قناة السيارات
بسم الله الرحمن الرحيم ..
100.000 مائة ألف .. هكذا كان يشير عداد سيارتي "الكورية"
قبل سنتين ونصف تقريباً ..
كانت البداية
قررت شراء سيارة بسعر مناسب ومواصفات مناسبه واسعار قطع غيار مناسبة أيضاَ ..
ما اخفيكم .. اني من عشاق الميني كوبر والكابريس ..
لكن بحكم صناعتها الألمانية فكان سعرها مرتفع جداً وسعر قطع الغيار غاليه بعد ..
طبعاً كانوا المعارضين كثيير على الميني كوبر بحجة الديزاين الغريب .. لكن كانت تحفه بالنسبة لي
والكابريس الـss كنت ابحث عن مستعمل وماحصلت شي نظيف وقتها ..
سألت وشاورت كثير من الزملاء
فكانت اغلب الاراء تتجه نحو الصانع الياباني لكثرة الشركات اليابانيه ..
كانت الخيارات كثيرة جداً وكانت كلها سيارات من شركات يابانيه
كامري .. أكورد .. جالنت .. ألتيمـا .. مازدا
الكامري شخصياً ما حبيتها لأسباب كثيره ..
الأكورد كانت سياره جيده لكن يعيبها سعر قطع الغيار غاليه جداااً ..
الجالنت .. من شركة ميتسوبيشي .. يعني مو مضمونه بالنسبه لي ..
الألتيما ابعدت عنها بسبب الوكيل .. وكان لنا معاناة سابقه مع وكيل نيسان ..
المازدا .. ما احد نصحني فيها .. والحمدلله ماخذتها ..
( حسيتوا اني معقد صح
بعد شهرين تقريباً .. في الصدفه كنا نتمشى انا وواحد من الزملاء
ومرينا من جانب وكيل هيونداي الوعـلان ..
دخلنا الوكالة وبسم الله قلبنا بالسيارات كلها ..
اتجهت انظاري للسوناتا بحكم انها من نفس الفئة المطلوبه ..
كانت السياره المعروضه فل اوبشن ...
صراحه خقيت معها وقتها ... جلست ساعه اقلب فيها يمين ويسار
واذكر اني كنت جالس عند واحد من المندوبين لاكثر من نص ساعه للسؤال عن السوناتا
اخذت الكاتلوج ومن هنا اشاور فيها الاهل والزملاء . .
طبعاً كل اللوم جاني مجرد اني فكرت فيها لانها من انتاج هيونداي
وش تبيها فيها .. من جدك انت تاخذ كوريه ..
50 الف كيلوا وتخبط المكينة !!
70 الف كيلوا ويطيح القير !!
80 الف كيلوا وتبيعها تشليح بدون مكينة وقير !!
ما اقتنعت في هالكلام كله لانه كان لنا تجارب سابقه مع سيارات هيونداي
شاورت الاهل فيها والحمدلله استقر الخيار عليها ..
اخذتها نص فل .. قير اوتوا + تخشيبه + تحكم من الدركسون في المسجل + مثبت
والحمدلله توكلت على الله واخذتها طبعاً كانت اخر حبه من الدفعه .. واللون فضي > مب على كيفي
السياره الاولى دائم ماتصير فيها الأفلام .. وكانت سيارتي الاولى هي السوناتا
خلصنا اول 1000 كيلوا بحكه بسيطه .. بعد الـ1000 كيلوا بدا الأكشن
بعد ماتمت السياره 18 الف كيلوا قدر الله علي وصدمت فيها على سرعة 180 .. ( دخلت في صبة اللي تمسك الجسر ) .. والحمدلله طلعنا سالمين منها
السياره تضرر الوجه كاامل منها واثرت الصدمه على المكينه ..
كانت الاراء تتجه لأني ابيعها تشليح ! لكن ماطاوعني قلبي
صورة للسيارة من الداخل والخارج
فكانت اول تجربه في توفر قطع الغيار مع الوكيل .. وماخاب ظني فيه
جلست السياره شهرين في الورشه سمكره ورش ..
طبعا فكينا المكينه وغيرنا كذا قطعه فيها ..
اللي استغربت منه اسعار قطع الغيار.. وجدتها الأرخص في السوق
فمن راح يحصل كبوت جديد بـ600 ريال تقريبا .. ورفرف بحدود الـ300 ريال ..
وكلها أصلييييية
بعد ماطلعت السياره من الورشه كان عزمهاا ناايم لان المكينة مفكوكه
فأظطريت العب فيها شوي من فلتر لكويلات لبواجي ..
شهر تقريبا وكأن السياره استعادت عافيتها ..
والحمدلله . . إلى الآن وانا اشكر ربي اللي وفقني في اختيارهـا ..
اليوم كملت 100.000 الف كيـلـوا ..
سياره صار لها بحدود الخمس حوادث ( زودوا السادس حق قبل امس )
العزم ماشاء الله لايعلى عليها . .
المكيف والحمدلله توووووب . . ( واحد من الشباب ركب معاي قالي انت شكلك مرهم لها مكيف تويوتا ) قلت له اللي مايعرف الصقر يشويه ..
طبعا مافيه مكان مادخلته من ردمية العاذريه إلا الثمامة وطعوسها ..
وفي السفريات الحمدلله مبيضة الوجه .. وصلت لأبها ولجدة ولدبي وللشرقية وللكويت
والآن والحمدلله عال العال
انطباعي عنها سياره أكثر من رائعة
مواصفات + جودة + سعر = كملها يامايكرو
رغم عدم اهتمامي بالصيانة الدائمه للسيارة
فتصور ان السياره فيها اربع بواجي كل واحد مختلف عن الثاني
لكن الحمدلله ماواجهت اي مشاكل مع التحفه الكوريه
بعـد هالتجربه .. تتوقع مني كمجرب ومستخدم للسيارة الكوريه اصدق كلام من يقول انها ماتمشي وانها ماتنفع وهو حتى ماجربها ؟
أو من يقول ان جودتها دون المستوى المطلوب ؟ !!
شخصياً .. ما اتوقع في يوم اني اشتري سياره غير هيونـداي .. (الله يحييـنا )
.....
ملاحظة :
*..التقرير المفروض كان يطلع بشكل أفضل من كذا بس لضيق الوقت ماقدرت اخذ وقتي في التنسيق
رد مع اقتباس
