافعين السيارة بستم ومنزلين عمود الكردان وقايلين لي....
فعلا في مشكلة في العمود نفسه..!
وفعلاً.. انتظرت كم يوم وأخذت السوبربان وعليه عمود كردان جديد باستكرات
بلده ، وانتهت المشكلة ( طبعا العمود على الضمان ) .
السوبربان واليوكن نفس التركيب والقطع ماعدا الشكل الخارجي والديكورات!
بس يمكن مشكلتك تختلف عن مشكلتي ، عموما الصوت كان يشبه طقطة
مجموعة المفاتيح إذا هي في إيدك وانت دقيت بيها سطح مكتب عليه لوح زجاج
بس أقصد صوت ارتطام المفاتيح بالزجاج وليس صوت المفاتيح مع بعضها .
والصوت عبارة عن طقة بسيطة ، لكن بعد فترة شهر أو أكثر بتزيد لأكثر من طقة
متتالية حسب الاستخدام للسيارة ، والصوت يكون أوضح وقت تكون السيارة باردة
( والله ياجماعة الجمسات الجديدة من 2007 وانت طالع فيها عيوب وبالذات أول دفعة
وصلت السعودية من 2007 ، وهي اللي كانت من نصيبي ، بس الله يكون في عون
المواطن المسكين هنا ، لوأنك في أمريكا واشتكيت كان أخذوها واعطوك وحدة غيرها..! )
أتمنى تكون مشكلتك بسيطة ولاتشيل هم ، أنا بس حبيت أساهم في مساعدتك؛؛
