السلام عليكم ورحمة الله وبركاته
إخواني الخبراء والأعضاء الكرام بالمنتدى
هذي معلوماتي البسيطة عن الفرارات :
1- الفرارات تكون للسيارت الدفع الرباعي اللي فيها دفرنشات ( مو اكسلات )
النياسين والبيكب أب والكروزرات الموديلات القديمة إلخ .. تركب في الأمام .
2- عملها فصل الإطارات الأمامية عن عن الدفرنش ، يعني ذلك لو تشغل الدبل يكون التاير بالأمام مفصول رغم إن الدفرنش والتروسات الداخلية تتحرك لكن الحركة ماتصل للتاير .
3- يتم التحكم بسويتش ، تنزل من السيارة وتفر السويتش أو الزر من لوك إلى فري والعكس ، هذا العيب اللي فيها أنك تنزل من الموتر إذا ودك تدخل الرمل وتحط لوك والله يعينك في السبخة والطين إذا ناسي .
4- في نوع من الفرارات السويتش أوتوماتيك مربوط مع الدبل ويشبك إذا شبكته ، ماله داعي تنزل وتفره بس غالي وماعرف حد استخدمه .
5- الفايدة منه إن الموتر يخف ، لأن إذا الموتر دفرنش والموتر ماشي رغم إنك فاصل الدبل يكون الدفرنش داخليا بحالة حركة تبعا للإطارات ولاشك إن الحركة تعتبر حمل والفرار يفصل حركة الاطار عن الدفرنش
ونتيجة الخفة : أداء أفضل قومة خط و توفير بنزين .. أكيد الفرق مش كبير خاصة للسيارات الحديثة
والفايدة الثانية للمواتر اللي فيها صوت بالدفرنشات أو ونة إن الصوت يختفي وتشعر بالهدوء والطمأنينة
6- لا أحد يخلط بين الدف لوك والفرار ، الدف لوك باختصار هو جعل الإطارات الخلفية أو الأمامية مقفولة و تتحرك بنفس السرعة دون توزيع للحركة يعني لو تشل بالموتر تلفى التاير المعلق يدور بنفس السرعة رغم إنه حر طليق ، لأن الدبل يشتغل على شكل حرف X لو الموتر علق فيه اطارين متعاكسن بالأمام والخلف يشل عن الحركة ويدور بالهواء باستثناء المواتر اللي فيها ( تراكشن كنترول
انظمة توزيع حركة )
صور :
فرار AVM يدوي
AVM اتوماتيك
أنواع من الفرارات
وهذي مقتطفات من شرح من الأخ البدوي2 بمنتدى مكشات لطريقة التركيب .
توجد صور كثيرة لكني اخترت الذي بالأعلى
اللي عنده خبرة أو تجربة للفرارات ممكن يفيدنا ويفيد الإخوان بالمنتدى
من ناحية السعر والماركات والتجربة
والأنواع السيئة ومكان التركيب والمشاكل
وفرقية البنزين والأداء في القومة وخفة السيارة
لاتبخلون علينا بالمشاركة والشكر للجميع والحمدلله رب العالمين
* الموضوع ستجده بأكثر من منتدى لنفس الكاتب باسم (,NokNok , under_net)