جربت اكسبلورر 2006 وخرجت بالانطباع التالي

[مشتاق16]

السلام عليكم ورحمة الله وبركاته

اخواني انا كان عندي اكسبلورر 2005 وبعته بسبب ضيقه النسبي اريد سيارة اوسع ( اخوكم سمين )

السيارة - موديل 2005 - رائعة مايعيبها شي سوى صوت المكينة العالي وطقة عند تغيير القير

لكن انا جيت الوكالة وطلبت تجربة موديل ا2006 الجديد وكان احد موظفي المبيعات الاخ خالد الشريحي في منتهى الذوق والادب والتعاون وماقصر الاخ عطاني مفتاح السيارة طلعت جربتها سيارة راااااااااائعة جدا وحسنوا عليها اضافات كثيرة منها :
1- هدوء تام داخل المقصورة يعني انسى صوت المكينة
2- القير صار ارضي وناااااعم جدا في التغيير تقول بلي ستيشن
3- حسنوا في المكيف اول كان يدفع هواء قوي جدا بشكل مزعج ياطفي المكيف وهذه مشكلة أو تشغله ويزيدك برد الان لا اصبحت مروحة المكيف بسرعات متناسقة
4- اللون الداخلي اصبح بيج ناصع ماهو مثل اول بيج داكن
5- غيروا واجهة السيارة واصبحت اكثر تناسق وارفعو المقدمة (اللحية ) عن الارض بشكل يستهوي اهل البر
6- فصلوا المرتبة الخلفية بحيث يمكن الاستفادة بجزء او كل المرتبة في السابق كنت مضطر انك تسفط المرتبة كاملة حتى تستفيد من المساحة الخلفية للاخزين
7- قوة المكينة نفسها ماتغيرت ( ست سلندر ، اربعة لتر ، 232 حصان )
8- القير بخمس سرعات مما يعطي راحة اكثر للمكينة
9- تم تغيير في مكان ازرة الدبل في السابق كانت في الواجهة بحيث اللاطفال يصلون بيسر للازرار الآن اصبحت الوضعية منخفضة
10- تم عزل الهواء الخارجي بشكل اكثر من الاول ولم تعد تسمع ذاك الضجيج الناتج عن احتكاك الهواء بالهيكل
11- مجهز بمشغل Mp3 بشكل اساسي وهذا يتيح لك تركيب dvd للاطفال من خلال سواقة mp3

في النهاية السيارة رائعة واعجبتني وخصوصا اني مجرب الموديلات السابقة وحاس بالفرق الكبير وبالشغل اللي اشتغلوه

تحياتي للجميع

كتبت نفس الموضوع في ساحة السيارات الساحة العربية

[Tiguan King]

والله السيارة حلو وعاجبتني


وأحسن ماسووة ان غيرو الواجهه الموديل الجديد من ورا مهب زين..اول أحلا


ومشكوور وماقصرت تحياتي

[فواز]

الإكسبلورر الجديد في قمة الروعة والتناسق ..

يسلمو مشتاق16 على الموضوع والله يعطيك العافيه وإن شاءالله الأخوان اللي يفكرون في الإكسبلورر يستفيدون من الموضوع ..

بحفظ الله

[shagra]

أنا أفكر بالاكسبلورر

شفت وحدة بالوكالة و عجبتني..... كان القير موب أرضي ( أنا أحب القير الدركسون )) و كان زر الدبل عند الراكب! و هذا اللي قهرني

ما أدري هل اللي شفتها أنا مثل اللي تمدحها أنت و لا اللي تشتكي منها؟

[kuwait]

شسالفة الصوت العالي للمكاين

كنت أفكر بالباثفايندر وصرفت النظر عنه بسبب صوت مكينته وفعلاً سمعته عالطبيعه كان ملفت

والحين الاكسبلورر ؟؟ يمكن صوت المروحه والحرارة عالية ابي أقنع نفسي p:

مشكور أخوي مشتاق على التجربة وحبيت اسالك شلون تجاوب السيارة معاك مع دعستك على دواسة البنزين اتحسها استجابة سريعه وقوية ؟

[يوكن 2004]

يعطيك العافية أخوي على التجربة المميزة واكسبلورر سيارة تستحق هذه واكثر

[salehhd]

السلام عليكم

احب اتقدم لك بالشكر الجزيل على طرح انطباعك لهذه السيارة الرائعة وكذلك مقارنتها بالموديل السابق بناء على تجربتك للسياراتين

واشكرك على مشاركتنا معلوماتك وفي انتظار جديدك دائماً

اخوك
صالح

[مشتاق16]

شسالفة الصوت العالي للمكاين

كنت أفكر بالباثفايندر وصرفت النظر عنه بسبب صوت مكينته وفعلاً سمعته عالطبيعه كان ملفت

والحين الاكسبلورر ؟؟ يمكن صوت المروحه والحرارة عالية ابي أقنع نفسي p:

مشكور أخوي مشتاق على التجربة وحبيت اسالك شلون تجاوب السيارة معاك مع دعستك على دواسة البنزين اتحسها استجابة سريعه وقوية ؟

حبيبنا بالنسبة لصوت المكينة في موديل 2005 كان واضح لكن لم يكن مزعج كماهو في الباثفيندر الجديد لكن في اكسبلورر 2006 تم تفادي ذلك العيب وهدوء تام داخل المقصورة

اما لتجاوب السيارة مع دعسة البنزين فخذ ولد قصدي موتر

تحياتي