قناة السيارات
السلام عليكم ورحمة الله وبركاته ,,
كيفكم ان شاء الله طيبين ؟
اليوم وبحمد الله قطعت سيارتي السوناتا ال 10,000 كيلو الأولى ..
ووديتها للصيانة عند الوعلان ... وقالو لي راح تكلفك مبدئيا 540 ريال قابلة للخصم !!!!
وراح نشيك لك على 40 نقطة بالسيارة .. وراح نغير فلتر المكيف !! وزيت السيارة والفلتر
رفضت هذا المبلغ الخيالي .. وقلت لهم والله لو انها صيانة 60 ألف !!
وطلعتها من عندهم ووديتها للمحطة اللي بجنبهم وغيرت الزيت وفلتر الزيت
بلا تشييك بلا هم
عموما بعد هذي المسافة اتضحت لي عيوب السيارة ومميزاتها واللي ما تتضح من القيادة الأولى ,,
وراح اطرح بهذا الموضوع عيوب ومميزات السيارة .. ( بكل أمانة )
وراح يكون مرجع لكل عضو يفكر او راح يشتري سيارة متوسطة او راح يشتري سوناتا تحديدا .. !!!
وقبل لا أطرح المميزات اعرفكم بفئة ومواصفات سيارتي
( سوناتا 2006 ) 4 سلندر GL >> ومواصفاتها ( جنوط - مثبت سرعة - تحكم بالمسجل - قير تيبترونيك ب 4 سرعات - كشافات ضبابية - ريموت كونترول )
وشريتها بمبلغ 53 الف ريال قبل 4 شهور تقريبا
نبدا على بركة الله ,,
((( المميزات )))
أولا .. الراحة والعزل الصوتي .. بصراحة هذي السيارة من أفضل سيارات فئتها من حيث الراحة والعازولية الاستثنائية ( بغض النظر عن الالتيما لاني ما جربتها ) أمشي الى سرعة 180 لا تنسيم هواء ولا أصوات ولا أي شي ..
وميزة الراحة والعزل من أقوى ميزات السيارة ,,
ثانيا .. جودة المواد الداخلية .. أي واحد يركب السيارة من المرة الأولى راح يتعرف على هذا الشي
مواد خام ممتازة .. وتختلف عن مواد الشكل القديم 180 درجة ,,
ثالثا ..قير السيارة التيبترونيك .. هذي الميزة رائعة جدا .. وتحسسك بالشعور الرياضي ..
لكنها تبقى غير عملية بحيث انها تشتت انتباه السائق ,,
* ملاحظة ( ال 6 سلندر ) قير السيارة 5 سرعات تيبترونيك وهي السيارة الوحيدة بين فئاتها اللي تحتوي هذي الميزة (ب الأسواق الخليجية )
رابعا .. وجود مواصفات رائعة .. مثل وجود مثبت السرعة والتحكم بالمسجل عن طريق الدركسون ..
خامسا .. ثبات السيارة جيد جدا .. ويشابه سيارات فئتها مع العلم انها غير متوفرة بأي نظام ثبات
لكن الحال يختلف مع ال 6 سلندرات المزودة بنظام ESP والتحكم بالجر TSC واتوقع ان الطرازات المتوفرة
بهذي الانظمة ثباتها جدا ممتاز ويتفوق على منافسيه ...
سادسا .. شمعات السيارة الأمامية مزودة بعدسات .. وبصراحة شكلها رائع ويكون أروع لما الواحد يركب عليها زينون
سابعا .. نظام التكييف بالسيارة جدا ممتاز .. باختصار ( تكييف سيارة يابانية 100% )
ثامنا .. النظام الصوتي بالسيارة جيد جدا من حيث قوة الصوت وممتاز من ناحية جودة المسجل وفخامته
وتوجد بالطرازات الاوبشن مبدل اسطوانة بصيغة MP3 وهي ميزة رائعة
تاسعا وأخيرا .. آداء السيارة جدا معقول بالقير الاوتوماتيكي
وجيد جدا مرتفع بالناقل اليدوي ( 4 سلندر )
(( العيوب ))
أولا .. عدم وجود أي وسادة هوائية بالفئة السياحية ( فئة سيارتي )
ثانيا .. ضعف عزم المحرك بسرعات الدوران المنخفضة .. وما يبدا عندي العزم يكون قوي الا بعد ال 3 RPM
على عكس الأكورد .. المتوفرة بنظام VETIC الذي يكون عزمها ممتاز على كافة سرعات الدوران
ثالثا .. ارتفاع السيارة قليلا .. واللي أثر على ثباتها .. بحيث صار الشكل القديم أثبت من سيارتي
( نفس حكاية الكامري 2002 و2003 ) القديمة أثبت من الجديدة .. والسبب الارتفاع !!
رابعا .. قماش المراتب يحتاج الى تحسين لأنه خشن بصراحة !!
خامسا .. الصرفية مرتفعة أشوفها .. اعبيها ب 50 ريال اذا كانت فاضية مرة ..
وتمشيني بحدود 450 كيلو الى 480 كحد أقصى ..
سادسا .. صوت المحرك مزعج بعض الشيء في حالة التسارع القوي ,,
سابعا .. الطارة فيها بعض الثقل بالسرعات المنخفضة .. وتكون ممتازة بالسرعات العالية
ثامنا .. عدم وجود مكيف خلفي .. بس الحمدلله تكييفها الامامي ممتاز
هذي نهاية العيوب الموجودة بوجهة نظري .. وبصراحة هذي العيوب على سيارة قيمتها 53 الف ريال ما تعتبر عيوب !!
* ملاحظة .. هذي العيوب المذكورة او المميزات للفئة 4 سلندر GL
وملاحظة أخرى يا ليت أي عضو معاه سوناتا جديدة يتفحص ظغط كفرات سيارته ..
لاني شفت الظغط عندي 45 وهو ظغط مرتفع وتصير السيارة قاسية عالمطبات
وختاما أرجو ان الموضوع حاز على رضاكم .. وأي سؤال أو استفسار أنا حاضر ..
تحياتي مع احتراماتي
