قناة السيارات
مشكلتي بسيطة
كنت ماشي بالسيارة طبيعي جدا
140 لمدة نص ساعة تقريبا
والكل شي تمام الهدوء والروقان والحرارة تمزح معي مره تحت النص ومره فوقها
وأخلص مشواري وأطفي السيارة وأنزل للمطعم و10 دقائق وأرجع وأشغل السيارة
والمفاجأة تفتفه غريبة وتكتيمة ومدري وش المشكله قلت خلني أطفي السيارة وأشغلها مرة ثانية وما فيه فيده (على بالي ريستارت)
قلت خلني أروح أنام والصبح يفرجها ربك
وقمت الصبح لو إنها نفس التفتفه
وش الحل؟ شيكت بنفسي تشييكه خفيفة ما لقيت شي
وقلت ما فيه غير الكمبيوتر وما أدراك ما الكمبيوتر
المهم رحت للصناعيه وقلت خلني أشوف كم ورشة يمكن يكتشفوا المشكله قبل الكمبيوتر لأن الكمبيوتر هو الجوكر بالنسبة لي (الورقة الرابحة)
المهم على عدد الورش إللي في الصناعيه لقيت مشاكل في سيارتي
ورشه تقول بواجي
وورشة تقول أسلاك بواجي وغيرها بخاخات والثانية ديلكو والأخرى كويل وإللي تقول صفاية بنزين وإللي يقول فلتر هواء وإللي تقول كمبيوتر يبغاله برمجة
وهذي تقول سير تيمن؟؟؟؟؟؟؟؟؟
وإللي يقول كهرباء ضعيفة والميكانيكي يقول وزن بلوف والكهربائي يقول طرمبة بنزين
يعني ما فيه ورشتين كلمتهم وحده
المهم طلعوا عيوب ومشاكل الدنيا في السيارة وزرعوا نخل براسي
وقلت خلني أنزل الجوكر (كشف كمبيوتر)
نقيت أحسن ورشة يمدحونها ويمدحوا شغلهم وكمبيوترهم ورحت عندهم
السلام عليكم
عليكم السلام
عندي تفتفة
إفتح الكبوت طالع شوي في المكينه وقال لازم كشف كمبيوتر
قلت هذا إللي أنا جاي علشانه
ركب أسلاكه وتوصيلاته وقال شغل
شغلت
يطالع بالكمبيوتر وشوي وقال هذي سيارتك يبغى لها شغل
قلت خير إنشاء الله
قال أولا وزن ديلكو
ثانيا وزن سير تيمن
ثالثا منظم هواء
رابعا وهو الأهم تصفية مكينه
أستهبل عليه قلت له وش يعني تصفية مكينه قال
بواجي وأسلاك بواجي وصفاية وطرمبه وفلتر وبخاخات وتنظيف تانكي البنزين ووووووووو......
وسألته يأخي لازم يكون فيه سبب واحد واضح قال كل الأشياء هذي لازم نشيك عليها
قلت ياولد هذا يضحك عليك ما عنده سالفة ويبغ يجرب كل الأشياء هذي وإللي تصيب معه
المهم رحت للقطع أخذت 6بواجي أصلي ورحت البيت وأنازعلان على ورشنا
يا عالم ياناس أبغ بس واحد يأكد لي المشكله من وين ما أحد يأكد
والمشكله إللي أساله أقول له وش المشكله يقول بخاخات مثلا أقول له أكيد؟ يقول لا مهو أكيد
وش الحل ؟
وصلت البيت قلت ما فيه غير إني أركب البواجي بنفسي
طيب ليش أخذت بواجي؟
لأن لي تقريبا سنتين ونص ما غيرتها والسيارة ما شاء الله زي الفل
فكيت البواجي القديمة وأركب الجديدة
وأشغل السيارة وزي ماهي ورحت نمت والصباح بعد الفجر قلت خلني أشيك عليها للمرة الأخيرة
فتحت الكبوت أركز في الأسلاك وسبحان الله ألاقي سلك مقطوع في فيش حساس الهواء
وصراحة أنا شاك في القطعة هذي هل هي حساس الهواء أو شي ثاني
المهم ركبت السلك والسيارة زي ماهي خربانه (تكتم وتتفتف)
طفيت السيارة وشغلتها ويمسيك الله بالعافيه راحت التفتفة والتكتيمة والحمد لله
لكن فيه مشكله بسيطة مدري وش هي
وأتمنى إنه أحد يقدر يفيدني وما يتوهني ويطلع عيوب ومشاكل الدنيا كلها
تخيلوا المسأله سلك في حساس جابوا فيني العيد
المشكله هي رجه بسيطه في المكينه توصل للدركسون وإذا مشيت تروح مع العلم إنها كانت زي المسطرة ما شاء الله
هل من أحد يدلني على شي واحد وأصلحه وأرتاح؟
رد مع اقتباس
