السلام عليكم
اخواني ملاك سيارات تاهو ويوكن 2009 (حتى موديلات 2008 و 2007 اعتقد يشملهم على الاغلب)
اليوم حاب اتكلم عن دليل المالك اللي موجود في السيارة على شكل كتالوجات وكتيبات صغيرة ومتنوعة وكل كتيب مختص في مهام معينة في السيارة.
سؤالي: من فينا يقرأ الدليل او خصص وقت معين للقراءة وفهم كل (او اهم) النقاط والتعليمات المكتوبة في الدليل؟؟؟
في الحقيقة امس جلست جلسة وقلت لازم اخذ نظرة على الكتيبات مايصير اهملها كذا وكأن مالها اي اهمية.
وفعلا وانا اتصفح في بعض الكتالوجات اكتشفت معلومات (لو كنت قرأتها من قبل) كان وفرت على نفسي مبلغ 260 ريال لما رحت لمحل المفاتيح علشان ينسخ لي على مفتاح السيارة مع البرمجة.
لمزيد من المعلومات عن موضوع نسخ وبرمجة مفتاح التاهو: تـفـضـل هـنـا
المهم ...
اكتشفت ان الحركة اللي سواها لي الفلبيني في محل المفاتيح هي نفسها مذكورة في دليل المالك!!
يعني المصنع كان يخاطبني بصفتي مالك السيارة ويعلمني الطريقة الصحيحة لبرمجة المفتاح وانا بسبب اهمالي لقراءة دليل المالك (او لأن أمة اقرأ غالباً لاتقرأ) اختصرت على نفسي ورحت لأقرب محل واخذ مني 260 ريال والمعلومة موجودة عندي مجاناً في درج السيارة!!
الحقيقة ان الدليل (جميع الكتالوجات) فيها فوائد كثيرة جدا على الاقل تعلمك على خفايا واسرار السيارة التقنية والميكانيكية والبرمجية ووو الخ.
فلا تبخل على نفسك بمعرفتها بنفسك
انا عن نفسي بخصص وقت لقراء الدليل بالكامل على الاقل الامور اللي تهمني في السيارة
هذا الموضوع بمثابة تذكير ونصيحة لي وللجميع
اخوكم